ទីក្រុងហុងកុងព្រមព្រៀងជាមួយកម្ពុជាលើកិច្ចសហប្រតិបត្តិការពាណិជ្ជកម្មនិងវិនិយោគ
2024.08.03
គណៈប្រតិភូមដឹកនាំដោយប្រធានប្រតិបត្តិតំបន់រដ្ឋបាលពិសេសហុងកុង លោក ចន លី (John Lee) ចាកចេញពីកម្ពុជា នៅអាកាសយានដ្ឋានអន្តរជាតិភ្នំពេញ កាលពីថ្ងៃទី៣១ កក្កដា ២០២៤។
រូប៖ ហ្វេសប៊ុកក្រុមប្រឹក្សាអភីវឌ្ឍន៍កម្ពុជា
ក្រុមប្រឹក្សាអភិវឌ្ឍន៍កម្ពុជា(CDC)និងក្រុមប្រឹក្សាអភិវឌ្ឍន៍ពាណិជ្ជកម្មហុងកុងនិងភាគីពាក់ព័ន្ធផ្សេងៗ បានចុះហត្ថលេខាលើអនុស្សរណៈនៃការយោគយល់គ្នាចំនួន១៣ កាលពីពេលថ្មីៗ។
ភាគីទាំងពីរអះអាងថាអនុស្សរណៈយោគយល់គ្នាទាំងនេះ ធ្វើឡើង ក្នុងគោលបំណងពង្រីកកិច្ចសហប្រតិបត្តិការពាណិជ្ជកម្ម វិនិយោគ ក៏ដូចជាការអភិវឌ្ឍន៍សេដ្ឋកិច្ចនិងលើកកម្ពស់អាជីវកម្មរវាងកម្ពុជានិងទីក្រុងហុងកុង។
អ្នកស្រាវជ្រាវផ្នែកអភិវឌ្ឍន៍សេដ្ឋកិច្ចនិងសង្គម យល់ថា កម្ពុជាអាចមានឱកាសប្រកួតប្រជែងពាណិជ្ជកម្មថ្មីៗ នៅក្នុងទីផ្សារហុងកុង ប្រសិនបើកម្ពុជា ឆ្លាតវៃក្នុងការសិក្សាបទពិសោធន៍ ហើយបន្តពង្រីកនិងពង្រឹងសមត្ថភាពរបស់ខ្លួន ដើម្បីការប្រកួតប្រជែង។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការសិក្សាស្រាវជ្រាវ លោក សេក សុជាតិ មានប្រសាសន៍ប្រាប់វិទ្យុអាស៊ីសេរី កាលពីថ្ងៃទី៣១ ខែកក្កដា ថា ការចុះហត្ថលេខាលើអនុស្សរណៈយោគយល់គ្នា ចំនួន១៣ រវាងកម្ពុជានិងហុងកុង គឺជាឱកាសដែលម្ចាស់អាជីវកម្មនិងប្រទេសនីមួយៗអាចមើលឃើញរៀងៗខ្លួនដើម្បីបង្កើតមុខមាត់និងទំនាក់ទំនងទីផ្សារល្អ សម្រាប់វិស័យពាណិជ្ជកម្ម។
លោក សេក សុជាតិ៖ «បើសិនជាយើងយកបញ្ហាក្រុមហ៊ុន ឬក៏ទិសដៅនៃកម្ពុជាធ្វើជាទីផ្សាររបស់គេក៏ដោយ ក៏ជាឱកាសមួយសម្រាប់កម្ពុជាដែរ។ បើសិនជាកម្ពុជាមានភាពឆ្លាតវៃ ក្នុងការយកសមិទ្ធផល ដែលគេធ្លាប់ប្រើប្រាស់កម្ពុជាធ្វើជាទីផ្សាររួចហើយនោះ មកធ្វើការសិក្សាអំពីបទពិសោធន៍របស់គេ រួចហើយពង្រឹងសមត្ថភាពរបស់ខ្លួន ប្រកួតប្រជែងវិញនោះ វាក៏ជាទីផ្សារសម្រាប់កម្ពុជាដែរ បើសិនជាកម្ពុជាគិតក្នុងផ្លូវវិជ្ជមានបែបនេះ»។
ការលើកឡើងបែបនេះ នៅក្នុងពេលដែលនាយកប្រតិបត្តិតំបន់រដ្ឋបាលពិសេសនៃទីក្រុងហុងកុង លោក ចន លី (John Lee Ka-chiu)ធ្វើទស្សនកិច្ច មកកាន់កម្ពុជា កាលពីថ្ងៃទី៣០-៣១ខែកក្កដា។
ក្នុងកំឡុងពេលដំណើរទស្សនកិច្ច របស់ លោក ចន លី(John Lee Ka-chiu)នៅកម្ពុជារយៈពេល២ថ្ងៃនោះ គឺទីក្រុងហុងកុងនិងកម្ពុជា បានចុះអនុស្សរណៈយោគយល់គ្នាចំនួន១៣ ដើម្បីជំរុញពាណិជ្ជកម្ម និងវិនិយោគ ព្រមទាំងលើកទឹកចិត្តឱ្យកម្ពុជាធ្វើជាដៃគូអាជីវកម្មជាមួយហុងកុងផង។
អនុស្សារណៈយោគយល់គ្នាចំនួន១៣នេះ គឺជាការបើកផ្លូវ ឱ្យកម្ពុជានិងហុងកុង អាចបង្កើនទំនាក់ទំនងនិងឱកាសថ្មីៗ លើកិច្ចសហប្រតិបត្តិការពាណិជ្ជកម្ម ដែលគ្របដណ្ដប់លើវិស័យដូចជា កិច្ចសហប្រតិបត្តិការសេដ្ឋកិច្ច ពាណិជ្ជកម្ម ការជំរុញវិនិយោគវិស័យអាកាសចរណ៍ ព័ត៌មានវិទ្យា អចលនទ្រព្យ ភស្តុភារ ការដឹកជញ្ជូន បដិសណ្ឋារកិច្ច ទីផ្សារភាគហ៊ុន ម្ហូបអាហារ សេវាកម្មហិរញ្ញវត្ថុ ភាពយន្តនិងផ្នែកថាមពលជាដើម។
នាយកប្រតិបត្តិរបស់ទីក្រុងហុងកុង លោក ចន លី(John Lee Ka-chiu)បានថ្លែងទៅកាន់ក្រុមអ្នកធុរៈកិច្ច ក្នុងពេលធ្វើទស្សនកិច្ច កាលពីថ្ងៃទី៣០-៣១ ខែកក្កដាថា ហុងកុង កំពុងស្វែងរកឱកាសដ៏ធំធេង សម្រាប់កិច្ចសហប្រតិបត្តិការ ពាណិជ្ជកម្មនិងវិនិយោគជាមួយកម្ពុជា ដើម្បីភាពរុងរឿងទៅវិញទៅមក ក៏ដូចជាការអភិវឌ្ឍន៍សេដ្ឋកិច្ចនិងការលើកកម្ពស់អាជីវកម្ម។
វិទ្យុអាស៊ីសេរី មិនអាចសុំការអធិប្បាយ ជុំវិញសារៈសំខាន់ស្ដីពីការចុះហត្ថលេខាលើអនុស្សរណៈយោគយល់គ្នាដ៏ច្រើន រវាងកម្ពុជានិងទីក្រុងហុងកុងនេះ ពីឧបនាយករដ្ឋមន្ត្រីនិងជាអនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល និងពីប្រធានក្រុមអ្នកនាំពាក្យរដ្ឋាភិបាល លោក ប៉ែន បូណា បាននៅឡើយ កាលពីថ្ងៃទី៣ ខែសីហា។
សភាពាណិជ្ជកម្មកម្ពុជា កាលពីថ្ងៃទី៣១ ខែកក្កដា បង្ហាញថាបច្ចុប្បន្ន ទំនាក់ទំនងពាណិជ្ជកម្ម រវាងកម្ពុជានិងហុងកុង គឺជាទំនាក់ទំនងដ៏រឹងមាំ។
សភាពាណិជ្ជកម្មកម្ពុជាបញ្ជាក់ថា ចាប់តាំងពីឆ្នាំ២០១៣ រហូតមកដល់ពេលនេះទំហំពាណិជ្ជកម្មទ្វេភាគី រវាងហុងកុងនិងកម្ពុជា បានបន្តកើនឡើងជាលំដាប់ក្នុងទំហំទឹកប្រាក់ច្រើនជាង ១ពាន់លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- ស្តូបមិត្តភាពកម្ពុជាវៀតណាមនៅខេត្តសៀមរាបរងការបំផ្លាញដោយគ្រាប់បែក ក្នុងពេលពលរដ្ឋបារម្ភបាត់បង់ដីទៅវៀតណាម ដោយសារគម្រោង CLV
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត