កម្ពុជា និងកូរ៉េខាងត្បូងនឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីពាក់កណ្ដាលឆ្នាំនេះ
2021.02.04
ជំនួបរវាងមេដឹកនាំកូរ៉េខាងត្បូង ដឺកនាំដោយប្រធានាធិបតីកូរ៉េខាងត្បូងលោក មូន ជេអ៊ីន (Moon Jae-In) និងរបបក្រុងភ្នំពេញ លោក ហ៊ុន សែន នៅថ្ងៃទី១៥ ខែមីនា ឆ្នាំ២០១៩។
កម្ពុជា និងកូរ៉េខាងត្បូង (South Korea) នឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី FTA នាពាក់កណ្ដាលឆ្នាំនេះ ក្រោយប្រទេសទាំងពីរប្រកាសថា ទើបនឹងបញ្ចប់ការចរចា នៅថ្ងៃទី០៣ កុម្ភៈ។ សេចក្ដីប្រកាសព័ត៌មានរបស់ក្រសួងពាណិជ្ជកម្ម ឱ្យដឹងថា កិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េខាងត្បូងនេះ នឹងលើកកម្ពស់ការនាំចេញរបស់កម្ពុជា ទៅកាន់ប្រទេសកូរ៉េបន្ថែមទៀត ក្នុងនោះ មានដូចជា សំលៀកបំពាក់ និងវាយនភណ្ឌ ស្បែកជើង កាបូប គ្រឿងបន្លាស់ ឧបករណ៍អេឡិចត្រូនិក កៅស៊ូ និងផលិតផលកសិកម្មជាដើម។ រីឯ ការនាំចេញបន្ថែមពីកូរ៉េ មក កម្ពុជា វិញ រួមមាន យានយន្ត គ្រឿងអេឡិចត្រូនិក សម្ភារៈអគ្គិសនី ភេសជ្ជៈ ឱសថ និងផលិតផលប្លាស្ទិក។
ក្រសួងពាណិជ្ជកម្ម ឱ្យដឹងថា កិច្ចព្រមព្រៀងពាណិជ្ជកម្មសេរីទ្វេភាគីនេះ នឹងពង្រីកបន្ថែមទីផ្សាររវាងប្រទេសទាំងពីរ លើសពីកិច្ចព្រមព្រៀងពាណិជ្ជកម្មសេរីដែលមានស្រាប់ ក្នុងនោះ មានកិច្ចព្រមព្រៀងពាណិជ្ជកម្មសេរីរវាង អាស៊ាន និងកូរ៉េ (AKFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
ក្រៅពីសម្រេចបានកិច្ចព្រមព្រៀងពាណិជ្ជកម្មសេរីទ្វេភាគីជាមួយនឹងកូរ៉េខាងត្បូង និងចិន នារយៈពេលចុងក្រោយនេះ កម្ពុជាក៏មានមហិច្ឆតាជំរុញចរចាចុះកិច្ចព្រមព្រៀងពាណិជ្ជកម្មសេរីទ្វេភាគី ជាមួយប្រទេសរុស្ស៊ី (Russia) សហភាពសេដ្ឋកិច្ចអឺរ៉ាស៊ាន (EAEU) ប្រទេសឥណ្ឌា (India) និងចក្រភពអង់គ្លេស (UK)។ កម្ពុជា បានជំរុញការចរចាចុះកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសពាក់ព័ន្ធជាបន្តបន្ទាប់ ក្រោយសហភាពអឺរ៉ុប បានប្រកាសដកប្រព័ន្ធអនុគ្រោះពន្ធ EBA ២០%។ ក្រុមអ្នកជំនាញធ្លាប់ព្រមានថា ការចុះកិច្ចព្រមព្រៀងពាណិជ្ជកម្មទ្វេភាគីជាមួយប្រទេសផ្សេងៗ នឹងមិនអាចធានាបានថា ប្រទេសទាំងនោះ នឹងទទួលទិញទំនិញនាំចេញពីកម្ពុជា ហើយអាចឱ្យកម្ពុជាចំណេញច្រើនដូចការផ្តល់ប្រព័ន្ធអនុគ្រោះពន្ធ EBA របស់សហភាពអឺរ៉ុប និង GSP របស់សហរដ្ឋអាមេរិកនោះទេ។ ពួកគេថា កិច្ចព្រមព្រៀងពាណិជ្ជកម្មសេរី មិនមែនជារឿងល្អទេសម្រាប់កម្ពុជា ដោយសារតែកម្ពុជា នឹងនាំចូលកាន់តែច្រើនបន្ថែមទៀតពីប្រទេសទាំងនេះ។ ពួកគេក៏ព្រមានដែរថា ប្រសិនបើកម្ពុជាគ្មានផលិតផលត្រូវនាំចេញបន្ថែមនោះទេ នោះវានឹងក្លាយជាការធ្វើអត្តឃាតខ្លួនឯង ខណៈឧស្សាហកម្មទន់ខ្សោយក្នុងស្រុកនឹងត្រូវដួលរលំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ