រដ្ឋាភិបាលកម្ពុជាបានផ្តល់អាជ្ញាប័ណ្ណឱ្យក្រុមហ៊ុនកាណាដាមួយឈ្មោះ អ៊ីនើខេម (EnerCam) ដែលជាបុត្រសម្ព័ន្ធរបស់ក្រុមហ៊ុនអង្គរ (Angkor Resources) ដើម្បីធ្វើការរុករកប្រេងនិងឧស្ម័ន នៅតំបន់ប្លុក៨ (VIII) លើផ្ទៃដីប្រមាណជាង ៧ពាន់គីឡូម៉ែត្រការ៉េ ស្ថិតនៅដីគោក តំបន់អាងកំពង់សោម។ កម្ពុជាបែងចែកតំបន់សម្រាប់ការរុករកប្រេងកាត រួមមាន ៦ ប្លុក នៅក្នុងសមុទ្រ និង នៅលើគោកមានចំនួន ១៩ ប្លុកផ្សេងទៀត។
សេចក្តីប្រកាសព័ត៌មានកាលពីថ្ងៃទី៣ ខែតុលា របស់ក្រុមហ៊ុនអង្គរ ដែលមានទីស្នាក់ការនៅខេត្តអាល់ប៊ឺរតា (Alberta) នៃប្រទេសកាណាដា ឲ្យដឹងថា ការរុករកដំណាក់កាលដំបូងនៅប្លុក៨ (VIII) គឺសម្រាប់រយៈពេល៣ ឆ្នាំ បន្ទាប់មកនឹងបន្ត រយៈពេល២ឆ្នាំម្ដង។ លក្ខខណ្ឌនៃការអភិវឌ្ឍ និងផលិតកម្ម មានរយៈពេល ២៥ឆ្នាំ ដោយអាចពន្យារថ្មីបន្ថែមទៀតបាន។ ការរុករកនេះ នឹងធ្វើឡើង នៅខាងក្រៅតំបន់ឧទ្យាន ដែលជាផ្នែកមួយនៃអាណត្តិអភិបាលកិច្ចបរិស្ថានសង្គម (ESG) របស់ក្រុមហ៊ុន EnerCam ហើយដែលតម្រូវឲ្យក្រុមហ៊ុននេះ ជួយការពារឧទ្យានជាតិភ្នំក្រវាញ ព្រះមុនីវង្ស និងឧទ្យានជាតិគិរីរម្យ។
ប្រធានក្រុមហ៊ុន អ៊ីនើខេម (EnerCam) លោក ម៉ៃ វីគស៍ (Mike Weeks) អះអាងថា ការទទួលបានអាជ្ញាប័ណ្ណរុករកប្រេងនិងឧស្ម័ននេះ ក្រុមហ៊ុននឹងចូលរួមចំណែកក្នុងការអភិវឌ្ឍឧស្សាហកម្មប្រេង និងឧស្ម័នរបស់កម្ពុជា ដែលជាឱកាសដ៏ធំមួយ ដើម្បីអភិវឌ្ឍវិស័យឧស្សាហកម្មថ្មី នៅប្រទេសកម្ពុជា។ លោកបន្តថា ប្រការដែលមានប្រភពធនធានថាមពលរយៈពេលវែង សម្រាប់ឧស្ម័នធម្មជាតិ (LNG) ប្រេងឥន្ធនៈ និងផលិតផលជាច្រើនប្រភេទទៀត នឹងជំរុញប្រទេសកម្ពុជា វិវត្តដល់កម្រិតថ្មីមួយយ៉ាងប្រសើរថែមទៀត។
លោក ម៉ៃ វីគស៍ ក៏បានឲ្យដឹងផងដែរថា តាមការពិនិត្យជាបឋម នៅតំបន់ប្លុក៨ ក្រុមអ្នកសិក្សាស្រាវជ្រាវពីស្ថានភាពដី បានរកឃើញការជ្រាបប្រេង និងឧស្ម័ន ជាច្រើនកន្លែង នៅទូទាំងតំបន់គោលដៅនេះ ហើយដែលលោកជឿជាក់ថា វាជាសក្ដានុពលដ៏សំខាន់ សំរាប់ការរុករកប្រេងនិងឧស្ម័ននេះ។
ពាក់ព័ន្ធការរុករកប្រេងនេះ រដ្ឋាភិបាលកម្ពុជា ធ្លាប់បានផ្តល់អាជ្ញាប័ណ្ណឲ្យក្រុមហ៊ុនប្រេងឥន្ធនៈ ឆឺ វឺរ៉ុន (Chevron Overseas Petroleum) ដែលជាក្រុមហ៊ុនប្រេងដ៏ធំមួយរបស់សហរដ្ឋអាមេរិក ក៏ប៉ុន្តែក្រោយមកក្រុមហ៊ុនមួយនេះ ក៏បានបោះបង់សិទ្ធិរុករកនិងអាជីវកម្មបូមប្រេង ដោយសម្រេចលក់គម្រោងវិនិយោគឲ្យទៅក្រុមហ៊ុនគ្រីស អ៊ិននឺហ្យី (Kris Energy) របស់ប្រទេសសិង្ហបុរី ក្នុងតម្លៃ ៦៥លានដុល្លារអាមេរិក ដើម្បីបន្តអាជីវកម្មបូមប្រេងក្នុងប្លុកអេ (A) ឬប្លុកអប្សរា។
រហូតដល់ពាក់កណ្តាលឆ្នាំ២០២១ ទើបក្រុមហ៊ុន Kris Energy បូមបានប្រេងឆៅ ចំនួនជិត៣០ម៉ឺនបារ៉ែល (២៩៥.០០០) ប៉ុន្តែប្រេងទាំងនេះ ត្រូវបានក្រុមនាវិកនៃកប៉ាល់ ឈ្មោះ MT Strovolos លួចដឹកចេញពីដែនទឹកកម្ពុជា កាលពីខែមិថុនា ឆ្នាំ២០២១។ ការលួចដឹកចេញនេះ ភាគីក្រុមហ៊ុននាវាដឹកប្រេង អះអាងថា ដោយសារក្រុមហ៊ុន KrisEnergy មិនបានបង់ប្រាក់ឱ្យខ្លួន ក្រោយពីក្រុមហ៊ុននេះ បានប្រកាសក្ស័យធន។
លទ្ធផលការចរចាចុងក្រោយរបស់ក្រសួងរ៉ែ និងថាមពល ក្នុងការទាមទារយកប្រេងឆៅកម្ពុជា ជិត៣០ម៉ឺនបារ៉ែល ពីម្ចាស់កប៉ាល់ MT Strovolos នេះត្រូវបានបញ្ចប់តាមរយៈការចុះហត្ថលេខាលើកិច្ចព្រមព្រៀងលក់ប្រេងឆៅទាំងនេះ។ លោក ជៀប សួរ ថ្លែងប្រាប់ក្រុមអ្នកសារព័ត៌មាន កាលពីចុងខែកញ្ញាថា កម្ពុជាទទួលបានប្រាក់ចំនួន៧០% នៃតម្លៃសរុបប្រមាណជាង២០លានដុល្លារ ដែលបានមកពីការលក់ប្រេងឆៅទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។