គណៈរដ្ឋមន្ត្រីអនុម័តលើសេចក្តីព្រាងយុទ្ធសាស្ត្រជាតិស្ដីពីការអភិវឌ្ឍសេដ្ឋកិច្ចក្រៅប្រព័ន្ធ៥ឆ្នាំបន្ទាប់
2023.09.21
កិច្ចប្រជុំគណៈរដ្ឋមន្ត្រី កាលពីថ្ងៃទី២០ កញ្ញា ២០២៣។
រូប៖ តេឡេក្រាមលោក ហ៊ុន ម៉ាណែត
រដ្ឋាភិបាលលោក ហ៊ុន ម៉ាណែត អះអាងថា ការពិភាក្សានិងអនុម័ត សេចក្តីព្រាងយុទ្ធសាស្ត្រជាតិស្ដីពីការអភិវឌ្ឍសេដ្ឋកិច្ចក្រៅប្រព័ន្ធពីឆ្នាំ២០២៣ ដល់ឆ្នាំ២០២៨ ជាការកំណែទម្រង់ ដែលរដ្ឋាភិបាលត្រូវដោះស្រាយបន្ទាន់។ ទោះយ៉ាងណារដ្ឋាភិបាល មិនទាន់បង្ហាញលម្អិតពីសេចក្តីព្រាងយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធនៅឡើយទេ។
វិទ្យុអាស៊ីសេរីមិនទាន់អាចសុំការអត្ថាធិប្បាយបន្ថែមពីប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា បានទេនៅថ្ងៃទី២០ ខែកញ្ញា។ ទោះយ៉ាងណា លោក ប៉ែន បូណា សរសេរនៅលើទំព័រហ្វេសប៊ុករបស់លោកនៅថ្ងៃទី២០ ខែកញ្ញា ថា រដ្ឋាភិបាលរបស់ លោក ហ៊ុន ម៉ាណែត ជារដ្ឋាភិបាលកំណែទម្រង់ និងគាំពារប្រជាពលរដ្ឋ។ លោកបន្តថា រដ្ឋាភិបាលថ្មីនេះធ្វើសកម្មភាពភ្លាមៗ លឿនរហ័ស ដោយផ្ដោតសំខាន់លើការលើកកម្ពស់ជីវភាពពលរដ្ឋ គាំពារប្រជាពលរដ្ឋ យកចិត្តទុកដាក់ចំពោះពលរដ្ឋ ជាពិសេសពលរដ្ឋក្រីក្រនិងងាយរងគ្រោះដែលទទួលបានផលមុនគេ។
បើទោះជាមន្ត្រីរដ្ឋាភិបាលអះអាងបែបនេះក្ដី អ្នកធ្វើការងារជាមួយពលរដ្ឋប្រកបរបរក្រៅប្រព័ន្ធ និងអ្នកឃ្លាំមើលសង្គម សង្កេតឃើញថា ពលរដ្ឋដែលប្រកបរបរសេដ្ឋកិច្ចក្រៅប្រព័ន្ធ ត្រូវបានរដ្ឋទុកពួកគេចោលមិនគិតគូររាប់ឆ្នាំមកហើយ។
ប្រធានសហព័ន្ធសហជីពកម្មករសំណង់ លោក សុខ គីន លើកឡើងថា ពលរដ្ឋដែលប្រកបរបរសេដ្ឋកិច្ចក្រៅប្រព័ន្ធគឺមានទំហំធំ តែត្រូវបានរដ្ឋាភិបាល ហាក់មិនគិតគូរ ឬផ្ដល់ការគាំទ្រសង្គមដល់ពួកគេឱ្យមានប្រសិទ្ធភាពនោះទេ។ លោកបន្តថា ល្មមដល់ពេលដែលរដ្ឋាភិបាល ដាក់ផែនការជំរុញឱ្យពលរដ្ឋដែលប្រកបរបរសេដ្ឋកិច្ចក្រៅប្រព័ន្ធ មានស្ថិរភាពការងារ និងប្រាក់ឈ្នួលសមរម្យ។ អ្នកការពារសិទ្ធិពលរដ្ឋធ្វើការផ្នែកសំណង់រូបនេះ បន្តទៀតថា រដ្ឋគួរមានការកំណត់ប្រាក់ឈ្នួល ដល់ពលរដ្ឋក្នុងវិស័យនេះ ឬពលរដ្ឋក្នុងវិស័យសំណង់យ៉ាងហោចណាស់ចាប់ពី ១៣ដុល្លារ ទៅ ១៥ដុល្លារ ក្នុងមួយថ្ងៃ។
លោក សុខ គីន៖ «ហាក់បីដូចមានចន្លោះសេដ្ឋកិច្ចក្រៅប្រព័ន្ធហ្នឹងមួយ ហាក់បីដូចមិនមានយន្តការណាមួយឬក៏ច្បាប់បទដ្ឋានគតិយុត្តិណាមួយត្រូវអនុវត្តទៅលើគាត់ឱ្យមានផែនការមួយជាក់លាក់សម្រាប់អភិវឌ្ឍន៍វិស័យហ្នឹងឱ្យជាក់លាក់អ៊ីចឹងណា អ៊ីចឹងធ្វើគាត់ហាក់បីដូចជារាយប៉ាយមិនមានអ្នកណាមួយទទួលខុសត្រូវ»។
លោក សុខ គីន ឱ្យដឹងដែរថា នៅឆ្នាំ២០២៣នេះ មានកម្មករធ្វើការនៅក្នុងវិស័យសំណង់ពី២៥ម៉ឺននាក់ ទៅ៣០ម៉ឺននាក់ ក្នុងនោះស្ត្រី៣០ភាគរយ ហើយការងារពួកគេមានអត្រាគ្រោះថ្នាក់ការងារខ្ពស់(១៩ភាគរយ) ហើយនៅពេលជួបបញ្ហានេះ កម្មករភាគច្រើនមិនទទួលបានសេវាកិច្ចគាំពារសង្គមពីរដ្ឋនោះទេ ពោលគឺពួកគេត្រូវចំណាយប្រាក់ផ្ទាល់ខ្លួនដើម្បីព្យាបាលជំងឺ។
ទាក់ទងរឿងនេះដែរ អ្នកសិក្សាផ្នែកច្បាប់ លោក វ៉ន ចាន់ឡូត សង្កេតឃើញថា នៅពេលប្រទេសជួបវិបត្តិអ្វីមួយ ដូចជាគឺវិបត្តិជំងឺកូវីដ១៩ ប្រសិនបើអ្នកប្រកបរបរសេដ្ឋកិច្ចក្រៅប្រព័ន្ធ ជួបបញ្ហាហើយនោះ វាក៏ធ្វើជះឥទ្ធិពលដល់វិបត្តិសង្គមធ្ងន់ធ្ងរផងដែរ។ លោកបន្តទៀតថា ដើម្បីគាំទ្រដល់ពលរដ្ឋប្រកបរបរសេដ្ឋកិច្ចក្រៅប្រព័ន្ធ ឱ្យមានប្រសិទ្ធភាព រដ្ឋាភិបាលក៏ត្រូវពង្រឹងស្ថាប័នរបស់រដ្ឋដែលផ្ដល់សេវាគាំពារដល់អ្នកប្រកបរបរសេដ្ឋកិច្ចក្រៅប្រព័ន្ធឱ្យមានប្រសិទ្ធភាព និងគ្មានការរើសអើងផងដែរ។
លោក វ៉ន ចាន់ឡូត៖ «សេវាគាំពារសង្គមហ្នឹងអ៊ីចឹងទៅយើងឃើញថា រដ្ឋក៏ទទួលបាននូវអត្ថប្រយោជន៍អំពីអ្នកបង់សេដ្ឋកិច្ចក្រៅប្រព័ន្ធហ្នឹងដែរ ប៉ុន្តែគ្រាន់តែអ្វីតែដែលយើងចង់ផ្ដោតសំខាន់រដ្ឋត្រូវតែពង្រឹងទាំងគុណភាព នៃផ្នែកសេវាសុខាភិបាលទាំងឯកជនទាំងវិស័យរដ្ឋអីផ្សេងៗទាំងអស់ហ្នឹងគឺត្រូវធ្វើម៉េចឱ្យពួកគាត់អាចប្រើប្រាស់សេវាទាំងអស់ហ្នឹងប្រកបដោយប្រសិទ្ធភាពទើបយើងអាចនិយាយបានថា រដ្ឋដាក់ចេញនូវគោលនយោបាយហ្នឹងគឺត្រឹមត្រូវសមស្រប»។
របាយការណ៍មជ្ឈមណ្ឌលសិទ្ធិមនុស្សកម្ពុជា (CCHR) កាលពីឆ្នាំ២០២២ បង្ហាញថា ការងារនៅកម្ពុជាជាង ៩០ ភាគរយ ជាការងារផ្នែកសេដ្ឋកិច្ចក្រៅប្រព័ន្ធ ប៉ុន្តែ កម្មករផ្នែកសេដ្ឋកិច្ចក្រៅប្រព័ន្ធ ត្រូវគេមើលរំលង ឬមើលមិនឃើញ និងបន្តស្ថិតក្នុងភាពក្រីក្រដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- សិស្សជាប់បាក់ឌុបមួយចំនួន មិនទទួលស្គាល់លទ្ធផលប្រឡង
- សមត្ថកិច្ចចាប់ខ្លួនពលរដ្ឋម្នាក់ដែលរិះគន់រឿងគ្រឿងញៀននិងលំហូរជនបរទេសខុសច្បាប់
- លោក ហ៊ុន ម៉ាណែត ថា ក្រោមការដឹកនាំរបស់លោករយៈពេល ៣ខែ រដ្ឋាភិបាលមានស្នាដៃជាច្រើន
- គ្រួសារអ្នករិះគន់បក្សកាន់អំណាចលើហ្វេសប៊ុកទាមទារតុលាការខេត្តដោះលែងស្វាមី
អត្ថបទពេញនិយម
សេដ្ឋកិច្ច
