កសិករដាំដំឡូងមីនៅតាមបណ្ដាខេត្តមួយចំនួនត្អូញត្អែរពីតម្លៃកសិផលធ្លាក់ចុះ
2024.12.03
ដំណាំដំឡូងមី ដែលក្រសួងកសិកម្មផុសលើហ្វេសប៊ុក កាលពីថ្ងៃទី៧ ធ្នូ ២០២៤។
រូប៖ ហ្វេសប៊ុកក្រសួងកសិកម្ម
កសិករដាំដំឡូងមីនៅតាមខេត្តមួយចំនួនត្អូញត្អែរថា តម្លៃដំឡូងមីឆ្នាំនេះ ធ្លាក់ចុះខ្លាំងជាងឆ្នាំមុន ទាំងដំឡូងស្រស់ និងស្ងួត ដែលធ្វើឱ្យពួកគាត់ខាតបង់ទាំងដើមទាំងចុង រហូតដល់គ្មានលុយសងធនាគារ។ ប្រធានសមាគមកសិករដំឡូងមីខ្មែរថា តម្លៃដំឡូងមីធ្លាក់ចុះបែបនេះ គឺដោយសារឃ្លាំងស្តុកដំឡូងរបស់អ្នកបញ្ជាទិញ នៅសល់ស្ដុកចាស់ច្រើន ខណៈការកែច្នៃវត្ថុធាតុដើមចេញពីដំឡូងក៏ធ្លាក់ចុះ ដោយសារមានវត្ថុធាតុដើមថ្មី មកជំនួស។
បន្ទាប់ពីឆ្លងកាត់គ្រោះរាំងស្ងួតនៅដើមរដូវ និងជំនន់ទឹកភ្លៀងកើតមាននៅកៀករដូវប្រមូលផល នៅពេលនេះប្រជាពលរដ្ឋនៅតាមខេត្តមួយចំនួន បានប្រមូលផលដំឡូងមីរបស់ពួកគាត់ជាបណ្ដើរៗ ហើយ។ នៅតាមចម្ការកម្មករបានចុះដកដំឡូងនៅតាមរងដែលពូនជាភ្លឺវែងៗ ហើយដំឡូងដែលដកចេញមក មានមើមធំៗ រហូតគុម្ពខ្លះមានមើមដល់ទៅ ១០គីឡូក្រាមក៏មាន។
ក៏ប៉ុន្តែ កសិករហាក់មិនសូវគាប់ចិត្តនឹងមើមដំឡូងធំល្អទាំងនេះនោះឡើយ ដោយពួកគាត់រអ៊ូរទាំថា ដំឡូងឆ្នាំនេះល្អទាំងមើម ល្អទាំងដើម ប៉ុន្តែចំពោះតម្លៃវិញចុះថោក ប្រៀបដូចគាស់ដីយកទៅលក់ដូច្នេះដែរ។
កសិករដាំដំឡូងនៅស្រុកចំការលើ ខេត្តកំពង់ចាម លោក លីម ហេង ប្រាប់វិទ្យុអាស៊ីសេរី ថា នៅតំបន់លោកតម្លៃដំឡូងមីស្រស់ បានចុះមកនៅត្រឹម ៣៥០រៀលក្នុងមួយគីឡូក្រាម ថោកជាងឆ្នាំមុនដែលមានតម្លៃ ៤៨០រៀល។ លោកបន្តថា តម្លៃប៉ុណ្ណេះលោកមិនចំណេញនោះទេ ដោយសារការដាំដំឡូងឆ្នាំនេះ ជួបគ្រោះរាំងស្ងួតផង និងជំនន់ទឹកភ្លៀងផង ដែលធ្វើឱ្យលោក ត្រូវចំណាយទៅលើជី និងថ្នាំបំប៉នច្រើន។
លោក លីម ហេង៖ «ដំឡូងនេះ កែច្នៃបានគ្រប់សព្វហ្នឹង តាំងពីកាកសំណល់យកទៅធ្វើជី យកទៅធ្វើឧស្ម័នចេញមកវិញនៅក្នុងរោងចក្រ អ៊ីចឹងខ្ញុំឆ្ងល់ដែរ ហេតុអ្វីបានវាចុះថោក?»។
ដំឡូងមី គឺជាដំណាំកសិ-ឧស្សាហកម្មប្រភេទធ្ងន់ ដែលប្រើប្រាស់រយៈពេលដាំ និងថែទាំយ៉ាងតិច ១ឆ្នាំទើបអាចប្រមូលផលបាន ហើយប្រសិនបើដំឡូងអាយុក្រោមមួយឆ្នាំ នឹងធ្វើឱ្យទិន្នផលថយចុះ ប៉ុន្តែបើលើសពីនេះ នឹងធ្វើឱ្យកម្រិតម្សៅរបស់មើមថយចុះ កើនសរសៃ និងរឹងដូចឈើ។ ជាទូទៅកសិករប្រមូលផលដំឡូងមីនៅរដូវប្រាំង ព្រោះមានកម្រិតជាតិម្សៅល្អ និងតម្លៃខ្ពស់។
កសិករដាំដំឡូងនៅខេត្តកំពង់ចាម ម្នាក់ទៀតគឺលោក ហុង រិន្ទ រៀបរាប់ថា ការប្រមូលផលដំឡូងមីនៅឆ្នាំនេះ ត្បិតទទួលបានទិន្នផលច្រើន ប៉ុន្តែបែរជាតម្លៃចុះថោក ធ្វើឱ្យលោកខកបំណងជាខ្លាំង។
លោក ហុង រិន្ទ៖ «បើថោកម្លឹងៗ ហើយកសិករមួយឆ្នាំ ប្រមូលផលបានតែម្ដងហ្នឹង ហើយប្រសិនបើគ្នាជំពាក់អង្គការ អត់មានលុយបង់អង្គការ មានតែលក់ដីលក់ធ្លីហ្នឹងបង់ឱ្យអង្គការ ហើយនិងធ្វើការចំណាកស្រុក។ បានតែ ២០០ជាងហ្នឹង កសិករមិនចំណេញទេ»។
ម្ចាស់សៃឡូដែលទទួលទិញដំឡូងមីបានកំណត់តម្លៃខុសៗគ្នា ដោយអាស្រ័យទៅតាមចម្ងាយផ្លូវដឹកជញ្ជូន ដោយតំបន់ខ្លះថ្លៃ ៣០០រៀលក្នុងមួយគីឡូក្រាម ប៉ុន្តែនៅខេត្តបាត់ដំបង ប៉ៃលិន ពួកគេឱ្យតម្លៃត្រឹមតែ ២០០រៀលប៉ុណ្ណោះ រីឯខេត្តឧត្តរមានជ័យ បាន ២៣០រៀល។ កសិករប្រាប់ថា ទាល់តែដំឡូងស្រស់លក់បានតម្លៃ ៤០០រៀលក្នុងមួយគីឡូក្រាម និងស្ងួតលក់បាន ៧០០រៀល ទើបពួកគាត់ចំណេញ។
ទោះជាយ៉ាងណា បញ្ហាដំឡូងមីចុះថោកនេះ មិនមែនមានតែកសិករដែលជាអ្នកលក់នោះទេ ដែលខាតឡុងចុងនោះ សូម្បីតែម្ចាស់សៃឡូដែលជាអ្នកទទួលទិញកសិផល ក៏ជួបការលំបាក និងខាតចូលដើមដូចគ្នាដែរ។
ម្ចាស់សៃឡូនៅស្រុកស្វាយលើ ខេត្តសៀមរាប លោក បូ វី ប្រាប់ថា លោកទទួលទិញដំឡូងមីស្រស់ពីកសិករក្នុងតម្លៃ ២០០រៀលក្នុងមួយគីឡូក្រាម ចំណែងដំឡូងស្ងួតក្នុងតម្លៃ ៤០០រៀល។ លោកបញ្ជាក់ថា ការទិញចូលក្នុងតម្លៃទាបបែបនេះ មិនមែនលោកជាអ្នកកំណត់ដោយខ្លួនឯងនោះទេ ប៉ុន្តែគឺដោយសារឈ្មួញវៀតណាម និងថៃ គឺជាអ្នកដាក់តម្លៃទាបមកស្រាប់ ពោលគឺលើសពីតម្លៃលោកទិញចូលតែ ១០០រៀលក្នុងមួយគីឡូក្រាមប៉ុណ្ណោះ។ ថៅកែសៃឡូរូបនេះត្អូញត្អែរថា ដោយសារតែថ្លៃកម្មករ និងដឹកជញ្ជូនចំណាយច្រើន លោករងការខាតបង់ មិនខុសពីកសិករនោះឡើយ។
លោក បូ វី៖ «យើងអ្នកទិញ យើងកំណត់មិនបានទេ បើយើងរកតែដង្ហើមដកខ្លួនឯងមិនបានដែរ។ និយាយទៅពិបាកទាំងអស់គ្នា មិនថាតែកសិករ ឬក៏ខ្ញុំដែលជាឈ្មួញកណ្ដាលនោះទេ គឺគ្រប់គ្នាទាំងអស់ ព្រោះភាគច្រើនយើងសុទ្ធតែជំពាក់អង្គការ។ ពេលដែលយើងរកលុយអត់បាន គឺពិបាកហើយរហូតដល់រត់ចោលផ្ទះសម្បែង។ អ្នកខ្លះពេលដាំដំឡូងអត់កើតពីរបីដង គាត់អត់នៅមើលដំឡូងទេ គឺគាត់ទៅថៃអស់ហើយ»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងកសិកម្ម កញ្ញា អ៊ឹម រចនា និងលោក ឃឹម ហ្វីណង់ ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី២ ខែធ្នូ។
ប្រធានសមាគមដំឡូងមីកម្ពុជា លោក អិល ឈិញ លើកឡើងថា មូលហេតុដែលធ្វើឱ្យតម្លៃដំឡូងមីធ្លាក់ចុះ គឺដោយសារតែរោងចក្រមួយចំនួនបានផ្អាកបញ្ជាទិញ ព្រោះស្ដុកចាស់នៅសល់ច្រើន ខណៈការកែច្នៃវត្ថុធាតុដើមចេញពីដំឡូង ដូចជាអេតាណុល (Ethanol) ដែលជាប្រភេទអាកុលខ្សោយ និងម្សៅមីជាដើម ក៏ធ្លាក់ចុះ ដោយសារមានវត្ថុធាតុដើមថ្មីមកជំនួស។ លោក អិល ឈិញ ពន្យល់ថា ដើម្បីដោះស្រាយបញ្ហានេះ លុះត្រាតែមានការបង្កើនចំនួនរោងចក្រកែច្នៃដំឡូងមីនៅក្នុងស្រុក ដើម្បីកាត់បន្ថយលើការនាំចេញទៅក្រៅ ហើយកសិករត្រូវជ្រើសរើសពូជដំឡូងសម្រាប់ដាំ ឱ្យសមស្របទៅតាមតម្រូវការទីផ្សារ ដូចជាពូជដំឡូងមីសម្រាប់ផលិត អេតាណុល និងពូជសម្រាប់ផលិតម្សៅមីជាដើម។
លោក អិល ឈិញ៖ «ដំណោះស្រាយដែលល្អសម្រាប់កសិករនោះ ដូចខ្ញុំលើកឡើងរួចមកហើយ គឺបើដីណាបានផលក្រោម២០តោន (ក្នុងមួយហិកតារ) យើងកុំដាំ បើមិនអ៊ីចឹងទេ យើងនៅតែខាត នៅតែធ្លាក់ខ្លួនក្រ។ បើសិនជាយើងគិតថាដីណាដែលវាល្អចាប់ពី២៥តោន ចាំយើងដាំ។ ព្រោះដីឧទាហរណ៍ថា ១០ហិកតារ ខ្លះគេដាំដំឡូងទាំងអស់ ប៉ុន្តែមានដី២ ឬ ៣ហិកតារវាអត់កើតទេ ព្រោះវាអត់មានមើម អ៊ីចឹងយើងដក ២ ឬ៣ ហិកតារនោះចេញ ហើយយើងធ្វើតែ ៧ហិកតារបានហើយ»។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បង្ហាញថា ក្នុងរយៈពេល ៥ខែ នៃឆ្នាំ២០២៤ កម្ពុជាបាននាំចេញដំឡូងមីក្រៀមចំនួនជាង ៨០ម៉ឺនតោន (៨០៤.៥៨៥) ដំឡូងមីស្រស់ជាង ១លានតោន(១.៥៩៩.១៦០) ម្សៅដំឡូងមីជិត ៤ម៉ឺនតោន (៣៨.៣៥០) និងកាកសំណល់ដំឡូងមីជិត ៣ម៉ឺនតោន(២៩.៣២៤)។
តែយ៉ាងណា របាយការណ៍របស់សមាគមដំឡូងមីកម្ពុជា បង្ហាញថា ក្នុងឆ្នាំ២០២៤នេះ ទាំងទិន្នផល និងផ្ទៃដីដាំដុះដំឡូងមី បានធ្លាក់ចុះ ដោយសារគ្រោះរាំងស្ងួតនៅដើមរដូវ និងជំនន់ទឹកភ្លៀងកើតមាននៅកៀករដូវប្រមូលផល ដែលធ្វើឱ្យរលួយមើមដំឡូង និងបាត់បង់ទិន្នផលពី១០ ទៅ ២០ភាគរយ នៅទូទាំងប្រទេស។
កសិករស្នើឱ្យរដ្ឋាភិបាលទាក់ទងវិនិយោគទុនឱ្យមកបង្កើតរោងចក្រកែច្នៃដំឡូងមីបន្ថែមទៀត ដើម្បីបង្កើនទីផ្សារ និងរក្សាស្ថិរភាពតម្លៃដំឡូងមីរបស់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
