កសិករចំនួន៣ខេត្តអំពាវនាវមន្ត្រីកសិកម្មរបស់រដ្ឋាភិបាលថ្មីចុះជួយកសិករក្នុងមូលដ្ឋាន
2023.09.20
រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ លោក ឌិត ទីណា។
រូប៖ ហ្វេសប៊ុកលោក ឌិត ទីណា
កសិករ៣ខេត្តផ្សេងគ្នាអំពាវនាវឱ្យមន្ត្រីកសិកម្មរបស់រដ្ឋាភិបាលថ្មីយកចិត្តទុកដាក់ និងចុះជួយធ្វើការងារដល់កសិករមូលដ្ឋាន ដោយសារកាលពីអាណត្តិចាស់មន្ត្រីទាំងអស់នោះ នៅតែក្នុងការិយាល័យ។ រីឯសង្គមស៊ីវិលលើកទឹកចិត្តឲ្យមន្ត្រីទាំងនោះ យកចិត្តទុកដាក់ជួយដោះស្រាយបញ្ហាកសិករជាជាងគ្រាន់តែចង់បានតួនាទីមិនធ្វើអ្វីសោះ។
ប្រជាកសិករនៅតាមបណ្ដាខេត្តចំនួន៣គឺខេត្តកណ្ដាល ខេត្តសៀមរាប និងខេត្តត្បូងឃ្មុំ លើកឡើងស្រដៀងគ្នាថា កន្លងទៅមន្ត្រីកសិកម្ម របស់ក្រសួងកសិកម្ម រុក្ខា ប្រមាញ់ និង នេសាទ មិនបានយកចិត្តទុកដាក់ចុះជួយកសិករនោះទេ ភាគច្រើន ពួកមន្ត្រីទាំងនោះអង្គុយធ្វើការងារនៅក្នុងការិយាល័យប៉ុណ្ណោះ។ ការអះអាងបែបនេះ ដោយសារកសិករទាំងអស់នោះ មិនដែលឃើញមន្ត្រីចុះសួរពីផលលំបាករបស់ពួកគេនោះទេ។
កសិករនៅម្នាក់ស្រុកកោះធំ ខេត្តកណ្ដាល លោកស្រី សែម ភា ត្អូញត្អែរប្រាប់វិទ្យុអាស៊ីសេរី នៅថ្ងៃទី២០ ខែកញ្ញាថា ចំពោះលោកស្រីបញ្ហាចម្បងនោះ គឺតម្លៃ ជី ថ្នាំ បាញ់សម្លាប់សត្វល្អិត និងប្រេងឥន្ធនៈ បានហក់ឡើងខ្ពស់ធ្វើឲ្យពលរដ្ឋមួយចំនួនធំ មិនអាចលក់បានប្រាក់ចំណេញ សងម្ចាស់បំណុលបើទោះបីតម្លៃស្រូវឆ្នាំនេះមានតម្លៃថ្លៃ ជាងឆ្នាំមុនក៏ដោយ។ កសិករវ័យ៥០ឆ្នាំរូបនេះ បន្ថែមថា ធ្វើស្រែជាង២០ឆ្នាំហើយ មិនដែលឃើញមន្ត្រីកសិកម្មចុះ ជួយគិតគូរនិងបង្រៀនអំពីបច្ចេកទេសកសិកម្មថែទាំដំណាំកសិផលដល់កសិករម្ដងណាឡើយ។
លោកស្រី សែម ភា៖ «រាល់ថ្ងៃនេះអត់មានរដ្ឋាភិបាលណា ខាងក្រសួងកសិកម្មអីណាគាត់ចុះមកសួរថា ឥឡូវបងហើយត្រូវដាំនេះដាំនោះ ហើយត្រូវលក់ដាច់មិនដាច់ ត្រូវខាតចំណេញគឺអត់មានទេ ចង់បានឱ្យរដ្ឋាភិបាលកសិកម្មតាមភូមិតាមឃុំគាត់ ព្រោះសំខាន់ប្រធានភូមិ ហើយនឹងគណៈឃុំហ្នឹងហើយដែលគាត់ដឹងសុខទុក្ខប្រជាពលរដ្ឋដែលនៅក្នុងស្រុក គាត់ពិបាក គាត់ចង់ធ្វើអ្វីៗឱ្យគាត់ចុះណែនាំអ៊ីចឹងហា៎»។
កសិករវ័យ៤០ឆ្នាំម្នាក់ទៀតរស់នៅ ស្រុកវ៉ារិន ខេត្តសៀមរាប លោក មូល ម៉ៃ រៀបរាប់ឲ្យដឹងដែរថា កន្លងទៅអ្នកភូមិប្រកបមុខរបរធ្វើកសិកម្មដាំដំឡូងមី និងធ្វើស្រូវដើម្បីផ្គត់ផ្គង់ជីវភាពគ្រួសារ ដោយសារពួកគេមិនអាចរកប្រាក់ចំណេញពីការដាំដុះនេះ។ លោកថា មានគ្រួសារខ្លះបង្ខំកូនឲ្យឈប់រៀនរួចទៅធ្វើការនៅក្រៅប្រទេស។ លោកបន្ថែមថា អ្នកភូមិរបស់លោកប្រសិនបើមានមន្ត្រីជំនាញយកចិត្តទុកដាក់ ជួយស្វែង រកទីផ្សារនិងជួយបង្ហាត់បង្រៀនពីការដាំដុះនូវដំណាំផ្សេងៗ ពួកគេមិនអាចបោះបង់ ប្រពន្ធ កូន រត់ទៅរកស៊ីស្រុកនៅគេនោះទេ។
លោក មូល ម៉ៃ៖ «ឥឡូវគាត់ជួបវិបត្តិច្រើនបង! ជួបវិបត្តិ ឥឡូវគាត់ចំណាកស្រុកច្រើនជាប់បំណុលច្រើនម្នាក់ៗចូលបីបួនស្ថាប័នជាប់បំណុល ឥឡូវមិនដឹងថា មកពីពួកគាត់ មិនដឹងថា មកពីអាជ្ញាធរទេ បំណុលគឺជាប់ច្រើនស្ថាប័ន ហើយការបង្កបង្កើនផលគាត់ អត់សូវបានផលច្រើន ភាគច្រើនគាត់ធ្វើដំឡូងមី ហើយនឹងស្រូវ ស្រូវធ្វើមួយរដូវម្តង តែដល់ពេលបច្ចុប្បន្ននេះគាត់ចំណាកស្រុកច្រើនឡើងស្ងាត់ភូមិហើយ»។
រីឯកសិកររស់នៅជាប់ព្រំដែនកម្ពុជា -វៀតណាម ស្ថិតក្នុងខេត្តត្បូងឃ្មុំ ដែលជាកសិករ ដាំដំឡូង គឺលោក ផុន សុភាព ឱ្យដឹងថា បច្ចុប្បន្នដំណាំដំឡូងកំពុងមានជំងឺជាច្រើន ប្រភេទ ក្រុមកសិករពិបាកក្នុងមើលថែ បើទោះបីពួកគេបានបាញ់ថ្នាំព្យាបាលហើយក្ដី។ ពួកគេរំពឹងរដ្ឋាភិបាលថ្មីនឹងមានមន្ត្រីជំនាញពិតប្រាកដចុះជួយដល់ពួកគេ។ លោកបន្ថែមថា កន្លងមកសូម្បីឈ្មោះមន្ត្រីកសិកម្ម ដែលចាំជួយកសិករ នៅតំបន់នោះ ក៏ពួកគេ មិនស្គាល់ផង ចំណែកឯ តម្លៃទីផ្សារវិញ ឈ្មួញវៀតណាម ក្រឡុកឡើងចុះតាមតែអំពើចិត្ត។
លោក ផុន សុភាព៖ «ទីផ្សារដល់ពេលយើងលក់ទៅវាអត់ទៀង មិនស្រួលវាត្រូវបញ្ចុះយើងវាបញ្ចុះភ្លាមក្នុង១ម៉ោងហ្នឹង មិនស្រួលបញ្ចុះភ្លាម អ៊ីចឹងយើងកសិករដូចពិបាកណាស់ តម្លៃដូចវាអត់នឹង ដូចថាយើងសួរគេប៉ុន្មាន ៣រយ[រៀល] មិនស្រួលយើងដករួចឡើងលើឡានដឹកទៅដល់វាថា គេចុះមុននេះបន្តិច វៀតណាមវាថា អ៊ីចឹង! ទៅធ្វើម៉េចគេ ហើយយើងដឹកទៅដល់ខលប្រាប់គ្នាវាហើយ ពួកហ្នឹងគឺវាមានបណ្ដាញគ្នាគេហើយ អ៊ីចឹងវាពិបាក ទៅណោះទៀតកាន់តែចុះបន្ថែមទៀត»។
ក្រុមកសិករស្នើឲ្យរដ្ឋាភិបាលថ្មីជួយយកចិត្តទុកដាក់ទៅលើកសិករ ដោយបញ្ជូនមន្ត្រី ជំនាញ បច្ចេកទេសកសិកម្មពិតប្រាកដមកជួយបង្ហាត់បង្រៀន និងជួយស្វែងរកទីផ្សារឲ្យបានសមរម្យ ដើម្បីជៀសវាងកុំឲ្យប្រជាពលរដ្ឋ នាំគ្នាចំណាកស្រុកទៅរក ការងារធ្វើនៅក្រៅប្រទេសទាំងប្រឈមនឹងហានិភ័យខ្ពស់។
ជុំវិញរឿងនេះ វិទ្យុអាស៊ីសេរីមិនអាចទាក់ទងអ្នកនាំពាក្យក្រសួង កសិកម្ម កញ្ញា អ៊ឹម រចនា និង លោក ឃឹម ហ្វីណង់ ដើម្បីសុំការឆ្លើយតបបានទេ នៅថ្ងៃទី២០ ខែកញ្ញានេះ។
ទាក់ទិននឹងបញ្ហានេះ ប្រធានសមាគមសម្ព័ន្ធកសិករកម្ពុជា(CCFC) លោក ថេង សាវឿន ដែលតែងតែចុះជួបនិងបង្រៀនបច្ចេកទេសកសិកម្មដល់កសិករ យល់ឃើញថា ថ្មីនេះរដ្ឋាភិបាលបានដាក់ចេញនូវគោលនយោបាយមួយ ដោយបញ្ជូនមន្ត្រីជំនាញកសិកម្មចុះជួយពលរដ្ឋតាមឃុំរួចហើយក្ដី ប៉ុន្តែលោកនៅតែលើកទឹកចិត្តទៅដល់មន្ត្រីជំនាញកសិកម្មរបស់ក្រសួង ត្រូវចុះជួយកសិករឲ្យពិតប្រាកដ មិនត្រូវយកតំណែង ឬតួនាទីជាមន្ត្រីហើយ មិនធ្វើការដោះស្រាយជូនពលរដ្ឋនោះទេ។
លោក ថេង សាវឿន៖ «បើសិនជាមន្ត្រីហ្នឹងដាក់ទៅត្រឹមត្រូវ មានលក្ខខណ្ឌគ្រប់គ្រាន់វាទទួលបានផលប្រយោជន៍ ហើយជួយដោះស្រាយបញ្ហា ប្រជាជនគឺទទួលបានផលប្រយោជន៍ ក៏ប៉ុន្តែបើមន្ត្រីដែលត្រូវដាក់ពង្រាយគ្រាន់តែចង់បានតួនាទីមុខតំណែងការងារ ប៉ុន្តែមិនអាចដោះស្រាយបាននោះជំរុញឱ្យវិសាលភាពនៃការដោះស្រាយបញ្ហារបស់ប្រជាពលរដ្ឋនៅដដែល អ៊ីចឹងយុទ្ធសាស្ត្រនៃការដោះស្រាយវានឹងអាច[ទៅរួច] កាន់តែបង្កើតឱ្យមានភាពអសកម្ម ហើយឬក៏បង្កើតឱ្យមានភាពមិនទុកចិត្តរបស់ប្រជាពលរដ្ឋទៅលើមន្ត្រីកសិកម្ម»។
កាលពីពេលរដ្ឋមន្ត្រីក្រសួងកសិកម្ម លោក ឌិត ទីណា ឡើងកាន់តំណែង បានប្ដេជ្ញាចិត្ត ថាធ្វើឱ្យកសិករ មានជីវភាព ធូរធារ តាមរយៈដំឡើងតម្លៃ និងបញ្ចុះតម្លៃ ជី ថ្នាំ និងសម្ភារៈ ឲ្យបានសមរម្យ ដើម្បីឲ្យកសិករទទួលបានផលចំណេញច្រើន ប៉ុន្តែរយៈ ពេលមួយឆ្នាំមកនេះ ការប្ដេជ្ញាចិត្តរបស់លោកមិនទានឃើញចេញជាផ្លែផ្កាជួយការលំបាករបស់ពលរដ្ឋនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន ម៉ាណែត ថា ក្រោមការដឹកនាំរបស់លោករយៈពេល ៣ខែ រដ្ឋាភិបាលមានស្នាដៃជាច្រើន
- លោក ហ៊ុន ម៉ាណែត ព្រមានមេដឹកនាំសហជីពកុំខ្ចីដៃកម្មករទៅបម្រើសកម្មភាពនយោបាយ
- តុលាការខេត្តបន្ទាយមានជ័យកាត់ទោសពលរដ្ឋរិះគន់បក្សប្រជាជនឱ្យជាប់ពន្ធនាគារ ៣ឆ្នាំ
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- លោក ហ្សង់ហ្វ្រង់ស័រ ពីអ្នកកាសែតមានកេរ្តិ៍ឈ្មោះ ទៅជាមន្ត្រីនយោបាយរបស់ត្រកូលហ៊ុន