កម្មកររោងចក្រមួយចំនួន មិនពេញចិត្តចំពោះរដ្ឋាភិបាល ដែលដំឡើងប្រាក់ឈ្នួលគោលចំនួនត្រឹមតែ ២០៤ដុល្លារ សម្រាប់ឆ្នាំ ២០២៤ ឡើយ។ សហជីពឯករាជ្យថា ការដំឡើងចំនួនប្រាក់ឈ្នួលដ៏តិចតួចបែបនេះ នឹងធ្វើឱ្យជីវភាពកម្មករកាន់តែលំបាក បើប្រៀបធៀបនឹងកំណើនអតិផរណា និងការឡើងថ្លៃទំនិញគ្រប់ប្រភេទ។
កម្មករធ្វើការនៅរោងចក្រកាត់ដេរ មួយចំនួនដែលវិទ្យុអាស៊ីសេរីបានសម្ភាសលើកឡើងថា ការដំឡើងប្រាក់ ៤ដុល្លារនេះ មិនអាចសម្រាលជីវភាពលំបាករបស់ពួកគាត់បាននោះទេ។
កម្មការិនីរោងចក្រ នីអាន់ ឃីដ NYAN KIDS កញ្ញា ភួង រដ្ឋា ប្រាប់វិទ្យុអាស៊ីសេរី ថា ការដំឡើងប្រាក់ឈ្នួលគោលសម្រាប់ឆ្នាំ២០២៤ ត្រឹមតែ ៤ដុល្លារនេះ គឺតិចតួចខ្លាំងណាស់សម្រាប់កម្មករ ស្របពេលដែលទំនិញនៅលើទីផ្សារឡើងថ្លៃគ្រប់មុខ។
កញ្ញា ភួង រដ្ឋា៖ «ប្រហែលជាខក ព្រោះអីម្នាក់ៗ រំពឹង និងត្អូញត្អែរគ្រប់ៗគ្នាថា អ្វីៗឡើងថ្លៃ ទំនិញនៅលើទីផ្សារ ដល់ពេលប្រាក់ខែឡើងត្រឹម ៤ដុល្លារ ដល់ពេលអ៊ីចឹងទៅខ្ញុំឆ្ងល់វិញ។ កាលឆ្នាំ ២០២៣ឡើងបាន ៦ដុល្លារ ដល់ពេលឆ្នាំឡើង ទៅជាប្រាក់ខែថយ ឡើងបានត្រឹម ៤ដុល្លារវិញ។ ដល់ពេលអ៊ីចឹងទៅ យ៉ាងម៉េចវិញទៅ»។
ស្រដៀងគ្នានេះដែរកម្មការិនីរោងចក្រ សិនតៃ ហ្គាមែន ខេមបូឌា (Zhen Tai Garment Cambodia) លោកស្រី សុខ ស្រីរ័ត្ន លើកឡើងថា ការដំឡើងឈ្នួលឱ្យកម្មករ ចំនួន ៤ដុល្លារ គឺជាការសម្រេចមួយ ដែលខ្វះគុណធម៌ និងមិនផ្អែកលើស្ថានភាពលំបាករបស់កម្មករឡើយ។ លោកស្រីយល់ថា ចំនួន ៤ដុល្លារនេះ គឺកើតចេញពីភាពលម្អៀងរបស់ក្រសួងការងារ និងសហជីពគាំទ្រនិយោជក ដែលឃុបឃិតគ្នាជាមួយថៅកែក្រុមហ៊ុន ដើម្បីកេងចំណេញផលប្រយោជន៍ពីកម្លាំងកម្មករ។
លោកស្រី សុខ ស្រីរ័ត្ន៖ «ខ្ញុំគិតថា ដូចជាមិនយុត្តិធម៌ចំពោះកម្មករទេ។ ព្រោះអីប្រាក់ខែឡើងតិច ចំណែកបន្ទប់ជួល ទឹក ភ្លើង ឡើងថ្លៃ ម្ហូបអាហារឡើងថ្លៃ អង្ករឡើងថ្លៃ ខ្ញុំគិតថា តិចណាស់ សម្រាប់កម្មករ។ ខ្ញុំគិតថា ប្រសិនបើមានបញ្ហាហ្នឹងកើតឡើងទៀត ប្រហែលកម្មករត្រូវចំណាកស្រុកច្រើនណាស់ ព្រោះសេដ្ឋកិច្ចមិនទៅមុខទេ ដូចជាពិបាកទៅៗ»។
រដ្ឋាភិបាលបានកំណត់ប្រាក់ឈ្នួលអប្បបរមាដល់កម្មករនិយោជិតនៃវិស័យវាយនភណ្ឌ កាត់ដេរ ផលិតស្បែកជើង និងសម្ភារៈធ្វើដំណើរ សម្រាប់ឆ្នាំ២០២៤ ចំនួន ២០៤ដុល្លារ ដោយចាប់ផ្ដើមអនុវត្តពីថ្ងៃទី១ ខែមករា ឆ្នាំ២០២៤តទៅ។ នេះមានន័យថា ប្រាក់ឈ្នួលអប្បបរមារបស់កម្មករ និយោជិត កើនឡើងចំនួន ៤ដុល្លារ ដោយភាគីថៅកែ ឬនិយោជកដំឡើងឱ្យ ២ដុល្លារ និង ២ដុល្លារទៀត បានមកពីរដ្ឋាភិបាលលោក ហ៊ុន ម៉ាណែត បន្ថែមឱ្យ ដូចកាលជំនាន់ឪពុករបស់លោកធ្លាប់ធ្វើដែរ។ ប្រាក់ខែគោលឆ្នាំ២០២៣ មានចំនួន ២០០ដុល្លារ។
ចាប់តាំងពីការចរចាប្រាក់ឈ្នួលអប្បបរមាកម្មករនិយោជិត ជាលើកដំបូង កាលពីថ្ងៃទី២៨ ខែសីហា មក ភាគីសហជីពកម្មករ បានទាមទារដំឡើងប្រាក់ឈ្នួលចំនួន ២១៥ដុល្លារ ក៏ប៉ុន្តែភាគីនិយោជកផ្ដល់ឱ្យត្រឹមតែ ២០១ដុល្លារ។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងការងារ លោក កត្តា អ៊ន និងអគ្គលេខាធិការនៃសមាគមរោងចក្រកាត់ដេរនៅកម្ពុជា លោក ខេន លូ ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី២៨ កញ្ញា ដោយទូរស័ព្ទហៅចូលជាច្រើនដង តែគ្មានអ្នកលើក។ ប៉ុន្តែលោកនាយករដ្ឋមន្ត្រី ហ៊ុន ម៉ាណែត និងក្រសួងការងារ បានបង្ហោះសារនៅលើទំព័របណ្ដាញសង្គមហ្វេសប៊ុក ដោយអបអរសាទរដល់កម្មករ កម្មការិនី ផ្នែកវាយនភណ្ឌ កាត់ដេរ ផលិតស្បែកជើងនិងផលិតផលិតផលធ្វើដំណើរ និងកាបូប ទទួលបានប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ ២០៤ដុល្លារ ក្នុង ១ខែ។
ជុំវិញការលើកឡើងនេះ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា លើកឡើងថា ការដំឡើងប្រាក់ឈ្នួលអប្បបរមា តែ ៤ដុល្លារ គឺមិនសមស្របទៅនឹងកំណើនអតិផរណា និងការឡើងថ្លៃទំនិញគ្រប់ប្រភេទនោះទេ។ លោកយល់ឃើញថា ការបោះឆ្នោតកំណត់តួលេខប្រាក់ឈ្នួលអប្បបរមា នេះ ហាក់គ្មានតម្លាភាព និងនិងយុត្តិធម៌ឡើយ ដោយសារក្នុងចំណោមតំណាងសហជីពកម្មករទាំង ១៧នាក់ មានតែ ៥នាក់ប៉ុណ្ណោះ ដែលបោះឆ្នោតស្របទៅតាមស្ថានភាពជាក់ស្ដែងរបស់កម្មករ ខណៈដែលភាគីក្រសួងការងារ បានបោះឆ្នោតគាំទ្រតួលេខរបស់ភាគីនិយោជកទាំងស្រុង។
លោក ប៉ាវ ស៊ីណា៖ «១២រូបទៀត ដែលតំណាងឱ្យកម្មករដែរនោះ គាត់មិនបានបោះឆ្នោតឱ្យលេខខ្លួនផង។ ប៉ុន្តែគាត់បែរជាគាំទ្រតួលេខ២០២ ដែលជាតួលេខរួមជាមួយនិយោជក ជាមួយភាគីរដ្ឋាភិបាល។ ដូច្នេះយើងឃើញទិដ្ឋភាពទាំងអស់នេះ យើងពិបាកនៅក្នុងការស្វែងយល់ថា តើតំណាងសហជីព ១២រូបផ្សេងទៀត តើគាត់យល់ឃើញរបៀបម៉េច ចំពោះខ្លួនឯងដែលជាភាគីកម្មករ ហើយបែរជាមិនគាំទ្រសំណើរបស់បងប្អូនកម្មករ»។
ក្រុមកម្មករលើកឡើងថា ការដំឡើងប្រាក់ឈ្នួលដ៏តិចតួចនេះ មានគម្លាតឆ្ងាយពីការស្នើសុំរបស់ពួកគាត់ដល់ទៅជាង ១០ដុល្លារ ស្របពេលដែលស្ថានភាពកម្មករកំពុងជួបប្រទះការលំបាក បណ្ដាលមកពីរោងចក្រមួយចំនួនព្យួរការងារ និងកាត់បន្ថយម៉ោងធ្វើការ ហើយត្រូវរស់នៅពឹងផ្អែកលើប្រាក់ខែគោលទាំងស្រុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។