RFA
ផលអវិជ្ជមានកើតចេញពីគម្រោងព្យួរប្រព័ន្ធអនុគ្រោះពន្ធ EBA ចាប់ផ្ដើមចេញសញ្ញាជាបណ្ដើរៗហើយ។ សហជីពថា ការផ្អាកការចរចា អំពីការដំឡើងប្រាក់ឈ្នួលកម្មករ មកពីសមាគមអ្នកបញ្ហាទិញ មិនបន្ថែមការបញ្ជាទិញ និងមិនដំឡើងតម្លៃនៃបញ្ជាទិញពីកម្ពុជា។
អគ្គលេខាធិការនៃសមាគមរោងចក្រកាត់ដេរនៅកម្ពុជា(GMAC) លោក ខេន លូ ឱ្យអាស៊ីសេរីដឹងថ្ងៃទី១៨ ខែកក្កដា ថា សមាគមរោងចក្រកាត់ដេរនៅកម្ពុជា សម្រេចផ្អាកការចរចាអនុសញ្ញារួមថ្នាក់វិស័យនេះ ដោយសារតែភាពមិនច្បាស់លាស់ ជុំវិញបញ្ហាព្យួរ ឬមិនព្យួរ គម្រោងអនុគ្រោះពន្ធលើទំនិញគ្រប់ប្រភេទលើកលែងតែគ្រឿងសព្វាវុធ (EBA) ពីសហភាពអឺរ៉ុប។ លោកបញ្ជាក់ថា ក្នុងស្ថានភាពដូចសព្វថ្ងៃនេះ សមាគមរោងចក្រកាត់ដេរនៅកម្ពុជា គ្មានលទ្ធភាពចរចាដំឡើងប្រាក់ឈ្នួលសមរម្យជូនដល់កម្មករឡើយ៖ «បញ្ហាEBAច្បាស់លាស់យើងអាចពិចារណាឡើងវិញព្រោះរឿងមិនមែនទាក់ទងនឹងប្រាក់ឈ្នួលអប្បបរមាទេ វាទាក់ទងនឹងប្រាក់រង្វាន់ផ្សេងៗ»។
ប្រធានសមាគមរោងចក្រកាត់ដេរនៅកម្ពុជា (GMAC) លោក ខេន លូ មិនទាន់អាចបញ្ជាក់ថា សមាគមនឹងបើកការចរចានេះឡើងវិញ នៅពេលណានោះទេ ដោយលោកបញ្ជាក់ថា គឺអាស្រ័យទៅលើស្ថានភាពជាក់ស្ដែង។
ការចរចាលើអនុសញ្ញារួមថ្នាក់វិស័យ (TUS-CBA) គឺជាការចរចាដើម្បីស្វែងរកលទ្ធភាពក្នុងការផ្តល់ប្រាក់ឈ្នួលសមរម្យបន្ថែមសម្រាប់ក្រុមកម្មកររោងចក្រ ក្នុងវិស័យវាយនភណ្ឌ ក្រៅពីយន្តការនៃការចរចាដំឡើងប្រាក់ឈ្នួលអប្បបរមា។
កាលពីថ្ងៃទី១៥ ខែ កក្កដា សមាគមរោងចក្រកាត់ដេរនៅកម្ពុជា បានចុះផ្សាយលិខិតមួយច្បាប់ឱ្យដឹងថា «ភាពមិនច្បាស់លាស់នៃការដកប្រព័ន្ធអនុគ្រោះពន្ធ (EBA) ពីសហភាពអឺរ៉ុប មានន័យ ថា យើងមិនស្ថិតនៅក្នុងជំហរណាមួយ ដែលត្រូវធ្វើការចរចាសំខាន់ៗណាមួយ ដែលនឹងប៉ះពាល់ដល់ឧស្សាហកម្មកាត់ដេរនេះឡើយ»។ លោកបន្តថា «យើងទន្ទឹងរង់ចាំចូលរួមការចរចាលើអនុសញ្ញារួមថ្នាក់វិស័យនេះឡើងវិញ នៅពេលយើងមានភាពច្បាស់លាស់អំពីបញ្ហា EBA»។
នេះជាលើកទី២ហើយដែលសមាគមរោងចក្រកាត់ដេរនៅកម្ពុជា បានស្នើសុំផ្អាកការចរចានេះ ដែលលោកទីមួយសមាគមបានជូនដំណឹងកាលពីខែមីនាកន្លងទៅ។
ប្រធានសហភាពការងារកម្ពុជា លោក អាត់ ធន់ ពន្យល់ថា ទោះការការចរចាលើអនុសញ្ញារួមថ្នាក់វិស័យ មិនមែនជាការចរចាលើប្រាក់ឈ្នួលអប្បបរមារបស់កម្មករក្ដី ប៉ុន្តែលោកយល់ថា ការផ្អាកការចរចានេះ នឹងមិនអាចធ្វើឱ្យកម្មករទទួលបានប្រាក់អត្ថប្រយោជន៍ផ្សេងទៀត ដែលអាចធ្វើកម្មករមានជីវភាពរស់នៅបានសមរម្យឡើយ។ លោកឱ្យដឹងទៀតថា ការចរចានេះគឺជាការផ្ដួចផ្ដើមពីសមាគមអ្នកបញ្ជាទិញដើម្បីជំរុញឱ្យមានការចរចារវាងតំណាងសហជីព និងសមាគមរោងចក្រកាត់ដេរនៅកម្ពុជា ក្នុងគោលបំណងឱ្យកម្មករទទួលបានប្រាក់ឈ្នួលសមរម្យបន្ថែមលើប្រាក់ប្រាក់ឈ្នួលអប្បបរមារបស់កម្មករ៖ «យើងស្ដាយឱកាសនៅពេលអ្នកបញ្ជាទិញរហូតដល់ជិត៥០ភាគរយបានតាំងចិត្តថា ឱ្យតែនិយោជកបង្កើតប្រាក់តម្លៃប្រាក់ឈ្នួលសមរម្យដល់កម្មករដល់កម្រិតដែលគេអាចទទួលយកបានគេបង្កើតតម្លៃទិញឱ្យនិយោជកចំណេញ»។
លោក អាត់ ធន់ ឱ្យដឹងដែរថា នៅពេលសមាគមរោងចក្រកាត់ដេរ ប្រកាសផ្អាកការចរចានេះ លោកទទួលដំណឹងពីភាគីបញ្ជាទិញជិត៤០ភាគរយនៃក្រុមហ៊ុនបញ្ជាទិញពីកម្ពុជា បានប្រកាសថា ពួកគេមិនបន្ថែមការបញ្ជាទិញ និងមិនដំឡើងតម្លៃបញ្ជាពីក្រុមហ៊ុនកាត់ដេរនៅកម្ពុជានោះទេ។ លោក អាត់ ធន់ យល់ថា នេះគឺជារឿងគួរឱ្យសោកស្ដាយ និងជាការបាត់បង់ឱកាសរបស់សមាគមរោងចក្រកាត់ដេរទៅវិញ៖ «តាមពិតគេបានចេញលិខិតព្រមានដល់ GMACកាលពីប៉ុន្មានខែមុនហើយថា បើGMACមិនបន្តជជែកគ្នាទេ គេក៏អត់មានការតាំងចិត្តនៅក្នុងការបញ្ជាទិញបន្ថែម ឬ ក៏បង្កើតតម្លៃបញ្ជាទិញទៀតទេ គឺនៅរក្សាតម្លៃធម្មតាដូចមុនអ៊ីចឹង»។
ក្រសួងការងារកំណត់ប្រាក់ឈ្នួលឱ្យកម្មករ ១៨២ដុល្លារ សម្រាប់ឆ្នាំ២០១៩។ លោក អាត់ ធន់ ជាភាគីចរចាម្នាក់ក្នុងការចរចានោះឱ្យដឹងថា ក្រុមសហជីពគម្រោងស្នើសុំការដំឡើងប្រាក់ឈ្នួលសមរម្យដល់កម្មករបន្ថែមចំនួន ៣០ដុល្លារក្នុងមួយខែ ជារៀងរាល់មួយឆ្នាំម្ដង ក្នុងរយៈពេលបីឆ្នាំ ចាប់ពីឆ្នាំ២០១៨ ដល់ឆ្នាំ២០២០ បន្ថែមពីលើប្រាក់ឈ្នួលអប្បបរមាកម្មករដែលទទួលបាន។
កាលពីខែកុម្ភៈ ឆ្នាំ២០១៩ កន្លងទៅនេះ សហភាពអឺរ៉ុប EU បានប្រកាសពីការចាប់ផ្ដើមដំណើរការនីតិវិធីផ្លូវការរបស់ខ្លួន ដើម្បីសម្រេចថា តើត្រូវដកឬបន្ត កិច្ចព្រមព្រៀង អនុគ្រោះពន្ធ EBA ពីប្រទេសកម្ពុជា ខណៈរបបក្រុងភ្នំពេញធ្វើឱ្យធ្លាក់ចុះនៃការគោរពសិទ្ធិមនុស្ស និងលទ្ធិប្រជាធិបតេយ្យយ៉ាងធ្ងន់ធ្ងរ។ កម្ពុជាអាចនឹងខាតបង់ទឹកប្រាក់ប្រមាណពី ៥០០ ទៅជាង ៦០០លានដុល្លារក្នុងមួយឆ្នាំ ប្រសិនបើសហភាពអឺរ៉ុបសម្រេចព្យួរ ឬដក EBA នេះ៕
