ក្រុមកូដករក្រុមហ៊ុនកាស៊ីណូណាហ្គាវើលដ៍ (Naga World) ជាង១រយនាក់ (១០០) នៅថ្ងៃទី១៥ ខែតុលា បានបន្តនាំគ្នាបោះតង់សម្រាកនៅខាងមុខក្រុមហ៊ុន ដើម្បីធ្វើកូដកម្ម និងស្រែកដង្ហោយទាមទារឱ្យថៅកែចេញមុខដោះស្រាយបញ្ចប់វិវាទការងារដ៏រ៉ាំរ៉ៃមួយនេះ។ មន្រ្តីសង្គមស៊ីវិល សោកស្ដាយចំពោះក្រុមហ៊ុន និងអាជ្ញាធរពាក់ព័ន្ធដែលនៅតែគ្មានឆន្ទៈរកដំណោះស្រាយជូនកម្មករ។
តំណាងកូដករក្រុមហ៊ុនបនល្បែងកាស៊ីណូណាហ្គាវើលដ៍ (Naga World) លើកឡើងជាថ្មីទៀតថា ពួកគាត់នៅតែមានជំហរ និងឆន្ទៈធ្វើកូដកម្មដោយសន្តិវិធី ដើម្បីឱ្យថៅកែក្រុមហ៊ុនបនល្បែងមួយនេះបញ្ឈប់ការរំលោភបំពានសិទ្ធិកម្មករ និងច្បាប់កម្ពុជាតទៅទៀត។
កូដករណាហ្គាវើលដ៍ (Naga world) លោកស្រី ម៉ម សុវឌ្ឍិន ប្រាប់វិទ្យុអាស៊ីសេរីនៅថ្ងៃទី១៥ ខែតុលាថា ទោះបីជាសព្វថ្ងៃនេះមានជនស៊ីវិល និងអាជ្ញាធរតាមបន្តយាយីគំរាមកំហែងកូដករគ្រប់រូបភាពក៏ដោយ ក៏ក្រុមកូដករមិនបាក់ស្បាត ហើយនៅតែបន្តចេញធ្វើកូដកម្មរហូតថៅកែចេញមុខដោះស្រាយវិវាទការងារនេះឱ្យបានត្រឹមត្រូវតាមច្បាប់។ លោកស្រីបញ្ជាក់ថា នារយៈពេលចុងក្រោយនេះអាជ្ញាធរបានចុះជួបឪពុកម្ដាយកូដករមួយចំនួនបង្ខំឱ្យពួកគាត់ទទួលសំណងជំនួសកូនៗរបស់គាត់ ដើម្បីកុំមានការចេញធ្វើកូដកម្មតទៅទៀត។
លោកស្រី ម៉ម សុវឌ្ឍិន យល់ថា បើស្ថាប័នរដ្ឋពាក់ព័ន្ធនៅតែមិនអើពើរកដំណោះស្រាយ ហើយបណ្ដោយឱ្យថៅកែក្រុមហ៊ុនបនល្បែងកាស៊ីណូណាហ្គាវើលដ៍ (Naga World) លុបបំបាត់សហជីពឯករាជ្យបានដូចបំណងពួកគេពិតមែន នោះបានន័យថា អាជ្ញាធរលើកទឹកចិត្តឱ្យក្រុមហ៊ុនបរទេសដទៃទៀតបន្តកេងប្រវ័ញ្ចកម្លាំង និងរំលោភសិទ្ធិកម្មករខ្មែរ៖
«ពួកបងគឺជាសមាជិកសហជីព ហើយត្រូវបានគេបញ្ឈប់ពីការងារ ទាំងអយុត្តិធម៌ គ្រាន់ជាសមាជិកសហជីពហ្នឹង។ ការបញ្ឈប់នេះ ដោយរើសអើងទៅទៀត ពួកយើងអត់សុខចិត្តទេ។ ទីពីរ យើងរកយុត្តិធម៌សហជីពឯករាជ្យ (LRSU) គឺជាសហជីពដែលទ្រទ្រង់សិទ្ធការងារនៃបុគ្គលិកក្រុមហ៊ុនណាហ្គាវើល (Naga World) ហ្នឹង។ មានន័យថា យើងមិនចង់ណាហ្គា កម្ទេចសហជីពបាន វាអាចជះឥទ្ធិពល ទៅដល់ស្ថាប័នផ្សេងទៀត គេនឹងអាចយកគំរូតាមណាហ្គា ទៅធ្វើបាបទៅកេងប្រវ័ញ្ចកម្មករខ្មែរ»។
វិទ្យុអាស៊ីសេរីនៅមិនអាចទាក់ទងអ្នកនាំពាក្យក្រសួងការងារលោក ហេង សួរ ដើម្បីសាកសួរជុំវិញរឿងនេះបានទេនៅថ្ងៃទី១៥ ខែតុលា។
ក្រសួងការងារថាគិតត្រឹមថ្ងៃទី១ ខែតុលា មានអតីតបុគ្គលិកសរុបចំនួនជាង ២រយនាក់ (២៤៤) ក្នុងចំណោមជាង ៣រយនាក់ (៣៧៣) បានយល់ព្រមទទួលយកប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន។ អតីតបុគ្គលិកដែលមិនព្រមទទួលយក ចំនួន ១២៩នាក់ប៉ុណ្ណោះ។
ក្រុមកូដករក្រុមហ៊ុនណាហ្គាវើលដ៍បានចាប់ផ្ដើមធ្វើកូដកម្ម ដើម្បីទាមទារសិទ្ធិសេរីភាពការងារជិត១ឆ្នាំមកហើយ ក្រោយពីក្រុមកូដករចោទថា ថៅកែក្រុមហ៊ុនបនល្បែងដ៏ធំជាងគេជាងគេនៅកណ្ដាលក្រុងភ្នំពេញនេះ បានរំលោភបំពានសិទ្ធកម្មករ ព្រមទាំងមានចេតនាលុបបំបាត់សំឡេងសហជីពឯករាជ្យក្នុងកន្លែងការងារ និងបញ្ឈប់បុគ្គលិកជាង ៣រយនាក់ចេញពីការងារទាំងខុសច្បាប់។ ជាងនេះទៀត ការចេញតវ៉ារបស់ក្រុមកូដករកន្លងមកនេះ តែងតែត្រូវកម្លាំងអាជ្ញាធរដាក់ចំណាត់ការបង្ក្រាបយ៉ាងទៀងទាត់ រហូតដល់មានការប្រើអំពើហិង្សាទៅលើកូដករម្នាក់បណ្ដាលឱ្យរលូតកូនក្នុងផ្ទៃទៀតផង។ អាជ្ញាធរនៃរដ្ឋាភិបាលលោក ហ៊ុន សែន បានផ្អាកការបង្ក្រាបដោយហិង្សាលើកូដករ និងអនុញ្ញាតឱ្យពួកគេធ្វើកូដករកម្មនៅខាងមុខក្រុមហ៊ុន ក្រោយពីអ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅកម្ពុជាគឺលោក វិទិត មុនតាប៊ន (Vitit Muntarbhorn) បំពេញទស្សនកិច្ចនៅកម្ពុជាកាលពីខែសីហា។
ទោះបីយ៉ាងណា មកពេលនេះមានកូដករដែលសកម្មចំនួន ៤នាក់ហើយដែលត្រូវក្រុមហ៊ុនបនល្បែងកាស៊ីណូណាហ្គាវើលដ៍ប្ដឹងពីបទ រំលោភលំនៅឋាន ធ្វើឱ្យខូចខាតដោយចេតនាដែលមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់ ក្រោយពីក្រុមកូដករបានប្រមូលផ្ដុំគ្នាបោះតង់ វាយស្គរ នៅខាងមុខក្រុមហ៊ុន ដើម្បីឱ្យថៅកែចេញមុខទទួលខុសត្រូវចំពោះការបញ្ឈប់បុគ្គលិក និងសហជីពទាំងផ្ទុយពីច្បាប់ការងារ។
នាយកទទួលបន្ទុកទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មើលឃើញថា ការណ៍ដែលក្រុមហ៊ុនដាក់ពាក្យប្ដឹងក្រុមកូដករតាមប្រព័ន្ធតុលាការបែបនេះ គឺជាការគំរាមកំហែងលើកូដករបន្ថែមទៀត ហើយកម្ពុជានឹងអាចទទួលរងការរិះគន់ពីសហគមន៍ជាតិ និងអន្តរជាតិកាន់តែខ្លាំង៖
«អ៊ីចឹងការជ្រើសរើសតាមប្រព័ន្ធតុលាការ ដើម្បីគំរាមកំហែងបំបាក់ស្មារតី ដើម្បីកុំឱ្យមានការតវ៉ា ឬការធ្វើកូដកម្មនេះ មិនមែនជាជម្រើសល្អទេ ប៉ុន្តែ ផ្ទុយទៅវិញគឺបង្កើននូវស្ថានភាពតានតឹងកាន់តែធ្ងន់ ហើយក៏មានការរិះគន់កាន់តែធ្ងន់ទៀត។ ខ្ញុំយល់ថា ជម្រើសដ៏ល្អ [អាជ្ញាធរ និងក្រុមហ៊ុន] ឈរលើនៅលើគោលការណ៍ច្បាប់ជាតិ អន្តរជាតិ ជាពិសេសអនុសញ្ញា ILO ឬក៏ច្បាប់ការងារ បញ្ចប់វិវាទការងារនេះនៅណាហ្គាវើលដ៍នេះ ជាដំណោះស្រាយដ៏ល្អបំផុត»។
កន្លងមកអង្គការជាតិ អន្តរជាតិ ព្រមទាំងប្រទេសប្រជាធិបតេយ្យធំៗមួយចំនួន រួមទាំងទីភ្នាក់ងារអង្គការសហប្រជាជាតិផង អំពាវនាវដល់រដ្ឋាភិបាលលោក ហ៊ុន សែន ឱ្យបញ្ឈប់ការរឹតត្បិតសេរីភាពជាមូលដ្ឋានពលរដ្ឋក្នុងសម្ដែងមតិ និងប្រើប្រាស់ប្រព័ន្ធតុលាការជាឧបករណ៍សម្រាប់បម្រើនយោបាយ។ ស្ថាប័នទាំងនោះតែងតែទទូចដល់រដ្ឋាភិបាលកម្ពុជា និងក្រសួងស្ថាប័នពាក់ព័ន្ធ ឱ្យពន្លឿនការដោះស្រាយវិវាទការងារជូនក្រុមកម្មករនៃក្រុមហ៊ុនណាហ្គាវើលដ៍ឱ្យបានត្រឹមត្រូវស្របតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។