ប្រជាពលរដ្ឋ​ស្នើ​អាជ្ញាធរ​យកចិត្តទុកដាក់​ដោះស្រាយ​បញ្ហា​ជីវភាព​អំឡុង​ពេល​បិទ​តំបន់​ពួក​គេ

ដោយ ឡេង ម៉ាលី
2021-03-26
Share
ប្រជាពលរដ្ឋ​ស្នើ​អាជ្ញាធរ​យកចិត្តទុកដាក់​ដោះស្រាយ​បញ្ហា​ជីវភាព​អំឡុង​ពេល​បិទ​តំបន់​ពួក​គេ សកម្មភាព​ធ្វើ​តេស្ត​រកមេរោគ​កូវីដ-១៩។
រូប​ពី​ហ្វេសប៊ុក

ប្រជាពលរដ្ឋ​ស្នើ​អាជ្ញាធរ​ឱ្យ​យក​ចិត្ត​ទុក​ដាក់​ដោះ​ស្រាយ​បញ្ហា​ជីវភាព​របស់​ពួក​គាត់ ក្រោយ​អាជ្ញាធរ​ដាក់​ចេញ​វិធានការ​រឹត​បន្តឹង​សន្តិសុខ និង​ការ​ធ្វើ​ដំណើរ​ចេញ​ចូល​តាម​ឃុំ​សង្កាត់​មួយ​ចំនួន ដើម្បី​ទប់ស្កាត់​ការ​រាតត្បាត​ជំងឺ​កូវីដ-១៩។ មន្ត្រី​សង្គម​ស៊ីវិល​ថា រដ្ឋាភិបាល​គួរ​បញ្ចេញ​កញ្ចប់​ថវិកា​បម្រុង ដើម្បី​ជួយ​សម្រួល​បន្ទុក​ប្រជាពលរដ្ឋ នៅ​តាម​ភូមិ​ឃុំ​មួយ​ចំនួន​ដែល​បិទ ឬ​រឹត​បន្តឹង​ការ​ធ្វើ​ដំណើរ។

ប្រជាពលរដ្ឋ​មួយ​ចំនួន កំពុង​រស់​ក្នុង​ស្ថាន​ភាព​លំបាក បន្ទាប់​ពី​អាជ្ញាធរ​បិទ​ភូមិ​ឃុំ ដើម្បី​ការពារ​ការ​ផ្ទុះ​រាល​ដាល​ជំងឺ​កូវីដ-១៩ ក្នុង​សហគមន៍។

ប្រជាពលរដ្ឋ​រស់​នៅ​សង្កាត់​គោក​ចក ខេត្ត​សៀមរាប លោក យឹម សុង៉ា ប្រាប់​អាស៊ី​សេរី​ថា អាជ្ញាធរ​ខេត្ត​សៀមរាប​បាន​ប្រកាស​បិទ​ការ​ធ្វើ​ដំណើរ​ចេញ​ចូល​ក្នុង​សង្កាត់​គោក​ចក រយៈ​ពេល​ជិត​មួយ​សប្ដាហ៍​មក​ហើយ។ លោក​ថា​ការ​បិទ​ចរាចរណ៍​ចេញ​ចូល​នេះ បាន​ធ្វើ​ឱ្យ​ប៉ះពាល់​ដល់​ចំណូល​ប្រចាំ​ថ្ងៃ ហើយ​លោក​ត្រូវ​បង់​ថ្លៃ​បន្ទប់​ជួល ទឹក​ភ្លើង និង​ធនាគារ​ជា​ដើម ដែល​ធ្វើ​ឱ្យ​ជីវភាព​គ្រួសារ​លោក​កាន់​តែ​យ៉ាប់យ៉ឺន។ លោក​ឱ្យ​ដឹង​ទៀត​ថា អាជ្ញាធរ​ហាក់​មិន​អើពើ ចំពោះ​ទុក្ខ​លំបាក​របស់​ប្រជាពលរដ្ឋ​នៅ​ក្នុង​សង្កាត់​នេះ​ទេ ក្រោយ​ការ​បិទ​តំបន់​នេះ៖ «សង្កាត់​គោក​ចក​ថ្ងៃ​នេះ ជា​ថ្ងៃ​ទី៥ ទី៦ ថា ទៅ​មិន​ទាន់​មួយ​សប្ដាហ៍​គ្រាប់​គ្រាន់ ចត្តាឡីស័ក​រយៈ​ពេល ១៤ថ្ងៃ​យើង​គិត​មើល ចុះ​ទំរាំ​គ្រប់ ១៤ថ្ងៃ​យើង​មាន​លទ្ធភាព​ឯណា ហើយ​លុយ​ដែល​យើង​រក​បាន​ចាយ​អស់​ ត្រូវ​បង់​ធនាគារ​ទៀត គឺ​យ៉ាប់។ ខ្ញុំ​ស្នើ​រដ្ឋាភិបាល​គួរ​តែ​ជួយ​ដោះ​បន្ទុក​ប្រជាពលរដ្ឋ​សង្កាត់​គោក​ចក​ឱ្យ​បាន​ច្រើន​ជាង​នេះ»

ស្រដៀង​គ្នា​នេះ​ដែរ អ្នក​រត់​ផាសអាប់ (PassApp) នៅ​ខេត្ត​ព្រះ​ស៊ីហនុ លោក សាន់ ទី ប្រាប់​អាស៊ី​សេរី​ថា អាជ្ញាធរ​បាន​ប្រកាស​បិទ​ការ​ធ្វើ​ដំណើរ ដើម្បី​ទប់​ស្កាត់​ការ​ឆ្លង​ជំងឺ​កូវីដ-១៩ នេះ។ លោក​ថា​ការ​ផ្ទុះ​ជំងឺ​កូវីដ​នេះ បាន​ធ្វើ​ឱ្យ​ពលរដ្ឋ​ក្នុង​ខេត្ត​ជាប់​មាត់​សមុទ្រ​មួយ​នេះ បាត់បង់​ប្រាក់​ចំណូល​ទាំង​ស្រុង។ លោក​បញ្ជាក់​ថា ក្នុង​ស្ថានភាព​ដ៏​លំបាក​នេះ លោក​ត្រូវ​ទទួល​បន្ទុក​បង់​រំលោះ​ផាសអាប់ ថ្លៃ​បន្ទប់​ជួល ថ្លៃ​ទឹក​ភ្លើង​ប្រចាំ​ខែ។ លោក​ស្នើ​ដល់​រដ្ឋាភិបាល​ដោះ​ស្រាយ​បញ្ហា​របស់​ប្រជាពលរដ្ឋ​ជា​រួម រហូត​ដល់​ស្ថានភាព​សេដ្ឋកិច្ច​ល្អ​ប្រសើរ​ឡើង​វិញ៖ «រឿង​ជីវភាព​គ្រួសារ​កាន់​តែ​ពិបាក​ទៀត រាល់​ថ្ងៃ​ផ្គត់ផ្គង់​កូន​ពីរ​ផង​ ទឹក​ដោះ​គោ​ផង រត់​ផាសអាប់​រាល់​ថ្ងៃ​អត់​បាន​ទៀត ហើយ​មួយ​វឹក​​កូវីដ​នេះ មិន​បាន​ចេញ​ក្រៅ​ទេ ឱ្យ​រដ្ឋាភិបាល​លោក​ជួយ​សម្រួល​ខ្លះ​ក្នុង​ការ​បង់ ធនាគារ​ឱ្យ​គាត់​ជួយ​ផ្អាក​មួយ​ខែ ឬ​ក៏​ពីរ​ខែ បី​ខែ​សិន»

ចំណែក​ប្រជាពលរដ្ឋ​រស់នៅ​ខេត្ត​កណ្ដាល លោកស្រី ជ័យ ស្រីនី លោកស្រី​ប្រាប់​ថា រយៈ​ពេល​ជាង​មួយ​សប្ដាហ៍​មក​ហើយ លោកស្រី​មិន​បាន​ចេញ​ទៅ​លក់​ដូរ​នៅ​ផ្សារ​ទេ ព្រោះ​បារម្ភ​ពី​ការ​ឆ្លង​ជំងឺ​កូវីដ-១៩។ លោកស្រី​ថា គ្រួសារ​លោកស្រី​បាត់​ចំណូល ហើយ​រស់​ទាំង​ត្រដាបត្រដួស ថែម​ទាំង​ត្រូវ​បង់​បំណុល​ឯកជន​ទៀត​ផង។ លោកស្រី​បាន​សម្រេច​ចិត្ត​ឱ្យ​កូន​ឈប់​រៀន​មហាវិទ្យាល័យ ព្រោះ​គ្មាន​លុយ​សម្រាប់​ផ្គត់ផ្គង់​ឱ្យ​កូន​រៀន​បន្ត​ទៀត៖ «ជីវភាពគ្រួសារ​ខ្វះខាត​អ៊ីចឹង ភូមិ​ឃុំ​ត្រូវ​តែ​ជួយ​មើល ជួយដោះស្រាយ​ឱ្យ​ប្រជាពលរដ្ឋ​ផង ប្រជាពលរដ្ឋ​ដូច​ខ្ញុំ​អ៊ីចឹង​ មាន​មួយថ្ងៃ​ហូបថ្ងៃ ហូប​អង្ករ​គីឡូ​ដូចគ្នា ដល់​ខែ​ដល់ពេលវេលាយើង​រក​មិន​បាន»

ការ​លើក​ឡើង​របស់​ប្រជាពលរដ្ឋ​នេះ គឺ​ដោយ​សារ​តែ​រដ្ឋាភិបាល​បាន​ដាក់​ចេញ​វិធានការ​រឹត​បន្តឹង​សន្តិសុខ និង​ការ​ធ្វើ​ដំណើរ​ចេញ​ចូល​ទីតាំង​ដែល​បាន​ហាម​ឃាត់ បន្ទាប់​ពី​ការ​រាល​ដាល​​ជំងឺ​កូវីដ-១៩ ចូល​ក្នុង​​សហគមន៍​កើន​ឡើង។ ពលរដ្ឋ​អះអាង​ដូច​គ្នា​ថា រដ្ឋាភិបាល និង​អាជ្ញាធរ​ផ្ដោត​តែ​ទៅ​លើ​ការ​រឹត​បន្តឹង​សន្តិសុខ ប៉ុន្តែ​ហាក់​មិន​បាន​គិត​គូរ​អំពី​បញ្ហា​ជីវភាព និង​ការ​ខ្វះខាត​របស់​ពួកគាត់​ដែល​ស្ថិត​ក្នុង​តំបន់​រឹត​បន្តឹង​នោះ​ទេ។

រដ្ឋលេខាធិការ និង​ជា​អ្នក​នាំ​ពាក្យ​ក្រសួងសេដ្ឋកិច្ច និង​ហិរញ្ញវត្ថុ លោក មាស សុខសេនសាន បដិសេធ​ការ​ឆ្លើយតប​ជុំវិញ​កង្វល់ និង​សំណើ​របស់​ប្រជាពលរដ្ឋ ដោយ​លោក​រុញ​ឱ្យ​ទៅ​អាជ្ញាធរ​មូលដ្ឋាន​វិញ។ អាស៊ី​សេរី​បាន​ទាក់ទង​ទៅ​អាជ្ញាធរ​មូលដ្ឋាន​នៅ​តាម​តំបន់​មួយ​ចំនួន ដើម្បី​សាកសួរ​បញ្ហា​នេះ​ដែរ ប៉ុន្តែ​មិន​ទទួល​បាន​ការ​ឆ្លើយតប​នោះ​ទេ។

ទោះ​ជា​យ៉ាង​ណា​ក្ដី កន្លងមក រដ្ឋាភិបាល​បាន​ចែក​ប្រាក់​ខ្លះ ដល់​ពលរដ្ឋ​ដែល​មាន​ប័ណ្ណ​ក្រីក្រ និង​ផ្ដើម​ផ្តល់​ប្រាក់​ឧបត្ថម្ភ និង​ស្បៀង​អាហារ​ខ្លះៗ ដល់​អ្នក​កំពុង​ធ្វើ​ចត្តាឡីស័ក។ ជាមួយ​គ្នា​នេះ រដ្ឋាភិបាល​បាន​ដាក់​ចេញ​កម្មវិធី​ឧបត្ថម្ភ​សាច់​ប្រាក់ ជុំទី៨ ដើម្បី​កាត់​បន្ថយ​ផល​ប៉ះពាល់​ស្ថានភាព​សង្គម ជួយ​ទំនុកបម្រុង​ដល់​ជីវភាព​ប្រចាំ​ថ្ងៃ​ដល់​គ្រួសារ​ក្រីក្រ និង​ងាយ​រង​គ្រោះ។ កម្មវិធី​ឧបត្ថម្ភ​សាច់​ប្រាក់​ជុំ​ទី៨ នេះ ចាប់​បន្ត​អនុវត្ត​រយៈ​ពេល​បី​ខែ​បន្ថែម​ទៀត ពី​ខែ​មេសា ដល់​ខែ​មិថុនា។

ទាក់ទង​​រឿង​នេះ ប្រធាន​ផ្នែក​សិទ្ធិ​មនុស្ស នៃ​សមាគម​ការពារ​សិទ្ធិ​មនុស្ស​អាដហុក (Adhoc) លោក នី សុខា មាន​​ប្រសាសន៍​ថា រដ្ឋាភិបាល​ត្រូវ​យក​ចិត្ត​ទុក​ដាក់ និង​ពិចារណា ដោះ​ស្រាយ​បញ្ហា​ជីវភាព ជា​ពិសេស​សេដ្ឋកិច្ច​របស់​ប្រជាពលរដ្ឋ មិន​មែន​គិត​តែ​ពី​រឿង​ទប់​ស្កាត់​កូវីដ​តែ​មួយ​មុខ​នោះ​ទេ។ លោក​ថា នៅ​ក្នុង​ស្ថានភាព​បែប​នេះ​រដ្ឋាភិបាល​គួរ​ខ្នះខ្នែង​ជួយ​សម្រួល​បន្ទុក​ប្រជាពលរដ្ឋ ជា​ពិសេស​នៅ​តាម​ភូមិ​ឃុំ​មួយ​ចំនួន​ដែល​បាន​បិទ ឬ​រឹត​បណ្ដឹង​ចរាចរណ៍។ លោក​ស្នើ​រដ្ឋាភិបាល​ត្រូវ​បញ្ចេញ​ថវិកា​បម្រុង និង​ជួយ​ផ្គត់ផ្គង់​ស្បៀង​អាហារ​ជូន​ពលរដ្ឋ ដែល​មិន​បាន​ចេញ​ប្រកប​មុខ​របប​នៅ​ខាង​ក្រៅ ខណៈ​ពលរដ្ឋ​បាត់បង់​ចំណូល៖ «ជាកត្តាមួយ​ដែល​ជា​បន្ទុក​របស់​រដ្ឋាភិបាល​ដែល​លោក​ត្រូវតែពិចារណា ក្នុង​ការដោះស្រាយ​ឱ្យ​ទាន់​ពេលវេលា ពិសេស​គឺ​ថវិកា​រដ្ឋ​ដែលបម្រុង​ទុក​សម្រាប់​ដោះស្រាយ​បញ្ហាកូវីដ-១៩ ដើម្បី​ជួយ​ទៅ​ដល់​ប្រជាពលរដ្ឋឱ្យទាន់ពេលវេលា​ចំពោះ​បញ្ហា​ហ្នឹង និង​យន្តការ​មួយ​ទៀត រដ្ឋ​ក៏​អាច​បន្ត​ធ្វើ​ការពិភាក្សា​ឱ្យ​ចេញ​ជាលទ្ធភាព​ជាក់ស្តែង​ចំពោះ​ធនាគារ​ដែល​ពលរដ្ឋ​កំពុង​ខ្ចីបុល​ត្រូវ​ដោះស្រាយ យ៉ាងមិច​ឱ្យ​ធនាគារ​បន្ធូរបន្ថយ»

ប្រជាពលរដ្ឋ ដែល​កំពុង​ជួប​ការ​ខ្វះខាត សំណូម​ពរ​ដល់​រដ្ឋាភិបាល​ឱ្យ​គិត​គូរ​បន្ថែម​ទៀត​ដល់​សុខទុក្ខ​របស់​ពួក​គាត់ ដូច​ជា ការ​ផ្តល់​ជំនួយ​ជា​ស្បៀង​អាហារ និង​​ថវិកា ព្រម​ទាំង​ជួយ​សម្រួល​រឿង​បំណុល​ធនាគារ​ និង​បញ្ចុះ​ថ្លៃ​​ទឹក​ភ្លើង ព្រោះ​ពួក​គាត់​មិន​អាច​ចេញ​ប្រកប​មុខ​របរ​ខាង​ក្រៅ​បាន​ទេ នៅ​ក្នុង​ស្ថាន​ភាព​ដ៏​លំបាក​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល