បន្ទប់ និងផ្ទះជួលក្នុងក្រុងប៉ោយប៉ែត ខេត្តបន្ទាយមានជ័យ កំពុងត្រូវប៉ាន់សម្រាប់អ្នកដែលសម្រុកទៅធ្វើការនៅទីនោះ ជាពិសេសក្នុងវិស័យល្បែងអនឡាញ និងកាស៊ីណូ។ តម្រូវការនេះ ធ្វើឱ្យតម្លៃនៃការជួលបានហក់ឡើងជាបន្តបន្ទាប់។ បច្ចុប្បន្ន ឧស្សាហកម្មល្បែងអនឡាញ និងកាស៊ីណូ កំពុងរីកដុះដាលក្នុងក្រុងប៉ោយប៉ែត ដែលជាតំបន់មានសក្ដានុពលខាងប្រព្រឹត្តអំពើខុសច្បាប់ និងពុករលួយជាប្រព័ន្ធ។
ក្រុងប៉ោយប៉ែត ខេត្តបន្ទាយមានជ័យ បច្ចុប្បន្នកាន់តែមានភាពមមាញឹកខ្លាំងជាងមុន បន្ទាប់ពីក្រុមហ៊ុនកាស៊ីណូជាច្រើន បានពង្រីកសេវាកម្មតាមអនឡាញកាន់តែខ្លាំង ដោយមានជនបរទេសចម្រុះជាតិសាសន៍ មានដូចជា ចិន (China) ឥណ្ឌូណេស៊ី (Indonesia) ហ្វីលីពីន (Philippines) ថៃ (Thailand) និងឡាវ (Lao) ជាដើម បានមកធ្វើការនៅក្នុងវិស័យមួយនេះ។
ភាពមមាញឹកនៃឧស្សាហកម្មបនល្បែងនេះ បានធ្វើឱ្យតម្រូវការបន្ទប់ជួល និងផ្ទះជួល ក្នុងក្រុងប៉ោយប៉ែត កើនឡើងខ្ពស់ ដែលជាឱកាសសម្រាប់ម្ចាស់អចលនៈទ្រព្យ ដំឡើងតម្លៃជួលកាន់តែខ្ពស់ ដើម្បីដាក់ជួលឱ្យជនបរទេស និងពលរដ្ឋខ្មែរ ដែលធ្វើការនៅក្នុងវិស័យកាស៊ីណូអនឡាញ ហើយកត្តានេះ បានធ្វើឱ្យប៉ះពាល់ដល់ពលរដ្ឋប្រកបរបរសេដ្ឋកិច្ចក្រៅប្រព័ន្ធ ដែលមានចំណូលទាប។
ពលរដ្ឋនៅក្បែរតំបន់បឹងស្រល់ លោក អឿន មករា ប្រាប់វិទ្យុអាស៊ីសេរី ថា ក្រុងប៉ោយប៉ែត បច្ចុប្បន្នមានការប្រកួតប្រជែងដណ្ដើមផ្ទះ និងបន្ទប់ជួល រវាងជនបរទេស និងពលរដ្ឋខ្មែរ តាមរយៈការប្រើអំណាចទឹកលុយ។ លោកឱ្យដឹងថា ដោយសារតែបញ្ហានេះ បានធ្វើឱ្យលោក ត្រូវផ្លាស់ប្ដូរបន្ទប់ជួលជាច្រើនដង ដោយសារម្ចាស់ផ្ទះបានបណ្ដេញចេញ នៅពេលមានជនបរទេសឱ្យតម្លៃខ្ពស់ជាង២ ទៅ៣ដង។
លោក អឿន មករា៖«អ្នកខ្លះគេមិនដេញយើងជាចំហ ជាចំៗទេ គេដេញដោយប្រយោល គេដំឡើងថ្លៃឱ្យយើងរត់មិនរួច។ ដូចពីមុន តែពីរពាន់បាតយើងថាថ្លៃ រត់មិនចង់រួចទេពីរពាន់បាត(បើ)ដំឡើងតែបីពាន់បាត បួនពាន់បាតភ្លាមៗយើងរត់ម៉េចរួច ហើយប្រាក់ខែយើង អ្នកខ្លះប្រាំ ប្រាំមួយពាន់បាត។ នរណាស៊ីចុកប្រចាំថ្ងៃ ធ្វើដំណើរ ហើយយើងនៅស្រុកគេដឹងហើយ ចំណាយច្រើនណាស់ យើងនៅចំណាកស្រុក ស្អីក៏ទិញគេដែរ បោកគក់ទឹកភ្លើង ទិញគេទាំងអស់»។
បន្ទប់ជួលនៅក្នុងក្រុងប៉ោយប៉ែត ជាមធ្យមមានតម្លៃ ១១៥ដុល្លារ ក្នុងមួយខែ សម្រាប់បន្ទប់តូចមានទំហំ ២ម៉ែត្រកន្លះ គុណនឹង ៥ម៉ែត្រ និង១៥០ដុល្លារ សម្រាប់ទំហំ ៣ម៉ែត្រកន្លះ គុណនឹង៦ម៉ែត្រ។ តម្លៃទាំងនេះ គឺកើនឡើង ២ដង បើប្រៀបធៀបជាមួយតម្លៃកាលពី ៣ឆ្នាំមុន។
យ៉ាងណាមិញ ជនបរទេសដែលមកធ្វើការ និងរស់នៅក្នុងក្រុងប៉ោយប៉ែត ខ្លះមិនមែនជួលផ្ទះសម្រាប់តែការស្នាក់នៅនោះឡើយ ដោយពួកគេខ្លះ បានបើកអាជីវកម្មលក់ទំនិញ ចំណីអាហារ កន្លែងប្ដូរប្រាក់ កន្លែងបោកអ៊ុត ជាដើម។
អាជីវករនៅសង្កាត់ផ្សារកណ្ដាល លោក សេង ហាក់ ប្រាប់ថា ជនបរទេសមួយចំនួន ដែលមកធ្វើការនៅក្រុងប៉ោយប៉ែត បានឆ្លៀតរកស៊ីប្រកួតប្រជែងជាមួយពលរដ្ឋខ្មែរ ដោយពួកគេហ៊ានឱ្យតម្លៃជួលផ្ទះថ្លៃ ឬជួលផ្ដាច់មុខ ដើម្បីបិទផ្លូវរកស៊ីពលរដ្ឋខ្មែរ ខណៈម្ចាស់អចលនៈទ្រព្យ បានដំឡើងថ្លៃជួលសឹងរាល់ខែ។ លោកបន្តថា បញ្ហានេះ បានធ្វើឱ្យអាជីវករខ្មែរខ្លះ ត្រូវក្ស័យធន ក្រោយអស់លទ្ធភាពជួលផ្ទះ និងខ្លះទៀត ត្រូវម្ចាស់ផ្ទះបណ្ដេញចេញដោយស្វ័យប្រវត្តិ។
លោក សេង ហាក់៖«ដូចប៉ុន្មានខែនេះឡើងថ្លៃ ឡើងប្រហែលជាបីបួនរយបាត ក្នុងមួយបន្ទប់ គេដំឡើងអ៊ីចឹង។ អត់មានកំណត់ថាប៉ុន្មានឆ្នាំដំឡើងម្ដងទេ អាហ្នឹងអាស្រ័យលើទីផ្សារការងារ ស្រេចតែម្ចាស់ផ្ទះគេ»។
ទោះជាបែបនេះក្ដី តម្រូវការបន្ទប់ស្នាក់នៅ មិនមែនមានតែបុគ្គលិកកាស៊ីណូ និងអ្នករកស៊ីនោះទេ។ ក្នុងក្រុងប៉ោយប៉ែត ដែលប្រៀបបានទៅនឹងទីក្រុងបនល្បែង សម្បូរដោយអ្នកញៀនល្បែង ដែលភាគច្រើនជាជនជាតិថៃ។ បន្ទាប់ពីពួកគេចាញ់ល្បែងអស់លុយពីខ្លួន រហូតបញ្ចាំរបស់របរ រួមទាំងលិខិតឆ្លងដែន និងមិនអាចវិញត្រឡប់ទៅវិញបាន ពួកគេបានជួលបន្ទប់ដែលមានតម្លៃជាង ១ម៉ឺនរៀល ឬប្រហែល ៤ដុល្លារ ក្នុងមួយយប់ សម្រាប់ស្នាក់នៅ។ អ្នកជួលបន្ទប់នេះ ត្រូវដេកជុំគ្នាជាង ១០នាក់នៅលើការ៉ូ ដោយមានតែភួយ និងខ្នើយកើយម្នាក់មួយប៉ុណ្ណោះ។
លើសពីនេះ ដោយសារតែបន្ទប់ជួលនៅក្រុងប៉ោយប៉ែត មានតម្រូវការទីផ្សារខ្ពស់ អ្នករស់នៅបន្ទប់ជួលមួយចំនួន បានយកកន្លែងស្នាក់នៅរបស់ខ្លួន ដាក់គ្រែបន្ថែម ជាថ្នាក់ៗ ទុកសម្រាប់ជួលឱ្យអ្នកញៀនល្បែង ក្នុងតម្លៃ ៦ពាន់រៀលក្នុងមួយយប់។
វិទ្យុអាស៊ីសេរី មិនអាចទាក់ទងអភិបាលក្រុងប៉ោយប៉ែត លោក គាត ហ៊ុល និងអភិបាលរងខេត្តបន្ទាយមានជ័យ លោក ង៉ោ ម៉េងជ្រួន ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី៨ ខែតុលា។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា (CIREA) លោក ឌិន ពុទ្ធី សង្កេតឃើញថា បញ្ហាតម្លៃបន្ទប់ជួលឡើងថ្លៃ នៅក្នុងក្រុងប៉ោយប៉ែត បានដាក់បន្ទុកដល់ពលរដ្ឋខ្មែរ ដែលប្រកបរបរសេដ្ឋកិច្ចក្រៅប្រព័ន្ធ និងមានប្រាក់ចំណូលទាប ខ្វះលទ្ធភាពជួលបន្ទប់ស្នាក់នៅ ក្នុងនោះពួកគាត់ភាគច្រើន រស់នៅទីកន្លែងគ្មានផាសុកភាព និងគ្មានការគាំពារសង្គមត្រឹមត្រូវឡើយ។
លោក ឌិន ពុទ្ធី៖«បន្ទប់ជួលឡើងថ្លៃ គឺជាភាពពិត។ ប៉ុន្តែ អភិវឌ្ឍតែអាគារ អភិវឌ្ឍតែកាស៊ីណូ ប៉ុន្តែយើងក្រឡេកមើលហេដ្ឋារចនាសម្ព័ន្ធវិញ មានភាពរញ៉ែរញ៉ៃគ្មានរៀបចំសណ្ដាប់ធ្នាប់បានល្អទេ។ ខ្ញុំសំណូមពរ ឱ្យអភិបាលក្រុង និងអភិបាលខេត្តបន្ទាយមានជ័យ ហ្នឹង មេត្តាជួយមើល ពាក់ព័ន្ធនឹងសណ្ដាប់ធ្នាប់ ក៏ដូចជាហេដ្ឋារចនាសម្ពន្ធ ផ្លូវថ្នល់ ក៏ដូចជាប្រព័ន្ធលូ ប្រព័ន្ធលូ គឺភ្លៀងតែបន្តិចមក គឺស្អុយ ជះក្លិនមក គឺស្ទះគ្រប់កន្លែងទាំងអស់»។
ទិន្នន័យរបស់អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា បង្ហាញថា កាស៊ីណូ កំពុងប្រតិបត្តិការនៅក្នុងក្រុងប៉ោយប៉ែត សរុបមានចំនួន ៣១ទីតាំង ដែលភាគច្រើនផ្ដុំគ្នា នៅជាប់ច្រកព្រំដែនថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។