អាជីវករលក់ស្បៀងអាហារមួយចំនួនជួបការលំបាកដោយសារទំនិញឡើងថ្លៃរាល់ថ្ងៃធ្វើឱ្យពួកគាត់លក់មិនសូវដាច់ ហើយមុខទំនិញខ្លះខាតបង់ទៀតផង។ ជាមួយគ្នានេះលោកនាយករដ្ឋមន្ត្រីហ៊ុន ម៉ាណែត ប្រកាសប្ដេជ្ញាថា នឹងធ្វើឱ្យមានភាពប្រសើរឡើងបើពលរដ្ឋនៅតែគាំទ្រគណបក្សប្រជាជនកម្ពុជា។
អាជីវករដែលត្អូញត្អែរពីការខាតបង់លើកឡើងថា ពួកគាត់លក់យកចំណេញតិចតួចពីអតិថិជន ប៉ុន្តែពេលទៅទិញទំនិញពីកន្លែងបោះដុំធំៗគេបានដំឡើងថ្លៃពីមួយថ្ងៃទៅមួយថ្ងៃ។
អាជីវករនៅខេត្តកណ្តាលលោក វីរៈ ជ័យ ឱ្យដឹងថា លោកជួបបញ្ហាដោយសារ ភេសជ្ជៈនិងម្ហូប អាហារផ្សេងទៀតលោកលក់យកចំណេញតិចតួច ប៉ុន្តែពេលទៅទិញចូល គឺទំនិញទាំង នោះតែង តែឡើងថ្លៃ។
លោក វីរៈ ជ័យ៖ «មួយរយៈនេះយ៉ាប់លក់ដែរលក់អត់សូវដាច់ហើយរបស់វាថ្លៃពេកយើងយកចូល។ពេលដែលយើងយកចូលមកធូរថ្លៃ ដល់ពេលលក់ចេញអស់ទៅត្រូវទៅយកអាថ្មីមកលុយយើងក្នុងតម្លៃមុនទៅយកទំនិញថ្មីយកអត់បានទេព្រោះទំនិញថ្មីវាថ្លៃជាងអាយើងយកសារមុន»។
អាជីវករនៅរាជធានីភ្នំពេញ លោក លឹម ប៊ុនគា ថ្លែងថា ទំនិញរំកិលឡើងថ្លៃគ្រប់មុខទំនិញ ដោយខ្លះឡើងតិចខ្លះឡើងច្រើន។ លោកបន្តថា មុខទំនិញមួយចំនួន លោកឈប់លក់ដោយសារខាតបង់ ហើយបច្ចុប្បន្នមានចំណូលទាប ប៉ុន្តែចំណាយក្នុងគ្រួសារកើនឡើង។
លោក លឹម ប៊ុនគា៖«បោះឆ្នោតហើយសាំងក៏ឡើងថ្លៃហើយអង្ករក៏ឡើងថ្លៃ។ របស់បន្តិចបន្តួចចាប់ផ្តើមឡើងថ្លៃបន្តិចៗទាំងអស់។ ស្អីក៏ឡើងថ្លៃដែរបន្តិចៗទាំងអស់យើងមើលអត់ឃើញ១០០ឬ២០០អ៊ីចឹងទៅ។ ហើយសូម្បីតែសាលារៀនក៏ឡើងដែរ គឺសាលារៀនឡើងដល់២០ភាគរយ»។
អាជីវករនៅខេត្តពោធិ៍សាត់ លោក គ្រី គ្រឿន ប្រាប់ថា លោកផ្អាកលក់ និងជួសជុលទូរស័ព្ទដោយ សារមិនមានអតិថិជន។ ចំណែកស្បៀងអាហារដែលលោកនៅបន្តលក់គឺកំពុងឡើងថ្លៃឥតឈប់ឈរ ធ្វើឱ្យលោកខាតបង់ ឬចំណេញតិច នៅតាមមុខទំនិញ ដែលមិនមានលទ្ធភាពរកប្រាក់សងធនាគារ។
លោក គ្រី គ្រឿន៖«វាឡើងថ្លៃនិយាយទៅអីវ៉ាន់ហក់ឡើងថ្លៃ បើនិយាយពីអង្ករខ្ញុំទិញយកមកលក់មួយបេ ៩ម៉ឺនជាងឥឡូវឡើងជិត ១៣ម៉ឺនហក់ឡើង ១បេជាង២ម៉ឺន»។
ក្រុមអាជីវករឱ្យដឹងថាមុខទំនិញ រួមមានស្ករ អំបិល ទឹកត្រី ប្រេងឆា មី ពងទា និងអង្ករជាដើមគឺឡើង ថ្លៃពី ចន្លោះរាប់រយ ទៅរាប់ម៉ឺនរៀលក្នុង១មុខៗ។
ដោយឡែកស្ថានភាពនៅតាមផ្លូវទាំងក្នុងទីប្រជុំជន និងនៅតាមជនបទ រួមទាំងកន្លែងលក់ដូរនៅតាមផ្សារ ក៏ស្ងាត់មនុស្សដែរ។ អ្នកលក់ដូរ ភាគច្រើនមានទឹកមុខក្រៀមក្រំ រអ៊ូរទាំច្រើន និងបារម្ភពីបញ្ហាគ្មានប្រាក់បង់ធនាគារ។
វិទ្យុអាស៊ីសេរីមិនអាចទាក់ទងរដ្ឋមន្ត្រីក្រសួងសេដ្ឋកិច្ចលោក អូន ព័ន្ធមុនីរ័ត្ន និងរដ្ឋមន្ត្រីក្រសួង ពាណិជ្ជកម្ម អ្នកស្រី ចម និម្មល ដើម្បីសាកសួរបានទេនៅថ្ងៃទី៣ ខែកញ្ញា។
ប៉ុន្តែនៅថ្ងៃទី១ ខែកញ្ញា លោក ហ៊ុន ម៉ាណែត ថ្លែងប្រាប់កម្មករថា លោកប្ដេជ្ញាបង្កើតការងារ និងធ្វើពលរដ្ឋមានជីវភាពល្អប្រសើរ បើពលរដ្ឋនៅតែគាំទ្រគណបក្ស ប្រជាជនកម្ពុជា។
លោក ហ៊ុន ម៉ាណែត៖«ហ្នឹងហើយជាគោលនយោបាយដែលយើងធ្វើមកដល់ម៉ោងនេះហើយបងប្អូនជឿចុះ ដរាបណាបងប្អូននៅជឿទុកចិត្តឱ្យគណបក្សប្រជាជនបន្តដឹកនាំបម្រើប្រជាពលរដ្ឋគោល នយោបាយបង្កើតការងារនិងបង្កើនជីវភាពរស់នៅរបស់ប្រជាពលរដ្ឋនិងត្រូវបន្តជានិច្ច។ជាការប្ដេជ្ញាចិត្តដែលយើងបានធ្វើកន្លងមកហើយនិងបន្តធ្វើទៅទៀត»។
ទោះយ៉ាងណា លោក ហ៊ុន ម៉ាណែត មិនបានដាក់វិធានការច្បាស់លាស់ ក្នុងការដោះស្រាយឱ្យចំគោលដៅដែលពលរដ្ឋកំពុងប្រឈមបាត់បង់ការងារ បាត់បង់ចំណូលមិនមានលុយសងបំណុលនោះទេ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង គត់សម្គាល់ ឃើញថា ប្រជាពលរដ្ឋដាក់ផ្ទះនិងដីលក់ច្រើនដើម្បីសងបំណុលព្រោះចំណូលធ្លាក់ចុះ។ លោកជំរុញ ឱ្យរដ្ឋាភិបាលកែទម្រង់នយោបាយដើរតាមគន្លងប្រជាធិបតេយ្យ ដើម្បីទទួលបានការវិនិយោគពីប្រទេសលោកសេរីទើបសេដ្ឋកិច្ចជាតិនិងសេដ្ឋកិច្ចពលរដ្ឋបានប្រសើរឡើង។
របាយការណ៍ពីសមាគមមីក្រូហិរញ្ញវត្ថុកម្ពុជាបង្ហាញថា មុនពេលកូវីដពលរដ្ឋមិនមានលទ្ធភាព សង បំណុល រង្វង់១ភាគរយ អំឡុងកូវីដប្រមាណ៣ភាគរយ ប៉ុន្តែនៅក្នុងខែសីហា ឆ្នាំ២០២៣ ពលរដ្ឋមិនមានលទ្ធភាព សងបំណុលមានរហូតដល់៥ភាគរយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។