មន្ត្រី​សហជីព និង​សិទ្ធិ​ការងារ​​ថា GMAC គួរ​ប្រឹងប្រែង​ធ្វើ​នូវ​អ្វី​ដែល​​អឺរ៉ុប​ទាមទារ​ជាជាង​ការ​ប្ដឹង​ទៅ​តុលាការ​អឺរ៉ុប​រឿង​កាត់ EBA ២០ភាគ​រយ

ដោយ មួង ណារ៉េត
2020-09-28
អ៊ីម៉ែល
មតិ
Share
បោះពុម្ព
រូបសញ្ញា​របស់​សមាគម​រោងចក្រ​កាត់ដេរ​សំលៀកបំពាក់​នៅ​កម្ពុជា ហៅកាត់ថា ជីម៉ាក់ (GMAC)។
រូបសញ្ញា​របស់​សមាគម​រោងចក្រ​កាត់ដេរ​សំលៀកបំពាក់​នៅ​កម្ពុជា ហៅកាត់ថា ជីម៉ាក់ (GMAC)។
GMAC និង​ហ្វេសប៊ុក

មន្ត្រី​សហជីព​និង​សិទ្ធិ​ការងារ ​​ថា​ សមាគម​រោងចក្រ​កាត់ដេរ​នៅ​កម្ពុជា​ហៅ​កាត់​ថា GMAC ​ គួរ​​ជំរុញ​ទៅ​រដ្ឋាភិបាល​ឱ្យ​ប្រឹង​ប្រែង​បំពេញ​តាម​លក្ខខណ្ឌ​​ ដែល​​សហភាព​អឺរ៉ុប​ទាមទារ​ជាជាង​ការ​ប្ដឹង​ទៅ​តុលាការ​យុត្តិធម៌​ក្នុង​តំបន់​អឺរ៉ុប​រឿង​ ដក​ប្រព័ន្ធ​អនុគ្រោះ​ពន្ធ EBA ២០ភាគ​រយ។​ ការ​លើក​ឡើង​នេះ​​ក្រោយ​ពេល GMAC​ បាន​ប្ដឹង​ទៅ​តុលាការ​​សហភាព​អឺរ៉ុប​​ ពាក់ព័ន្ធ​នឹង​ការ​ដក​ប្រព័ន្ធ​អនុគ្រោះ​ពន្ធ ២០ភាគ​រយ​លើ​ការ​នាំ​ចេញ​ទំនិញ​របស់​កម្ពុជា​ទៅ​ទី​ផ្សារ​អឺរ៉ុប។

មន្ត្រី​សហជីព​និង​សិទ្ធិ​ការងារ​ សង្កេត​ឃើញ​​​នា​ពេល​កន្លង​មក​ថា នៅ​ពេល​គណៈកម្មការ​អឺរ៉ុប​​ដាក់​ទណ្ឌ​​ឬ​យក​ពន្ធ​ពី​ការ​នាំ​ចេញ​របស់​ប្រទេស​​ណា​មួយ​ចូល​ជា​ផ្លូវ​ការ​រួច​ហើយ​ គឺ​មិន​ដែល​មាន​ប្រទេស​​រង​ទណ្ឌ​កម្ម​នោះ​ប្ដឹង​ជំទាស់​បាន​ជោគជ័យ​ឡើយ​។​ ផ្ទុយ​ទៅ​វិញ​​មាន​តែ​ការ​ព្យាយាម​កែ​លម្អ​​តាម​សំណើ​អឺរ៉ុប​ទៅ​វិញ​ទេ​ទើប​អឺរ៉ុប​​ដក​ទណ្ឌកម្ម​របស់​ខ្លួន​វិញ។

នាយ​ក​ប្រតិបត្តិ​មជ្ឈមណ្ឌល​សម្ធ័ន្ធភាព​ការងារ និង​សិទ្ធិមនុស្ស (CENTRAL) លោក មឿន តុលា ​ យល់​ថា​ ការ​សម្រេច​ប្ដឹង​នេះ​ជា​សិទ្ធិ​របស់​សមាគម​រោងចក្រ​កាត់ដេរ​ប៉ុន្តែ​លោក​ថា​ការ​ព្យាយាម​ម្ដង​ហើយ​ម្ដង​ទៀត​របស់​សមា គម​រោងចក្រ​កាត់ដេរ​ក្នុង​ការ​ជំទាស់​ការ​យក​ពន្ធ​នេះ​ហាក់​​ទទួល​ស្គាល់​​​ថាការ​​យក​ពន្ធ​នេះ​ធ្វើ​ឱ្យ​មាន​ផល​ប៉ះពាល់​ធ្ងន់ធ្ងរ​លើ​សេដ្ឋ​កិច្ច​កម្ពុជា​មិន​មែន​ដូច​ការ​អះអាង​របស់​រដ្ឋាភិបាល​ និង​​ GMAC ​​កន្លង​មក​​ថា​មិន​ប៉ះពាល់​នោះ​ឡើយ៖ «សម្រាប់​ខ្ញុំ​រឿង​ដែល​សំខាន់​គឺ​ការ​កែ​លម្អ​ស្ថានភាព​សិទ្ធិ​ការងារ ច្បាប់​ការងារ ច្បាប់​សហជីព ដើម្បី​លើក​កម្ពស់​បញ្ហា​ទាំង​អស់​ហ្នឹង​ឱ្យ​ទៅ​នឹង​បទដ្ឋាន​ការងារ​អន្តរជាតិ»

លោក មឿន តុលា ឱ្យ​ដឹង​ទៀត​ថា​ តាម​ការ​សង្កេត​របស់​លោក​​កន្លង​មក​មាន​ប្រទេស​ក្នុង​តំបន់​អាស៊ី​ខាង​​កើត​ធ្លាប់​ប្ដឹង​ទៅ​តុលាការ​នៅ​តំបន់​អឺរ៉ុប​​ពី​ករណី​គណៈកម្មការ​អឺរ៉ុប​​ដាក់​ទណ្ឌកម្ម​នេះ​ដែរ ប៉ុន្តែ​មិន​ទទួល​បាន​ជោគ​ជ័យ​នោះ​ទេ។ ប៉ុន្តែ​លោក​ថា​ ផ្ទុយ​ទៅ​វិញ​ប្រទេស​ភូមា ឬ​មីយ៉ាន់ម៉ា (Myanmar) ខិតខំ​កែ​លម្អ​សិទ្ធិ​មនុស្ស​តាម​សំណើ​របស់​គណៈកម្មការ​អឺរ៉ុប ​​​ហើយ​ប្រទេស​នេះ​ក៏​រួច​ផុត​ពី​ការ​ដាក់​ទណ្ឌ​​ពី​សហភាព​អឺរ៉ុប។ មន្ត្រី​សិទ្ធិ​ការងារ​រូប​នេះ​បន្ត​ថា ចំពោះ​កម្ពុជា​វិញ ​ទម្រាំ​សហភាព​អឺរ៉ុប​សម្រេច​ដក​ហូត​ផ្លូវការ​នូវ​ប្រព័ន្ធ​អនុគ្រោះ​ពន្ធ ២០ភាគ​រយ គឺ​គេ​បាន​ទុក​ពេល​ជាង​មួយ​ឆ្នាំ​​​ហើយ​មន្ត្រី​ជំនាញ​អឺរ៉ុប​ ក៏បាន​ជួប​ជជែក​​និង​ស្រាវ​ជ្រាវ​​ពី​ភាគី​ពាក់ព័ន្ធ​ជាច្រើន​ដង​ថែម​ទៀត។

រីឯ​ប្រធាន​សហភាព​ការងារ​កម្ពុជា លោក អាត់ ធន់ និយាយ​ថា ការ​ដែល GMAC ប្ដឹង​ទៅ​តុលាការ​អឺរ៉ុប​នេះ​ជា​រឿង​ថ្មី​មួយ​ ខណៈ​លោក​សង្កេត​ឃើញ​ថា​បណ្ដា​ប្រទេស​មួយ​ចំនួន​ដែល​ត្រូវ​អឺរ៉ុប​​​បិទ​សេដ្ឋកិច្ច​ ឬ​ដាក់​ទណ្ឌកម្ម​​​គេ​ច្រើន​តែ​កែតម្រូវ​នូវ​សំណើ​របស់​អឺរ៉ុប។ ទោះ​យ៉ាង​ណា​​មន្ត្រី​សហជីព​មួយ​នេះ​សង្កេត​​ឃើញ​ថា​រដ្ឋាភិបាល​មិន​ទាន់​កែទម្រង់​ប្រព័ន្ធ​ការងារ​​ និង​សិទ្ធិមនុស្ស​តាម​ការ​ទាមទារ​របស់​សហភាព​អឺរ៉ុប​នៅ​ឡើយ​ទេ៖ «ហេតុ​មិន​រក​វិធី​កែ​តាម​ហ្នឹង​ទៅ​ស្រួល​ជាង​មិន​បាច់​ទៅ​ប្ដឹង ព្រោះ​ជា​ទូទៅ​សេចក្ដី​សម្រេច​នៅ​ពេល​គណៈកម្មការ​សម្រេច​រួច​ហើយ​គេ​រុញ​ទៅ​រដ្ឋាភិបាល ឬ​សភា​ជា​ការ​បិទ​ផ្លូវ​ហើយ ប៉ុន្តែ​ការ​ប្ដឹង​ទៅ​តុលាការ​ជា​រឿង​ថ្មី​មួយ​ដែរ»

ការ​លើក​ឡើង​របស់​មន្ត្រី​សហជីព​និង​សិទ្ធិ​ការងារ​​បែប​នេះ ក្រោយ​ពី​សមាគម​រោងចក្រ​កាត់ដេរ​សម្រេច​ដាក់​ពាក្យ​ប្ដឹង​ទៅ​តុលាការ​​សហភាព​អឺរ៉ុប​កាល​ពី​ខែ​កក្កដា​សុំ​ឱ្យ​តុលាការ​លុប​ចោល​ការ​សម្រេច​យក​ពន្ធ EBA ២០ភាគ​រយ​​ ពី​កម្ពុជា។ តាម​ពាក្យ​បណ្ដឹង​របស់ GMAC ខ្លួន​មាន​ហេតុ​ផល​ពីរ​សំខាន់​ក្នុង​​ការ​ប្ដឹង​ជំទាស់​​​ដោយ​ចោទ​ប្រកាន់​ថា​ ការសម្រេច​របស់​​គណៈកម្មការ​អឺរ៉ុប​​កាល​ពី​ថ្ងៃ​ទី១២​ ខែ​សីហា​កន្លង​ទៅ​មិនបាន​ធ្វើការ​វាយតម្លៃ​​ឱ្យ​បាន​សមរម្យ​​និង​ហេតុ​ផល​មួយទៀត​គឺ​​​​ការ​សម្រេច​នេះ​ជា​ការ​រំលោភ​លើ​សិទ្ធិ​​និង​​សន្ធិសញ្ញា​របស់​សហភាព​អឺរ៉ុប​។ ​រីឯ​តុលាការ​អឺរ៉ុប​បាន​​ឱ្យ​ដឹង​ថា​ ខ្លួន​បាន​ទទួល​ពាក្យ​ប្ដឹង​​នេះ​ហើយ​កាល​ពី​ថ្ងៃ​ទី១៤ ខែ​សីហា​ ប៉ុន្តែ​តុលាការ​មួយ​នេះ​មិន​ទាន់​ឱ្យ​ដឹង​ពី​នីតិវិធី​​បន្ត​ក្រោយ​ទទួល​ពាក្យ​បណ្ដឹង​នេះ​នៅឡើយ​ទេ។

អគ្គលេខាធិការ​នៃ​សមាគម​រោងចក្រ​កាត់ដេរ​​លោក ខេន លូ ​ឱ្យ​អាស៊ីសេរី​ដឹង​ថា​ ក្រោយ​តុលាការ​បាន​ទទួល​ពាក្យ​រួច​គឺ​មិន​ទាន់​មាន​ការ​វិវឌ្ឍ​អ្វី​បន្ថែម​ទៀត​ទេ​ហើយ​ពេល​ខាង GMAC រង់​ចាំ​នីតិវិធី​របស់​តុលាការ។ លោក​អះអាង​ដែរ​ថា​​ ក្នុង​ពាក្យ​បណ្ដឹង​ជាង ៣០ទំព័រ​ខាង GMAC បាន​ដាក់​ជូន​ពី​កិច្ច​ខិតខំ​ប្រឹង​របស់​ស្ថាប័ន​របស់​លោក​ក្នុង​ការ​លើក​កម្ពស់​​សិទ្ធិ​ការងារ​​​ដែល​ជា​ការ​តាម​​ទាមទារ​របស់​​សហភាព​អឺរ៉ុប​កន្លង​ទៅ៖ «ពាក្យ​បណ្ដឹង​យើង​ដាក់​ទៅ​ភាគី​ដែល​ដក​អនុគ្រោះ​ពន្ធ​អត់​មាន​ប៉ះពាល់​អ្នក​ផ្សេង​ទេ អត់​មាន​ប៉ះពាល់​រដ្ឋាភិបាល​ខ្មែរ​ទេ​អ៊ីចឹង​យើង​ដាក់​ចំ​គោល​បំណង​ហ្មង​ណា»

ជុំវិញ​​ការ​លើក​ឡើង​​​របស់​មន្ត្រី​សហជីព​ដែល​​ជំរុញ​ទៅ​សមាគម​រោងចក្រ​កាត់ដេរ​ គួរ​ស្នើ​ទៅ​រដ្ឋាភិបាល​ឱ្យ​ប្រឹង​ប្រែង​នូវ​អ្វី​ដែល​​អឺរ៉ុប​ទាមទារ​ជាជាង​ការ​ប្ដឹង​ទៅ​តុលាការ​​លោក ​ខេន​ លូ​ ប្រាប់​ថា​ ដោយ​សារ​អឺរ៉ុប​ជា​អ្នក​ដក​ EBA២០ភាគរយ ​ពី​កម្ពុជា​ដូច្នេះ​លោក​ត្រូវ​តែ​ប្ដឹង​ទៅ​តុលាការអឺរ៉ុប​។​ ​ ​ទោះ​យ៉ាង​ណា​ លោក ខេន​ លូ​ មិន​ទាន់​បង្ហាញ​ក្ដី​សង្ឃឹម​ថា​ខ្លួន​នឹង​ឈ្នះ​ក្ដី​ឬ​យ៉ាង​ណា​នោះ​ទេ​ ​ដោយ​លោក​និយាយ​​​ថា​នេះ​ជា​សមត្ថកិច្ច​របស់​តុលាការ។

កាល​ពី​ខែ​សីហា ​សហភាព​អឺរ៉ុប​ប្រកាស​ជា​ផ្លូវ​ការ​យក​​ពន្ធ​លើ​ទំនិញ​កម្ពុជា​២០% ធ្វើ​ឱ្យ​ផលិតផល​នាំ​ចេញ​របស់​កម្ពុជា​ទៅ​សហភាព​អឺរ៉ុប ដែល​មាន​តម្លៃ​ជាង ១ពាន់​លាន​អឺរ៉ូ​ត្រូវ​ជាប់​ពន្ធ ឬ​កម្ពុជា​អាច​នឹង​ត្រូវ​ខាតបង់​ទឹកប្រាក់​រវាង​ពី ១២០ ទៅ ២០០​ លាន​ដុល្លារ​ក្នុង​មួយ​ឆ្នាំ​ទៅ​លើ​ការ​បង់ពន្ធ។ ការបាត់បង់EBA ២០ភាគ​រយ​នេះ ដោយសារ​រដ្ឋាភិបាល​ដឹកនាំ ដោយ​គណបក្ស​ប្រជាជន​កម្ពុជា ​មិន​ព្រម​កែ​លម្អ​ស្ថានការណ៍​សិទ្ធិមនុស្ស​ និង​លទ្ធិប្រជាធិបតេយ្យ ។​ សមាគម​រោងចក្រ​កាត់ដេរ​នៅ​កម្ពុជា ​ព្យាករណ៍​ថា ការ​ដក​ប្រព័ន្ធ​អនុគ្រោះ​ពន្ធ (EBA) ចំនួន​ ២០ភាគ​រយ​នេះ អាច​នឹង​បណ្ដាល​ឱ្យ​កម្មករ​រាប់​ម៉ឺន​នាក់​បាត់​បង់​ការងារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល