អាមេរិកដំឡើងពន្ធថ្មីលើការនាំចូលបន្ទះស្រូបពន្លឺព្រះអាទិត្យពីកម្ពុជា ម៉ាឡេស៊ី វៀតណាម និងថៃ
2024.12.02
ឧទ្យានថាមពលពីពន្លឺព្រះអាទិត្យដែលមានអនុភាព ១០ មេហ្កាវ៉ាត់ នៅក្រុងបាវិត ខេត្តស្វាយរៀង។
រូប៖ ហ្វេសប៊ុកលោក កែវ រតនៈ
មន្ត្រីក្រសួងពាណិជ្ជកម្មសហរដ្ឋអាមេរិកប្រកាសពីការដំឡើងពន្ធថ្មីលើការនាំចូលបន្ទះស្រូបពន្លឺព្រះអាទិត្យ ឬផ្ទាំងសូឡា ពីប្រទេសចំនួន ៤ នៅអាស៊ីអាគ្នេយ៍ រួមមានកម្ពុជា ម៉ាឡេស៊ី (Malaysia) វៀតណាម (Vietnam) និងថៃ (Thailand)។
សារព័ត៌មានរ៉យទ័រស៍ (Reuters) រាយការណ៍កាលពីថ្ងៃទី២៩ ខែវិច្ឆិកា ថា នេះជាការសម្រេចជាបឋមមួយទៀត របស់ក្រសួងពាណិជ្ជកម្មនៃរដ្ឋបាលប្រធានាធិបតី ចូ បៃដិន (Joe Biden) ឆ្លើយតបនឹងបណ្ដឹងរបស់ក្រុមហ៊ុនក្នុងស្រុករបស់អាមេរិក ដែលត្អូញត្អែរពីផលប៉ះពាល់ទីផ្សារ ដោយសារផលិតផលនាំចូលតម្លៃថោកច្រើនលើសលុប ជោរជន់ទីផ្សារ និងគ្មានការប្រកួតប្រជែងដោយយុត្តិធម៌។ ក្រុមហ៊ុនអាមេរិកាំងទាំងនេះ បានចោទក្រុមហ៊ុនផលិតបន្ទះសូឡារបស់ចិនធំៗ ដែលមានរោងចក្រក្នុងប្រទេសកម្ពុជា ម៉ាឡេស៊ី វៀតណាម និងថៃ ថាបានធ្វើឱ្យតម្លៃបន្ទះសូឡានៅលើពិភពលោកធ្លាក់ចុះជាគំហុក ដោយសារតែការលក់ផលិតផលរបស់ខ្លួនច្រើនលើសលប់ក្នុងតម្លៃថោកជាងទីផ្សារក្នុងស្រុករបស់អាមេរិក។
នៅក្នុងសេចក្ដីសម្រេចចេញកាលពីថ្ងៃសុក្រ ទី២៩ ខែកញ្ញា ក្រសួងពាណិជ្ជកម្មអាមេរិក បានកំណត់ពន្ធថ្មីចន្លោះពី ២១,៣១% ទៅ ២៧១,២% អាស្រ័យទៅលើប្រភេទបន្ទះសូឡា ដែលនាំចូលពីកម្ពុជា ម៉ាឡេស៊ី វៀតណាម និងថៃ។
បើទោះជាយ៉ាងណាក្រសួងពាណិជ្ជកម្មអាមេរិកកំណត់ថា នឹងចេញការសម្រេចជាចុងក្រោយទាក់ទងនឹងរឿងនេះនៅថ្ងៃទី១៨ ខែមេសា ឆ្នាំ២០២៥។
កាលពីខែមិថុនា ក្រសួងពាណិជ្ជកម្មអាមេរិកបានចេញសេចក្ដីសម្រេចបឋមម្ដងរួចហើយ ដោយសម្រេចលុបចោលការអនុគ្រោះពន្ធលើការនាំចូលបន្ទះសូឡា ពីបណ្ដាប្រទេសទាំង៤ នេះ។
អ្នកជំនាញផ្នែកពាណិជ្ជកម្មក្នុងតំបន់អាស៊ានមើលឃើញថា ផលប៉ះពាល់នៃបញ្ហានេះគឺនឹងធ្វើឱ្យរោងចក្រ ដែលដំឡើង ឬផលិតបន្ទះសូឡានៅតាមបណ្ដាប្រទេសទាំងនេះអាចប្រឈមនឹងការបិទទ្វារ លែងដំណើរការ។
សហរដ្ឋអាមេរិកនាំចូលបន្ទះសូឡាពីក្រៅប្រទេសរហូតដល់ ៨០% ហើយភាគច្រើននាំចូលពីកម្ពុជា ម៉ាឡេស៊ី វៀតណាម និងថៃ។
ក្នុងចំណោមប្រទេសទាំងនោះ កម្ពុជាជាប្រទេសលេចធ្លោក្នុងការនាំបន្ទះសូឡាទៅសហរដ្ឋអាមេរិកសម្រាប់ឆ្នាំ ២០២២ និង២០២៣ ខណៈតួលេខពាណិជ្ជបញ្ជាក់ថា កម្ពុជាក៏នាំចូលបន្ទះសូឡាច្រើនជាងគេពីប្រទេសចិនដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន