អ្នកប្រកបរបរលក់ដូរនៅក្នុងផ្សាររាត្រី នៅខេត្តបាត់ដំបង កំពុងជួបបញ្ហាជីវភាព ដោយសារលក់ដូរលែងដាច់ គ្មានអតិថិជនចូលទិញ ក្រោយពេលរដ្ឋបាលខេត្តផ្លាស់ប្ដូរទីតាំងផ្សារ។ ស្របពេលគ្នានេះ ក្រុងបាត់ដំបង ក៏តែធ្លាក់សោភ័ណភាពដោយសារផ្លូវខូចស្ទើរគ្រប់កន្លែង និងមិនសូវមានភ្ញៀវទេសចរមកដើរលេងកម្សាន្តដូចមុន។ មន្ត្រីសង្គមស៊ីវិល ជំរុញឱ្យរដ្ឋបាលខេត្តរៀបចំផ្សាររាត្រីឡើងវិញ។
នៅតាមសួនច្បារក្រុងបាត់ដំបង ក្នុងពេលរាត្រី ហាក់មានភាពស្រស់បំព្រង និងភ្លឺចិញ្ចែងចិញ្ចាច ក្រោយភ្លៀងធ្លាក់ជោកជាំ ខណៈមនុស្សម្នាចេញមកដើរលេងកម្សាន្ត ខ្លះលេងកីឡា និងខ្លះទៀតហាត់ប្រាណ។ ប៉ុន្តែ ចំពោះអាជីវករលក់ដូរនៅក្នុងផ្សាររាត្រី ជាប់នឹងសួនកម្សាន្តវិញ បែរជាមានទឹកមុខសោកសៅ ដោយអ្នកខ្លះអង្គុយលេងទូរស័ព្ទ ខ្លះអង្គុយក្រាបលើតុ និងខ្លះទៀតអង្គុយបណ្ដើរ ហាមាត់ស្ងាបបណ្ដើរ។
នៅពេលមានភ្ញៀវដើរ ឬក៏ជិះម៉ូតូឆ្លងកាត់តាមផ្លូវនេះម្ដងៗ អាជីវករប្រុសស្រី តែងចេញមកបក់បោយដៃហៅ ឱ្យចូលមកជួយទិញជាហូរហែ ដោយមានភ្ញៀវភាគតិចណាស់ ឈប់អែបម៉ូតូចូលទិញ។ នៅពេលភ្ញៀវដើរទៅហួសអស់ អាជីវករក៏ត្រឡប់ទៅអង្គុយនៅកៅអីវិញដោយធ្វើមុខជូរ ព្រោះមានអ្នកខ្លះបើកតូបតាំងពីថ្ងៃភ្លឺ រហូតដល់យប់ជ្រៅ ក៏នៅមិនទាន់លក់បានថ្លៃដើមនៅឡើយ។
អាជីវករលក់អាហារ លោក សាំង សុភាព ប្រាប់វិទ្យុអាស៊ីសេរីថា លោកលក់អាហារប្រចាំខេត្តបាត់ដំបង ស្ទើរគ្រប់មុខ តែគ្មានអ្នកចូលបរិភោគឡើយ ទោះបីនៅថ្ងៃចុងសប្ដាហ៍ក្ដី។ លោកបន្តថា បញ្ហានេះបណ្ដាលមកពីការរៀបចំទីតាំងផ្សាររាត្រីមិនត្រឹមត្រូវ ដោយយកទៅដាក់ចំកណ្ដាលទ្រូងផ្លូវ ផ្ទុយទិសចរាចរណ៍ ធ្វើឱ្យភ្ញៀវមិនងាយឈប់ចូលហូបអាហារ ឬទិញទំនិញនោះឡើយ។
លោក សាំង សុភាព៖«បើតូបគេក្រោយខ្នងម្ខាងម្នាក់ហ្នឹង មួយជួរហ្នឹងគេលក់ដាច់គ្រាន់ជាងយើងខាងនេះ ព្រោះផ្លូវចូលខាងស្ដាំដៃរបស់គេ។ បើយើងសុំទៅចៅហ្វាយខេត្តគាត់និយាយជាមួយយើងវិញថា លក់មិនកើតឈប់លក់ទៅ»។
អាជីវករផ្សាររាត្រី ចាប់ផ្ដើមលក់ដូរចាប់ពីម៉ោង ២រសៀល រហូតដល់ម៉ោង ៥ព្រឹក ហើយនៅចន្លោះម៉ោង ៧យប់ រហូតដល់ម៉ោង ១១យប់ គឺជាពេលសម្បូរមនុស្សចេញដើរច្រើន។ ប៉ុន្តែអ្នកមកដើរលំហែភាគច្រើន មិនសូវចូលហូបចំណីអាហារ ឬទិញរបស់របរនៅផ្សាររាត្រីនោះទេ ដោយសារមិនសូវមានកន្លែងដើរ។ បញ្ហានេះ បានធ្វើឱ្យអាជីវករមួយចំនួនត្រូវក្ស័យធន បិទតូបចោល និងខ្លះទៀតដាក់ស្លាកលក់ ឬជួល ដែលធ្វើឱ្យល្វែងតូបខ្លះ មានចន្លោះដាច់ពីគ្នាជាកំណាត់ ធ្វើឱ្យផ្សាររាត្រីក្រុងបាត់ដំបង កាន់តែស្ងាត់គ្មានភាពទាក់ទាញ។
អាជីវករលក់អាហារនៅផ្សាររាត្រីម្នាក់ទៀត គឺកញ្ញា សរ សុផល រៀបរាប់ថា ការលក់ដូរនៅផ្សាររាត្រីបច្ចុប្បន្ន មិនសូវកាក់កបដូចកាលពីមុននោះទេ ព្រោះតូបលក់អាហារ មានទីធ្លាតូចចង្អៀតមិនអាចដាក់តុឱ្យភ្ញៀវអង្គុយបាន ហើយថែមទាំងមានផ្លូវលិចទឹកនៅរដូវវស្សា និងដីហុយនៅរដូវប្រាំងទៀតផង។ កញ្ញាបន្តថា បើប្រៀបធៀបទៅនឹងការលក់ដូរនៅផ្សាររាត្រីទីតាំងចាស់ តាមមាត់ស្ទឹង ការលក់ដូរនៅទីតាំងថ្មីនេះ គឺមានការថយចុះពាក់កណ្ដាល ដោយមានថ្ងៃខ្លះ កញ្ញាលក់ចូលដើម ក៏មាន ក្នុងនោះ មានអាជីវករមួយចំនួន លក់ឡុងចុង រហូតទាល់តែសេងតូបឱ្យអ្នកដទៃទៀតផង ។
កញ្ញា សរ សុផល៖«ចំណូលបើប្រៀបធៀបទៅ ខុសពីកន្លែងចាស់យើងដាច់។ បើឱ្យចំណេញ លក់មកដល់ឥឡូវអត់ចំណេញទេ ពេលខ្លះចូលដើមទៀត ចូលដើមសឹងរាល់ថ្ងៃហើយ។ ពួកយើងចំណាយច្រើន ព្រោះចំណាយថ្លៃតូប ១ខែចូលជិត ១លានរៀលទៅហើយ។ អាជីវករច្រើន ភ្ញៀវខ្លះក៏ទិញអាជីវករផ្សេងទៅ ដល់ពេលម៉ូតូឡានចតទៅ ធ្វើឱ្យមានការកកស្ទះ។ ពេលស្ទះភ្ញៀវខ្លះឃើញអ៊ីចឹង គាត់អត់ឈប់ទេ ហើយគាត់ជិះទៅមុខទៀត។ ភ្ញៀវខ្លះទៀតគាត់គិតថា នៅជាប់នឹងចិញ្ចើមផ្លូវពេក វាហុយ»។
កាលពីដំបូងឡើយ ផ្សាររាត្រីក្រុងបាត់ដំបង មានទីតាំងស្ថិតនៅប្របតាមមាត់ស្ទឹងសង្កែ ត្រើយខាងលិចចាប់តាំងពីមុខសារមន្ទីរ រហូតដល់សួននាគបាញ់ទឹក ដែលមានចំនួន ២៨តូប និងមានអាជីវករលក់នំប៉័ង បបរគុយទាវ នំបញ្ចុកសង្វាក់ ទឹកផ្លែឈើក្រឡុក បង្អែម និងចំណីអាហារផ្សេងទៀត។ ផ្សាររាត្រីនៅក្បែរមាត់ស្ទឹងសង្កែ កាលនោះ មានអតិថិជន ភ្ញៀវក្នុងស្រុក និងក្រៅស្រុកជាច្រើន បានចូលមកអង្គុយទទួលទានអាហារនៅតូបផ្សាររាត្រី ព្រោះទីនោះមានបរិយាកាសស្រស់ស្រាយ ទីធ្លាធំទូលាយ ហើយភ្ញៀវទេសចរ អាចគយគន់ទេសភាពស្ទឹងសង្កែ បានផងដែរ។
ក៏ប៉ុន្តែ នៅមីនា ឆ្នាំ២០២៣ រដ្ឋបាលក្រុងបាត់ដំបង បានបង្ខំឱ្យអាជីវកររុះរើតូបលក់ដូរ ចេញពីមាត់ស្ទឹងសង្កែ ក្នុងរយៈពេលបីថ្ងៃ ទៅខាងលិចសួនចំប៉ី ដើម្បីយកទីតាំងធ្វើសួនច្បារសម្ដេច ស ខេង និងវិមានឯករាជ្យ ដោយអាជ្ញាធរបានសន្យាជួសជុលផ្លូវនៅជិតវត្តដំរីស និងសាងសង់តូបឱ្យអាជីវករ សម្រាប់ជាការដោះដូរឱ្យពួកគាត់ទៅលក់នៅទីនោះវិញ។ ម៉្យាងទៀត តូបដែលអាជ្ញាធរសង់ឱ្យអាជីវករនៅទីតាំងថ្មីនោះ មានផ្ទៃត្រឹមតែ ២ម៉ែត្រកន្លះបួនជ្រុងប៉ុណ្ណោះ ដែលធ្វើឱ្យផ្សារ មានភាពចង្អៀតណែនតាន់តាប់ និងមិនមានកន្លែងគ្រប់គ្រាន់ សម្រាប់ដាក់តុឱ្យភ្ញៀវអង្គុយឡើយ។
វិទ្យុអាស៊ីសេរី មិនអាចទាក់ទងអភិបាលខេត្តបាត់ដំបង លោក សុខ លូ និងអភិបាលក្រុងបាត់ដំបង លោក លាង វាសនា ដើម្បីសុំការបកស្រាយជុំវិញរឿងនេះបានទេ នៅថ្ងៃទី២២ ខែកក្កដា។
ទាក់ទិនរឿងនេះ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ លោក វន់ ពៅ យល់ឃើញថា រឿងសំខាន់ ដែលរដ្ឋបាលខេត្តត្រូវធ្វើនៅពេលនេះ គឺត្រូវការរៀបចំផ្សាររាត្រីឡើងវិញ ដោយផ្ដោតទៅលើសោភ័ណភាព ភាពទាក់ទាញសម្បូរបែប និងទីតាំងធំទូលាយ ដូចផ្សាររាត្រីនៅក្រុងសៀមរាប ឬដូចប្រទេសជិតខាង។ លោកបន្តថា រដ្ឋាភិបាលគួរបង្កើនការទាក់ទាញភ្ញៀវទេសចរក្រៅស្រុកមកបន្ថែមទៀត តាមរយៈការធានាលើសុវត្ថិភាពសង្គម ការធ្វើដំណើរ បដិសណ្ឋារកិច្ច និងងាកមកគោរពសិទ្ធិមនុស្ស ប្រជាធិបតេយ្យ ដែលជាកត្តាទាក់ទាញភ្ញៀវទេសចរពីប្រទេសលោកសេរីកាន់តែច្រើន។
លោក វន់ ពៅ៖«យើងមើលផ្សាររាត្រីនៅផ្សារចាស់តែបន្តិចហ្នឹង។ ដល់អ៊ីចឹង វាហាក់មិនទាន់មានការទាក់ទាញភ្ញៀវទេសចរ។ អ៊ីចឹង ផ្សាររាត្រី ធ្វើឱ្យទូលំទូលាយដូចប្រទេសគេជិតខាង គិតថា ល្អហើយ។ ប្រទេសខ្លះ គេធ្វើផ្សាររាត្រីដល់ក្នុងទឹកក្នុងអីផង អានេះជាចំណុច ដែលទាក់ទាញភ្ញៀវទេសចរផងដែរ ហើយអ្វី ដែលសំខាន់ គឺការរៀបចំសេវាឱ្យគិតអំពីសីលធម៌ទាក់ទងនឹងអាជីវកម្ម ចៀសវាងនូវការកោរភ្ញៀវ ឬធ្វើឱ្យភ្ញៀវមិនសប្បាយចិត្ត ដោយប្រការណាមួយ អាហ្នឹងជាចំណុចមួយ ដែលត្រូវគិតដែរ»។
ពាក់ព័ន្ធនឹងការប្ដូរទីតាំងផ្សាររាត្រីនេះ កាលពីចុងឆ្នាំ២០២២ ប្រជាពលរដ្ឋនៅខេត្តបាត់ដំបង ធ្លាប់ប្រតិកម្ម និងរិះគន់អាជ្ញាធរខេត្តនេះ ម្ដងរួចមកហើយ បន្ទាប់ពីបានរុះរើ និងកាប់គាស់ដើមផ្កាចំប៉ី ដែលជាស្នាដៃបន្សល់ពីអភិបាលខេត្តចាស់ លោក អ៊ុង សាមី ក្នុងអំឡុងឆ្នាំ១៩៩៣ ដល់ឆ្នាំ១៩៩៩ ដែលជាកន្លែងផ្ដល់ម្លប់សម្រាប់ពលរដ្ឋសម្រាក និងដើរលំហែហាត់ប្រាណ យកមកបង្កើតផ្សាររាត្រីនេះ។
អាជីវករបារម្ភថា ប្រសិនបើរដ្ឋបាលខេត្តបាត់ដំបង មិនរៀបចំផ្សាររាត្រីឡើងវិញទេ ពួកគាត់នឹងត្រូវបោះបង់មុខរបរមួយនេះ ដោយសារគ្មានចំណូល នាំឱ្យក្ស័យធនជំពាក់ធនាគារ ហើយប្រឈមនឹងភាពឥតការងារធ្វើដោយសារគ្មានដើមទុនប្រកបរបរផ្សេងទៀត។ ពួកគាត់ស្នើឱ្យអភិបាលខេត្តលោក សុខ លូ ដោះស្រាយបញ្ហានេះជាបន្ទាន់ ដើម្បីសេដ្ឋកិច្ចពលរដ្ឋ និងលើកមុខមាត់ខេត្តបាត់ដំបងឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។