សកម្មជន​បរិស្ថាន​​សុំ​​របប​ក្រុង​ភ្នំពេញ​បើក​​ឲ្យ​សាធារណជន​ចូល​​មើល​​ទីតាំង​​ផ្ទុក​​សំរាម ៨៣​កុងតឺន័រ ដើម្បី​​ឱ្យ​​ប្រាកដ​​ថា ពិត​​ជា​​បាន​​បញ្ជូន​​ចេញ​​អស់

ដោយ ថន ថារ៉ូ
2019-09-18
អ៊ីម៉ែល
មតិ
Share
បោះពុម្ព
កាកសំណល់​ពី​បរទេស​ចំនួន ៨៣​កុងតឺន័រ ទម្ងន់​ប្រមាណ ១.៦០០​តោន ចូល​មក​កំពង់ផែ​ខេត្ត​ព្រះសីហនុ កាល​ពី​ថ្ងៃទី១៦ កក្កដា ២០១៩។
កាកសំណល់​ពី​បរទេស​ចំនួន ៨៣​កុងតឺន័រ ទម្ងន់​ប្រមាណ ១.៦០០​តោន ចូល​មក​កំពង់ផែ​ខេត្ត​ព្រះសីហនុ កាល​ពី​ថ្ងៃទី១៦ កក្កដា ២០១៩។
រូប​ពី​ហ្វេសប៊ុក​ក្រសួង​បរិស្ថាន

សកម្មជន​បរិស្ថាន​ ស្នើ​សុំ​របប​ក្រុង​ភ្នំពេញ បើក​ឲ្យ​សាធារណៈ​ជន អាច​ចូល​មើល​ទីតាំង​ដាក់​កុងតឺន័រ​ ដើម្បី​ឲ្យ​ប្រាកដ​ថា សំរាម​ទាំង​ទាំង​៨៣​កុងតឺន័រ ពិត​ត្រូវ​បាន​បញ្ជូន​ចេញ​អស់​មែន។ អាជ្ញាធរ​មិន​ទាន់​អាច​បញ្ជាក់​ថា ទីតាំង​នោះ នឹង​ត្រូវ​បើក​ឲ្យ​ចូល​​​មើល ឬ​យ៉ាង​ណា​ទេ។

សកម្មជន​បរិស្ថាន លោក ថុន រដ្ឋា មិន​ទាន់​ជឿជាក់​​ថា​ អាជ្ញាធរ​គយ​បាន​បញ្ជូន​សំរាម​ទាំង ៨៣​កុងតឺន័រ​ចេញ​ពី​កម្ពុជា​ទេ ព្រោះ​លោក​មិន​ទាន់​បាន​ឃើញ​ទីតាំង​ផ្ទុក​កុងតឺន័រ​ដាក់​សំរាម​ទាំង​នោះ​ថា ដឹក​ចេញ​ពី​កម្ពុជា​អស់​ឬ​នៅ។ លោក​ថា សកម្មជន​បរិស្ថាន​ធ្លាប់​សុំ​ចូល​ទៅ​មើល​ទីតាំង​កុងតឺន័រ​ទាំង​ ៨៣​នោះ នៅ​ក្នុង​បរិវេណ​កំពង់ផែ​ក្រុង​ព្រះសីហនុ​ដែរ តែ​មន្ត្រី​បដិសេធ។ លោក​ចង់​ឲ្យ​មន្ត្រី​បង្ហាញ​ទី​តាំង​នោះ ឲ្យ​ពលរដ្ឋ​ចូល​មើល ទើប​ពួក​គេ​ជឿ​ថា​សំរាម​ទាំង​នោះ ពិត​ត្រូវ​បាន​ដឹក​ចេញ​មែន៖ «បើ​សិន​ជា​បាន​ដឹក​ចេញ​មែន យើង​ចង់​ឲ្យ​គយ​ហ្នឹង មិន​មែន​ត្រឹម​ប្រកាស​ថា ​ក្រុមហ៊ុន​បាន​ដឹក​ចេញ​ទៅ​ប្រទេស​ដើម​ យើង​ចង់​ឲ្យ​បង្ហាញ​នូវ​តម្លា​ភាព អាច​ថា មាន​អង្គការ​សង្គម​ស៊ីវិល​ យុវជន ប្រជាពលរដ្ឋ​ហ្នឹង បាន​ចូល​ទៅ​មើល​ ថា​ប្រាកដ​ជា សំរាម​ទាំង​ ៨៣​កុងតឺន័រ​ហ្នឹង​បាន​ដឹក​ចេញ​ពី​កម្ពុជា​ជាក់ស្ដែង​មែន ព្រោះ​យើង​អត់​មាន​ជំនឿ​ចិត្ត​ទៅ​លើ​របប​លោក ហ៊ុន សែន ទេ។ កន្លង​មក​ហ្នឹង​ គឺ​ទាក់ទង​នឹង​តម្លាភាព​គឺ​អត់​មាន​សោះ។ អ៊ីចឹង​បាន​ជា​ពួក​យើង​ថា អ្វី​ដែល​ពួកគាត់​និយាយ​ អត់​មាន​ភាព​ប្រាកដ​ជឿ​ ១០០​ភាគ​​រយ​ថា ប្រាកដ​ជា​សំរាម​ទាំង ៨៣​កុងតឺន័រ ដឹក​ចេញ​ប្រាកដ​មែន​ ឬ​អត់​ ទាល់​តែ​យើង​ឃើញ​ជាក់​ស្ដែង​ថា​ មិន​មាន​ឃើញ​អា​កុងតឺន័រ​សំរាម​ហ្នឹង ក្នុង​ផែ​ក្រុង​ព្រះសីហនុ ហើយ​មាន​ឯកសារ​បញ្ជាក់​អ្វី​ជា​ដើម​ហ្នឹង ទើប​យើង​ជឿ​ទុក​ចិត្ត»

អគ្គ​នាយកដ្ឋាន​គយ និង​រដ្ឋាករ​កម្ពុជា កាលពី​ថ្ងៃ​ទី១៦ កញ្ញា​ប្រកាស​ថា កាក​សំណល់​ប្លាស្ទីក​ចំនួន ៨៣​កុងតឺន័រ ដែល​បាន​លួច​នាំ​ចូល​ប្រទេស​កម្ពុជា​ដោយ​ខុស​ច្បាប់ ដោយ​ក្រុមហ៊ុន​ប្លាស្ទីក ជុង ង្វៀង (CHUNGYUEN PLASTIC MANUFACTURE) ត្រូវ​បាន​បញ្ជូន​ចេញ​ពី​ប្រទេស​កម្ពុជា ទៅ​ប្រទេស​ដើម​វិញ​អស់​ហើយ។ ក្នុង​សេចក្ដី​ប្រកាស​ព័ត៌មាន​អគ្គ​នាយកដ្ឋាន​គយ និង​រដ្ឋាករ​កម្ពុជា បញ្ជាក់​ថា ក្រុមហ៊ុន​នេះ បាន​ដឹក​ជញ្ជូន​កាក​សំណល់​ប្លាស្ទិក​ទម្ងន់​ជិត ១ពាន់ ៦រយ​តោន (.៦០០) ចេញ​ ចំនួន​ ២​លើក ដោយ​លើក​ទី​១ ដឹក​ចេញ​ចំនួន​ ១៤​កុងតឺន័រ កាល​ពី​ថ្ងៃ​ទី២០ ខែ​សីហា ហើយ​លើក​ទី២ បាន​បន្ត​ដឹក​ចេញ​កាក​សំណល់​ប្លាស្ទិក​ នៅ​សេស​សល់​ចំនួន ៦៩​កុងតឺន័រ កាល​ពី​ថ្ងៃ​ទី១៥ ខែ​កញ្ញា។

បន្ថែម​ពី​នេះ អគ្គ​នាយកដ្ឋាន​គយ និង​រដ្ឋាករ​កម្ពុជា បាន​ផាក​ពិន័យ​ក្រុមហ៊ុន​ឲ្យ​បង់​ប្រាក់​ផាក​ពិន័យ​ចំនួន ២ម៉ឺន ៥ពាន់ (២៥.០០០) ដុល្លារ​អាមេរិក តាម​លក្ខខណ្ឌ ដែល​បាន​សម្រេច​ដោយ​សមត្ថកិច្ច​កម្ពុជា ចប់​សព្វ​គ្រប់​អស់​ហើយ។

អ្នក​នាំ​ពាក្យ​សាលា​ខេត្ត​ព្រះសីហនុ លោក ឃាង ភារម្យ ប្រាប់​អាស៊ី​សេរី​ថា លោក​មិន​ដឹង​ប្រាកដ​ថា សំរាម​ទាំង ៨៣​កុងតឺន័រ នៅ​ខេត្ត​ព្រះសីហនុ ត្រូវ​បាន​ដឹក​ចេញ​អស់​ ឬ​នៅ​ទេ។ លោក​បង្វែរ​ឲ្យ​ទៅ​សួរ​ព័ត៌មាន​បន្ថែម​ ពី​ខាង​អគ្គនាយកដ្ឋាន​គយ និង​ក្រសួង​បរិស្ថាន៖ «បើ​សម្រាប់​ខ្ញុំ ខ្ញុំ​អត់​ច្បាស់​ទេ រឿង​ព័ត៌មាន​ ព្រោះ​ដោយសារ​ការ​គ្រប់គ្រង​ករណី​នេះ គឺ​ស្ថាប័ន​គយ និង​ក្រសួង​បរិស្ថាន»

អាស៊ី​សេរី មិន​អាច​សុំ​ការ​បញ្ជាក់​ពី​អគ្គនាយក​នៃ​អគ្គនាយកដ្ឋាន​គយ និង​រដ្ឋាករ​កម្ពុជា លោក គុណ ញឹម បាន​ទេ នៅ​ថ្ងៃ​ទី១៨ កញ្ញា ដោយសារ​ទូរស័ព្ទ​រោទ៍​គ្មាន​អ្នក​ទទួល។

ទោះ​បី​ជា​យ៉ាង​ណា អ្នក​នាំ​ពាក្យ​ក្រសួង​បរិស្ថាន លោក នេត ភក្ត្រា អះអាង​ថា សំរាម​ទាំង ៨៣​កុងតឺន័រ ពិត​ជា​ត្រូវ​បាន​អគ្គនាយកដ្ឋាន​គយ និង​រដ្ឋាករ​កម្ពុជា បញ្ជូន​ចេញ​អស់​ហើយ តែ​លោក​មិន​បញ្ជាក់​ថា សំរាម​ទាំង​នោះ ត្រូវ​បញ្ជូន​ចេញ​ទៅ​ប្រទេស​ណា​ទេ៖ «អគ្គ​នាយកដ្ឋាន​គយ និង​រដ្ឋាករ ក៏​ដូចជា​ក្រសួង​បរិស្ថាន​ និង​ភាគី​ពាក់ព័ន្ធ​នានា​ ផ្សេង​ទៀត នៅ​ក្នុង​ការ​ទប់​ស្កាត់ ក៏​ដូច​ជា​ចាប់​បញ្ជូន​ឲ្យ​កុងតឺន័រ​សំរាម​ប្លាស្ទិក​ទាំង​៨៣ ឲ្យ​វិល​ទៅ​ប្រទេស​ដើម​វិញ»

កាកសំណល់​សំរាម​ប្លាស្ទិក ចំនួន ៨៣​កុងតឺន័រ ត្រូវ​បាន​វេច​ខ្ចប់​យ៉ាង​មាន​របៀបរៀបរយ​ដាក់​នៅ​ក្នុង​កុងតឺន័រ​ដឹក​មក​កាន់​កំពង់ផែ​ក្រុង​ព្រះសីហនុ ជា​បន្ត​បន្ទាប់ តាំង​ពី​ខែ​តុលា​ឆ្នាំ២០១៨។ របប​ក្រុង​ភ្នំពេញ​បញ្ចេញ​ព័ត៌មាន​នេះ កាល​ពី​ថ្ងៃ​ទី១៦ ខែ​កក្កដា។ អាជ្ញាធរ​អះអាង​ថា សំរាម ៨៣​កុងតឺន័រ មាន​ប្រភព​ចេញពី​សហរដ្ឋ​អាមេរិក និង​ប្រទេស​កាណាដា តាម​រយៈ​ក្រុមហ៊ុន​ចិន ដឹក​យក​មក​ទម្លាក់​ចោល នៅ​កំពង់ផែ​ក្រុងព្រះសីហនុ។ ទោះ​យ៉ាង​ណា ស្ថាប័ន​គយ​អះអាង​ថា មន្ទីរ​ពិសោធន៍​រក​ឃើញ​ថា កាក​សំណល់​ប្លាស្ទិក​ទាំង ៨៣​កុងតឺន័រ​នោះ គ្មាន​ផ្ទុក​សារធាតុ​គ្រោះ​ថ្នាក់​ដល់​សុខភាព​ឡើយ។ ស្ថានទូត​អាមេរិក​នៅ​កម្ពុជា​ធ្លាប់​បដិសេធ​មិន​អត្ថាធិប្បាយ ចំពោះ​កាក​សំណល់​សំរាម​នេះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

all 83 toxic wastes containers already dumped into the seawater and all problem solved

Why some of u still wondering want to go to check all these shits out,trusted me everything in the whole 83 plastics wasted containers had been released into the ocean during heavily rainy flooding,and u all can see there are so many trashes floating on water and on along the shores.That why they proud to be called a great kingdom of Cambodia.There too proud,too jerky,too bullies,too trustworthy with far left radical of"China" that why cause many tourism declined and fears to come there.Because,many barbarian Hun Sen's govm't officials too jerky and be proud by themselves by without others.Those Hun Sen's barbarian working around him just screws him up with clapped their hand yessssir all day until he falling from the sky and crash to earth.

Sep 20, 2019 11:07 AM

គេហទំព័រ​ទាំងមូល