សកម្មជន​បរិស្ថាន​៖ ក្រុមហ៊ុន​ចិន យាន ឆាយ ដឹក​ឈើ​ពី​ដែន​ជម្រក​សត្វ​ព្រៃ​ភ្នំ​ព្រេច​ទៅ​វៀតណាម

ដោយ វ៉ែន សុមេធ
2019-05-24
អ៊ីម៉ែល
មតិ
Share
បោះពុម្ព
រថយន្ត​ប៉ាកុង​ដឹក​ឈើ​ចេញ​ពី​ដែន​ជម្រក​សត្វ​ព្រៃ​ភ្នំ​ព្រេច ឋិត​ក្នុង​ស្រុក​កែវ​សីមា ខេត្ត​មណ្ឌលគិរី កាល​ពី​ថ្ងៃ​ទី៩ ខែ​សីហា ឆ្នាំ ២០១៨។
រថយន្ត​ប៉ាកុង​ដឹក​ឈើ​ចេញ​ពី​ដែន​ជម្រក​សត្វ​ព្រៃ​ភ្នំ​ព្រេច ឋិត​ក្នុង​ស្រុក​កែវ​សីមា ខេត្ត​មណ្ឌលគិរី កាល​ពី​ថ្ងៃ​ទី៩ ខែ​សីហា ឆ្នាំ ២០១៨។
រូប៖ សកម្មជន​បរិស្ថាន

សកម្មជន​បរិស្ថាន​រក​ឃើញ​ថា​ ក្រុមហ៊ុន​ យាន​ ឆាយ​ និង​ឧកញ៉ា​មួយ​ចំនួន​ នៅតែ​បន្ត​សកម្មភាព​ដឹកជញ្ជូន​ឈើ​ខុសច្បាប់​ ចេញពី​ដែន​ជម្រក​សត្វ​ព្រៃ​ភ្នំ​ព្រេច​ ទៅ​លក់​នៅ​ប្រទេស​វៀតណាម​ និង​ចែកចាយ​តាម​ដេប៉ូ​ក្នុង​ប្រទេស។ ការ​លើកឡើង​នេះ​ បន្ទាប់ពី​ពួកគេ​បាន​ចុះ​ស៊ើបអង្កេត​ដល់​ទី​តាំង​ផ្ទាល់​ ប្រទះឃើញ​ក្បួន​រថយន្ត​យី​ឌុប​ រាប់​សិប​គ្រឿង​ដឹកជញ្ជូន​ឈើ​ចេញពី​ដែន​ជម្រក​សត្វ​ព្រៃ​ភ្នំ​ព្រេច​ ឆ្លង​កាត់​ភូមិ​សំពោច ស្រុក​ស្នួល ខេត្ត​ក្រចេះ។

ចំណែក​មន្រ្តី​ពាក់ព័ន្ធ​ទទួល​បន្ទុក​ការពារ​ព្រៃ​ឈើ នៃ​របប​ក្រុង​ភ្នំពេញ មិន​ទាន់​មាន​ប្រតិកម្ម​ជុំវិញ​ការ​រក​ឃើញ​ពី​បទ​ល្មើស​ឈើ​នេះ​នៅ​ឡើយ​ទេ។

សកម្មជន​បរិស្ថាន​ថា​ ក្រុមហ៊ុន​ចិន​ យាន​ ឆាយ​ ដែល​ទទួល​សិទ្ធិ​វិនិយោគ​ដីសម្បទាន​សេដ្ឋកិច្ច​លើ​ផ្ទៃដី​ជាង​ ១ពាន់​ហិកតារ (១.១០០) នៅ​ស្រុក​កោះញែក​ ខេត្ត​មណ្ឌលគិរី​ កំពុង​ធ្វើអាជីវកម្ម​ឈើ​ខ្នាត​ធំ​ និង​មាន​ឧកញ៉ា​មួយ​ចំនួន​ជ្រក​ក្រោម​ស្លាក​ក្រុមហ៊ុន​នេះ​ខ្ចី​ដៃ​ពលរដ្ឋ​ឲ្យ​ចូល​ព្រៃ​អភិរក្ស​កាប់​ឈើ​លក់​ឲ្យ​ខ្លួន។

សកម្មជន​បរិស្ថាន​ ដែល​ចុះ​ស៊ើប​អង្កេត​ករណី​នេះ​ លោក​ ហេង​ ស្រស់​ ឲ្យ​ដឹង​នៅ​ថ្ងៃ​ទី២៣ ឧសភា​ថា​ គោយន្ត​ ៩គ្រឿង​ និង​រថ​យន្ត​ប៉ាកុង ឬ​ហៅ​ថា​ អា​រ៉េវ​ ចំនួន ៨០គ្រឿង​ បាន​ដឹកជញ្ជូន​ឈើ​មូល​ធំៗ ចេញ​ពី​ដែន​ជម្រក​សត្វព្រៃ​ភ្នំ​ព្រេច​ ចូល​ការដ្ឋាន​ក្រុមហ៊ុន​ចិន​ យាន​ ឆាយ​ ដើម្បី​អា​ច្រៀក​ជា​ឈើ​ជ្រុង​ រួច​ដឹក​ចេញ​ទៅ​ក្រៅ​នៅ​ពេល​យប់​ ដែល​មាន​មន្ត្រី​រដ្ឋបាល​ព្រៃ​ឈើ​ ចាំ​ស៊ីញេ​បំប្លែង​ឈើ​ទាំងនោះ​ ឲ្យ​ទៅ​ជា​ឈើ​ស្រប​ច្បាប់​។ លោក​ថា​ អាជីវកម្ម​ឈើ​ខ្នាត​ធំ​នេះ​ មន្ត្រី​ពាក់ព័ន្ធ​ចូលរួម​ប្រព្រឹត្ត​អំពើ​ពុករលួយ​ និង​ធ្វើ​របាយការណ៍​ភូតភរ​ទៅ​ថ្នាក់លើ​ បំណង​ជួយ​បិទបាំង​របរ​រក​ស៊ី​ផ្លូវ​ងងឹត​របស់​ជន​ទុច្ចរិត​មួយ​ចំនួន«យប់​ម្សិលមិញ​ដែល​ខ្ញុំ​ចុះ​ផ្ទាល់​ហ្នឹង យើង​មើល​ឃើញ​ថា មិន​ត្រឹម​មន្ត្រី​រដ្ឋបាល​ព្រៃ​ឈើ​ទេ មន្ត្រី​រដ្ឋបាល​ព្រៃ​ឈើ​គ្រាន់​តែ​ជា​អ្នក​កាង គ្រាន់​តែ​ជា​អ្នក​អះអាង ការពារ​ព្រៃ​ឈើ​ហ្នឹង​ឲ្យ​ស្រប​ច្បាប់ ហើយ​ឡាន​ពាក់​ស្លាក​លេខ ខ.ម ចំនួន ២គ្រឿង មាន​ឡាន​មួយ​អ្នក​រត់​ការ និង​ឡាន​មួយ​ទៀត​ការពារ​សុវត្ថិភាព​ឈើ​ចេញ​ពី​ព្រៃ ទៅ​ក្រៅ​ប្រទេស​ដោយ​សុវត្ថិភាព»

សកម្មជន​បរិស្ថាន​រូប​នេះ​បន្ថែម​ថា​ ពួកគេ​បាន​ប្រទះឃើញ​រថយន្ត​យី​ឌុប​ ២២គ្រឿង​ បាន​ដឹក​ជញ្ជូន​ឈើ​កាលពី​យប់​ថ្ងៃ​ទី២១​ ឧសភា​ ហើយ​ឈើ​ទាំង​នោះ​មាន​ លិខិតអនុញ្ញាត​ឬ​ហៅ​ថា ប៉េសេ​ ចំនួន ១២រថយន្ត​ និង ១០​រថយន្ត​ទៀត​ គ្មាន​លិខិត​អនុញ្ញាត ហើយ​រថយន្ត​យី​ឌុប​ទាំងនោះ​ ដឹក​ឈើ​ចេញពី​ក្រុមហ៊ុន​ចិន​ យាន​ ឆាយ។ លោក​សង្កេតឃើញ​ថា​ ក្រុមហ៊ុន​ យាន​ ឆាយ​ ទទួល​សិទ្ធិ​វិនិយោគ​លើ​ផ្ទៃ​ដី​ទំហំ​ ១ពាន់​ ១រយ​ហិកតារ​ ក៏​ប៉ុន្តែ​ដី​ក្រុមហ៊ុន​នេះ​ គ្មាន​ដើម​ឈើ​ធំៗ​ សម្រាប់​ប្រមូល​ទៀត​ទេ​ ហើយ​ឈើ​ដែល​កំពុង​ធ្វើ​អាជីវកម្ម​ គឺ​ជា​ឈើ​ដែល​ប្រមូល​បាន​ពី​ព្រៃ​អភិរក្ស​ ក្រោម​ការ​គ្រប់គ្រង​របស់​ក្រសួង​កសិកម្ម៖ «ឈូស​ឆាយ​ព្រៃ​ស្អាត​ធេង​តែ​ម្ដង ធ្វើ​តែ​រោង ដើម្បី អារ​ច្រៀក​ឈើ ដឹក​ជញ្ជូន​ទៅ​ក្រៅ​សុទ្ធតែ​ម្ដង បើ​ឲ្យ​មាន​ដាំដុះ​អ្វី​មួយ គឺ​មិន​មាន។ គេ​ចែក​គ្នា​ស៊ី​តែ​ម្ដង ជា​ពិសេស គឺ​រដ្ឋបាល​ព្រៃ​ឈើ​តែ​ម្តង ជា​អ្នក​ស៊ីញេ​ឲ្យ​មាន​ការ ក្រុមហ៊ុន​សម្បទាន​សេដ្ឋកិច្ច ធ្វើ​រូបភាព​បែប​នេះ មាន​ការ​កាប់​បំផ្លាញ​ព្រៃ​ក្នុង​ដែន​ជម្រក​សត្វ​ព្រៃ​មួយ​នេះ ជិត​រលាយ​ហិនហោច»

ជនជាតិ​ដើម​ភាគតិច​រស់នៅ​ឃុំ​រយ៉​ ស្រុក​កោះញែក​ លោក​ ប្រុង​ ណច​ សង្កេតឃើញ​ថា​ ដើម​ឈើ​ធំៗ​ ក្នុង​ដែន​ជម្រក​សត្វព្រៃ​ភ្នំ​ព្រេច​ ​ត្រូវ​បាន​កម្លាំង​កម្មករ​រាប់​សិប​នាក់​ សម្រុក​កាប់​​យក​ឈើ​ធំៗ​ស្ទើរ​គ្រប់​តំបន់​ លក់​ឲ្យ​ក្រុមហ៊ុន​ ដែល​ចាំ​ទទួល​ទិញ​នៅ​តាម​ដេប៉ូ​អា​ឈើ​មួយ​ចំនួន ដែល​ឋិត​នៅ​ក្បែរ​តំបន់​ព្រៃ​អភិរក្ស​ទាំង​នោះ។ សកម្មភាព​កាប់​បំផ្លាញ​ព្រៃឈើ​នេះ​ បាន​រាលដាល​ដល់​តំបន់​ព្រៃ​កប់​សព​ និង​ព្រៃ​អារក្ស​របស់​ពួកគេ​អស់​ស្ទើរ​ទាំងស្រុង​។ លោក​ថា​ ថ្មីៗ នេះ​ ក្រុមល្បាត​សហគមន៍​បាន​ប្រទះឃើញ​ ដើម​ឈើ​ធំៗ​ ក្នុង​ដែន​ជម្រក​សត្វព្រៃ​ភ្នំ​ព្រេច​ ត្រូវ​គេ​កាប់​នៅសល់​តែ​គល់​ ហើយ​នេះ គឺ​ជា​វិនាសកម្ម​ព្រៃ​ឈើ ដែល​មិន​អាច​ប្រកែក​បាន៖ «ឈើ​ហ្នឹង​គេ​កាប់​តែ ២ថ្ងៃ​ទៅ ៣ថ្ងៃ​អស់​អាលីង បង​អើយ ទប់​ស្កាត់​អត់​ឈ្នះ​ទេ កាប់​ឈើ​កន្លែង​ផ្នូរ​ខ្មោច​ខ្ញុំ​ហ្មង និង​ព្រៃ​អារក្ស​អ្នក​តា​ខ្ញុំ​ហ្មង ឡាន​ឡើង​ទក់ ប៊ិះ​ទាន់ បាត់​បង់​អត្តសញ្ញាណ បាត់​បង់​ព្រៃ​ឈើ អនាគត​មាន​អី​ទៀត​វាល​ធេង»

ដែន​ជម្រក​សត្វព្រៃ​ភ្នំ​ព្រេច​ ត្រូវ​បាន​អតីត​ព្រះមហាក្សត្រ​ នរោត្តម​ សីហនុ ចេញ​ព្រះរាជក្រឹត្យ​កំណត់​ជា​ព្រៃ​អភិរក្ស​កាល​ពី​ខែ​វិច្ឆិកា​ ឆ្នាំ១៩៩៣ ដែល​មានផ្ទៃ​ដី​ជាង​ ២២ម៉ឺន​ហិកតារ (២២២.៥០០) ឋិតនៅ​ស្រុក​កោះញែក​ ស្រុក​កែវសីមា​ ខេត្ត​មណ្ឌលគិរី​ និង​ស្រុក​ស្នូល​ ខេត្ត​ក្រចេះ។ កម្ម​ជន​បរិស្ថាន​រក​ឃើញ​ថា​ ក្រសួង​កសិកម្ម​ គឺ​ជា​អ្នក​រួម​ចំណែក​បំផ្លាញ​ព្រៃ​ឈើ​ក្នុង​ព្រៃ​អភិរក្ស​មួយ​នេះ​ តាមរយៈ​ផ្ដល់​អាជ្ញាប័ណ្ណ​ប្រមូល​ឈើ​ក្នុង​ដី​សម្បទាន​ជាប់​ព្រៃ​អភិរក្ស។

អាស៊ី​សេរី ពុំ​ទាន់​អាច​សុំ​ការ​ឆ្លើយ​តប ពី​ការ​រក​ឃើញ​ករណី​ជួញ​ដូរ​ឈើ​ទ្រង់ទ្រាយ​ធំ​នេះ ពី​អ្នក​នាំ​ពាក្យ​ក្រសួង​កសិកម្ម​ លោក​ ស្រី​ វុឌ្ឍី បាន​នៅ​ឡើយ​ទេ នៅ​ថ្ងៃ​ទី២៣ ឧសភា។

ចំណែក​អ្នក​នាំ​ពាក្យ​គណៈកម្មការ​ជាតិ​ទប់​ស្កាត់​ និង​បង្ក្រាប​បទ​ល្មើស​ព្រៃឈើ​ លោក​ អេង​ ហ៊ី​ និង​ ប្រធាន​មន្ទីរ​កសិកម្ម​ ខេត្ត​មណ្ឌលគិរី​ លោក​ សុខ​ ឃាង ក៏​ពុំ​ទាន់​សុំ​ប្រតិកម្ម​ជុំវិញ​រឿង​នេះ​បាន​ដែរ ដោយ​ពួក​លោក មិន​លើក​ទូរស័ព្ទ។

រី​ឯ​អ្នក​នាំ​ពាក្យ​ក្រសួងបរិស្ថាន​ លោក​ នេត្រ​ ភត្ត្រា​ មាន​ប្រសាសន៍​ថា​ តំបន់​មួយ​ចំនួន​ឋិត​ក្រោម​ការ​គ្រប់គ្រង​របស់​រដ្ឋបាល​ព្រៃឈើ​ ធ្វើ​ឲ្យ​លោក​ពិបាក​សន្និដ្ឋាន​ថា​ ឈើ​ទាំង​នោះ​មាន​ប្រភព​មក​ពី​ណា? ក៏​ប៉ុន្តែ​ក៏​មាន​ឈើ​ខ្លះ​មាន​លិខិត​អនុញ្ញាត​ពី​រដ្ឋបាល​ព្រៃឈើ​ដែរ។ ទន្ទឹម​នឹង​នេះ​ មន្ត្រី​ឧទ្យានុរក្ស​របស់​ក្រ​សួង​បរិស្ថាន​ជាង​ ២០នាក់​ កំពុង​ឈរ​ជើង​នៅ​តំបន់​នោះ​ បាន​សហការ​ជាមួយ​អង្គការ WWF រួម​គ្នា អភិរក្ស​ព្រៃ​ឈើ​ ជីវចម្រុះ​ និង​ទប់ស្កាត់​បទ​ល្មើស​ព្រៃ​ឈើ​គ្រប់​ប្រភេទ។ លោក​ទទួល​ស្គាល់​ថា បទ​ល្មើស​ព្រៃ​ឈើ​បាន​ថយ​ចុះ​ច្រើន ព្រោះ​មន្ត្រី​ជំនាញ​ កំពុង​បង្កើន​ការ​ចុះ​ល្បាត​ ទប់​ស្កាត់​បទ​ល្មើស​ព្រៃ​ឈើ​ និង​ដោះ​អន្ទាក់​សត្វព្រៃ​ជា​ដើម។ លោក​អំពាវនាវ​ឲ្យ​ពលរដ្ឋ​បញ្ឈប់​កាប់​បំផ្លាញ​ព្រៃ​ឈើ​ ក្នុង​ដែន​ជម្រក​សត្វ​ព្រៃ​ និង​កុំ​ជឿ​ ពាក្យ​បោកប្រាស់​មេ​ខ្លោង​ដែល​ប្រើ​លុយ​ ជួល​អ្នក​ភូមិ​ឲ្យ​ចូល​ព្រៃ​កាប់​ឈើ​លក់​ឲ្យ​ខ្លួន​នោះ៖ «គួរ​តែ​បែងចែក​ឲ្យ​បាន​ច្បាស់លាស់​ថា​ ការ​ដឹក​ជញ្ជូន​ឈើ​ខ្លះ​ក៏​មាន ច្បាប់​អនុញ្ញាត​ដោយ​រដ្ឋបាល​ព្រៃ​ឈើ​ដែរ​ជា​ឈើ​ស្រប​ច្បាប់។ តែ​ជា​មួយ​គ្នា​នេះ យើង​នៅ​តែ​បន្ត​ប្រយុទ្ធ​ប្រឆាំង ការ​កាប់​បំផ្លាញ​ព្រៃ​ឈើ​ខុស​ច្បាប់ ជា​ពិសេស ដែន​សមត្ថកិច្ច​ក្រសួង​បរិស្ថាន​យើង​ផ្ដោត​ការពារ និង​អភិរក្ស ទប់​ស្កាត់ និង​រុករាន​ទន្ទ្រាន​ដីធ្លី»

សកម្មជន​បរិស្ថាន​ លោក​ ហេង​ ស្រស់​ ប្ដេជ្ញា​ថា​ នឹង​បន្ត​ស៊ើប​អង្កេត​ពី​ភាព​មិន​ប្រក្រតី​នៃ​លិខិត​អនុញ្ញាត​របស់​មន្ត្រី​រដ្ឋបាល​ព្រៃឈើ​ ដែល​ជា​សេនាធិការ​របស់​ក្រសួង​កសិកម្ម​ បាន​ផ្ដល់​លទ្ធភាព​ឲ្យ​ឧកញ៉ា​មួយ​ចំនួន​ដឹក​ឈើ​ទៅ​លក់​នៅ​ក្រៅ​ប្រទេស​ និង​ចែកចាយ​តាម​ដេប៉ូ​ក្នុង​ស្រុក​នោះ។ លោក​អះអាង​ បើ​គ្មាន​ការ​ឃុបឃិត​គ្នា​ និង​បើកដៃ​ពី​អាជ្ញាធរ​ពាក់ព័ន្ធ​ទេ​ ឈើ​ទាំងនោះ​នឹង​មិន​អាច​ដឹកជញ្ជូន​ចេញ​ ទៅ​លក់​នៅ​ក្រៅ​ប្រទេស​ តាម​ច្រក​របៀង​ ព្រំដែន​ត្រពាំងស្រែ​ ឋិត​ក្នុង​ស្រុក​ស្រូល​ខេត្ត​ក្រចេះ​បាន​នោះ​ទេ៖ «យើង​ចង់​ឲ្យ​ខាង​មេ​ព្រៃ រដ្ឋបាល​ព្រៃ​ឈើ​ក្នុង​តំបន់​នេះ បញ្ចេញ​ក្រដាស ប៉េសេ PC ថា ក្រុមហ៊ុន​មួយ​ហ្នឹង មាន​សិទ្ធិ​ដឹក​ជញ្ជូន​ឈើ​ដឹក​ទៅ​ក្រៅ​ប្រទេស មាន​ប៉ុន្មាន​ម៉ែត្រ​គូប។ រហូត​មក​ដល់​ពេល​ហ្នឹង យើង​អត់​ដែល​ឃើញ​ថា មន្ត្រី​ទាំង​អស់​ហ្នឹង​បញ្ចេញ​ព័ត៌មាន​ទាំង​អស់​ហ្នឹង​ឲ្យ​ពលរដ្ឋ​បាន​ដឹង​ទេ អីចឹង​ហើយ​ឈើ​ទាំង​អស់​ហ្នឹង​ខុស​ច្បាប់»

សកម្មជន​បរិស្ថាន​បន្ថែម​ថា​ បើ​ទោះជា​ក្រុមហ៊ុន​សម្បទាន​សេដ្ឋកិច្ច​ទាំង​នោះ​ អះអាង​ថា​ មាន​លិខិតអនុញ្ញាត​ ឬ​ហៅ​ថា PC តែ​ការ​ដឹក​ជញ្ជូន​ឈើ​ទាំង​នោះ​ សុទ្ធ​សឹង​តែ​ប្រមូល​ពី​តំបន់​ព្រៃ​ការពារ​ធម្មជាតិ​ ដើម្បី​បំប្លែង​ជា​ឈើ​ស្របច្បាប់​ ដែល​​​​ឃុបឃិត​គ្នា​ជា​ប្រព័ន្ធ ​ដោយ​អាជ្ញាធរ​មានសមត្ថកិច្ច​ប្រចាំ​តាម​តំបន់​ទាំង​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល