អ្នក​ភូមិ​នៅ​មណ្ឌលគិរី​រង​ការ​គំរាម​សម្លាប់​បន្ទាប់​ចុះ​បង្ក្រាប​បទ​ល្មើស​ព្រៃ​ឈើ

ប្រជាពលរដ្ឋ​សហគមន៍​ជនជាតិ​ដើម​ភាគ​តិច​ព្នង នៅ​ខេត្ត​មណ្ឌលគិរី អះអាង​ថា អ្នក​ភូមិ​បាន​រង​ការ​គំរាម​សម្លាប់​ពី​មន្ត្រី​យោធា បន្ទាប់​ពី​សហគមន៍​បាន​ចុះ​បង្ក្រាប​បទ​ល្មើស​ព្រៃ​ឈើ ដែល​ក្រុម​យោធា​បាន​លួច​អារ​ឈើ​ប្រណីត​ខុស​ច្បាប់​ក្នុង​ព្រៃ​សហគមន៍។
ដោយ រដ្ឋា វិសាល
2013-10-23
Share

ម៉ាស៊ីន​កាត់​ឈើ​បី​គ្រឿង និង​ឈើ​ប្រណីត​ជាច្រើន​ដុំ ត្រូវ​បាន​សហគមន៍​ភូមិ​ពូញ៉ាវ ឃុំ​មេម៉ង់ ស្រុក​កែវសីមា ខេត្ត​មណ្ឌលគិរី ចាប់​បាន​ពី​មន្ត្រី​យោធា​ស្រុក ខណៈ​កំពុង​លួច​អារ​ច្រៀក​ឈើ​ប្រណីត​ក្នុង​ព្រៃ​សហគមន៍។

កាល​ពី​ថ្ងៃ​អាទិត្យ សប្ដាហ៍​មុន សមាជិក​សហគមន៍​មាន​គ្នា ១២​នាក់ បាន​ចុះ​ល្បាត​ព្រៃ ហើយ​ប្រទះ​ឃើញ​ក្រុម​យោធា​មាន​គ្នា ៥​នាក់ កំពុង​លួច​អារ​ឈើ​នៅ​តំបន់​ព្រៃ​ការពារ ចំណុច​អូរអន្រះ ទើប​អ្នក​ភូមិ​នាំ​គ្នា​ចាប់​រឹបអូស​ម៉ាស៊ីន​កាត់​ឈើ​នាំ​មក​រក្សា​ទុក​នៅ​រោង​ប្រជុំ​សហគមន៍ និង​បាន​រាយការណ៍​ជូន​អាជ្ញាធរ​ឃុំ។ ចំណែក​ក្រុម​យោធា​បាន​ព្យាយាម​សម្រប​សម្រួល​ឲ្យ​សហគមន៍​ប្រគល់​ម៉ាស៊ីន​កាត់​ឈើ​វិញ ជា​ថ្នូរ​នឹង​ការ​បង់​ប្រាក់​ជូន​សហគមន៍ ប៉ុន្តែ​សហគមន៍​មិន​យល់​ព្រម។

សមាជិក​សហគមន៍ អ្នកស្រី ព្យាន និ មាន​ប្រសាសន៍​បញ្ជាក់​ថា កាល​ពី​វេលា​ម៉ោង ៧​យប់​ថ្ងៃ​ទី​២១ តុលា កន្លង​ទៅ ក្រុម​យោធា​មាន​គ្នា​បី​នាក់ ក្នុង​នោះ​អ្នក​ភូមិ​ស្គាល់​យោធា​ម្នាក់​មាន​ឈ្មោះ វណ្ណ បាន​ចូល​មក​ដល់​ភូមិ ហើយ​គំរាម​ឲ្យ​អ្នក​ភូមិ​ប្រគល់​ម៉ាស៊ីន​ជា​ថ្មី ប៉ុន្តែ​អ្នក​ភូមិ​នៅ​តែ​មិន​យល់​ព្រម។ អ្នកស្រី​បន្ត​ថា ក្រុម​យោធា​ទាំង​នោះ​បាន​ចូល​ព្រៃ​សហគមន៍ ហើយ​អារ​រំលំ​ឈើ​ប្រណីត​អារ​ច្រៀក​ធ្វើ​អាជីវកម្ម​យូរ​ខែ ហើយ​មិន​មាន​សមត្ថកិច្ច​ណា​បង្ក្រាប​ឡើយ៖ «អា​អ្នក​បទ​ល្មើស​អាង​សិទ្ធិ​អំណាច គេ​កំពុង​អារ​ឈើ​នៅ​ចោល​ក្នុង​ព្រៃ។ ទាហាន​អ្នក​បទ​ល្មើស​ហ្នឹង ថា​យក​ម៉ាស៊ីន ឥឡូវៗ​យក​ឈើ​អស់​មួយ​ព្រៃ​ហ្នឹង​លក់​ឲ្យ​ក្រុមហ៊ុន គាត់​ថា​មិន​មែន​ខ្ញុំ​អារ​ទេ ឧកញ៉ា​ឲ្យ​អារ»

វិទ្យុ​អាស៊ីសេរី នៅ​ថ្ងៃ​ទី​២២ ខែ​តុលា មិន​អាច​ទាក់ទង​មន្ត្រី​យោធា​ឈ្មោះ វណ្ណ សុំ​បញ្ជាក់​ពី​ការ​ចោទ​ប្រកាន់​នេះ​បាន​ទេ។

មេ​ឃុំ​មេម៉ង់ លោក ចាន់ សាមេន ទទួល​ស្គាល់​ថា ក្រុម​យោធា​ស្រុក​ពិត​ជា​មាន​ពាក់ព័ន្ធ​អារ​ឈើ​ក្នុង​ព្រៃ​ការពារ​មែន។ លោក​មាន​ប្រសាសន៍​ថា ដោយសារ​មាន​ការ​យោគយល់​លោក​មាន​បំណង​អប់រំ និង​ធ្វើ​កិច្ច​សន្យា​ឲ្យ​ក្រុម​យោធា​ឈប់​ប្រព្រឹត្ត​បទ​ល្មើស​ព្រៃ​ឈើ​នេះ៖ «យើង​ព្រមាន​វា​ទៅ​កុំ​ឲ្យ​លើក​ទី​ពីរ​ទៀត។ គោល​បំណង​ខ្ញុំ​ធ្វើ​អ៊ីចឹង​ទេ ធ្វើ​កំណត់​ហេតុ​ទៅ​ហើយ​វា​ផ្ដិត​មេដៃ​ទៅ កុំ​ឲ្យ​បទ​ល្មើស​ទៅ​លើក​ទី​ពីរ​ទី​បី​អ៊ីចឹង​ណា!»

នៅ​ព្រឹក​ថ្ងៃ​អង្គារ ទី​២២ ខែ​តុលា តំណាង​សហគមន៍​ពីរ​នាក់​បាន​ធ្វើ​ដំណើរ​មក​ការិយាល័យ​សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​មណ្ឌលគិរី សុំ​ឲ្យ​មន្ត្រី​អង្គការ​នេះ​ជួយ​អន្តរាគមន៍​ការពារ​សុវត្ថិភាព​ពួក​គាត់ និង​អន្តរាគមន៍​ទៅ​អាជ្ញាធរ​មាន​សមត្ថកិច្ច ចាត់​វិធាន​ការ​ទប់ស្កាត់​បទ​ល្មើស​ព្រៃ​ឈើ​នេះ​កុំ​ឲ្យ​កើត​មាន​បន្ត​ទៀត។

មន្ត្រី​សម្រប​សម្រួល​សមាគម​អាដហុក ខេត្ត​មណ្ឌលគិរី លោក សុក រដ្ឋា មាន​ប្រសាសន៍​បញ្ជាក់​ថា ការ​សម្រប​សម្រួល​ដោះ​លែង​ជន​ប្រព្រឹត្តិ​បទ​ល្មើស​ព្រៃ​ឈើ គឺ​ជា​ការ​ខុស​ច្បាប់។ លោក​អះអាង​ថា នឹង​អន្តរាគមន៍​ពាក្យ​ប្ដឹង​របស់​សហគមន៍​ជូន​មន្ត្រី​ព្រៃ​ឈើ​ចាត់​វិធាន​ការ​តាម​ច្បាប់៖ «មិន​ត្រូវ​ឲ្យ​មាន​ការ​សម្រប​សម្រួល​ទៅ​តាម​វិធី​ការ​សម្រប​សម្រួល​ណា​មួយ​ទេ សំខាន់​គឺ​ចូល​ទៅ​កាប់​ព្រៃ​ឈើ គឺ​ជា​បទ​ល្មើស​ឧក្រិដ្ឋ ត្រូវ​តែ​ចាប់​ជន​បង្ក​មក​ផ្ដន្ទាទោស​ឲ្យ​បាន»

នាយ​ខណ្ឌ​រដ្ឋបាល​ព្រៃ​ឈើ​ខេត្ត​មណ្ឌលគិរី លោក កែប តក់ បដិសេធ​មិន​ឆ្លើយ​តប​សំណួរ​វិទ្យុ​អាស៊ីសេរី ទេ។ លោក​អះអាង​ថា កំពុង​នៅ​តំបន់​ឆ្ងាយ​ស្តាប់​សំណួរ​មិន​បាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល