ពលរដ្ឋ​សង្កាត់​និរោធ​ស្នើ​អាជ្ញាធរ​ត្រួត​ពិនិត្យ​សិប្បកម្ម​ផលិត​ឆ្នាំង​ស្ពាន់​ដែល​ភាយ​ក្លិន​ស្អុយ

ដោយ ប្រាជ្ញ ចេវ
2015-02-04
អ៊ីម៉ែល
មតិ
Share
បោះពុម្ព
ទឹក​ស្អុយ​ដែល​ហូរ​ចេញ​ពី​សិប្បកម្ម​ផលិត​ឆ្នាំង​ស្ពាន់​ដែល​ពលរដ្ឋ​ចោទ​ថា​ជះ​ក្លិន និង​ប៉ះពាល់​ដល់​ពលរដ្ឋ​នៅ​ភូមិ​និរោធ សង្កាត់​និរោធ ខណ្ឌ​មានជ័យ រាជធានី​ភ្នំពេញ។ រូបថត​ថ្ងៃ​ទី​២៧ ខែ​មករា ឆ្នាំ​២០១៥
ទឹក​ស្អុយ​ដែល​ហូរ​ចេញ​ពី​សិប្បកម្ម​ផលិត​ឆ្នាំង​ស្ពាន់​ដែល​ពលរដ្ឋ​ចោទ​ថា​ជះ​ក្លិន និង​ប៉ះពាល់​ដល់​ពលរដ្ឋ​នៅ​ភូមិ​និរោធ សង្កាត់​និរោធ ខណ្ឌ​មានជ័យ រាជធានី​ភ្នំពេញ។ រូបថត​ថ្ងៃ​ទី​២៧ ខែ​មករា ឆ្នាំ​២០១៥
RFA/Brach Chev

សិប្បកម្ម​ធ្វើ​ឆ្នាំង​ស្ពាន់​មួយ​កន្លែង​នៅ​ភ្នំពេញ កំពុង​បង្ក​ការ​រំខាន​ដល់​ពលរដ្ឋ​រស់នៅ​ទីនោះ ដោយ​សំឡេង ផ្សែង ទឹក​កាក​សំណល់ និង​ក្លិន​ស្អុយ ដែល​ភាយ​ចេញ​ពី​កន្លែង​សិប្បកម្ម។ ពលរដ្ឋ​រង​ផល​ប៉ះពាល់ ធ្លាប់​ផ្ដិត​មេដៃ​ប្ដឹង​ទៅ​អាជ្ញាធរ​មូលដ្ឋាន​ដែរ ប៉ុន្តែ​មិន​ទទួល​បាន​ការ​អន្តរាគមន៍​ពី​ពួក​គេ​នៅ​ឡើយ​ទេ។

ខ្យល់​បក់​ភាយ​លាយ​ក្លិន​ស្អុយ និង​សំឡេង​លាន់​ឮ​ទ្រហឹង​នៃ​ខ្សែ​សង្វាក់​ផលិត​ឆ្នាំង​ស្ពាន់ នៃ​រោង​សិប្បកម្ម​គ្មាន​ស្លាក​យីហោ​មួយ​កន្លែង​នៅ​កណ្ដាល​ភូមិ​អ្នក​ស្រុក ដែល​ឋិត​នៅ​ភូមិ​និរោធ សង្កាត់​និរោធ ខណ្ឌ​មានជ័យ រាជធានី​ភ្នំពេញ កំពុង​តែ​បង្ក​ការ​រំខាន​ដល់​ពលរដ្ឋ​នៅ​ក្បែរៗ​នោះ​ជា​រៀង​រាល់​ថ្ងៃ។

ការ​រំខាន​នៃ​សំឡេង ផ្សែង​ហុយ ធ្លាក់​កាក​សំណល់ និង​ទឹក​កាក​សំណល់​ដែល​មាន​ក្លិន​ស្អុយ បាន​ធ្វើ​ឲ្យ​ពលរដ្ឋ​រស់នៅ​ក្បែរ​កន្លែង​សិប្បកម្ម​នេះ ដាក់​ពាក្យ​ប្ដឹង​ទៅ​អាជ្ញាធរ​មូលដ្ឋាន​ជាច្រើន​ដង​មក​ហើយ សុំ​ឲ្យ​មាន​ការ​ត្រួត​ពិនិត្យ ប៉ុន្តែ​អាជ្ញាធរ​មិន​ទាន់​ឆ្លើយ​តប​ចំពោះ​ការ​ព្រួយ​បារម្ភ​តាម​អ្វី​ដែល​ពលរដ្ឋ​ចង់​ឃើញ​នៅ​ឡើយ​ទេ។

កំពុង​ស្រោច​ទឹក​បន្លែ​ក្បែរ​ទឹក​កាក​សំណល់ លោកស្រី ចាប លី ជា​ពលរដ្ឋ​មាន​ព្រំ​ដី​ជាប់​កន្លែង​សិប្បកម្ម​នេះ​រៀបរាប់​ថា ចាប់​តាំង​ពី​ទឹក​កាក​សំណល់​បាន​ហូរ​ជ្រាប​ចូល​ដី​លោកស្រី លោកស្រី​មិន​អាច​ដាំ​ដំណាំ​អ្វី​លើ​ដី​នោះ​បាន​ទេ។ លោកស្រី​ឲ្យ​ដឹង​ថា ទោះ​កន្លង​មក លោកស្រី​ប្រាប់​ទៅ​ម្ចាស់​សិប្បកម្ម​ឲ្យ​ការពារ​រឿង​ទឹក​កាក​សំណល់​នេះ​ដែរ ប៉ុន្តែ​គេ​មិន​បាន​ស្តាប់ និង​ធ្វើ​តាម​ឡើយ៖ «ស្អុយ​ណាស់​ភាយ​ក្លិន​ម្តងៗ​ចង់​ដាច់​ខ្យល់។ ខ្ញុំ​ប្រាប់​គេ គេ​ឈប់​បាន​តិច ហើយ​បង្ហូរ​មក​ដដែល»

ទឹក​កាក​សំណល់​មាន​ក្លិន​ស្អុយ​ឆ្អាប​ជ្រាប​ចេញ​ពី​តាម​ជញ្ជាំង នៃ​រោង​សិប្បកម្ម​នោះ ធ្វើ​ឲ្យ​ស្មៅ និង​ដើម​ឈើ​នៅ​ទីនោះ​ងាប់។ ពលរដ្ឋ​ថា សិប្បកម្ម​នេះ​ទើប​ចាប់​ផ្តើម​ដំណើរ​ការ​កាល​ពី​ឆ្នាំ​២០១២។

ពលរដ្ឋ​នៅ​ទីនោះ​បាន​ប្រមូល​គ្នា​ផ្ដិត​មេដៃ​ប្ដឹង​ទៅ​អាជ្ញាធរ​មូលដ្ឋាន​ញឹកញយ​ដែរ ប៉ុន្តែ​គេ​មិន​ទាន់​ឃើញ​អាជ្ញាធរ​មាន​វិធានការ​ណា​មួយ​ទៅ​លើ​កន្លែង​ធ្វើ​សិប្បកម្ម​នេះ​ទេ។

ពលរដ្ឋ​មួយ​រូប​ទៀត​សុំ​មិន​បញ្ចេញ​ឈ្មោះ ដែល​ផ្ទះ​លោក​នៅ​ជាប់​កន្លែង​សិប្បកម្ម ឲ្យ​ដឹង​ថា សំឡេង ផ្សេង និង​ក្លិន​របស់​សិប្បកម្ម​នេះ កំពុង​ធ្វើ​ឲ្យ​ប៉ះពាល់​ដល់​លោក និង​អ្នក​ផ្សេង​ទៀត។ លោក​ទាមទារ​ឲ្យ​សិប្បកម្ម​នេះ​ជួយ​សម្រួល​បំពង់​ផ្សែង កាត់​បន្ថយ​សំឡេង​រំខាន និង​បញ្ឈប់​ការ​បង្ហូរ​ទឹក​កាក​សំណល់​ចេញ​មក​ក្រៅ​ទៀត៖ «តវ៉ា​ម្តង​ជា​ពីរ​ដង ហើយ​គ្មាន​ដំណោះស្រាយ​អី​ទេ សុំ​ឲ្យ​មាន​ដំណោះស្រាយ​មួយ​ដែល​អាច​ទទួល​បាន​យក​បាន​ទាំងអស់​គ្នា»

រោង​សិប្បកម្ម​នេះ​លាត​សន្ធឹង​នៅ​កណ្ដាល​ភូមិ​របស់​ពលរដ្ឋ មាន​បណ្តោយ​ជាង ១០​ម៉ែត្រ ទទឹង​ជាង ៥​ម៉ែត្រ ជញ្ជាំង​នៅ​ផ្នែក​ក្រោម​ជាប់​ដី​ធ្វើ​ពី​ឥដ្ឋ នៅ​ផ្នែក​ខាង​លើ​បិទ​បាំង​ដោយ​ស័ង្កសី។ បំពង់​ផ្សែង​ត្បិត​តែ​គេ​ធ្វើ​ឲ្យ​មាន​កម្ពស់​វែង​លូត​ទៅ​លើ​ក្តី ប៉ុន្តែ​បាន​ធ្លាក់​កាក​សំណល់​ពណ៌​សៗ​ធ្លាក់​មក​លើ​បរិវេណ​ជុំវិញ​នោះ ដែល​សុទ្ធសឹងតែ​ជា​ផ្ទះ​របស់​ពលរដ្ឋ។

ចៅ​សង្កាត់​និរោធ ខណ្ឌ​មានជ័យ អ្នកស្រី ទេព ព្រហ្មមុន្នី មាន​ប្រសាសន៍​ថា រឿង​នេះ​កើត​ឡើង​តាំង​ពី​លោក​ចៅ​សង្កាត់​ចាស់​នៅ​កាន់​តំណែង​ម្ល៉េះ ហើយ​ពេល​នោះ សង្កាត់​បាន​បញ្ជា​ឲ្យ​សិប្បកម្ម​នោះ​កែ​សម្រួល​ដែរ ប៉ុន្តែ​គេ​មិន​បាន​ធ្វើ​តាម​ឡើយ។ អ្នកស្រី​ចៅ​សង្កាត់​បញ្ជាក់​ឲ្យ​ដឹង​ថា ក្រុម​ការងារ​សង្កាត់​នឹង​ចុះ​ទៅ​ពិនិត្យ​ដល់​កន្លែង​ជា​ថ្មី​ម្តង​ទៀត​នៅ​ពេល​ទទួល​ព័ត៌មាន​នេះ៖ «ទីតាំង​ហ្នឹង​ធ្លាប់​បាន​ណែនាំ​ហើយ។ ខ្ញុំ​ត្រូវ​តែ​ចុះ ព្រោះ​លោក​បាន​ជម្រាប​ឲ្យ​ដឹង​ចឹង​ល្អ​ហើយ»

ចំពោះ​ករណី​នេះ​ដែរ អ្នក​នាំ​ពាក្យ​ក្រសួង​បរិស្ថាន លោក សៅ សុភាព មាន​ប្រសាសន៍​ថា លោក​នឹង​ចាត់​ឲ្យ​មន្ត្រី​មន្ទីរ​បរិស្ថាន​ចុះ​ទៅ​ដល់​កន្លែង ដើម្បី​ពិនិត្យ​ឲ្យ​ដឹង​ពី​ការ​ពិត។ លោក​ឲ្យ​ដឹង​ថា ប្រសិន​ការ​បើក​អាជីវកម្ម​ណា​មួយ​ធ្វើ​ឲ្យ​ប៉ះពាល់​ប្រជាពលរដ្ឋ ក្រសួង​ស្ថាប័ន​មាន​សមត្ថកិច្ច ត្រូវ​តែ​ដោះស្រាយ៖ «ខ្ញុំ​នឹង​ប្រាប់​មន្ត្រី​មន្ទីរ​ឲ្យ​គេ​ចុះ​ទៅ​ពិនិត្យ»

ពលរដ្ឋ​ឲ្យ​ដឹង​ថា កាក​សំណល់​ដែល​ធ្លាក់​ចុះ​តាម​បំពង់​ផ្សែង ហើយ​ប៉ះ​ត្រូវ​សម្លៀកបំពាក់ ប្រសិន​បើ​គេ​មិន​បោក​សម្អាត​នោះ​ទេ គឺ​បណ្ដាល​ឲ្យ​កើត​កន្ទួល​រមាស់​លើ​ស្បែក។

អ្នក​គ្រប់គ្រង​សិប្បកម្ម​ធ្វើ​ឆ្នាំង​ស្ពាន់ លោក លូ វុទ្ធី ឆ្លើយ​តប​ថា ករណី​ទឹក​កាក​សំណល់​ហៀរហូរ​ចេញ​ក្រៅ​នេះ ព្រោះ​គ្មាន​ប្រព័ន្ធ​លូ​បង្ហូរ​ទឹក។ ចំពោះ​សំឡេង​លាន់​ឮ​ខ្លាំង និង​កាក​សំណល់​ដែល​ចេញ​ពី​បំពង់​ផ្សែង លោក​ថា លោក​បាន​ធ្វើ​រឿង​នេះ​ដោយ​ត​បំពង់​ផ្សែង​ឡើង​លើ​ទៀត និង​កែ​សម្រួល​នៅ​ក្នុង​រោង​សិប្បកម្ម​មិន​ឲ្យ​បញ្ចេញ​សំឡេង​ខ្លាំងៗ​ដូច​មុន​ទេ៖ «នៅ​ទីនោះ​អត់​មាន​ប្រព័ន្ធ​លូ​ចឹង ហើយ​បាន​ទឹក​ចេះ​តែ​ហូរ​មក។ ប៉ុន្តែ​ខ្ញុំ​បាន​ទឹក​បូម​ចេញ​រហូត»

ទន្ទឹម​នឹង​ការ​រអ៊ូរទាំ​របស់​ពលរដ្ឋ​ចំពោះ​ការ​រំខាន​នេះ ម្ចាស់​សិប្បកម្ម​ស្នើ​ឲ្យ​អាជ្ញាធរ​មូលដ្ឋាន រៀបចំ​ប្រព័ន្ធ​លូ​បង្ហូរ​ទឹក​កខ្វក់ ដើម្បី​បង្ហូរ​ទឹក​កាក​សំណល់​ចេញ។ ប៉ុន្តែ​ចៅ​សង្កាត់​និរោធ អ្នកស្រី ទេព ព្រហ្មមុន្នី ថា សង្កាត់​គ្មាន​ថវិកា​ដើម្បី​ធ្វើ​ប្រព័ន្ធ​លូ​ឡើយ ហើយ​ក៏​មិន​ដឹង​ថា ត្រូវ​បង្ហូរ​ទឹក​កាក​សំណល់​ទៅ​ណា​ដែរ និង​ថា​ថវិកា​ធ្វើ​ប្រព័ន្ធ​លូ​ជា​បន្ទុក​របស់​សាលា​រាជធានី​ភ្នំពេញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល