ប្រជាពលរដ្ឋរស់នៅខេត្តកោះកុង ព្រួយបារម្ភខ្លាចសកម្មភាពបូមខ្សាច់ នៅស្រុកបុទុមសាគរ ខេត្តកោះកុង នឹងធ្វើឲ្យប៉ះពាល់ដល់បរិស្ថាន និងរំខានដល់ការប្រកបមុខរបរនេសាទរបស់ប្រជាពលរដ្ឋកំពុងរស់នៅតំបន់នោះ។ ការលើកឡើងនេះ ធ្វើឡើងបន្ទាប់ពីមានក្រុមហ៊ុនមិនស្គាល់ឈ្មោះមួយ កំពុងបូមខ្សាច់យ៉ាងមមាញឹកអស់រយៈពេលជាង ៦ខែមកហើយនៅស្រុកបុទុមសាគរ។
ពលរដ្ឋអះអាងថា អស់រយៈពេល៦ខែមកហើយ ដែលមានសាឡង់បូមខ្សាច់ ស្ថិតនៅឃុំតានូន ស្រុកបុទុមសាគរ ខេត្តកោះកុង ទាំងយប់ទាំងថ្ងៃ។ អ្នកភូមិលើកឡើងថា ពួកគាត់ប្រទះឃើញសាឡង់បូមខ្សាច់ទាំងអស់នោះ ដឹកជញ្ជូនយកខ្សាច់ទៅចាក់លុបឆ្នេរសមុទ្រនៅឃុំព្រែកខ្សាច់ ដើម្បីសាងសង់កំពង់ផែរបស់ប្រធានសមាគមឧកញ៉ាកម្ពុជា លោក លី យ៉ុងផាត់។
ប្រជាពលរដ្ឋរស់នៅឃុំតានូន លោក សំ ធី ប្រាប់វិទ្យុអាស៊ីសេរីនៅថ្ងៃទី១៣ ខែតុលា ថា បច្ចុប្បន្នមានសាឡង់ជាង ១០គ្រឿងកំពុងតែមមាញឹកបូមខ្សាច់ ធ្វើឲ្យរំខានដល់ប្រជានេសាទនៅតំបន់នោះ មិនអាចរកបានជលផលដូចមុនឡើយ។ លោកបន្ថែមថា អាជ្ញាធរមិនបានសិក្សាពីផលប៉ះពាល់ និងស្ដាប់មតិយោបល់របស់ប្រជាពលរដ្ឋ ដែលពឹងផ្អែកលើមុខរបរនេសាទនោះទេ ហើយបច្ចុប្បន្នមានប្រជានេសាទជាង ៣០០គ្រួសារ ដែលកំពុងតែប្រកបរបរនេសាទនៅតំបន់នោះ ដើម្បីផ្គត់ផ្គង់ជីវភាពគ្រួសារ។
លោក សំ ធី៖ «សុំឲ្យរដ្ឋាភិបាលដែលផ្ដល់អាជ្ញាប័ណ្ណដល់ក្រុមហ៊ុនមួយ កំពុងធ្វើការបូមខ្សាច់រាល់ថ្ងៃ សុំឲ្យដកឬក៏ពិនិត្យអាជ្ញាប័ណ្ណឡើងវិញ មកនិយាយជាមួយប្រជាពលរដ្ឋ ដែលពួកខ្ញុំកំពុងតែរងគ្រោះ កុំឲ្យពួកខ្ញុំបាត់បង់ជំនឿដល់រដ្ឋាភិបាល មាននរណាបោះឆ្នោតជូនគាត់មានតែប្រជាពលរដ្ឋទាំងអស់គ្នានេះហើយ ពេលបោះឆ្នោតឲ្យហើយអត់គិតគូរដល់ប្រជាពលរដ្ឋ សូមពិនិត្យមើលប្រជាពលរដ្ឋទាំងអស់នេះ ហើយគាត់ទាំងអស់គ្នាគាត់រំពឹងទៅលើអ្វីស្រែក៏គាត់មិនមានធ្វើមានតែតំបន់នេសាទនេះតែមួយគត់»។
ពលរដ្ឋម្នាក់ទៀតដែលពឹងផ្អែកលើមុខរបរនេសាទ សុំមិនបញ្ចេញឈ្មោះ ឲ្យដឹងថា រហូតមកដល់ពេលនេះ ទាំងអាជ្ញាធរភូមិឃុំ និងអាជ្ញាធរថ្នាក់ជាតិ មិនទាន់បង្ហាញព័ត៌មានឲ្យបានជាក់លាក់ជុំវិញអាជីវកម្មបូមខ្សាច់នេះនោះទេ។ លោកស្រីបន្ថែមថា ការបូមខ្សាច់នេះនឹងបង្កផលប៉ះពាល់ដល់ប្រជាពលរដ្ឋ ដែលធ្លាប់នេសាទជុំវិញទីតាំងនោះ។
ពលរដ្ឋថ្លែងសុំមិនបញ្ចេញឈ្មោះ៖ «សំណូមពរប្រជាពលរដ្ឋខ្លួនឯងក្រោកឈរដោយខ្លួនឯងក្នុងការការពារធនធានធម្មជាតិមានតែពលរដ្ឋក្រោកឈរការពារទើបការពារតំបន់របស់ខ្លួនយើងបាន ពីព្រោះកន្លងមកក៏ប្រជាពលរដ្ឋក្នុងភូមិជាអ្នកការពារតវ៉ាបានដោយខ្លួនឯងដែរកន្លងមក បើសម្រាប់អាជ្ញាធរភូមិឃុំគាត់ដូចអត់មានសកម្មភាពអ្វីផង»។
ប្រជាពលរដ្ឋលើកឡើងទៀតថា តំបន់ដែលមានសាឡង់បូមខ្សាច់គឺស្ថិតនៅត្រង់ចំណុចមាត់ពាមតានូន ក្នុងភូមិសាស្ត្រស្រុកបុទុមសាគរ ខេត្តកោះកុង ជាកន្លែងដែលពលរដ្ឋមកពីស្រុកចំនួន៣ ជាង៣០០ គ្រួសារ កំពុងប្រកបរបរនេសាទដើម្បីផ្គត់ផ្គង់ជីវភាពគ្រួសារ ក្នុងនោះមានស្រុកបុទុមសាគរ គីរីសាគរ និងស្រុកស្រែអំបិល ។ ពលរដ្ឋបន្ថែមថា ពួកគាត់អាចរកប្រាក់បានពីការនេសាទ ចាប់ពី ១០ម៉ឺនរៀល ទៅ ២០ម៉ឺនរៀលក្នុងមួយថ្ងៃ ប្រសិនបើមិនមានការបូមខ្សាច់នៅតំបន់នេះ ប៉ុន្តែបច្ចុប្បន្នពលរដ្ឋរកមិនសូវបានដូចមុនឡើយ។
ជុំវិញរឿងនេះ វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា និងអភិបាលខេត្តកោះកុង អ្នកស្រី មិថុនា ភូថង បានទេ នៅថ្ងៃទី១៣ ខែតុលា ដោយទូរស័ព្ទចូលតែគ្មានអ្នកទទួល។ ចំណែក អ្នកឧកញ៉ា លី យ៉ុងផាត ក៏វិទ្យុអាស៊ីសេរី មិនទានអាចទាក់ទងបានដែរនៅថ្ងៃដដែលនេះ។
ចំណែកអនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី យល់ឃើញថា មុនផ្ដល់អាជ្ញាប័ណ្ណទៅឲ្យក្រុមហ៊ុនឯកជនធ្វើអាជីវកម្ម អាជ្ញាធរត្រូវតែសិក្សាអំពីផលប៉ះពាល់បរិស្ថាន និងសង្គមឲ្យបានត្រឹមត្រូវជាមុនសិន ហើយត្រូវពិគ្រោះយោបល់ជាមួយប្រជាពលរដ្ឋ ផ្ដល់ព័ត៌មានឲ្យបានច្បាស់លាស់ដល់ប្រជាពលរដ្ឋនៅតំបន់នោះ ដើម្បីជៀសវាងអាជ្ញាធររងនូវពាក្យរិះគន់ពីពលរដ្ឋ និងធ្វើឲ្យប៉ះពាល់ដល់មុខរបរប្រចាំថ្ងៃរបស់ពួកគាត់ថែមទៀត។
លោក យិន ម៉េងលី៖ «អ៊ីចឹងដើម្បីឲ្យប្រជាពលរដ្ឋអស់មន្ទិលសង្ស័យ អស់ចម្ងល់ អស់បញ្ហា មន្ត្រីជំនាញត្រូវធ្វើការបកស្រាយហើយអ្វីដែលប្រជាពលរដ្ឋលើកឡើងប៉ះពាល់មុខរបរជីវភាពរបស់ពួកគាត់បាត់បង់ជីវចម្រុះនៅក្នុងសមុទ្រជំនាញត្រូវធ្វើការពន្យល់ ត្រូវសិក្សាឡើងវិញ ពីព្រោះកាលណាយើងធ្វើការអភិវឌ្ឍហើយបាត់បង់ប្រយោជន៍ ប៉ះពាល់ជីវភាពរបស់ប្រជាពលរដ្ឋ វាធ្វើឲ្យប៉ះពាល់ដល់សិទ្ធិសេដ្ឋកិច្ចរបស់ប្រជាពលរដ្ឋ»។
ប្រជាពលរដ្ឋស្នើឲ្យរដ្ឋាភិបាលផ្អាកអាជីវកម្មបូមខ្សាច់ជាបណ្ដោះអាសន្ន ដើម្បីជួបជជែកពិភាក្សាជាមួយប្រជាពលរដ្ឋ ជាង៣០០គ្រួសារ សិក្សាពីផលប៉ះពាល់ឲ្យបានច្បាស់លាស់ និងស្វែងរកដំណោះស្រាយ ហើយប្រសិនបើរកឃើញថា ការធ្វើអាជីវកម្មបូមខ្សាច់នេះបង្កផលប៉ះពាល់ដល់ប្រជាពលរដ្ឋ អាជ្ញាធរត្រូវបញ្ឈប់ និងដកហូតយកអាជ្ញាប័ណ្ណបូមខ្សាច់ក្រុមហ៊ុននេះមកវិញ បើពុំដូច្នោះទេ ប្រជាពលរដ្ឋគ្មានកន្លែងនេសាទ សម្រាប់ផ្គត់ផ្គង់ជីវភាពគ្រួសាររបស់ពួកគាត់ដូចមុនឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។