សហគមន៍ខកចិត្តនឹងគណៈកម្មការជាតិរកមិនឃើញបទល្មើសនៅជុំវិញព្រៃឡង់
2023.05.08
អគ្គមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ចុះត្រួតពិនិត្យគំនរឈើក្នុងបរិវេណក្រុមហ៊ុនដីសម្បទានសេដ្ឋកិច្ចចិន ក្នុងឃុំរលួស ស្រុកសំបូរ ខេត្តក្រចេះ កាលពីថ្ងៃទី១៩ ខែមករា ឆ្នាំ២០១៦។
RFA
សហគមន៍សកម្មជនហួសចិត្តដែលគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ រកមិនឃើញបទល្មើសដែលកើតឡើងដោយក្រុមហ៊ុននៅជុំវិញតំបន់ព្រៃឡង់ខណៈកន្លងមកសហគមន៍ និងសកម្មជនរកឃើញការកាប់បំផ្លាញព្រៃឡង់ប្រព្រឹត្តិដោយក្រុមហ៊ុនឯកជន។ សហគមន៍និងសកម្មជន ចាត់ទុកការបង្ក្រាបនេះជាការសម្ដែង មិនមែនជាការបង្ក្រាបពិតប្រាកដឡើយ។
ការបង្ក្រាបបទល្មើសព្រៃឈើនៅតំបន់ព្រៃឡង់ កើតឡើងក្រោយពីលោក សៅ សុខា បានបញ្ជាកាលពីថ្ងៃទី២៤ ខែមេសា កន្លងទៅ។ គេឃើញមានសមត្ថកិច្ចជាច្រើននាក់បានចុះទៅដល់តំបន់អភិរក្សភ្លាមៗ ក្រោយមកក៏មានការឃាត់គោយន្ត ម៉ូតូ ឡានដឹកឈើមូលធំៗ និងមនុស្សមួយចំនួនត្រូវបានបញ្ជូនទៅតុលាការខេត្តក្រចេះដើម្បីអនុវត្តច្បាប់។ ក៏ប៉ុន្តែ យុទ្ធនាការបង្ក្រាបនេះមិនបានរកឃើញការជាប់ពាក់ព័ន្ធរបស់ក្រុមហ៊ុនឯកជនណាមួយ ដែលមានទីតាំងជាប់តំបន់ព្រៃឡង់នោះទេ ទោះបីកងរាជអាវុធហត្ថលើផ្ទៃប្រទេស ចាប់បានឈើជាច្រើនម៉ែត្រគូប នៅក្នុងបរិវេណក្រុមហ៊ុនទាំងនោះក្ដី។
មេបញ្ជាការកងរាជអាវុធហត្ថខេត្តព្រះវិហារ លោក កង សៅគុណ ប្រាប់វិទ្យុអាស៊ីសេរី នៅថ្ងៃទី៧ខែឧសភា ថា កម្លាំងកងរាជអាវុធហត្ថលើផ្ទៃប្រទេស និងខេត្តបានចុះស្រាវជ្រាវជាងកន្លះខែមកនេះ រកមិនឃើញបទល្មើសព្រៃឈើនៅតំបន់ព្រៃឡង់ខាងខេត្តព្រះវិហារ ហើយក៏រកមិនឃើញបទល្មើសដែលជាប់ពាក់ព័ន្ធជាមួយក្រុមហ៊ុនម៉ាឃលឡូជីស្ទីក (ខេមបូឌា) (MACLE LOGISTICS។ លោកបន្ថែមថា កម្លាំងជំនាញរបស់លោកកំពុងបោះទីតាំង ដើម្បីធ្វើការបង្ក្រាបបទល្មើសព្រៃឈើនៅតំបន់ព្រៃឡង់។ លោកថាប្រសិនបើប្រជាពលរដ្ឋ ឬប្រជាសហគមន៍បានរកឃើញបទល្មើសនៅត្រង់ចំណុចណា ពួកគេអាចប្ដឹងទៅកម្លាំងរបស់លោកបាន។
លោក កង សៅគុណ៖ «ប៉ុន្មានថ្ងៃនេះខ្ញុំដើរដល់ថ្នាក់ខ្ញុំបើកឡានរុករហូតដល់ព្រៃឡង់ទៀត ប៉ុន្តែមិនឃើញជួបការបំផ្លិចបំផ្លាញហ្នឹង អត់ដែលជួបទេ គោលដៅស្រុកជ័យសែន និងរវៀងអត់ដែលជួបសោះ»។
ចំណែកក្រុមហ៊ុន ស៊ីងបាយអូថេក (Think Biotech Co.,Ltd) នៅខេត្តក្រចេះវិញ អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី ឲ្យដឹងថា ទោះបីគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ឃាត់ឈើជាច្រើននៅក្នុងក្រុមហ៊ុនក៏ពិតមែន ក៏ឈើទាំងអស់នោះមានច្បាប់អនុញ្ញាត។
លោក អេង ហ៊ី៖ «ព្រោះគេមានច្បាប់មានទម្លាប់គេ អាហ្នឹងជាធម្មតាការស្រាវជ្រាវយើងនៅតែស្រាវជ្រាវយើងមិនទាន់ដឹងថា នរណាជាប់ពាក់ព័ន្ធមិនជាប់ពាក់ព័ន្ធ យើងមិនទាន់និយាយបាន»។
សហគមន៍និងសកម្មជនហួសចិត្តនិងខកចិត្តដែលគណៈកម្មការជាតិ រកមិនឃើញបទល្មើសព្រៃឈើប្រព្រឹត្តិដោយក្រុមហ៊ុន ស៊ីងបាយអូថេក (Think Biotech Co.,Ltd) និងក្រុមហ៊ុនម៉ាឃល ឡូជីស្ទីក (ខេមបូឌា) (MACLE LOGISTICS) ដែលធ្លាប់កែនប្រជាពលរដ្ឋឲ្យចូលទៅកាប់ឈើយកលក់ទៅឲ្យក្រុមហ៊ុនរបស់ខ្លួន។
បណ្ដាញសហគមន៍ព្រៃឡង់ខេត្តព្រះវិហារ លោក ខេម សុឃី ឲ្យដឹងថា មន្ត្រីសមត្ថកិច្ចជំនាញថ្នាក់ខេត្ត របស់គណៈកម្មការជាតិ មិនបានធ្វើការស្រាវជ្រាវឲ្យគ្រប់ជ្រុងជ្រោយនោះទេ។ លោកថា ការបង្ក្រាបនៅតំបន់ព្រៃឡង់ខេត្តព្រះវិហារ សមត្ថកិច្ចហាក់ចុះទៅដើម្បីបង្គ្រប់កិច្ចតែប៉ុណ្ណោះ ។ លោកបន្ថែមថា បណ្ដាញសហគមន៍ព្រៃឡង់តែងតែចេញរបាយការណ៍ និងព័ត៌មានជាសាធារណៈ អំពីការកាប់បំផ្លាញព្រៃឈើដែលជាប់ពាក់ព័ន្ធជាមួយក្រុមហ៊ុនម៉ាឃលឡូជីស្ទីក ដែលមានទីតាំងស្ថិតនៅក្នុងបរិវេណក្រុមហ៊ុនវៀតណាមPNT។ លោកបន្ថែមទៀតថា ការរកមិនឃើញបទល្មើសព្រៃឈើដែលមិនជាប់ពាក់ព័ន្ធជាមួយក្រុមហ៊ុនឯកជននៅជុំវិញតំបន់ព្រៃឡង់ ធ្វើឲ្យសហគមន៍លែងមានជំនឿទៅលើគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
លោក ខេម សុឃី៖ «ហើយទទូចចង់បានគឺការធ្វើជារៀងរហូតដើម្បីសល់ព្រៃនិងព្រៃដែលសេសសល់មិនមែនធ្វើមួយប្រាវដើម្បីតែរបាយការណ៍ទេ ធ្វើដើម្បីឲ្យសល់ព្រៃសម្រាប់មនុស្សជាតិដើម្បីពិភពលោក អ្វីដែលខ្ញុំចង់បានអ្វីដែលខ្ញុំស្រមៃចង់បានទៅថ្ងៃខាងមុខ»។
ជុំវិញរឿងនេះ សកម្មជនបរិស្ថាន លោក អូត ឡាទីន ដែលធ្លាប់ចុះស្រាវជ្រាវរកឃើញបទល្មើសព្រៃឈើនៅតំបន់ព្រៃឡង់ យល់ឃើញថា គណៈកម្មការជាតិគួរតែបន្តស្រាវជ្រាវបន្ថែមទៀត និងដាក់កម្លាំងសម្ងាត់ដើម្បីតាមដានទៅលើក្រុមហ៊ុនទាំងអស់ ដែលមានទីតាំងជាប់តំបន់ការពារធម្មជាតិមួយនេះ។ លោកថា បើពុំដូច្នោះទេ ក្រុមហ៊ុនទាំងនេះនឹងវិលត្រឡប់មករកស៊ីការកាប់បំផ្លាញព្រៃឈើសាជាថ្មីម្ដងទៀត។ លោក អូត ឡាទីន បន្ថែមថា កាលពីពេលកន្លងទៅក្រុមសកម្មជនអង្គការសង្គមស៊ីវិលដែលបានចុះល្បាត តែងតែជួបកម្មកររបស់ក្រុមហ៊ុន ហើយពួកគេបានសារភាពថា ពួកគេកាប់និងដឹកជញ្ជូនឈើយកទៅឲ្យក្រុមហ៊ុន អង្គរផ្លាយវូត និងក្រុមហ៊ុនម៉ាឃលឡូជីស្ទីក។
លោក អូត ឡាទីន៖ «ព្រោះពីពេលកន្លងទៅពេលដែលពួកយើងធ្វើការស៊ើបអង្កេត ធ្វើការជួបក្រុមជនល្មើសគឺក្រុមជនល្មើសតែងតែបញ្ជាក់ហើយនិងអះអាងប្រាប់ថា ពួកគាត់គឺជាក្រុមកម្មកររបស់ក្រុមហ៊ុន ជាពិសេសគឺក្រុមហ៊ុនអង្គរផ្លាយវូត និងក្រុមហ៊ុនម៉ាឃលឡូជីស្ទីកដែលទទួលទិញឈើពីប្រជាពលរដ្ឋដើម្បីយកធ្វើអាជីវកម្មបន្ត»។
កាលពីថ្ងៃទី២៣ ខែមិថុនា ឆ្នាំ២០២០ ក្រសួងកសិកម្មដែលចុះហត្ថលេខាដោយអតីតរដ្ឋមន្ត្រីនៃក្រសួងនេះ គឺលោក វេង សាខុន បានអនុញ្ញាតឱ្យក្រុមហ៊ុន ម៉ាឃល ឡូជីស្ទីក (ខេមបូឌា) (MACLE LOGISTICS) របស់លោក សយ សុផល ប្រមូលឈើក្នុងអនុតំបន់ ២អនុតំបន់៣ និងអនុតំបន់ ៤ ឋិតក្នុងបរិវេណដីសម្បទានសេដ្ឋកិច្ចរបស់ក្រុមហ៊ុន ភីអ៊ិនធី (P.N.T Co., Ltd.)។ ចំណែកក្រុមហ៊ុន ស៊ីងបាយអូថេក ក្រុមហ៊ុននេះក៏ទទួលបានដីសម្បទានសេដ្ឋកិច្ចលើផ្ទៃដីសរុបទំហំជាង ៣ម៉ឺន ៤ពាន់ហិកតារ(៣៤, ០០៧ហិកតារ) កាលថ្ងៃទី១២ ខែសីហា ឆ្នាំ២០១១ ដើម្បីធ្វើជាស្ថានីយផ្សព្វផ្សាយ និងស្ដារព្រៃឈើឡើងវិញ ស្ថិតនៅក្នុងខេត្តក្រចេះ និងខេត្តស្ទឹងត្រែង។
សហគមន៍អង្គការសង្គមស៊ីវិលជាតិ និងអន្តរជាតិ រកឃើញថា ក្រុមហ៊ុននៅជុំវិញតំបន់ព្រៃឡង់បានកាប់បំផ្លាញព្រៃឈើនៅក្នុងតំបន់នេះ អស់រយៈពេលជិតមួយទសវត្សមកហើយ។ ចំណែកមន្ត្រីរដ្ឋាភិបាលរបស់លោក ហ៊ុន សែន ក៏ជាប់ពាក់ព័ន្ធនឹងការប្រព្រឹត្តិអំពើពុករលួយផ្សំគំនិតឲ្យកាប់បំផ្លាញព្រៃឈើនៅតំបន់ព្រៃអភិរក្សមួយនេះ។ មិនតែប៉ុណ្ណោះអាជ្ញាធររបស់លោក ហ៊ុន សែន ក៏បានយាយីធ្វើទុក្ខបុកម្នេញទៅលើសហគមន៍សកម្មជន និងអង្គការសង្គមស៊ីវិល ដែលចូលរួមអភិរក្សព្រៃឈើនៅតំបន់ព្រៃឡង់។
ដែនជម្រកសត្វព្រៃព្រៃឡង់ជាប់ខេត្តបួន គឺខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំរដ្ឋាភិបាលបានប្រកាសបង្កើតជាដែនជម្រកសត្វព្រៃ កាលពីថ្ងៃទី៩ ខែឧសភា ឆ្នាំ២០១៦ មានផ្ទៃដីជាង៤ សែនហិកតារ (៤៣១.៦៨៣ ហិកតារ ) ដែលឋិត ក្រោមការគ្រប់គ្រងរបស់ ក្រសួងបរិស្ថាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីធនាគារបង្ខំឲ្យកូនបំណុលលក់ទ្រព្យសម្បត្តិសងលុយទៅធនាគារខ្លួន
- តំណាងរាស្ត្រនិងទីប្រឹក្សាបក្សប្រជាជនប្រតិកម្មលើការប្រមូលពន្ធថា គាបសង្កត់ពលរដ្ឋក្នុងគ្រាលំបាក
- អាជ្ញាធរបញ្ជូនកញ្ញា សេង ធារី ទៅឃុំខ្លួននៅពន្ធនាគារព្រៃសវិញ ក្រោយពេលមន្ត្រីអាមេរិកជួបលោក ហ៊ុន ម៉ាណែត ផ្ទួនៗ គ្នា
- អាមេរិកផ្ដល់ជំនួយ ១៨លានដុល្លារមកកម្ពុជាវិញ តែមិនបានទទួលស្គាល់ថា ការបោះឆ្នោតត្រឹមត្រូវទេ
- អ្នកវិភាគថា អាមេរិកផ្ដល់ជំនួយឲ្យកម្ពុជាឡើងវិញ ដើម្បីទប់ទល់នឹងឥទ្ធិពលចិន