ក្រុមយុវជនស្រឡាញ់បរិស្ថានប្រមាណ ១០នាក់គ្រោងធ្វើយុទ្ធនាការជិះកង់ ពីរាជធានីភ្នំពេញ ទៅខេត្តព្រះវិហារមានចម្ងាយជាង ៣០០គីឡូម៉ែត្រ (៣១៦) ក្នុងបំណងផ្សព្វផ្សាយ ពីសក្តានុពលដែនជម្រកសត្វព្រៃព្រះរកា និងស្នើឱ្យមានការបង្កើតយន្តការជាក់លាក់ ដើម្បីធានាពីប្រសិទ្ធភាពក្នុងកិច្ចគាំពារអភិរក្សព្រៃមួយនេះ។ អ្នកនាំពាក្យក្រសួងបរិស្ថាន ស្វាគមន៍យុទ្ធនាការនេះ ដោយបូកបញ្ចូលទាំងយន្តការដែលមានស្រាប់របស់ក្រសួង។
សមាជិកក្រុមយុវជនស្រឡាញ់បរិស្ថាន លោក សាន់ ម៉ាឡា ឱ្យដឹងនៅថ្ងៃទី២៦ វិច្ឆិកាថា មូលហេតុដែលក្រុមយុវជនធ្វើយុទ្ធនាការជិះកង់ពីភ្នំពេញទៅខេត្តព្រះវិហារនេះ គឺក្នុងទិសដៅធ្វើបច្ចុប្បន្នភាពព្រៃព្រះរកា ថាតើមកទល់ពេលនេះ មានការកាប់បំផ្លាញដល់កម្រិតណាហើយ? លោកថា ក្រុមយុវជននឹងចែកខិតប័ណ្ណ ផ្សព្វផ្សាយពីសក្តានុពលព្រៃព្រះរកា អំឡុងពេលដែលពួកគេជិះកង់ឆ្លងកាត់តំបន់នីមួយៗ។ លោកបន្ថែមថា គោលបំណងចម្បងរបស់ក្រុមយុវជន គឺស្នើឱ្យក្រសួងបរិស្ថាន បង្កើតយន្តការអភិរក្សព្រៃឈើ ច្បាស់លាស់ជាងមុន ស្របពេលដែលពួកលោកសង្កេតឃើញថា បទល្មើសព្រៃឈើក្នុងព្រៃការពារមួយនេះ នៅតែកើតមានឥតស្រាកស្រាន្ត៖ «អ្វីដែលយើង យើងមើលឃើញ កន្លងមកហ្នឹងនៅក្នុងព្រៃ ដោយសារមានផ្លូវខ្វាត់ខ្វែង អ៊ីចឹងវាជាការសម្រួលដល់ជនល្មើស ក្នុងការដឹក ដោយសារមិនមានកម្លាំងរបស់ឧទ្យានុរក្សគ្រប់គ្រាន់ ហើយកត្តាមួយទៀតគឺ ប្រហែលជាអាចមានការឃុបឃិតគ្នា ជាលុយកាក់ ដើម្បីសម្រួលឱ្យ ជនល្មើសចូលទៅដឹក។ ដូច្នេះហើយ ក្រសួងអាចបន្ថែមប៉ុស្តិ៍ត្រូតពិនិត្យ ឱ្យបានច្រើនជាងមុន ធ្វើម៉េចឱ្យមានការយន្តការមួយ ក្នុងការតាមដាន ការអនុវត្តច្បាប់របស់មន្ត្រី និងបើកទូលាយឱ្យពលរដ្ឋ និងយុវជនចូលរួមដឹងឮ។ ហ្នឹងបានជាវិធីមួយឱ្យយើងជឿជាក់ថា អាចបញ្ឈប់ » ។
លោក សាន់ ម៉ាឡា បន្ថែមថា ពួកលោកហាក់មិនទាន់ស្ងប់ចិត្តទាល់តែសោះ ពីយន្តការអភិរក្សដែនជម្រកសត្វព្រៃព្រះរកា របស់ក្រសួងបរិស្ថាន ដោយសារទំហំព្រៃឈើក្នុងព្រៃអភិរក្សមួយនេះ កាន់តែថយចុះបន្តិចម្ដងៗ។ លោកថា ពេលចាប់ជនល្មើសមួយចំនួនបាន មន្ត្រីបរិស្ថានបានត្រឹមតែផាកពិន័យអន្តរកាលប៉ុណ្ណោះ ដោយសារមានកិច្ចអន្តរាគមន៍ ពីថៅកែឈើ ហើយមួយរយៈខ្លីក្រោយមក ក្រុមជនល្មើសនៅតែបន្តសកម្មភាពកាប់ឈើដដែលៗ៖ «តាំងពីដាក់បញ្ចូលជាដែនជម្រកសត្វព្រៃព្រះរកា ក្នុងឆ្នាំ ២០១៦ ហ្នឹងរយៈពេល ៣ឆ្នាំហើយ ព្រៃនៅតែទទួលរងការកាប់បំផ្លាញជាហូរហែ ឥតស្រាកស្រាន្ត។ ដូច្នេះគឺយើងចង់ ឱ្យការងារអភិរក្សរបស់រដ្ឋាភិបាល និងក្រសួងបរិស្ថាន មានប្រសិទ្ធភាពជាងមុន » ។
អ្នកនាំពាក្យក្រសួងបរិស្ថាន លោក នេត្រ ភត្រា ចាត់ទុកយុទ្ធនាការនេះ ជាសិទ្ធិផ្ទាល់ខ្លួនរបស់ក្រុមយុវជន។ លោកថា យន្តការគ្រប់គ្រង តំបន់ព្រៃការពារធម្មជាតិ ដែលឋិតក្រោមការគ្រប់គ្រងរបស់ក្រសួងបរិស្ថាន គឺក្រសួងបានរៀបចំ សកម្មភាពអភិរក្ស និងសកម្មភាពចុះល្បាត ក្នុងដែនសមត្ថកិច្ចរបស់ក្រសួង។ លោកបញ្ជាក់ថា តំបន់ការពារធម្មជាតិដែលគ្រប់គ្រងដោយក្រសួងបរិស្ថាន ក្រសួងបានបញ្ជូនមន្ត្រីឧទ្យានុរក្សអនុវត្តច្បាប់ព្រៃឈើជាប្រចាំ។ ក្រៅពីនេះ ក្រសួងក៏ទាមទារឱ្យមានការចូលរួម ពីសហគមន៍ និងមហាជន ដើម្បីអនុវត្តច្បាប់ព្រៃឈើកាន់តែមានប្រសិទ្ធភាព៖ «ការផ្សព្វផ្សាយ ការចូលរួមក្នុងការអប់រំ ពលរដ្ឋក៏ដូចជា ផ្សព្វផ្សាយអំពីផលប៉ះពាល់ផ្សេងៗ វាជាការល្អ ក៏ប៉ុន្តែគ្រាន់ថា សកម្មភាពហ្នឹង សូមឱ្យមានភាពស្មោះត្រង់ ហើយគោរពតាមច្បាប់ដែរមាន។ សំខាន់យើងស្វាគមន៍ រាល់ការចូលរួមរបស់សាធារណជន ហើយយន្តការ ដែលមានស្រាប់បញ្ចូលគ្នា ធ្វើម៉េចឱ្យមានប្រសិទ្ធភាព » ។
ប្រជាសហគមន៍ការពារព្រៃព្រះរកា លោក ចាន់ សិលា ចាត់ទុកយុទ្ធនាការរបស់ក្រុមយុវជន ជាសញ្ញាវិជ្ជមានមួយ ផ្សព្វផ្សាយពីអត្ថប្រយោជន៍ព្រៃឈើឱ្យបានទូលំទូលាយ និងជាផ្នែកមួយគាំពារព្រៃព្រះរកា ដែលកំពុងទទួលរងការកាប់បំផ្លាញឈើធ្វើអាជីវកម្មជាបន្តបន្ទាប់។ លោកសង្កេតឃើញថា បច្ចុប្បន្ន ក្រុមជនល្មើសហាក់មិនខ្លាចសមត្ថកិច្ច និងឆ្មាំអភិរក្សរបស់ក្រសួងបរិស្ថាននោះទេ គឺពួកគេខ្លាចតែក្រុមយុវជន និងសហគមន៍ការពារព្រៃឈើប៉ុណ្ណោះ នៅពេលដែលចុះល្បាតព្រៃឈើម្ដងៗ។ លោកថា ព្រៃព្រះរកានៅតែទទួលរងការកាប់រំលំឈើធំៗ អស់ជាបន្តបន្ទាប់ សូម្បីតែដើមឈើផលិតជ័រទឹករបស់អ្នកស្រុក ក៏កំពុងបាត់បង់ជាហូរហែដែរ៖ «មានតែអ្នកចង់ទៅ បង្ហើយតែរហូតតែប៉ុណ្ណឹងឯង ដឹកសាំងចូលជាបន្តៗ ដើម្បីបង្ហើយអាធំៗ ដែលមានអាខ្លះសល់ ៥០ ដើម ៧០ ដើមអ៊ីចឹងគេចង់បង្ហើយឱ្យអស់។ មិនថា តែខ្ញុំទេទាំងសហគមន៍ទាំងមូល ដោយសារតែគាត់ព្រួយបារម្ភខ្លាចគេ ឥឡូវគេបើកឱ្យមានអ្នកទិញអ៊ីចឹងហើយ។ ដើមជ័រអ្នកស្រុក រាល់ថ្ងៃមានតែដើមជ័រហ្នឹងហើយ ដែលធំបំផុត » ។
នៅលើក្រដាស ព្រៃព្រះរកា មានទំហំជាង ៩៦.០០០ហិកតារស្ថិតនៅចន្លោះព្រំប្រទល់ស្រុកចំនួន៣ គឺស្រុកត្បែងមានជ័យ ស្រុកជាំក្សាន្ត និងស្រុកឆែប របស់ខេត្តព្រះវិហារ។ មកទល់ពេលនេះ ព្រៃអភិរក្សមួយនេះ មានឆ្មាំអភិរក្ស ១៤នាក់ និងធ្វើការសហការជាមួយអាជ្ញាធរដែនដី សហគមន៍ និងសមត្ថកិច្ចចម្រុះ ដើម្បីចុះល្បាត និងទប់ស្កាត់បទល្មើសគ្រប់ប្រភេទ៕
(ប័ណ្ណផ្សព្វផ្សាយរបស់ក្រុមយុវជន)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។