អាជ្ញាធរខេត្តមួយចំនួននៅជុំវិញបឹងទន្លេសាប ធ្វើយុទ្ធនាការដាំដើមត្នោត ដើម្បីស្ដារឡើងវិញ នូវនិរន្តរភាពរបស់បឹងទន្លេសាប ឱ្យរួចផុតពីការទន្ទ្រានយកដី។
ក្រសួងរៀបចំដែនដី នគរូបនីយកម្ម និងសំណង់ បានប្រគល់គ្រាប់ត្នោតចំនួន ៣ម៉ឺនគ្រាប់ ទៅខេត្តកំពង់ធំ ដាក់ដាំនៅក្នុងតំបន់៣ ជុំវិញបឹងទន្លេសាប នៅថ្ងៃទី២៩ ក្នុងបំណងការពារដើម្បីកុំឱ្យមានការរុករៀនទន្ទ្រានយកដីនៅក្នុងតំបន់៣ មកធ្វើជាកម្មសិទ្ធិ។
ក្រៅពីខេត្តខេត្តកំពង់ធំ ថ្មីៗ នេះ អាជ្ញាធរខេត្តបាត់ដំបង ខេត្តពោធិ៍សាត់ ខេត្តសៀមរាប និងខេត្តកំពង់ឆ្នាំងជាដើម ក៏បានដាំកូនឈើ និងគ្រាប់ត្នោតរាប់ពាន់គ្រាប់និងដើម នៅតំបន់ព្រៃលិចទឹក ព្រំប្រទល់តំបន់បី ដែលរងការទន្ទ្រានយកដីធ្វើកសិកម្មដែរ។
យុទ្ធនាការនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី២៨ វិច្ឆិកា បានបញ្ជាឲ្យអាជ្ញាធរពាក់ព័ន្ធចុះបង្ក្រាបមន្ត្រីរាជការ ឬពលរដ្ឋទាំងឡាយណា ដែលបានកាប់ទន្ទ្រាន និងកាន់កាប់ដីព្រៃលិចទឹកយ៉ាងអនាធិបតេយ្យ នៅតំបន់បឹងទន្លេសាប។ លោក ហ៊ុន សែន ក៏បានបញ្ជាឲ្យដកហូតដីទាំងនោះត្រឡប់មកវិញ ដើម្បីដាំព្រៃឈើឡើងវិញ និងការពារព្រៃទាំងនោះទុកជាជម្រកត្រីពង។
ក្រសួងដែនដី ឲ្យដឹងថា នៅរយៈពេលជិត ៣សប្ដាហ៍ មានពលរដ្ឋចំនួន ៩.៤៩៤គ្រួសារ នៅក្នុងខេត្តចំនួន៦ បានឯកភាពប្រគល់ដីព្រៃលិចទឹកដែលខ្លួនបានកាប់ទន្ទ្រានសរុបជាង ៤ម៉ឺនហិកតារ (៤០.៤០៩.៨៨) ជូនរដ្ឋវិញ។ ទោះជាយ៉ាងណា គេនៅចាំមើលថា តើក្រោយពីការដាំហើយនឹងមានសកម្មភាពរក្សាថែទាំដើមត្នោតទាំងនោះឱ្យបានរស់ធំធាត់ដែរឬទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។