សកម្មជន​ព្រៃ​ឡង់​ និង​សកម្មជន​បរិស្ថាន​ ប្រតិកម្ម​ការ​លើកឡើង​តំណាង​ក្រុមហ៊ុន ស៊ីង បាយអូ​ថេក ថា មិន​កាប់​បំផ្លាញ​ព្រៃ​ឡង់

ដោយ ហេង រស្មី
2019-12-09
អ៊ីម៉ែល
មតិ
Share
បោះពុម្ព
ឈើ​ទាល ជា​ប្រភេទ​ដើម​ឈើ​ផលិត​ជ័រ​ទឹក ក្នុង​បរិវេណ​ក្រុមហ៊ុន ស៊ីង បាយអូថេក ក្នុង​ឃុំ​បឹង​ចារ ស្រុក​សំបូរ ខេត្ត​ក្រចេះ កាល​ពី​ចុង​ខែ​កុម្ភៈ ឆ្នាំ២០១៩។
ឈើ​ទាល ជា​ប្រភេទ​ដើម​ឈើ​ផលិត​ជ័រ​ទឹក ក្នុង​បរិវេណ​ក្រុមហ៊ុន ស៊ីង បាយអូថេក ក្នុង​ឃុំ​បឹង​ចារ ស្រុក​សំបូរ ខេត្ត​ក្រចេះ កាល​ពី​ចុង​ខែ​កុម្ភៈ ឆ្នាំ២០១៩។
រូប៖ សកម្មជន​បរិស្ថាន

សហគមន៍​ព្រៃ​ឡង់​ និង​សកម្មជន​បរិស្ថាន​ ប្រតិកម្ម​ចំពោះ​ការ​លើកឡើង​ របស់​តំណាង​ក្រុមហ៊ុន​ ស៊ីង​ បាយអូ​ថេក (THINK​ BIOTECH​ CAMBODIA) ដែល​ថា របាយការណ៍​របស់​ពួក​គេ គឺ​ជា​ការ​​លាប​ពណ៌​ប្រឆាំង​ក្រុមហ៊ុន​របស់​លោក​។ សកម្មជន​ការពារ​បរិស្ថាន​នៅ​តែ​អះអាង​ថា​ ក្រុមហ៊ុន​ ស៊ីង​ បាយ​អូ​ថេក បាន​ប្រព្រឹត្ត​កំហុស​ជាច្រើន​ដូចជា​ កាប់​ឈើ​​ក្នុង​ព្រៃ​អភិរក្ស​ ដើម្បី​ធ្វើអាជីវកម្ម​ខុស​ច្បាប់​ និង​ការ​មិន​បាន​កាត់​ឆ្វៀល​ផល​ប៉ះពាល់​ដី​ជូន​ប្រជាពលរដ្ឋ ជាពិសេស​ ក្រុមហ៊ុន​ស៊ីង​បាយអូ​ថេក ជួល​ពលរដ្ឋ​ឱ្យ​កាប់​ដើម​ច្បោះ​ជ័រ​របស់​អ្នកស្រុក​ លក់​ឱ្យ​ខ្លួន​ជាដើម​។

សកម្មជន​ព្រៃ​ឡង់​ និង​សកម្មជន​បរិស្ថាន​ បាន​ហៅ​ការ​លើកឡើង​ របស់​ លោក តាន់ សុខហ៊ាង តំណាង​ក្រុមហ៊ុន​ ស៊ីង​ បាយ​អូ​ថេក ប្រចាំ​ប្រទេស​កម្ពុជា​ថា​ គ្រាន់តែ​ជា​លេស​ឆ្លើយ​ដោះសា​យក​រួច​ខ្លួន​ គេច​ពី​ការទទួលខុសត្រូវ​ ប៉ុណ្ណោះ​។ ពួក​គេ​អះអាង​ថា​ ក្រុមហ៊ុន​នេះ​ និង​ក្រុមហ៊ុន​អង្គរ​ប្លាយ​វូដ (Angkor Playwood)​ គឺជា​មេខ្លោង​បំផ្លាញ​ទំហំ​ព្រៃ​ឈើ​ធំធេង​ និង​បំផ្លាញ​ជីវភាពរស់នៅ​របស់​ប្រជាជន​ រាប់ពាន់​គ្រួសារ​ដែល​រស់នៅ​ជុំវិញ​តំបន់​ព្រៃ​ឡង់។ ពួកគេ​សង្ស័យ​ថា ក្រុមហ៊ុន​នេះ​បាន​ជះ​លុយ​ជាច្រើន​ ឃុបឃិត​គ្នា​ជា​ប្រព័ន្ធ​ ដើម្បី​កាប់​ចោះ​យក​ឈើ​ធំៗ​ ក្នុង​ព្រៃ​ឡង់​ និង​ព្រៃ​សហគមន៍​ យក​ទៅ​លក់​នៅ​ក្រៅ​ប្រទេស។

ការ​លើកឡើង​នេះ​ បន្ទាប់ពី​​លោក តាន់ សុខហ៊ាង​ តំណាង​ក្រុមហ៊ុន​ ស៊ីង ​បាយ​អូ​ថេក ប្រចាំ​ប្រទេស​កម្ពុជា​​ប្រាប់​អាស៊ី​សេរី​កាលពី​ថ្ងៃ​ទី៩ ធ្នូ​ថា ក្រុម​ហ៊ុន​របស់​លោក​មិន​បាន​កាប់​បំផ្លាញ​ព្រៃ​ឈើ​ឆ្លង​ទៅ​ព្រំ​ប្រទល់​នៅ​ក្នុង​តំបន់​ព្រៃ​ឡង់​ទេ គឺ​កាប់​នៅ​ក្នុង​បរិវេណ​របស់​ក្រុមហ៊ុន​តែ​ប៉ុណ្ណោះ។ លោក​និយាយ​ថា​ រដ្ឋាភិបាល​បាន​ផ្ដល់​ដី​សម្បទាន​សេដ្ឋកិច្ច​នៅ​លើ​ផ្ទៃដី​ជាង ៣ម៉ឺន​ហិកតារ (៣៤.០០៧​ហិកតារ) សម្រាប់​ធ្វើ​អាជីវកម្ម​ផលិត​ក្តារ​បន្ទះ​លក់​នៅ​ក្នុង​ស្រុក មិន​បាន​ទៅ​កាប់​ឈើ​ប្រណិតៗ ដឹក​ជញ្ជូន​ចេញ​ទៅ​លក់​នៅ​ក្រៅ​ប្រទេស​ទេ។ ខណៈ​អះអាង​ថា សកម្មជន​ការពារ​បរិស្ថាន​ទាំងអស់នោះ​លាប​ពណ៌​ក្រុមហ៊ុន​ស៊ីង​បាយ​អូ​ថេ​ក​របស់​លោក លោក  តាន់ សុខហ៊ាង ចោទ​ថា អ្នក​ការពារ​បរិស្ថាន​ទាំង​នោះ គឺ​ជា​ក្រុម​បក្ស​ប្រឆាំង ជា​ភាសា​ដែល​គេ​តែង​ឮ​មន្ត្រី​បក្ស​កាន់​អំណាច​និយាយ​ចេញ​មក៖ «ជាទូទៅ​អ្នក​ទាំង​អស់​នោះ​ភាគ​ច្រើន​ជា​សកម្មជន​បក្ស​ប្រឆាំង​ជាពិសេស​គាគ​ច្រើនតែ​ទទួល​យក​នូវ​អ្វី​ដែល​ជា​ជំនួយ និង​អំណោយ​ពី​បរទេស​ហើយ​គាត់​មក​ប្រឆាំង​ជាមួយ​គោល​ការណ៍​អភិវឌ្ឍន៍​របស់​រាជ​រដ្ឋាភិបាល​អ៊ីចឹង​អ្នក​ទាំង​នោះ​ជា អ្នក​មកពី​ចម្ងាយ​ទេ។ ហើយ​ចំពោះ​ប្រជាពលរដ្ឋ​នៅ​ក្នុង​មូលដ្ឋាន​នេះ​ដូច​ជា​មិន​មាន​ការ​ចោទ​ប្រកាន់​នោះ​ទេ។ អានេះ​គ្រាន់​តែ​ជា​ការ​លាប​ពណ៌ ឬ​គ្រាន់​តែ​ជា​ការ​សំដែង​មក​ឲ្យ​ឃើញ​ថា​ជា​ការ​ប្រឆាំង»

សមាជិក​សហគមន៍​ព្រៃ​ឡង់​ លោក​ យឹម​ សុភ័ក្ត្រ​ ដែល​ចុះ​តាមដាន​រឿង​នេះ​ ឱ្យ​ដឹង​នៅ​ថ្ងៃ​ទី៩ ខែ​ធ្នូ​ថា​ សហគមន៍​ព្រៃ​ឡង់​ មាន​ភស្តុតាង​ជាច្រើន​បង្ហាញ​ថា ក្រុមហ៊ុន​ ស៊ីង ​បាយ​អូ​ថេ​ក និង​ក្រុមហ៊ុន​​អង្គ​ប្លាយ​វូដ​ មិន​គោរព​កិច្ចសន្យា​វិនិយោគ​ ជាពិសេស​កាប់​បំផ្លាញ​ ដើម​ច្បោះ​ជ័រ​រាប់​ម៉ឺន​ដើម​របស់​អ្នកស្រុក​ធ្វើអាជីវកម្ម​ ហើយ​កន្លងទៅ​សហគមន៍​ បាន​ប្រទះឃើញ​ឈើ​មូល​ធំៗ​ រាប់ពាន់​ម៉ែត្​គូប​ ឋិត​ក្នុង​បរិវេណ​ក្រុមហ៊ុន​ ស៊ីង​ បាយអូ​ថេក។

លោក​ឱ្យ​ដឹង​ទៀត​ថា ដើម​ឈើ​ធំៗ ទាំងនោះ​ កម្មករ​ក្រុមហ៊ុន​បាន​លួច​កាប់​ក្នុង​ព្រៃ​អភិរក្ស​ ព្រៃ​សហគមន៍​ ខណៈ​ដែល​ដី​សម្បទាន​សេដ្ឋកិច្ច​ដែល​រដ្ឋាភិបាល​ផ្ដល់​ឱ្យ​ក្រុមហ៊ុន​ គ្មាន​នៅសល់​ឈើ​ធំៗ ទៀត​ទេ។ លោក​ថា​ កន្លងទៅ​ក្រុមហ៊ុន​មាន​រថ​យន្ត​ប៉ាកុង​ជា​ច្រើន​គ្រឿង​ ចូល​ទៅ​ដឹក​ឈើ​ក្នុង​ព្រៃ​អាស្រ័យផល​របស់​ពលរដ្ឋ​ ក្នុង​ខេត្ត​ស្ទឹងត្រែង​ចំណុច​អូរ​គ្រាក់​ និង​បាន​កាប់​ផ្ដួល​រណ្ដៅ​ជ័រ​ទឹក​ អស់​ជាច្រើន​ដើម​ទៀត​ ហើយ​កាលពី​ពេល​ថ្មីៗ នេះ​ ក្រុមហ៊ុន​បាន​ឈូស​ផ្លូវ​ ៣ខ្សែ​ តម្រង់​មក​ព្រៃ​ឡង់​ ដើម្បី​បង្ក​លក្ខណៈ​ងាយស្រួល​ធ្វើអាជីវកម្ម​ឈើ។ លោក​អះអាង​ថា បើ​ទោះ​ជា​ក្រុមហ៊ុន​ ស៊ីង​ បាយអូ​ថេក (Think Biotech) បាន​ផ្ទេរសិទ្ធិ​បើក​រោងចក្រអារឈើ​ទៅ​ឱ្យ​ក្រុមហ៊ុន​ អង្គរ​ ប្លាយ​វូដ (Angkor​ Plywood) កាលពី​ចុងឆ្នាំ២០១៨​ក្ដី ក៏​ក្រុមហ៊ុន​ទាំងពីរ​នេះ​ នៅ​តែ​មាន​មហិច្ឆតា​ធ្វើ​អាជីវកម្ម​ឈើ​ខ្នាត​ធំ​ ក្នុង​ព្រៃ​អភិរក្ស​ដោយ​រំលោភច្បាប់៖ «យើង​នៅ​មាន​ភស្តុតាង​ជា​ច្រើន ដែល​អាច​បង្ហាញ​ថា ក្រុមហ៊ុន ស៊ីង បាយអូ​ថេក មិន​បាន​គោរព​តាម​កិច្ចសន្យា និង​កិច្ច​ព្រមព្រៀង​របស់​ក្រុមហ៊ុន រវាង​រដ្ឋាភិបាល​កម្ពុជា។ ជាក់​ស្ដែង​ការ​ស្នើសុំ​របស់​ក្រុមហ៊ុន​ទៅ​ក្រសួង​កសិកម្ម​រុក្ខ​ប្រមាញ់ គឺ​ប្រមូល​អនុផល​ព្រៃ​ឈើ ក៏​ប៉ុន្តែ​យើង​ឃើញ​មាន​ដើម​ច្បោះ​ជ័រ ជាពិសេស នៅ​មាន​ភស្តុតាង​ជាច្រើន គល់​ច្បោះ​ជា​ច្រើន​ដែល​បញ្ជាក់​ថា ជា​ការ​កាប់​បំផ្លាញ​ដោយ​ក្រុមហ៊ុន ស៊ីង បាយអូ​ថេក»

សកម្មជន​បរិស្ថាន​ លោក​ ហេង​ ស្រស់​ អះអាង​ថា​ ប្រសិនបើ​រដ្ឋាភិបាល​នៅ​តែ​បណ្ដោយ​ឱ្យ​ក្រុមហ៊ុន​ទាំងនេះ​ មាន​វត្តមាន​ជាប់​ព្រៃ​ឡង់​បន្ត​ទៀត​ មានន័យថា​ រដ្ឋាភិបាល​មាន​ចេតនា​បើកដៃ​ឱ្យ​ក្រុមហ៊ុន​ទាំងពីរ​នេះ​ បំផ្លាញ​ព្រៃឈើ​ និង​ជីវភាពរស់នៅ​របស់​ប្រជាជន​។ លោក​អះអាង​ទៀត​ថា​ ក្រុមហ៊ុន​ទាំងនេះ​ ពុំមែន​ស្ដារ​ព្រៃឈើ​ដូច​មាន​ចែង​ក្នុង​កិច្ចសន្យា​វិនិយោគ​នោះ​ទេ​ ផ្ទុយទៅវិញ​ គឺ​ធ្វើ​សកម្មភាព​កាប់​បំផ្លាញ​ ឈើ​មូល​ធំៗ​ ក្នុង​ព្រៃ​ឡង់​ និង​ព្រៃ​សហគមន៍​ ធ្វើអាជីវកម្ម​ យក​ទៅ​លក់​នៅ​ក្រៅ​ប្រទេស៖ «ក្រុមហ៊ុន ស៊ីង បាយអូ​ថេក យើង​ដឹង​ស្រាប់​ហើយ​ថា ចោល​បើ​លួច​របស់​គេ មិនដែល​សារភាព​ខ្លួន​ឯង​ថា ជា​ចោល​ទេ ត្រូវ​តែ​ព្យាយាម​បិទ​បាំង​ព័ត៌មាន​ពី​ខ្លួន​ឯង ព្យាយាម​និយាយ​ល្អ​ពី​ខ្លួន​ឯង ដើម្បី​កុំ​ឱ្យ​គេ​ថា ខ្លួន​ឯង​ហ្នឹង​ជា​ចោល។ ប្រសិន​បើ​យើង​មើល ពី​សកម្មភាព​របស់​គាត់​ហ្នឹង វា​លើស​ពី​ចោល​ទៅ​ទៀត។ ប្រើ​ឱ្យ​សន្តិសុខ​ហាម​ឃាត់ មិន​ឱ្យ​មាន​នរណា​ចូល​ក្នុង​តំបន់​ក្រុមហ៊ុន​ហ្នឹង »

សកម្មជន​បរិស្ថាន​រូប​នេះ​ អះអាង​ថា ពួកគេ​នឹង​បង្ហាញ​របាយការណ៍​នៅ​ពេល​ឆាប់​ៗនេះ​ ឆ្លុះបញ្ចាំង​ថា​ ក្រុមហ៊ុន​ទាំងនេះ​ បាន​បំផ្លាញ​ទំហំ​ព្រៃឈើ​ដ៏​ធំ​សម្បើម​ក្នុង​ព្រៃ​អភិរក្ស​ និង​ព្រៃ​សហគមន៍​បំពានច្បាប់​ ធ្វើ​ឱ្យ​ប៉ះពាល់​ជីវភាពរស់នៅ​របស់​ប្រជាជន​ជាច្រើន​គ្រួសារ​។ លោក​ថា​ ពួកគេ​មា​នភ​ស្ដុ​តាង​ និង​ឯកសារ​ច្បាស់លាស់​ ដើម្បី​ធ្វើការ​លាតត្រដាង​ ពី​ទង្វើ​ទុច្ចរិត​ របស់​ក្រុមហ៊ុន​ទាំងនេះ​ ឱ្យ​សាធ​រណៈ​ជន​ និង​ពលរដ្ឋ​វាយតម្លៃ៖ «យើង​នឹង​បញ្ចេញ​របាយការណ៍​បញ្ជាក់​ថា ក្រុមហ៊ុន​មួយ​ហ្នឹង​ជាប់​ពាក់ព័ន្ធ​កាប់​បទ​ល្មើស​ព្រៃ​ឈើ ធ្វើ​ឱ្យ​មាន​ការ​បាត់បង់​ជីវភាព​ពលរដ្ឋ។ យើង​នឹង​បង្ហាញ​​របាយការណ៍​ថា ក្រុមហ៊ុន​មួយ​ហ្នឹង​ល្មើស​ច្បាប់ ហើយ​ចូល​ទៅ​លួច​កាប់​ឈើ ក្នុង​តំបន់​ព្រៃ​ឡង់ ហើយ​យើង​មាន​ឯកសារ និង​ភស្តុតាង​គ្រប់គ្រាន់។ យើង​ជា​សកម្មជន​ព្រៃ​ឈើ​មួយ​រូប យើង​​ធ្វើ​ការ​តាម​ដាន និង​ស៊ើប​អង្កេត​លើ​ក្រុមហ៊ុន​មួយ​ហ្នឹង យើង​គិត​ថា ជា​ក្រុមហ៊ុន​បំផ្លាញ​ព្រៃ​ឈើ និង​បំផ្លាញ​ធនធាន​ធម្មជាតិ​របស់​ប្រទេស​កម្ពុជា»

កាលពីដើម​ខែ​តុលា​កន្លង​ទៅ​ រដ្ឋមន្ត្រី​ក្រសួង​បរិស្ថាន​ លោក​ សាយ​ សំអាល់​ បាន​ផ្ញើ​លិខិត​ទៅ​រដ្ឋមន្ត្រី​ក្រសួង​កសិកម្ម​ លោក​ វេង​ សា​ខុន​ ដើម្បី​សហការ​គ្នា​ស៊ើបអង្កេត​លើ​ក្រុមហ៊ុន​ស៊ីង​បាយ​អូ​ថេ​ក និង​ក្រុមហ៊ុន​អង្គរ​ប្លាយ​វូដ​ ដែល​ជាប់​សង្ស័យ​រឿង​កាប់​ឈើ​នៅ​តំបន់​ព្រៃ​ឡង់។

ចំណែក​អ្នក​នាំ​ពាក្យ​ក្រសួងបរិស្ថាន​ លោក​ នេត្រ​ រាស្ត្រ​ មានប្រសាសន៍ថា ក្រសួងបរិស្ថាន​មាន​ផែនការ​ និង​យុទ្ធសាស្ដ្រ​ច្បាស់លាស់​លើ​កិច្ចការពារ​ និង​អភិរក្ស​ធនធាន​ធម្មជាតិ។ ទោះ​ជា​យ៉ាង​ណា នៅ​ខណៈ​លោក​អះអាង​ថា ក្រុម​ការងារ​បច្ចេកទេស​របស់​លោក​កំពុង​ធ្វើ​ការ​សិក្សា​ស្រាវជ្រាវ​លើ​បញ្ហា​នេះ​ លោក នេត ភក្ត្រា ច្រាន​ចោល​ការ​រក​ឃើញ​របស់​សកម្មជន​បរិស្ថាន ដោយ​អះអាង​ថា នោះ​ជា​បទ​ល្មើស​ចាស់ៗ ដែល​កើត​មាន​ពី​មុនៗ៖ «សម្រាប់​ព្រៃ​ឡង់​របស់​យើង ខ្ញុំ​មិន​ទាន់​មាន​របាយការណ៍ បាន​ពេញលេញ នៅឡើយ ទេ ក៏ប៉ុន្តែ​យើង​បាន​បញ្ជាក់​ពី​ប្រធាន​មន្ទីរ​បរិស្ថាន នៅ​ជុំវិញ​តំបន់​ព្រៃ​ឡង់ គឺ​គេ​ថា បទ​ល្មើស​ពុំ​មាន​ការ​កើន​ឡើង​ដូច​អ្វី​ដែល សកម្មជន​បរិស្ថាន​មួយ​ចំនួន បាន​លើក​ឡើង​នោះ​ទេ ហើយ​របាយការណ៍​មួយ​ចំនួន ដែល​គាត់​បាន​លើក​ឡើង​នេះ ជា​របាយការណ៍​ចាស់ ហើយ​ពេល​ខ្លះ ក៏​បាន​ប្រើ​មធ្យោបាយ ឬ​មួយ​ក៏​អត់​ដែល​រាប់​គល់​ឈើ​ធ្វើ​ជា​បទ​ល្មើស ដែល​ខុស​ពី​អ្វី​ដែល​ក្រសួង​បាន​ធ្វើ មន្ត្រី​ឧទ្យានុរក្ស​របស់​យើង​បាន​ធ្វើ។ សូម​អរគុណ​បាទ»

ទោះ​ជា​យ៉ាង​ណា ​នៅ​ពេល​សួរ​ថា តើ​ក្រុមការងារ​បច្ចេកទេស​របស់ក្រ​សួង​គ្រោង​បិទ​បញ្ចប់​ដំណើរការ​ស៊ើបអង្កេត​លើ​ក្រុមហ៊ុន​ទាំងពីរ​ នៅ​ពេល​ណា​ហើយ​គ្រោង​នឹង​ផ្សាយ​របាយការណ៍​ជា​សាធារណៈ​ដែរ​ ឬ​ទេ​អ្នកនាំពាក្យ​រូប​នេះ​ នៅ​មិនទាន់​អាច​ឆ្លើយ​សំណួរ​នេះ​បាន​នោះ​ទេ​។

រី​ឯ​សមាជិក​សហគមន៍​ព្រៃ​ឡង់ លោក យឹម សុភ័ក្ត្រ ឱ្យ​ដឹង​បន្ថែម​ថា​ ប្រសិនបើ​ក្រុមហ៊ុន​ស៊ីង​បាយ​អូ​ថេក បញ្ជាក់​ភាព​ស្អាតស្អំ​របស់​ក្រុមហ៊ុន​ខ្លួន​ សូម​លោកនាយក​ក្រុមហ៊ុន​ ឈប់​រឹត​បន្តឹង​ច្រក​ចេញ​​ចូល​ និង​ត្រូវ​បើក​ច្រកចេញ​ចូល​ ដោយសេរី​។ លោក​បញ្ជាក់​ថា បើ​ក្រុមហ៊ុន​អះអាង​ថា ខ្លួន​រក​ស៊ី​សុចរិត​ពិត​ប្រាកដ​ សូម​បើក​ចិត្តទូលាយ​ឱ្យ​ ក្រុម​និស្សិត​ អ្នកកាសែត​ មន្ត្រី​សហគមន៍​ស៊ីវិល​ រួម​ទាំង​សហគមន៍​ មាន​សិទ្ធិ​ចេញចូល​តំបន់​នោះ​ដោយសេរី​ និង​គ្មាន​ការរារាំង​ ខណៈ​កន្លងទៅ​ក្រុមហ៊ុន​នេះ​ បាន​ពង្រាយ​សន្តិសុខ​យាមល្បាត​យ៉ាង​ប្រុងប្រយ័ត្ន​ មិន​ឱ្យ​មនុស្ស​ប្លែក​មុខ​ចេញចូល​តំបន់​នោះ៖ «ខ្ញុំ​គិត​ថា បើ​សិន​ជា​ក្រសួង​បរិស្ថាន និង​ក្រសួង​កសិកម្ម​មិន​យក​ចិត្ត​ទុក​ដាក់ ចំពោះ​ព័ត៌មាន​របស់​សហគមន៍ ហើយ​ជឿ​លើ​របាយការណ៍​របស់​មន្ត្រី​ខ្លួន ថ្នាក់​ក្រោម​របស់​ខ្លួន ខ្ញុំ​គិត​ថា ព្រៃ​ឡង់​មិន​យូរ​មិន​ឆាប់​អាច ទទួល​រង​ការ​កាប់​បំផ្លាញ​កាន់​តែ​ខ្លាំង​ក្លា ឡើង​ទៅ​ប្រៀប​ដូច​ថា សត្វ​ស្រមោច កំពុង​ពាំ​ចំណី ទោះ​បី​អង្ករ​មួយ​ការុង​ក៏​អស់​ដែរ»

ក្រុមហ៊ុន​ ស៊ី​ង បាយអូ​ថេក បើក​ដេប៉ូ​ ប្រមូល​ទិញ​ឈើ​ខ្នាត​យក្ស​ និង​អារ​ច្រៀក​ឈើ​ជា​បន្ទះ​ក្ដារ នៅ​ចំណុច​ដំបូក​ស ក្បែរ​ព្រៃ​ឡង់ ឆ្ងាយ​ពី​លំនៅឋាន​ពលរដ្ឋ​ក្នុង​ឃុំ​បឹង​ចារ​ប្រហែល​ជាង ១០គីឡូ​ម៉ែត្រ។ អាជីវកម្ម​ឈើ​នេះ​ ពលរដ្ឋ​មួយ​ចំនួន​ និង​កម្មករ​ក្រុមហ៊ុន​បាន​លួច​កាប់​ឈើ​ក្នុង​តំបន់​ព្រៃ​ឡង់ និង​ដើម​ច្បោះ​ជ័រ​ ដឹក​ជញ្ជូន​ចូល​ការដ្ឋាន​របស់​ក្រុមហ៊ុន។ កាលពី​ពេល​ថ្មីៗ នេះ (ថ្ងៃ​ទី៤ ធ្នូ) ពលរដ្ឋ​នៅ​ជាប់​ព្រៃ​ឡង់​ខេត្ត​ស្ទឹងត្រែង​ ប្រមាណ​ ៤គ្រួសារ​ បាន​លក់​ដើម​ច្បោះ​ជ័រទឹក​របស់​ខ្លួន​ឱ្យ​ក្រុមហ៊ុន​ប្រមាណ​ ១ពាន់​ដើម​ បន្ទាប់ពី​រង​ការ​គំរាម​កាប់​បំផ្លាញ​ពីសំណាក់​កម្មករ​របស់​ក្រុមហ៊ុន។

សកម្មជន​ការពារ​ព្រៃ​ឡង់​ ខេត្ត​ក្រចេះ​ បារម្ភ​ថា បើ​ក្រសួងបរិស្ថាន​ ក្រសួង​កសិកម្ម​ គណៈកម្មការ​ជាតិ​ និង​អាជ្ញាធរ​ពាក់ព័ន្ធ​ នៅ​តែ​បិទ​ភ្នែក​មិន​ចាត់វិធានការ​ដក​អាជ្ញាប័ណ្ណ​ក្រុមហ៊ុន​នេះ​ទេ​ ដើម​ឈើ​​ផលិត​ជ័រ​ទឹក​បន្សល់​ចុង​ក្រោយ​របស់​ពលរដ្ឋ​នឹង​រលាយ​នៅ​ពេល​ឆាប់ៗ នេះ បង្ក​បាត់បង់​ប្រាក់​ចំណូល និង​ជីវភាព​របស់​ពលរដ្ឋ។ ពួកគេ​អង្កេត​ឃើញ​ថា ពលរដ្ឋ​ភាគ​ច្រើន​ បាន​ខ្ចីបុល​ប្រាក់​ពី​ធនាគារ ដែល​រំពឹង​ថា ដង​ជ័រ​ទឹក​លក់​អាច​បង្វិល​ប្រាក់​សង​ម្ចាស់​បំណុល​វិញ​ តែ​ផ្ទុយ​ទៅ​វិញ បើ​ដើម​ឈើ​ផលិត​ជ័រទឹក​ត្រូវ​បាត់បង់​ ពួក​គេ​គ្មាន​ប្រភព​ចំណូល​សង់​ត្រឡប់​ជូន​ម្ចាស់​បំណុល​វិញ​ទេ។

កាលពី​ថ្ងៃទី១៩​ កក្កដា​ ២០១៩​ មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស​ និង​ជា​ប្រធាន​គណៈកម្មការ​ជាតិ​ទប់ស្កាត់​ និង​បង្ក្រាប​បទល្មើស​ធនធាន​ធម្មជាតិ​លោក សៅ សុខា បាន​ប្រកាស​ដាក់​ជីវិត​របស់​ខ្លួន​នៅ​ក្នុង​ប្រតិបត្តិ​ការ​បង្ក្រាប​បទល្មើស​ព្រៃឈើ​។ លោក​ថា​ យុទ្ធនាការ​លើក​នេះ​ លោក​បញ្ជា​ឱ្យ​មន្ត្រី​កងរាជអាវុធហត្ថ​ទូទាំង​ប្រទេស​ចាប់​ជនល្មើស​ទាំងអស់​មិនថា​ ជន​នោះ​មាន​តំណែង​​​ធំ​​ប៉ុន​ណា​នោះ​ទេ ប្រសិនបើ​ហ៊ាន​លួច​កាប់​ឈើ​នឹង​ត្រូវ​ចាប់​ផ្ដន្ទាទោស​តាមច្បាប់​ ដោយ​មិន​លើកលែង​នោះ​ឡើយ៖ «ខ្ញុំ​បាន​ទទួល​ព័ត៌មាន​មក​ថា ប្រទេស​ជិត​ខាង​យើង​គេ​សល់​ព្រៃ ៦០% នៃ​ផ្ទៃដី​ ផ្ទុយ​ទៅ​វិញ​គេ​បាន​ចំណូល​ពី​ការ​នាំ​ឈើ​ចេញ​បាន​ដល់​រាប់ពាន់​លាន​ដុល្លារ រីឯ​ប្រទេស​របស់​យើង​ព្រៃ​បាត់បង់​លុយ​ចូល​ថវិកា​ជាតិ​អត់​មាន​នេះ គឺ​ជា​ការ​ខ្មាស​អៀន​មួយ​ធំ​ណាស់​ដែល​យើង​កូន​ខ្មែរ​ទាំង​អស់​គ្នា»

ទោះ​ជា​បែប​នេះ​ក្តី របាយការណ៍​របស់​សកម្ម​ជន​បរិស្ថាន និង​សហគមន៍​ព្រៃ​ឈើ​ស្តីពី​បទ​ល្មើស​ព្រៃ​ដោយ​ភ្ជាប់​ជាមួយ​នូវ​រូប​ភាព និង​វីដេអូ​ផង​នៅ​តែ​កើត​មាន​ស្ទើរ​ជា​រៀង​រាល់ថ្ងៃ។

សហគមន៍​ព្រៃ​ឡង់​រក​ឃើញ​ថា ក្រុម​ជនជាតិ​ដើម​ភាគ​តិច​ជាង ២៥ម៉ឺន​នាក់ (២៥០.០០០​នាក់) ដែល​រស់នៅ​ក្នុង​ភូមិ​ចំនួន ៣៤០ភូមិ ជាប់​តំបន់​ព្រៃ​ឡង់​ទាំង ៤ខេត្ត​ នឹង​ប្រឈម​ផល​ប៉ះពាល់​ជីវភាព​ដោយ​ផ្ទាល់ និង​ប្រយោល​ ជាពិសេស​ មុខ​របរ​ចិញ្ចឹម​ជីវិត​របស់​ពួក​គេ ដែល​អាស្រ័យផល​ និង​រក​អនុផល​ព្រៃឈើ ប្រសិន​បើ​ព្រៃ​ឡង់​វិនាស​ហិនហោច​នៅ​ថ្ងៃ​ខាង​មុខ។

កន្លងទៅ​ សហគមន៍​ព្រៃ​ឡង់​បាន​ស្វែងរក​វិធីសាស្ត្រ​គ្រប់​បែប​យ៉ាង​ ដើម្បី​រក្សា​ព្រៃ​ឡើង​ឱ្យ​គង់វង្ស ​មាន​ជាអាទិ៍​ ការ​ចេញ​សេចក្ដី​ថ្លែង​ការណ៍ ការ​ដាក់​ញត្តិ​ទៅ​ក្រសួង​ពាក់ព័ន្ធ​ ការ​ធ្វើបាតុកម្ម​ស្នើ​ឱ្យ​បញ្ឈប់​​អាជ្ញាធរ​ប័ណ្ណ​ក្រុមហ៊ុន​ និង​ការ​ផ្ដល់​ដំណឹង​ឱ្យ​អាជ្ញាធរ​គ្រប់​ជាន់ថ្នាក់​ ឱ្យ​ប្រញាប់​ជួយ​ទប់ទល់​បទល្មើស​ព្រៃឈើ​ ក្នុង​ព្រៃ​ឡង់​ ក៏ប៉ុន្តែ​មកទល់​ពេលនេះ​នៅតែ​គ្មាន​លទ្ធផល​ជា​វិជ្ជមាន​នៅ​ឡើយ​​​ទេ​ ផ្ទុយទៅវិញ​ពួក​គាត់​អស់​សង្ឃឹម​ដោយ​ឃើញ​ក្រុមហ៊ុន ស៊ីង បាយអូ​ថេក និង​ក្រុមហ៊ុន អង្គរ ប្លាយ​វូដ នៅ​តែ​បន្ត​ធ្វើ​អាជីវកម្ម​ឈើ​ខុស​ច្បាប់​ទ្រង់ទ្រាយ​ធំ​ឥត​ស្រាក​ស្រាន្ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល