សហគមន៍​​ព្រៃឈើ​​សង្ឃ​រុក្ខ​វ័ន្ត​ថា​ ​អាជ្ញាធរ​យកចិត្តទុកដាក់​ការពារ​ព្រៃ​អភិ​រក្ស​នេះ​ប្រសើរ​ជាង​មុន​

ដោយ សុជីវី
2021-05-10
Share
សហគមន៍​​ព្រៃឈើ​​សង្ឃ​រុក្ខ​វ័ន្ត​ថា​ ​អាជ្ញាធរ​យកចិត្តទុកដាក់​ការពារ​ព្រៃ​អភិ​រក្ស​នេះ​ប្រសើរ​ជាង​មុន​ ​ព្រះសង្ឃ និង​មន្ត្រី​សង្គមស៊ីវិល ចុះ​ល្បាត​ព្រៃ​ឈើ​សង្ឃ​រុក្ខវ័ន ខេត្ត​ឧត្ដរមានជ័យ កាល​ពី​ថ្ងៃ​ទី៧ ខែ​វិច្ឆិកា ឆ្នាំ២០១៨។
រូបថត៖ ព្រះសង្ឃ​ឯករាជ្យ​ខេត្ត​បាត់ដំបង

ប្រជា​សហគមន៍​អះអាង​ថា​ ​ព្រៃ​សហគមន៍​សង្ឃ​រុក្ខ​វ័ន្ត​ ​មានផ្ទៃ​ដី​ជាង​ ​៣​ម៉ឺន​ហិកតារ​ ​ដែល​ជា​ព្រៃ​នៅ​សេសសល់​ចុងក្រោយ​គេ​ ​ក្នុង​ខេត្ត​ឧត្តរមានជ័យ​ ​បាន​ក្លាយ​ជា​តំបន់​អភិ​រក្ស​គំរូ​មួយ​នៅ​កម្ពុជា​ ​ខណៈ​ដើមឈើ​ធំ​ៗ​ ​សត្វព្រៃ​ ​រុក្ខជាតិ​ក​ម្រ ​និង​ជី​វ​ចម្រុះ​ ​មាននៅ​សល់​ច្រើន​ ​បើ​ធៀប​នឹង​តំបន់​អភិ​ក្ស​ដទៃទៀត​។​ ​ប្រជា​សហគមន៍​ថា​ ​អាជ្ញាធរ​ខេត្ត​កំពុង​ផ្តោត​ការ​យកចិត្តទុកដាក់​រួមគ្នា​  ​ទប់​ស្កាត់​បទល្មើស​ព្រៃឈើ​គ្រប់​ជ្រុង​ជ្រុង​ឱ្យ​មាន​ប្រសិទ្ធ​ភាព​។

ប្រធាន​ព្រៃ​សហគមន៍​សង្ឃ​រុក្ខ​វ័ន្ត​  ​ព្រះតេជព្រះគុណ​ ​ថូ​ ​ធូរ​ស់  ​មាន​ថេរ​ដីកា​ថា​ ​អាជ្ញាធរ​ពាក់ព័ន្ធ​ខេត្ត​នេះ​កំពុង​អនុវត្ត​តាម​ការ​ប្តេជ្ញា​ចិត្ត​របស់​ខ្លួន​ក្នុង​ការ​ថែរក្សា​ព្រៃ​អភិ​រក្ស​នេះ​ ឱ្យ​គង់វង្ស​ ​ព្រោះ​បទល្មើស​ព្រៃឈើ​នៅ​តំបន់​នោះ​ ​ស្ទើរតែ​គ្មាន​ទាល់តែសោះ​ ​នៅ​រយៈពេល​ជាង​ ​២​​ខែ ​ចុងក្រោយ​នេះ​។​ ​ព្រះអង្គ​បន្ថែម​ថា​  ​កន្លងទៅ​ព្រៃ​សហគមន៍​នេះ​ ​ប្រឈម​នឹង​សកម្មភាព​លួច​កាប់ដើមឈើ​ធំ​ៗ​ធ្វើអាជីវកម្ម​ ​ក៏ប៉ុន្តែ​នៅ​គ្រា​ដែល​អាជ្ញាធរ​បាន​បញ្ជូន​កម្លាំង​ចុះ​ល្បាត​ ​និង​យាមកាម​តឹងរ៉ឹង​ ​ធ្វើ​ឱ្យ​បទល្មើស​ថយ​ចុះ​ច្រើន​។​ ​លើស​ពី​នេះ​ ​ប្រជា​សហគមន៍​ ​និង​អាជ្ញាធរ​ ​បាន​ជីក​ប្រឡាយ​ហ៊ុម​ព័ទ្ធជុំវិញ​ព្រៃ​សម្រេច​បាន​ ​៨​០​ ​ភាគរយ​ ​ដើម្បី​បិទ​ខ្ទប់​មិន​ឱ្យ​ដឹក​ឈើ​ចេញពី​តំបន់​នោះ​៖​ ​«​អាត្មា​ជា​អ្នកដឹកនាំ​ប្រតិបត្តិ​ ​ក្នុង​ការ​ចុះ​ល្បាត​ ​ក្នុង​ការ​ទប់​ស្កាត់​បទល្មើស​ ​បន្ទាប់ពី​លោកគ្រូ​ ​ប៊ុន​ ​សា​លួត​មក​ហ្នឹង​​ទាំង​ប្រធាន​ ​អនុ​គណៈកម្មការ​​គ្រប់តំបន់​ភូមិ​ទាំង​អស់ហ្នឹង​។​ ​ជាទូទៅ​ ​អាត្មា​តែងតែ​ដឹកនាំ​គាត់​ ​ចុះ​ល្បាត​ ​បូករួម​ទាំង​កម្លាំង​មន្ត្រី​ឧ​ទ្យានុ​រក្ស​ ​ដែល​ឋិតនៅ​ជុំវិញ​ព្រៃ​ហ្នឹង​ផង​។​ ​យើង​​ឃើញ​ថា​ ​កិច្ចការ​ងារ​បន្ទាប់ពី​ ​លោក​ ​គ្រូ​ ​ប៊ុន​សា​លួត​មក​ ​ឃើញ​ថា​ ​បាន​ប្រសើរ​ ​បាន​សហការ​គ្នា​ចុះ​ល្បាត​ជាមួយ​មន្ត្រី​ឧ​ទ្យានុ​រក្ស​ ​ប្រធានមន្ទីរ​បរិស្ថាន​ខេត្ត​ »។

ព្រះ​តេជគុណ​ ​ថូ​ ​ធូរ​ស់ ​មាន​ថេរ​ដីកា​បន្ថែម​ថា​  ​បច្ចុប្បន្ន​មាន​មន្ត្រី​បរិស្ថាន​ជាង​ ​២​០​នាក់​ ​បាន​ពង្រាយ​កម្លាំង​ឈរ​ជើង​ព័ទ្ធជុំវិញ​ព្រៃ​សហគមន៍​ជិត​១​រយ​នាក់​ ​យោធា​ជាង​ ​១​០​នាក់​ ​សមត្ថកិច្ច​ ​និង​អាជ្ញាធរ​ភូមិ​ឃុំ​ ​រួម​ទាំង​ពលរដ្ឋ​ ​បាន​សហការ​គ្នា​ផ្តល់​ព័ត៌មាន​ ​និង​ទប់​ស្កាត់​បទល្មើស​ព្រៃឈើ​គ្រប់រូប​ភាព​។​ ​ព្រះអង្គ​បន្ថែម​ថា ថ្វីត្បិតតែ​សកម្មភាព​កាប់​ឈើ​ធំ​ៗ​ថយ​ច្រើន​ក្តី​ ​ក៏ប៉ុន្តែ​សកម្មភាព​លួច​បរបាញ់​ ​និង​ដាក់អន្ទាក់​ចាប់​សត្វព្រៃ​ ​នៅតែ​កើតមាន​ច្រើន​ ​ហើយ​សហគមន៍​កំពុង​ស្វែង​រក​​យន្ត​ការ​​ដោះស្រាយ​។​

ព្រៃ​សហគមន៍​សង្ឃ​រុក្ខ​វ័ន្ត​ ​មានផ្ទៃ​ដី​ជាង​ ​៣​ម៉ឺន​ហិកតារ ​ស្ថិតនៅ​ក្នុងស្រុក​អន្លង់​វែង​ ​ចុង​កាល់​ ​និង​ស្រុក​សំរោង​ ​ក្នុង​ខេត្ត​ឧត្ដរមានជ័យ​។​ ​ព្រៃ​សហគមន៍​នេះ​ ​មាន​បឹង​ធម្មជាតិ​ដ៏​ស្រស់​ស្អាត​មួយ​ ​ដែល​មាន​ទំហំ​ ​៦​ពាន់​ហិកតារ​ ​សំបូរ​ត្រី​ ​ជី​វ​ចម្រុះ​ ​និង​មាន​សត្វព្រៃ​ក​ម្រ​ជាច្រើន​ប្រភេទ​រស់នៅ​ ​ដូចជា​សត្វ​ខ្ទីង​ ​ទន្សោង​ ​ស្វា​ ​ប្រើស​ ​ខ្លារខិន​ ​ត្រដក់​ធំ​ ​ព​ង្រួ​ល​ ​ខ្លាឃ្មុំ​តូច​ ​ឆ្កែព្រៃ​ ​ទោច​  ​និង​សត្វ​ក្ងោក​ជាដើម​។​

អាស៊ី​សេរី​ ​មិន​អាច​ទាក់ទង​អភិបាល​រង​ខេត្ត​ឧត្តរមានជ័យ​ទទួលបន្ទុក​ទប់​ស្កាត់​បទល្មើស​ព្រៃឈើ​ ​គឺ​លោក​ ​វ៉ា​ត​  ​ប៉ា​រ៉ា​នី​ន​ ​និង​ ​ប្រធានមន្ទីរ​បរិស្ថាន​ខេត្ត​នេះ​  ​លោក​  ​ភួង​ ​លី​ណា​ ​ដើម្បី​សុំ​ការ​បំភ្លឺ​រឿង​នេះ​បន្ថែម​បានទេ​ ​នៅ​ថ្ងៃ​ទី​១​០​ ខែ​ឧសភា​។​

ប្រធានមន្ទីរ​បរិស្ថាន​ខេត្ត​នេះ​លោក​  ​ភួង​ ​លី​ណា​ ​ធ្លាប់​លើកឡើង​ថា​  ​មន្ត្រី​ជំនាញ​បាន​ផ្សព្វផ្សាយ​ពីសា​រៈ​ប្រយោជន៍​ព្រៃឈើ​ ​ស្តារ​ព្រៃឈើ​ឡើងវិញ​ ​និង​ជីក​ប្រឡាយ​ទឹក​​ហ៊ុម​ព័ទ្ធជុំវិញ​ព្រៃ​សហគមន៍​នេះ​ ​ដើម្បី​ទប់​ស្កាត់​បទល្មើស​នានា​។​ ​លោក​បញ្ជាក់​ថា​ ​អភិបាល​ខេត្ត​បាន​បញ្ជា​រយ៉ា​ង​ម៉ឹង​ម៉ាត់​ ​ការពារ​ព្រៃឈើ​ ​តំបន់​នេះ​ ឱ្យ​គង់វង្ស​៖​ ​«​យើង​ផ្សព្វផ្សាយ​ទាំង​កិច្ចការ​ងារ​អភិ​រក្ស​ ​និង​កិច្ចការ​ងារ​អភិវឌ្ឍន៍​។​ ​ការងារ​អភិវឌ្ឍន៍​យើង​ចង់និយាយ​ថា​ ​អភិវឌ្ឍន៍​ប្រកបដោយ​និរន្ត​ភាពជា​តំបន់​ទេសចរ​ផ្សេងៗ​។​ ​ការងារ​ទី​៣​ ​គឺ​ការ​ស្តារ​ព្រៃឈើ​ឡើងវិញ​ ​ក្រៅពី​ការងារ​អភិ​រក្ស​ ​ទោះបីជា​តំបន់​ហ្នឹង​ ​ជា​តំបន់​នៅ​បន្ទាប់ពី​ព្រៃឈើ​ច្រើន​ក៏ដោយ​ ​តែ​វាក៏ជា​តំបន់​មាន​​ព្រៃ​ រិ​ច​រឹល​ ​តាម​ផែនការ​របស់​មន្ទីរ​ ​យើង​នឹង​ដាំ​មួយ​ឆ្នាំ​ ​៣​ហិកតារ​ ​»​

ពលរដ្ឋ​ស្ម័គ្រចិត្ត​ចូលរួម​អភិ​រក្ស​ព្រៃ​សហគមន៍​សង្ឃ​រុក្ខ​វ័ន្ត​លោក​ ​សា​ ​ថ្លៃ​  ​អះអាង​ថា​ ​អភិបាល​ខេត្ត​តែងតែ​ទាក់ទង​មក​លោក​ដោយ​ផ្ទាល់​ ​សួរនាំ​ពី​ស្ថានភាព​ព្រៃ​ឈើ​ ​ដើម្បី​រក​ដំណោះស្រាយ​  ​ធ្វើ​យ៉ាងណា​អភិ​រក្ស​ព្រៃ​នេះ​ឱ្យ​គង់​។​ ​លោក​សង្កេតឃើញ​ថា​ ​ព្រៃ​សហគមន៍​នេះ​ ​នៅសល់​ដើមឈើ​មាន​តម្លៃ​ធំ​ៗ​ជាច្រើន​ប្រភេទ​រួម​មាន​ ​ដើម​ធ្នង់​ ​ឈើទាល​ ​ផ្ចឹក​ ​ត្រាច​ ​ផ្លុង​ ​ត្បែង​ ​និង​ ​គគីរ​ជាដើម​​៖​ ​«​អភិបាល​ខេត្ត​គាត់​យកចិត្តទុកដាក់​ ​ខ្ពស់​មែនទែន​ ​គ្រាន់តែ​ទាហាន​នៅ​ចូល​មួយ​ឆ្នាំ​ជាង​ហើយ​ ​ពេល​បទល្មើស​ ​គាត់​ដាក់​ទាហាន​មក​ ​ហើយ​គាត់​តាមដានមើល​រហូត​។​ ​ដល់ពេល​មាន​បញ្ហា​កើតឡើង​ ​ខ្ញុំ​តេលេ​ក្រាម​ដល់​គាត់​ ​ហើយ​គាត់​ពិនិត្យមើល​ ​ប្រាប់​គាត់​យើង​មកវិញ​ ​ត្រូវធ្វើ​ចេះ​ចុះ​ ​»​។

ជុំវិញ​រឿង​នេះ​ ​សកម្មជន​ការពារ​ព្រៃឈើ​ ​ដែល​ចុះ​អង្កេត​បទល្មើស​ព្រៃឈើ​លោក​ ​ហេង​ ​ស្រស់​ ​ថ្លែង​ថា​ ​លោក​នៅ​មិនទាន់​ជឿ​ចំពោះ​ការ​អះអាង​របស់​សហគមន៍​ទាំង​ស្រុង​​ទេ​ ​ព្រោះ​កន្លងទៅ​ពួក​លោក​ ​បាន​ចុះ​អង្កេត​ជាក់ស្តែង​រក​ឃើញ​ថា​ ​មានសមត្ថកិច្ច​ ​និង​មន្ត្រី​បរិស្ថាន​ខ្លះ​ ​បាន​ទទួល​សំ​ណូ​ល​ពី​បទល្មើស​ព្រៃឈើ​ជា​ថ្នូរ​មិន​អនុវត្ត​​ច្បាប់​។​  ​លោក​យល់ថា​ ​បើ​អាជ្ញាធរ​មាន​សុ​ឆន្ទៈ​ការពារ​ព្រៃ​សហគមន៍​ ឱ្យ​គង់វង្ស​ ​ត្រូវ​អនុវត្ត​ច្បាប់​ចំពោះ​មន្ត្រី​ខិលខូច​ដែល​ប្រព្រឹត្ត​អំពើពុករលួយ​ ​និង​អ្នកប្រព្រឹត្តល្មើស​តាម​ច្បាប់ជាធរមាន​៖​ ​«​យើង​មើលឃើញ​ថា​ ​មិនទាន់​មាន​វត្តមាន​មន្ត្រី​បរិស្ថាន​ ​ការ​កាប់​បំផ្លាញ​ព្រៃឈើ​មិនទាន់​មាន​គគ្រឹកគគ្រេង​ប៉ុន្មាន​ទេ​ ​តែ​ដល់ពេល​មាន​វត្តមាន​មន្ត្រី​ទាំង​អស់ហ្នឹង​ឈរ​ប្រចាំការ​តំបន់​នីមួយៗ​ ​តែង​មាន​បទល្មើស​ព្រៃឈើ​នៅ​តំបន់​នោះ​ ​ជាក់ស្តែង​ដូច​នៅ​តំបន់​ព្រៃ​សង្ឃ​រុក្ខ​វ័ន្ត​ជាដើម​ ​»។

របាយការណ៍​របស់​ប្រជា​សហគមន៍​ព្រៃ​សង្ឃ​រុក្ខ​វ័ន្ត​បង្ហាញ​ថា​   ​អំឡុង​ខែ​មករា​ ​និង​ខែ​កុម្ភៈ​ ​កន្លងទៅ​ ​ប្រជា​សហគមន៍​ឃាត់​ចាប់​បទល្មើស​បាន​ ​១​០​ ករណី​ ​រឹបអូស​ឈើ​ធ្នង់​ ​១​០​ដើម​ ​ដែល​មុខ​កាត់​ ​៤​តឹក​ ​រហូតដល់​ ​៥​តឹក​កន្លះ​ ​ប្រវែង​ជាង​ ​២​ម៉ែត្រ​ ​ទៅ​ ​៣​ម៉ែត្រ​ ​និង​រឹបអូស​រណា​យន្ត​ ​២​គ្រឿង​ ​រីឯ​ជនល្មើស​រត់​គេច​ខ្លួន​បាត់​។​ ​លើស​ពី​នេះ​ ​នៅ​រយៈពេល​ជាង​ ​២​ ​ខែ​ចុងក្រោយ​នេះ​ ​នៅ​មិនទាន់​ឃើញ​ ​មានការ​លូច​កាប់​ឈើ​ធំ​ៗ​ ​នៅឡើយ​ទេ​។​ ​ប្រជា​សហគមន៍​ ​សង្ឃឹម​ថា​ ​អាជ្ញាធរ​ខេត្ត​ឧត្តរមានជ័យ​ ​នឹង​ខិតខំ​បន្ថែម​ទៀត​ក្នុង​ការ​អភិ​រក្ស​ព្រៃ​សហគមន៍​បន្សល់​ចុងក្រោយ​នេះ​ ឱ្យ​គង់វង្ស​ត​ដល់​កូនចៅ​ជំនាន់​ក្រោយ​ ​ហើយ​សត្វព្រៃ​ក​ម្រ​ជាច្រើន​ប្រភេទ​នឹង​មាន​ជម្រក​យូរអង្វែង​ទាក់ទាញ​ភ្ញៀវ​ទេសចរ​៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល