ទឹកជំនន់ទន្លេមេគង្គនៅក្នុងខេត្តមួយចំនួនបានស្រកចុះបន្តិច ខណៈខេត្តមួយចំនួនទៀត នៅតែបន្តលិច
2024.09.27
ទឹកចាប់ផ្ដើមលិចស្រូវនៅឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ នៅថ្ងៃទី២៧ ខែកញ្ញា ឆ្នាំ២០២៤។
រូបពីពលរដ្ឋ
ទឹកជំនន់នៅតាមខេត្តមួយចំនួន ក្បែរទន្លេមេគង្គ ចាប់ផ្ដើមស្រកចុះជាបណ្ដើរៗហើយ ប៉ុន្តែនៅតាមតំបន់ទំនាបមួយចំនួននៅតែបន្តរងការជន់លិចខ្លាំង ស្របពេលដែលពលរដ្ឋកំពុងខ្វះខាតស្បៀងអាហារ និងថ្នាំសង្កូវសម្រាប់ទ្រទ្រង់ការរស់នៅ។
ស្ថានភាពទឹកជំនន់ទន្លេមេគង្គនៅចុងខែកញ្ញា នេះ ចាប់ផ្ដើមស្រកចុះក្នុងល្បឿនយឺតៗ ដែលធ្វើឱ្យតំបន់ទំនាប ជាប់ទន្លេក្នុងខេត្តមួយចំនួន នៅតែស្ថិតក្នុងស្ថានភាពជន់លិច ប៉ះពាល់ដល់ការរស់នៅ និងសុវត្ថិភាពរបស់ប្រជាពលរដ្ឋ។
ចៅអធិការវត្ត សិរីរតនារាម ស្ថិតនៅឃុំកោះតាស៊ុយ ស្រុកព្រែកប្រសព្វ ខេត្តក្រចេះ ព្រះតេជព្រះគុណ ភឿង សុភ័ក្ត មានថេរៈដីកាប្រាប់វិទ្យុអាស៊ីសេរី នៅថ្ងៃទី២៧ ខែកញ្ញា ថា ទឹកជំនន់ទន្លេមេគង្គ បានស្រកចុះបន្តិច បន្ទាប់ពីឡើងអស់រយៈពេល ៤ថ្ងៃ ប៉ុន្តែនៅក្នុងបរិវេណវត្ត នៅតែជន់លិច រហូតដល់ព្រះវិហារ។ ព្រះអង្គមានថេរៈដីកាបន្តថា ទឹកជំនន់បានធ្វើឱ្យប៉ះពាល់ដល់ផ្ទះប្រជាពលរដ្ឋទាំង ៣ភូមិ ដែលស្ថិតនៅលើកោះកណ្ដាលទន្លេនេះ និងបានបង្កការលំបាកដល់ពុទ្ធបរិស័ទក្នុងការប្រារព្ធពិធីបុណ្យកាន់បិណ្ឌ។
ព្រះតេជព្រះគុណ ភឿង សុភ័ក្ត៖ «ត្បិតតែថា ទឹកលិច ប៉ុន្តែញាតិញោមពុទ្ធបរិស័ទគាត់នៅតែខិតខំប្រឹង ផ្គត់ផ្គង់ចង្ហាន់ព្រះសង្ឃ តាមរយៈការធ្វើដំណើរតាមទូក តាមកាណូត បើកកាលេថង (គោយន្តកន្ត្រៃ) គាត់ព្យាយាមបើកមក ហើយក៏ទូកកាណូត អុំដោយដៃខ្លះ កាណូតខ្លះ សម្រាប់យកចង្ហាន់មកផ្គត់ផ្គង់ព្រះសង្ឃ»។
សេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម នៅថ្ងៃទី២៧ ខែកញ្ញា ឱ្យដឹងថា ទឹកទន្លេមេគង្គ នៅខេត្តក្រចេះ មានកម្ពស់ ២១,២១ម៉ែត្រ ខណៈកម្រិតប្រកាសអាសន្ន មានកម្ពស់ ២២ម៉ែត្រ។ ចំណែកកម្ពស់ទឹកទន្លេមេគង្គ នៅខេត្តកំពង់ចាម និងត្បូងឃ្មុំ មានកម្ពស់ ១៤,២៦ម៉ែត្រ ខណៈកម្រិតប្រកាសអាសន្ន មានកម្ពស់ ១៥,២០ម៉ែត្រ។
ពលរដ្ឋនៅឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ កញ្ញា ភួន ស្រីល័ក្ខ ប្រាប់វិទ្យុអាស៊ីសេរី ថា ទឹកជំនន់ទន្លេមេគង្គ បានឡើងអស់រយៈពេល ៤ថ្ងៃមកហើយ ដោយបានពន្លិចផ្លូវថ្នល់ និងផ្ទះប្រជាពលរដ្ឋអស់ជាច្រើនខ្នង ខណៈផ្ទះខ្លះ លិចដល់ដំបូលផ្ទះក៏មាន។ កញ្ញាបន្តថា ដោយសារទឹកជំនន់បានហក់ឡើងយ៉ាងឆាប់រហ័ស និងមានកម្ពស់ខ្ពស់ បានធ្វើឱ្យអ្នកភូមិជាច្រើន ជួបការលំបាក ដោយសារពួកគាត់មិនបានត្រៀមស្បៀងអាហារ ថ្នាំសង្កូវ និងសម្ភារៈប្រើប្រាស់ទុកមុន ខណៈអាជ្ញាធរ មិនបានផ្ដល់ជំនួយនៅឡើយ ក្នុងនោះកញ្ញាអះអាងថា អាជ្ញាធរមួយចំនួន មានភាពលម្អៀង និងកត់ឈ្មោះចែកអំណោយឱ្យតែបក្ខពួករបស់ខ្លួនប៉ុណ្ណោះ។
កញ្ញា ភួន ស្រីល័ក្ខ៖ «បាន (អំណោយ) តែអ្នកដែលបាន អ្នកដែលអត់ គឺនៅតែអត់។ ផ្ទះខ្ញុំនៅពេលលិចទឹក មានប្រហុក ផ្អក នៅនឹងក្រឡ យើងទិញរបស់ក្រៀមៗ សាគួរ។ ដូចខ្ញុំធ្លាប់លក់អីវ៉ាន់កំប៉ិកកំប៉ុក ហើយនៅពេលលិចទឹកអ៊ីចឹងទៅ គឺអត់បានលក់ទេ អ៊ីចឹងគឺអត់មានលុយចូលទេ»។
ដោយឡែក នៅក្នុងភូមិសាស្ត្ររាជធានីភ្នំពេញ ទឹកទន្លេមេគង្គមានការកើនឡើង បណ្ដាលឱ្យលិចចំណុចខ្លះនៃច្រាំងទន្លេតំបន់ទីក្រុងកោះនរា។ រីឯនៅខេត្តសៀមរាប វិញ ស្រុកចំនួន៣ បានទទួលផលប៉ះពាល់ដោយសារជំនន់ទឹកភ្លៀង អស់រយៈពេល ៤ថ្ងៃមកហើយ រួមមាន ស្រុកជីក្រែង ស្រុកស្វាយលើ និងស្រុកប្រាសាទបាគង។ ទោះយ៉ាងណា រដ្ឋបាលសាលាខេត្តសៀមរាប បានអះអាងថា ជំនន់ទឹកភ្លៀងនេះ មិនបានធ្វើឱ្យប៉ះពាល់ដល់ប្រាសាទបុរាណណាមួយនៅក្នុងខេត្តឡើយ។
ទាក់ទិនរឿងនេះ នាយកអង្គការបណ្ដាញការពារទន្លេបី លោក លាង ប៊ុនលាភ ណែនាំឱ្យពលរដ្ឋបន្តការប្រុងប្រយ័ត្ន ព្រោះចាប់ពីថ្ងៃទី១ ខែថ្ងៃទី១០ ខែតុលា ខាងមុខនេះ ប៉ែកខាងលើទន្លេសេសាន នឹងបើកទំនប់វារីអគ្គិសនីទម្លាក់ទឹក ទំហំជាង៦រយម៉ែត្រគីប ក្នុងមួយវិនាទី ដែលអាចបណ្ដាលឱ្យមានជំនន់ជាថ្មីម្ដងទៀតហូរចាក់មកទន្លេមេគង្គ។ លោកអំពាវនាវដល់អាជ្ញាធរពាក់ព័ន្ធឱ្យបង្កើនការជូនដំណឹង និងត្រូវត្រៀមជួយសង្គ្រោះពលរដ្ឋឱ្យបានទាន់ពេល។
លោក លាង ប៊ុនលាភ៖ «ធម្មជាតិវាកើតមានផល ភ្លៀង ព្យុះ ផ្គរ ហើយទំនប់នឹង ក៏គេបើកថែមទៀត ដូច្នេះទាមទារឱ្យប្រជាពលរដ្ឋ យកចិត្តទុកដាក់ឱ្យមែនទែន ពីព្រោះវាបណ្ដាលឱ្យ ការជន់លិចមានភាពឆាប់រហ័ស ដែលយើងមិនអាចចាត់ចែង មិនអាចយករបស់ធ្ងន់ៗ សត្វពាហណៈ ឬក៏អ្នកដែលងាយរងគ្រោះ ដូចជាមនុស្សចាស់ជរា ស្ត្រីមានផ្ទៃពោះ និងកុមារតូចៗ ឱ្យទាន់ពេលវេលានោះបានទេ។ ដូច្នេះយើងត្រូវតែត្រៀមមុន ដោយផ្ទៀងផ្ទាត់ជាមួយនឹងព័ត៌មាន និងផែនការ»។
គណៈកម្មាធិការជាតិគ្រប់គ្រងគ្រោះមហន្តរាយ បានប្រកាសថា គ្រោះទឹកជំនន់ បានបង្កផលប៉ះពាល់ដល់ប្រជាពលរដ្ឋសរុបជាង ៥ម៉ឺន ២ពាន់នាក់ (៥២.៣២៦) ស្មើនឹងជាង ១ម៉ឺន ៤ពាន់គ្រួសារ (១៤.១៥៨) ជម្លៀសប្រជាពលរដ្ឋ ១៣១គ្រួសារ ប៉ះពាល់ផ្ទះជាង ៦ពាន់ខ្នង (៦.០១៧) និងប៉ះពាល់សន្ទូង ពង្រោះជាង ៨ពាន់ហិកតារ (៨.២៥៩)។
ចំណែក អ្នកនាំពាក្យក្រសួងកសិកម្ម រុក្ខាប្រមាញ់ និង នេសាទ កញ្ញា អ៊ឹម រចនា បានប្រាប់សារព័ត៌មានក្នុងស្រុក នៅថ្ងៃទី២៧ ខែកញ្ញា ថា គ្រោះទឹកជំនន់បានបំផ្លាញផលដំណាំនៅក្នុងខេត្តចំនួន៧ រួមមាន ខេត្តក្រចេះ ស្ទឹងត្រែង មណ្ឌលគិរី ត្បូងឃ្មុំ កំពង់ចាម កំពង់ធំ និងខេត្តសៀមរាប។ ក្នុងនោះ ផលប៉ះពាល់លើដំណាំស្រូវ មានចំនួនជាង ១ម៉ឺន ២ពាន់ហិកតារ (១២.០០៨) ដំណាំស្បៀងរួមផ្សំជាង ៤ពាន់ហិកតារ (៤៤៩) និង ដំណាំទ្រទ្រង់សេដ្ឋកិច្ចចំនួនជាង ៨រយហិកតារ (៨២២)។
គិតត្រឹមថ្ងៃទី២៥ ខែកញ្ញា គ្រោះទឹកជំនន់ បានសម្លាប់មនុស្សចំនួន ៦នាក់ នៅខេត្តក្រចេះ ដោយសារលង់ទឹក។
ប្រជាពលរដ្ឋអំពាវនាវដល់រដ្ឋាភិបាល និងអាជ្ញាធរគ្រប់លំដាប់ថ្នាក់ ឱ្យបង្កើនការផ្ដល់ជំនួយស្បៀងអាហារ និងជួយសង្គ្រោះពលរដ្ឋរងគ្រោះប្រកបដោយសមធម៌ ចៀសវាងការ ចែកអំណោយដោយប្រកាន់បក្ខពួក ធ្វើឱ្យពលរដ្ឋកាន់តែរងគ្រោះបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ