ក្រុមហ៊ុនចិន សេវ ហ្គិច បន្តដឹកឈើពីតំបន់ផ្សេងចូលការដ្ឋាននៅខេត្តស្ទឹងត្រែង
2022.10.14
ឡានកែច្នៃរបស់ក្រុមហ៊ុនចិន ឈ្មោះ សេវ ហ្គេច (Sev Gek) ដឹកឈើឆ្លងសាឡាងកាត់ទន្លេស្រែពក ស្រុកសេសាន ខេត្តស្ទឹងត្រែង កាលពីថ្ងៃទី២ ខែតុលា ឆ្នាំ២០២២។ រូបសហគមន៍ផ្តល់
រូបភាពពីពលរដ្ឋសហគមន៍
ឈើមូលធំៗ បន្សល់ចុងក្រោយ ឋិតក្នុងឃុំចំនួន៣ នៃសេសាន ខេត្តស្ទឹងត្រែង ជាប់ព្រំដែនខេត្តរតនគិរី នៅតែប្រឈមការកាប់ផ្ដួលធ្វើអាជីវកម្ម ពីសំណាក់ ក្រុមហ៊ុនចិន សេវ ហ្គិច (Sev Gek)។ ប្រជាសហគមន៍ការពារព្រៃឈើ បន្តចោទក្រុមហ៊ុនចិនមួយនេះថា បំពានកិច្ចសន្យាវិនិយោគ ដោយបន្លំដឹកឈើពីខាងក្រៅចូលការដ្ឋានរបស់ខ្លួនជាច្រើនខែមកហើយ។
ពលរដ្ឋរស់នៅក្នុងឃុំចំនួន ៣ ក្នុងស្រុកសេសាន គឺឃុំស្រែគរ ឃុំតាឡាត និងឃុំក្បាលរមាស បន្តអំពាវនាវឱ្យរដ្ឋាភិបាល និងស្ថាប័នពាក់ព័ន្ធ ស៊ើបអង្កេតពីឧក្រិដ្ឋកម្មព្រៃឈើខ្នាតធំ ដែលប្រព្រឹត្តឡើងដោយ ក្រុមហ៊ុនចិន សេវ ហ្គេច (Sev Gek)។
ការលើកឡើងនេះ កើតឡើងក្រោយពីក្រុមហ៊ុនចិនមួយនេះ នៅតែប្រមូលឈើមានតម្លៃភាគច្រើនជាឈើឈ្លីច ដឹកចេញពីព្រៃអភិរក្សក្នុងស្រុកសេសាន ឆ្លងកាត់ទន្លេស្រែពក និងទន្លេសេសាន។
អ្នកភូមិថា ក្រុមហ៊ុននេះបានប្រើសាឡាង និងរថយន្តកែច្នៃ ជាមធ្យោបាយប្រមូលឈើ ចេញពីតំបន់អភិរក្ស ក្នុងឃុំតាឡាត និងតំបន់ក្រឡាពស់ ជាប់ព្រំប្រទល់ខេត្តរតនគិរី។
ពលរដ្ឋរស់នៅឃុំស្រែគរ លោក ហ្វុត ឃឿន ប្រាប់វិទ្យុអាស៊ីសេរី នៅថ្ងៃទី១៤ តុលាថា ផ្ទៃដីវិនិយោគ ដែលរដ្ឋាភិបាលផ្តល់សិទ្ធិឱ្យក្រុមហ៊ុននេះ អភិវឌ្ឍន៍ពុំមានឈើធំៗ ទៀតទេ ហើយឈើដែលក្រុមហ៊ុនកំពុងអារច្រៀកធ្វើអាជីវកម្ម គឺនាំចូលពីប្រភពខាងក្រៅ ។ លោកបន្ថែមថា អាជីវកម្មឈើរបស់ក្រុមហ៊ុននេះ កើតឡើងជាបន្តបន្ទាប់ជាងកន្លះឆ្នាំមកហើយ ដោយក្រុមហ៊ុនហាក់មានការប្រុងប្រយ័ត្នខ្ពស់ ក្នុងការនាំឈើចូលការដ្ឋានរបស់ខ្លួន៖ «ច្រើនជាងគេតាមមើល ដឹកចេញពីភូមិខ្សាច់ថ្មី ឃុំតាឡាតហ្នឹង គេដឹកឆ្លងសាឡាងមក គេដឹកចូលក្រុមហ៊ុនចិន ចូលរៃអារឈើ និងដឹកជញ្ជូនចេញតាមឡានក៏មាន តាមទូកក៏មាន»។
លោកបារម្ភថា អាជីវកម្មឈើរបស់ក្រុមហ៊ុននេះ នឹងធ្វើឱ្យដើមឈើធំៗ បន្សល់ចុងក្រោយ ក្នុងឃុំចំនួន៣ ក្នុងស្រុកសេសាន ហិនហោចអស់។ រីឯឈើខ្លះទៀត ដឹកជញ្ជូនតាមផ្លូវទឹកឆ្លងកាត់ទន្លេស្រែពក និងទន្លេសេសាន ចូលការដ្ឋានក្រុមហ៊ុន ដោយប្រើកម្លាំងកម្មកររាប់សិបនាក់។
ចំណែក តំណាងសហគមន៍ឃុំក្បាលរមាស លោកស្រី ស្រាំងឡាញ់ ឱ្យដឹងថា ប្រជាសហគមន៍នឹងដាក់ញត្តិជាថ្មីទៀត ទាមទារឱ្យអាជ្ញាធរខេត្តស្ទឹងត្រែង បំភ្លឺរឿងនេះ ព្រោះប៉ះពាល់ដល់ព្រៃអាស្រ័យផលរបស់ជនជាតិដើមភាគតិចព្នង និងព្រៃអភិរក្សផ្សេងទៀត ក្នុងឃុំតាឡាត។ លោកស្រីបន្ថែមថា កន្លងទៅ កម្មករក្រុមហ៊ុន បានលួចចូលកាប់ឈើធំៗ ក្នុងតំបន់អភិរក្សរបស់សហគមន៍ក្បាលរមាស ដោយគ្មានការទប់ស្កាត់នៅឡើយទេ៖ «នៅពេលក្តៅៗ សហគមន៍មិនចង់ឃើញមុខអាជ្ញាធរស្រុក និងខេត្តចុះមកមើលទីតាំងសហគមន៍ដែលប៉ះពាល់ហ្នឹង វាមិនទាន់មាន។
វិទ្យុអាស៊ីសេរីមិនអាចទាក់ទង សុំការបំភ្លឺជុំវិញការចោទប្រកាន់នេះ ពីតំណាងក្រុមហ៊ុនចិន ស៊ីវហ្គេច បាននៅឡើយទេ នៅថ្ងៃទី១៤ តុលា។
ប៉ុន្តែអ្នកនាំពាក្យរដ្ឋបាលខេត្តស្ទឹងត្រែង លោក ម៉ែន គុង មានប្រសាសន៍ថា ប្រសិនបើក្រុមហ៊ុនអនុវត្តមិនត្រឹមត្រូវតាមកិច្ចសន្យាវិនិយោគ អាជ្ញាធរជំនាញពាក់ព័ន្ធនឹងចុះពិនិត្យ ដោយជួបជាមួយប្រជាសហគមន៍នៅតំបន់នោះ ដើម្បីអនុវត្តច្បាប់។ លោកបញ្ជាក់ថា ក្រុមហ៊ុនអាចអនុវត្តបាន គឺស្របតាមកិច្ចសន្យាវិនិយោគ ជាមួយរដ្ឋាភិបាល និងក្រសួងពាក់ព័ន្ធ ដែលបានកំណត់ក្នុងផែនការមេ៖ «ប៉ុន្តែបើសិនជាក្រុមហ៊ុន ធ្វើលើសហួសពីព្រំប្រទល់កំណត់ ហើយបានទទួលព័ត៌មានពីសហគមន៍នោះ រដ្ឋបាលខេត្តនឹងចាត់វិធានការតាមនីតិវិធី ដោយមានកម្លាំងជំនាញចុះមូលដ្ឋាន។
កាលពីថ្ងៃទី១៣ ខែមីនា ឆ្នាំ២០១៩ លោកនាយករដ្ឋមន្ត្រី ហ៊ុន សែន បានចេញអនុក្រឹត្យ អនុបយោគដីទំហំ ៧.៣៩៧ហិកតារ សម្រាប់វិនិយោគឱ្យក្រុមហ៊ុនសម្បទានសេដ្ឋកិច្ច ដាំដើមអាកាស្យា ម៉ៃសាក់ និងប្រភេទឈើផ្សេងៗ ទៀត។
ប៉ុន្តែប្រជាសហគមន៍សង្កេតឃើញថា ក្រុមហ៊ុនចិន សេវ ហ្គេច បានអនុវត្តគម្រោងផ្ទុយពីកិច្ចសន្យាវិនិយោគ គឺដាំដំណាំកៅស៊ូ និងដើមចេកតិចតួចប៉ុណ្ណោះ គឺឃើញតែឈូសឆាយព្រៃ និងកាប់ឈើធ្វើអាជីវកម្មអស់ជាបន្តបន្ទាប់។ លើសពីនេះ ក្រុមហ៊ុនបានបើកដេប៉ូអារឈើខ្នាតធំ កាលពីចុងឆ្នាំ ២០២១ ក្នុងបរិវេណក្រុមហ៊ុន ឋិតក្នុងឃុំក្បាលរមាស ស្រុកសេសាន។
ជុំវិញរឿងនេះ មន្ត្រីសម្របសម្រួលសមាគមអាដហុក (Adhoc) ខេត្តស្ទឹងត្រែង លោក ប៊ី វ៉ាន់នី ស្នើដល់អាជ្ញាធរជាតិ ឱ្យស៊ើបអង្កេតឧក្រិដ្ឋកម្មព្រៃឈើទាំងនេះ ស្របពេលដែល អាជ្ញាធរខេត្តស្ទឹងត្រែងមិនអើពើអនុវត្តច្បាប់ដដែលៗ។ លោកសង្កេតឃើញថា អាជ្ញាធរពាក់ព័ន្ធខេត្តនេះ ហាក់ស្ងាត់ស្ងៀម មិនឃើញមានចំណាត់ការទាល់តែសោះ ចំពោះសកម្មភាពដឹកឈើខុសច្បាប់ទាំងនេះ៖ «អាជ្ញាធរមិនមានចំណាត់ការណាមួយ ធ្វើការឱ្យបានជាក់លាក់ទេ ឈើនៅតែប្រមូលចេញ ហើយឈើខ្លះប្រមូលក្រៅពីក្រុមហ៊ុន យកទៅដាក់ក្នុងរោងចក្រក្រុមហ៊ុនជាដើម»។
មន្ត្រីសង្គមស៊ីវិលរូបនេះ អំពាវនាវឱ្យអាជ្ញាធរខេត្តនេះ បំភ្លឺពីភាពមិនប្រក្រតី របស់ក្រុមហ៊ុនចិន សេវ ហ្គេច ដែលបន្តកាប់ឈើ និងដឹកជញ្ជូនឈើ ដោយគ្មានសមត្ថកិច្ចណាហ៊ានរារាំង។ លោកថា ពលរដ្ឋភាគច្រើនមិនហ៊ានរិះគន់ និងផ្តល់ព័ត៌មាន ពីឧក្រិដ្ឋកម្មព្រៃឈើនៅតំបន់នោះទេ ព្រោះបារម្ភពីសុវត្ថិភាព និងខ្លាចក្រែងអាជ្ញាធរធ្វើបាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម