សកម្មជន​ការពារ​ព្រៃ​ឈើ​​ខកចិត្ត​នឹង​តុលាការ​ខេត្ត​ក្រចេះ​ ដែល​មិន​ព្រម​ផ្ដល់​សម្ភារៈ​តាម​សំណើ​មក​វិញ

ដោយ មាន ឫទ្ធិ
2020-03-31
អ៊ីម៉ែល
មតិ
Share
បោះពុម្ព
សកម្មជន​ការពារ​ព្រៃឈើ​ រង់ចាំ​ទទួល​របស់​របរ​ពួក​គាត់​​ពី​តុលាការ​ខេត្ត​ក្រចេះ នៅ​ថ្ងៃ​ទី៣១ ខែ​​មីនា ឆ្នាំ២០២០។
សកម្មជន​ការពារ​ព្រៃឈើ​ រង់ចាំ​ទទួល​របស់​របរ​ពួក​គាត់​​ពី​តុលាការ​ខេត្ត​ក្រចេះ នៅ​ថ្ងៃ​ទី៣១ ខែ​​មីនា ឆ្នាំ២០២០។
រូប៖ សកម្មជន​បរិស្ថាន

ក្រុម​សកម្មជន​ព្រៃឈើ ដែល​សកម្ម​ក្នុង​ការ​ចុះ​ល្បាត​ការពារ​ព្រៃ​ឡង់ ខក​ចិត្ត​និង​សាលា​ដំបូង​ខេត្ត​ក្រចេះ បដិសេធ​ប្រគល់​សម្ភារៈ​ប្រើ​ប្រាស់​ក្នុង​ការ​ប្រមាញ់​បទ​ល្មើស​ព្រៃឈើ ម៉ូតូ និង​ថវិកា​ មក​ឲ្យ​ពួកគេ​ តាម​ការ​សន្យា ដោយ​យក​ហេតុ​ថា​ទុក​ស៊ើប​អង្កេត​បន្ត​ទៀត។ ពួក​គេ​ប្រកាន់​ជំហរ​ថា នឹង​ធ្វើ​សកម្មភាព​ការពារ​ព្រៃឈើ​ទៀត បើ​ទោះបីជា​មិន​មាន​សម្ភារៈ​ទាំង​អស់​នោះ​ក៏​ដោយ។

សកម្មជន​ការពារ​ព្រៃឈើ លោក ហេង ស្រស់ ប្រាប់​អាស៊ី​សេរី នៅ​ថ្ងៃ​ទី៣១ ខែ​មីនា​ថា ព្រះរាជ​អាជ្ញា​នៃ​សាលា​ដំបូង​ខេត្ត​ក្រចេះ ប្រើ​ជំនួយ​ការ​របស់​ខ្លួន ប្រគល់​ឲ្យ​សកម្មជន ៤នាក់ នូវ​អត្តសញ្ញាណប័ណ្ណ ប័ណ្ណ​បើកបរ​រថយន្ត និង​លិខិត​ឆ្លង​ដែន​ប៉ុណ្ណោះ ចំណែក​របស់​របរ​មួយ​ចំនួន​ធំ​ទៀត ខាង​តុលាការ​នៅ​តែ​មិន​ទាន់​ប្រគល់​ឲ្យ​ពួក​គាត់​វិញ​ទេ ដោយ​លើក​ហេតុ​ផល​ថា​ទុក​ស៊ើប​អង្កេត​បន្ត​ទៀត។

លោក​ឲ្យ​ដឹង​ថា សម្ភារៈ​ទាំង​នោះ មាន​ម៉ូត ២គ្រឿង​របស់​ប្រជា​សហគមន៍ ទូរស័ព្ទ​ដៃ​ស្មាត​ហ្វូន​៤គ្រឿង កាមេរ៉ា​ថត​រូប ៤គ្រឿង កាមេរ៉ា​សំងាត់ ៣គ្រឿង ឧបករណ៍​វាស់​ជីភីអេស (GPS) ២គ្រឿង អៃកូម (វិទ្យុ) ទាក់ទង​ក្នុង​ព្រៃ ៣គ្រឿង និង​ថវិកា ៧០០ដុល្លារ ដែល​សម្រាប់​ចាយ​វាយ​ពេល​ចុះ​ល្បាត​ព្រៃ​ឡង់ គឺ​ត្រូវ​បាន​តុលាការ​ដក​ហូត​ទុក៖ «ចំពោះ​តុលាការ​សម្រេច​មិន​ឲ្យ​សម្ភារៈ​ដល់​សកម្មជន​ទាំង ៤រូប ខ្ញុំ​គិត​ថា វា​រឿង​អយុត្តិធម៌​បំផុត ពី​ព្រោះ​ពួក​គាត់​មិន​មែន​ជា​ជន​ល្មើស ពួក​គាត់​ជា​សកម្មជន​ការពារ​ព្រៃ​ឈើ ដើម្បី​ទៅ​ចាប់​ជន​ល្មើស ដែល​បំផ្លាញ​សម្បត្តិ​ជាតិ​ឯ​ណោះ​វិញ​ទេ។ ពួក​យើង​ដែល​ជា​អ្នក​ការពារ​ព្រៃ​ឈើ​ដាច់ខាត គឺ​ត្រូវ​តែ​ចាញ់​ក្ដី​គេ​អ៊ីចឹង​ហើយ។ គេ​សម្រេច​ គឺ​ស្ថិត​លើ​បបូរ​មាត់​របស់​គេ។ គេ​ឲ្យៗ គេ​មិន​ឲ្យ​ជា​រឿង​របស់​គេ តែ​សម្រាប់​យើងៗ នៅ​តែ​តស៊ូ​ការពារ​បន្ត​ទៀត ហើយ​ទោះ​បី​ជា​ដាក់​កំហិត​យ៉ាង​ណា​មក​លើ​ពួក​យើង​នៅ​តែ​បន្ត​ធ្វើ​ការ​ការពារ​ព្រៃឈើ​ហ្នឹង​បន្ត​ទៀត​ដែរ»

អាស៊ី​សេរី​មិន​អាច​សុំ​ការ​បក​ស្រាយ​រឿង​នេះ ពី​ព្រះរាជអាជ្ញា​រង និង​ជា​អ្នក​នាំ​ពាក្យ​សាលា​ដំបូង​ខេត្ត​ក្រចេះ លោក ហាក់ ហ៊ាន់ បាន​ទេ​ ដោយ​សារ​លោក​មិន​ទទួល​ទូរស័ព្ទ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស​អាដហុក (ADHOC) លោក ស៊ឹង សែនករុណា មាន​ប្រសាសន៍ ការ​បន្ត​រក្សា​ទុក​សម្ភារៈ​របស់​ក្រុម​អ្នក​ការពារ​ព្រៃ​ឈើ ពី​សំណាក់​ស្ថាប័ន​តំណាង​អយ្យការ​នៃ​សាលា​ដំបូង​ខេត្ត​ក្រចេះ ហាក់​បី​ដូច​ជា​អ្នក​ទាំង​នោះ គឺ​ជន​ល្មើស​ព្រៃ​ឈើ​ទៅ​វិញ។

លោក​បន្ត​ថា តុលាការ​គួរ​ពិចារណា និង​ប្រគល់​សង​របស់​ទាំង​អស់​នោះ ឲ្យ​ប្រជា​សហគមន៍​ព្រៃ​ឡង់​វិញ ដើម្បី​ឲ្យ​ពួកគេ​បន្ត​សកម្មភាព​ការ​ពារ​ព្រៃ​ឈើ កុំ​ឲ្យ​បាត់​បង់​ត​ទៅ​ទៀត។ មន្ត្រី​ផ្នែក​ឃ្លាំ​មើល​សិទ្ធិ​មនុស្ស​រូប​នេះ លើក​ឡើង​ថា បើ​ផ្អែក​តាម​ផ្លូវ​តាម​ច្បាប់ ក្រុម​សកម្មជន​ការពារ​ព្រៃ​ឈើ អាច​ស្នើ​សុំ​របស់​ទាំង​វិញ ដោយ​ដាក់​បណ្ដឹង​ទៅ​អគ្គ​ព្រះរាជអាជ្ញា​នៅ​សាលា​ឧទ្ធរណ៍ ដើម្បី​ពិនិត្យ​មើល​រឿង​នេះ​ឡើង​វិញ៖ «បើ​តាម​ខ្ញុំ​ដឹង​លោក អ៊ូច ឡេង មុន​នឹង​ចេញ គាត់​ខ្ចី​ថវិកា​គេ ដើម្បី​ធ្វើ​សកម្មភាព ហើយ​អ្វី​ដែល​គាត់​យក​ទៅ ថវិកា​ហ្នឹង​មិន​មែន​ទុច្ចរិត​ទេ គឺ​ជា​ថវិកា​សុចរិត ដើម្បី​យក​ទៅ​បំពេញ​បេសកកម្ម​បម្រើ​ប្រទេស​ជាតិ​ដែរ ដូច​ជា ការពារ​ព្រៃ​ឈើ​ហ្នឹង ជា​សម្បត្តិ​រួម​របស់​ប្រទេស​ជាតិ បែរ​ជា​មាន​ការ​ឃាត់​ទុក។ រឿង​ទាំង​អស់​នេះ គឺ​ដូច​ជា​មិន​សម​ទំនង​ទាល់​តែ​សោះ ក្នុង​ការ​ឃាត់​ទុក​នេះ។ គួរ​តែ​មាន​ការ​ប្រគល់​ជូន​គាត់​ដើម្បី​ឲ្យ​គាត់​បាន​មធ្យោបាយ​ធ្វើ​ដំណើរ ហើយ​បាន​ថវិកា​ហ្នឹង​បន្ត​កិច្ច​ការងារ​របស់​ពួក​គាត់ ដើម្បី​ជួយ​ការពារ​ព្រៃ​ឈើ​របស់​យើង ដែល​កំពុង​សេសសល់​ចុង​ក្រោយ​ហ្នឹង»

កាល​ពី​ថ្ងៃ​ទី១៦ ខែ​មីនា ព្រះរាជអាជ្ញា​រង​នៃ​​សាលា​ដំបូង​ខេត្ត​ក្រចេះ លោក សោ វុទ្ធី ​សម្រេច​ដោះ​លែង លោក អ៊ូច ឡេង និង​សហគមន៍​ព្រៃ​ឡង់ ៣នាក់​ទៀត ក៏​ប៉ុន្តែ​តម្រូវ​ឱ្យ​ពួក​គេ​ធ្វើ​កិច្ចសន្យា ទទួល​ស្គាល់​កំហុស និង​បញ្ឈប់​សកម្មភាព​ការពារ​ព្រៃ​ឈើ។ ការ​ដោះ​លែង​នោះ​ ធ្វើ​ឡើង ៣ថ្ងៃ​ក្រោយ ពេល​ដែល​អ្នក​ទាំង ៤នាក់ ត្រូវ​បាន​សន្តិសុខ​ក្រុមហ៊ុន ស៊ីង បាយអូថេក (Think Biotech) ដែល​ជា​ក្រុមហ៊ុន​មាន​រោងចក្រ​អារ​ឈើ​ខ្នាត​ធំ​នៅ​ក្បែរ​ព្រៃ​ឡង់ ចាប់​ឃាត់​ខ្លួន កាល​ថ្ងៃ​ទី១៣ ខែ​មីនា។

ក្រុម​សកម្មជន​ការពារ​ព្រៃ​ឡង់​បញ្ជាក់​ជំហរ​ថា ពួក​គេ​នឹង​មិន​ទាមទារ​របស់​ទាំង​នេះ​ពី​តុលាការ​ទៀត​ហើយ ហើយ​ការ​បាត់បង់​សម្ភារៈ​នេះ ក៏​មិន​មែន​ជា​ឧបសគ្គ ដែល​រាំង​ស្ទះ​ដល់​សកម្មភាព​ចុះ​ល្បាត​ទប់​ស្កាត់​បទ​ល្មើស​ព្រៃ​ឈើ ​នោះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល