សហគមន៍​ថា អាជ្ញាធរ​ជាតិ​ចុះ​បង្ក្រាប​អាជីវកម្ម​រ៉ែ​មាស​ខុសច្បាប់​នៅ​ខេត្ត​ព្រះវិហារ​មិន​គ្រប់​ជ្រុង​ជ្រោយ

ដោយ ហេង រស្មី
2019-02-17
អ៊ីម៉ែល
មតិ
Share
បោះពុម្ព
ទីតាំង​អាជីវកម្ម​រ៉ែ​មាស នៅ​តំបន់​ភ្នំ​លុង ក្នុង​ឃុំ​រម្យទម ស្រុក​រវៀង ខេត្ត​ព្រះវិហារ ដែល​ក្រសួង​រ៉ែ និង​អាជ្ញាធរ​ខេត្ត​ចុះ​បង្ក្រាប កាល​ពី​ថ្ងៃ​ទី១២ ខែ​កុម្ភៈ ឆ្នាំ២០១៩។
ទីតាំង​អាជីវកម្ម​រ៉ែ​មាស នៅ​តំបន់​ភ្នំ​លុង ក្នុង​ឃុំ​រម្យទម ស្រុក​រវៀង ខេត្ត​ព្រះវិហារ ដែល​ក្រសួង​រ៉ែ និង​អាជ្ញាធរ​ខេត្ត​ចុះ​បង្ក្រាប កាល​ពី​ថ្ងៃ​ទី១២ ខែ​កុម្ភៈ ឆ្នាំ២០១៩។
រូបភាព៖ ហ្វេសបុក

មន្ត្រី​សង្គម​ស៊ីវិល​ និង​សហគមន៍​រស់នៅ​តំបន់​ភ្នំ​លុង​នៃ​ឃុំ​រម្យទម ​ស្រុក​រវៀង​ ខេត្ត​ព្រះវិហារ​ ចាត់​ទុក​ការ​បង្ក្រាប​ទីតាំង​អាជីវកម្ម​រ៉ែ​មាស​របស់​អាជ្ញាធរ​ខេត្ត​នេះ​ថា ​ធ្វើឡើង​គ្រាន់តែ​បង្កប់​កិច្ច​គ្មាន​ឥទ្ធិពល​ជា​វិជ្ជមាន​បញ្ឈប់​អាជីវកម្ម​រ៉ែ​មាស​ខុសច្បាប់​ឲ្យ​មាន​ប្រសិទ្ធភាព​​នោះ​​ទេ​។ ការ​លើកឡើង​បែបនេះ​ ក្រោយ​ពី​ក្រសួង​រ៉ែ និង​អាជ្ញាធរ​ខេត្ត​ព្រះ​វិហារ​​ថ្មីៗ នេះ បាន​​ចុះ​​បញ្ឈប់​​អាជីវកម្ម​​រ៉ែ​មាស​​ខុស​ច្បាប់​​នៅ​​តំបន់​​ភ្នំ​​លុង ​ដែល​​ជា​​កន្លែង​​សំបូរ​​ដោយ​​អាជីវកម្ម​រ៉ែ​មាស​បែប​អនាធិបតេយ្យ។

មន្ត្រី​សង្គម​ស៊ីវិល ​និង​ពលរដ្ឋ​រស់នៅ​តំបន់​ភ្នំ​លុង​សង្កេតឃើញ​ថា ​ការ​ចុះ​បង្ក្រាប​អា​ជី​កម្ម​រ៉ែ​មាស​របស់​អាជ្ញាធរ​ជាតិ​ និង​អាជ្ញាធរ​ខេត្ត​ព្រះវិហារ​ថា ​ខ្វះ​ចន្លោះ​ច្រើន​ និង​មិនបាន​អនុវត្ត​ច្បាប់​គ្រប់ជ្រុងជ្រោយ​នោះ​ទេ​។ ពួកគេ​អះអាង​ថា​អាជីវកម្ម​រ៉ែ​មាស​នៅ​តំបន់​ភ្នំ​លុង​ឈ្មួញ​ភាគច្រើន​មាន​ខ្នងបង្អែក​អ្នកមាន​អំណាច​ និង​មន្ត្រី​យោធា​ជាន់ខ្ពស់​ក្នុង​របប​លោក​ ហ៊ុន​ សែន​ ដែល​ជា​មូលហេតុ​ធ្វើឲ្យ​អាជ្ញាធរ​ពាក់ព័ន្ធ​មិន​ហ៊ាន​អនុវត្ត​ច្បាប់។

ប្រជា​សហគមន៍​រស់នៅ​ភូមិ​ត្រពាំង​ទន្ទឹម​ ឃុំ​រម្យទម​ ស្រុក​រវៀង​លោក​ ពុយ​ ឆេង​ ប្រាប់​អាស៊ី​សេរី​នៅ​ថ្ងៃអាទិត្យ​ ទី១៧​ កុម្ភៈ​​ថា​ អាជ្ញាធរ​ជាតិ​ និង​សមត្ថកិច្ច​ខេត្ត​​បាន​បញ្ឈប់​អាជីវកម្ម​រ៉ែ​មាស២កន្លែង​ដែល​លួច​ធ្វើខុស​ច្បាប់​ជាង៤ឆ្នាំ​មក​ហើយ។

លោក​ថា​មាន​អាជីវកម្ម​រ៉ែ​មាស​ជាច្រើន​កន្លែង​ទៀត ​ដែល​អាជ្ញាធរ​ជំនាញ​មើល​រំលង​ និង​មិន​អនុវត្ត​ច្បាប់​ដោយសារ​ឈ្មួញ​ និង​ក្រុមហ៊ុន​ខ្លះ​បាន​ជួល​អ្នកមាន​អំណាច​កាង​អាជីវកម្ម​ឲ្យ​ខ្លួន៖ «បើ​និយាយ​ទៅ​មួយ​ជុំវិញ​តំបន់​ភ្នំ​លុង​សុទ្ធតែ​ក្រុម​អនាធិបតេយ្យ​​ជុំវិញ​ភ្នំ​តែ​ម្ដង។​ កាប់​ភ្នំ​ឡើង​រលាយ​អស់ហើយ​។ ពេល​ក្រុម​អាជ្ញាធរ​មកវិញ​ ទាហាន​ទៅ​គំរាម​ក្រុម​ពលរដ្ឋ​ថា​ សុទ្ធតែ​ដី​របស់​ក្រុមហ៊ុន​ និង​ដី​ជំទាវ​ មិន​ឲ្យ​នរណា​ចូល​ ដោយ​គំរាម​នរណា​ហ៊ាន​ចូល​នឹង​បាញ់»

បុរស​ដដែល​បន្ថែម​ថា​ ភូមិសាស្ត្រ​ភ្នំ​លុង​មាន​អាជីវកម្ម​រ៉ែ​មាស​ខុសច្បាប់​ជាច្រើន​ក្នុង​នោះ​មាន​ជនជាតិ​វៀតណាម​ និង​ជនជាតិ​ចិន​ជា​ថៅកែ។ លោក​ថា ​មុន​ពេល​ដែល​សមត្ថកិច្ច​ចុះ​បង្ក្រាប​ កម្មករ​របស់​ក្រុមហ៊ុន​ចិន ​និង​វៀតណាម​បាន​គេចខ្លួន ​និង​ជម្លៀស​​គ្រឿងចក្រ​ចេញ​អស់​។ រហូត​មកទល់​ពេលនេះ​ក្រុមហ៊ុន​ខុសច្បាប់​ទាំងនោះ​ផ្ដើម​ដំណើរការ​អាជីវកម្ម​ឡើងវិញ​ហើយ។ លោក​បន្ថែម​ថា ​ក្រុមហ៊ុន​ចិន ​និង​វៀតណាម​ទាំងនោះ​មាន​ការដ្ឋាន​ជីក​រណ្ដៅ​ចម្រាញ់​រ៉ែ​មាស​ជាច្រើន​កន្លែង ​ហើយ​ពួក​គេ​​មាន​​ទំនាក់ទំនង​យ៉ាង​ស្និត​ជាមួយ​អាជ្ញាធរ​មូលដ្ឋាន​ និង​សមត្ថកិច្ច​ពាក់ព័ន្ធ​ដែរ៖ «គេ​ចុះ​មក ​ដូចជា​ឲ្យ​ដំណឹង​មុន​ហើយ។ ដូច្នេះ​ការ​ឲ្យ​ដំណឹង​មុនគេ​រត់​អស់​ សូម្បី​ទាហាន​សន្តិសុខ​ក៏​អត់​ហ៊ាន​នៅ​ដែរ។ នៅ​ពេល​ដែល​អាជ្ញាធរ​ចុះ​មកវិញ​ ទាហាន​សន្តិសុខ​ចូល​មក​ក្អេងក្អាង​ឡើងវិញ​លើស​ដើម​សព្វថ្ងៃ​នេះ»

សេចក្ដី​រាយការណ៍​ពី​សហគមន៍​រស់នៅ​តំបន់​ភ្នំ​លុង​ឲ្យដឹង​ថា​កាលពី​ថ្ងៃ​​ទី​១២ កុម្ភៈ​ ក្រសួង​រ៉ែ​ និង​​ថាមពល ​និង​អាជ្ញាធរ​ពាក់ព័ន្ធ​នៅ​ខេត្ត​ព្រះវិហារ​បាន​ទៅដល់​ទីតាំង​អាជីវកម្ម​រ៉ែ​មាស​នៅ​តំបន់​ភ្នំ​លុង ​និង​បាន​បញ្ឈប់​អាជីវកម្ម​រ៉ែ​មាស​ខុសច្បាប់​បាន ២កន្លែង​​ ក្នុង​នោះ​មាន​មួយ​កន្លែង​ជា​ក្រុមហ៊ុន​សាច់ញាតិ​ លោក​ហ៊ុន​ សែន​។ លើស​ពី​នេះ ​អាជ្ញាធរ​មិនបាន​​ឃាត់​ខ្លួន​​ម្ចាស់​​អាជីវកម្ម​ណា​​ម្នាក់​​ឲ្យ​​ទទួល​ខុស​ត្រូវ​​ដែរ។

អាស៊ី​សេរី​បាន​ព្យាយាម​ទាក់ទង​អ្នកនាំពាក្យ​ក្រសួង​រ៉ែ និង​ថាមពល​លោក​ យស​ មុនី​រ៉ាត់ ដើម្បី​សុំ​ការ​បំភ្លឺ​រឿង​​នេះ​​តែ​​លោក​​ប្រាប់​​ថា ទូរស័ព្ទ​ស្ដាប់​មិន​ឮ ​នៅ​​ថ្ងៃ​ទី១៧​ កុម្ភៈ​។

ចំណែក​អភិបាលស្រុក​រវៀង​លោក ហោរ ប៊ុនហួរ ក៏​មិន​អាច​ទាក់ទង​បាន​ដែរ​ព្រោះ​ទូរស័ព្ទ​ហៅ​ចូល​ច្រើនដង​គ្មាន​អ្នកទទួល​នៅ​ថ្ងៃ​ដដែល​នេះ​។

ជំទប់​ទី១ នៃ​ឃុំ​រម្យទម លោក​ ប្រាក់ ផន បញ្ជាក់​យ៉ាង​ខ្លី​ថា​ ថ្មីៗ នេះ អាជ្ញាធរ​ជាតិ​បាន​ បិទ​អាជីវកម្ម​រ៉ែ​មាស​បាន ៤ទីតាំង​ផ្សេង​គ្នា​ ដោយ​រឹបអូស​ម៉ាស៊ីន​ចម្រាញ់​រ៉ែ​មាស ​និង​លប់​រណ្ដៅ​រ៉ែ​មាស​មួយ​ចំនួន​ដែរ។ តែ​យ៉ាងណា​លោក​បដិសេធ​មិន​បញ្ជាក់​លម្អិត​ថា​មាន​អាជីវកម្ម​រ៉ែ​មាស​នៅ​តំបន់​នោះ​ប៉ុន្មាន​កន្លែង​នោះ​ទេ៖ «បង្ក្រាប​បាន ៤កន្លែង​ រឿង​ទីតាំង​ច្បាស់លាស់​ខ្ញុំ​អត់​ដឹង​ទេ​ដោយសារ​គេ​មក​អនុវត្ត​ខ្ញុំ​អត់​បាន​ដឹង។ កន្លែង​ដែលគេ​ធ្វើសកម្មភាព​គេ​មិន​ឲ្យ​ចូល​ដូច្នេះ​ខ្ញុំ​មិន​ដឹង​ថា​ មាន​ក្រុមហ៊ុន​ប៉ុន្មាន​ពិតប្រាកដ​នោះ​ទេ»

មន្ត្រី​ផ្នែក​តស៊ូ​មតិ​នៃ​អង្គការ​ពន្លក​ខ្មែរ​លោក​ប៉ិក​ សោភ័ណ​សង្កេតឃើញ​ថា​ សកម្មភាព​ចុះ​បង្ក្រាប​អាជីវកម្ម​រ៉ែ​មាស​របស់​អាជ្ញាធរ​ពុំ​មែន​ជា​ការអនុវត្ត​ច្បាប់​នោះ​ទេវា​ជា​ការអនុវត្ត​បទបញ្ជា​រយៈពេល​ខ្លី​គ្មាន​ប្រសិទ្ធភាព​និង​គ្មាន​ឥទ្ធិពល​បញ្ឈប់​អាជីវកម្ម​រ៉ែ​មាស​ខុសច្បាប់​បាន​ទាំងស្រុង​ដែរ​។លោក​គ្មាន​ជំនឿ​ថា​អាជ្ញាធរ​មូលដ្ឋាន​អនុវត្ត​ច្បាប់​អាជីវកម្ម​រ៉ែ​មាស​ទាំងនោះ​បាន​ពេញលេញ​នោះ​ទេពី​ព្រោះ​អំពើពុករលួយ​ទាក់ទិន​ករណី​នេះ​នៅតែ​ជា​ចំណុច​សង្ស័យ​ច្រើន​ដែល​អាជ្ញាធរ​និង​ក្រុមហ៊ុន​តែងតែ​លាក់​បាំង​​ព័ត៌មាន​ និង​រឹតត្បិត​មិន​ឲ្យ​អ្នក​ខាងក្រៅ​ចេញចូល​តំបន់​នោះ៖ «ជ្រុល​ជា​ធ្វើ​ហើយ​ គឺ​ធ្វើឲ្យ​មាន​តម្លាភាព​ គឺ​អនុវត្ត​ច្បាប់​ជាគោល​ការណ៍​មក​ កុំ​ឲ្យ​អនុវត្ត​តាម​បទបញ្ជា ព្រោះ​បទបញ្ជា​វា​មិនមែន​ជា​ច្បាប់​ទេ​។ដូច្នេះ​សូម​ធ្វើឲ្យ​ពលរដ្ឋ​មានទំនុក​ចិត្ត​ ឲ្យ​ពលរដ្ឋ​យល់ថា​ប្រទេស​មួយ​នេះ​អនុវត្ត​ច្បាប់​ជាធំ​ កុំ​ឲ្យ​អនុវត្ត​សិទ្ធិ​អំណាច​របស់​បុគ្គល​ជាធំ»

មន្ត្រី​សង្គម​ស៊ីវិល​រូប​នេះ​អំពាវនាវ​ឲ្យ​អាជ្ញាធរ​ជាតិ និង​អាជ្ញាធរ​មូលដ្ឋាន​អនុវត្ត​ច្បាប់​ក្រុមហ៊ុន​រ៉ែ​មាស​ទាំង​អស់​ឲ្យ​មាន​តម្លាភាព​ចៀស​វៀង​អនុវត្ត​តែ​បទបញ្ជា​ម្ដងម្កាល​ក្រោយ​មក​អាជីវកម្ម​រ៉ែ​មាស​ខុស​ច្បាប់​នៅ​តែ​កើត​មាន​ឡើង​ដដែល។

សហគមន៍​បន្ថែម​ថា​ ពលរដ្ឋ​រស់​នៅ​តំបន់​នោះ​តែង​រង​ការ​គំរាម​កំហែង​ពីសំណាក់​មន្ត្រី​យោធា ​ដែល​កាង​អាជីវកម្ម​ឲ្យ​ក្រុមហ៊ុន​រ៉ែ​មាស។ លើស​ពី​នេះ​ អាជីវកម្ម​រ៉ែ​មាស​ទាំង​នោះ​មិន​ផ្ដល់​ប្រយោជន៍អ្វី​ដល់​ពលរដ្ឋ​នោះ​ទេ។ ផ្ទុយ​ទៅ​វិញ ​ក្រុមហ៊ុន​ប្រើ​សារធាតុ​​គីមី​​ចម្រាញ់​រ៉ែ​មាស​មាន​ជាតិ​អាស៊ីដ​ចាក់​ចូល​លើ​ដី​និង​ក្នុង​ទឹក​អូរ​ធម្មជាតិ​បំពុល​បរិស្ថាន សត្វ​ពាហនៈ​អ្នក​ស្រុក​ហើយ​កន្លង​ទៅ​គោ-ក្របី​អ្នក​ភូមិ​ងាប់​ជា​បន្តបន្ទាប់​ដោយសារ​ពុល​ទឹកអូរ​ធម្មជាតិ​ ដែល​ក្រុមហ៊ុន​បង្ហូរ​កាក​សំណល់​ចូល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល