មេគណៈកម្មការទន្លេមេគង្គ (MRC) ជំរុញឱ្យចិនធ្វើការ និងសហការជាមួយ MRC ឱ្យបានច្រើនថែមទៀតដើម្បីគិតគូរពីផលខូចខាតបរិស្ថាននៅតំបន់ទន្លេមេគង្គ ដែលកំពុងតែប៉ះពាល់ដល់ជីវិតមនុស្សរាប់លាននាក់។ ការជំរុញនេះ ធ្វើឡើងនៅក្នុងអត្ថបទមួយរបស់លោក ចុះផ្សាយនៅលើ ទំព័រវ៉ឹបសៃថ៍សារព័ត៌មានជប៉ុន Nikkei Asia កាលពីថ្ងៃទី១២ ខែកក្កដា។
នាយកប្រតិបត្តិនៃលេខាធិការដ្ឋានគណៈកម្មការទន្លេមេគង្គ បណ្ឌិត អាន ពេជ្រហត្ថដា លើកឡើងថា យើងជំរុញឱ្យចិនពិគ្រោះយោបល់ឱ្យបានពេញលេញជាមួយគណៈកម្មការទន្លេមេគង្គ ជាពិសេស ទាក់ទងនឹងការចែករំលែកទិន្នន័យ និងព័ត៌មានពាក់ព័ន្ធនឹងទន្លេមេគង្គ។ លោកគូសបញ្ជាក់ថា យើងបានឃើញមាននូវជំហានដ៏ធំមួយនៅក្នុងកិច្ចសហប្រតិបត្តិការរវាងចិនជាមួយនឹងគណៈកម្មការទន្លេមេគង្គ ដែលកាលពីខែតុលា ឆ្នាំទៅម៉ិញ ក្រុងប៉េកាំង (Beijing) បានយល់ព្រមចែករំលែកព័ត៌មានទឹករយៈពេលពេញមួយឆ្នាំជាមួយគណៈកម្មការទន្លេមេគង្គ ក្រោយពីប្រទេសនេះបានកម្រិតការចែកចាយព័ត៌មាននេះតែក្នុងរដូវវស្សាអស់រយៈពេល ១៨ឆ្នាំមកហើយ។ លោកថា នៅមានកិច្ចការជាច្រើនទៀតដែលចិនត្រូវធ្វើ។
គ្រោះរាំងស្ងួតកាលពីឆ្នាំ២០១៩ និងឆ្នាំ២០២០ បានបណ្ដាលឱ្យទឹកទន្លេមេគង្គស្រកចុះក្នុងកម្រិតទាបបំផុតមិនធ្លាប់មានពីមុនមក។ គណៈកម្មការទន្លេមេគង្គព្យាករណ៍ថា គ្រោះរាំងស្ងួត និងទឹកជំនន់កាន់តែអាក្រក់នឹងបន្តកើតមាននៅតំបន់ទន្លេមេគង្គកាន់តែញឹកញាប់ថែមទៀតនាពេលអនាគត។
បណ្ឌិត អាន ពេជ្រហត្ថដា ពន្យល់ថា តំបន់ទន្លេមេគង្គកំពុងជួបប្រទះនូវបញ្ហាគំរាមកំហែងជាច្រើន រួមផ្សំទាំងវិបត្តិជំងឺកូវីដ១៩ ដែលកំពុងបង្កើតឱ្យមាននូវភាពលំបាកលំបិនផ្នែកសេដ្ឋកិច្ច និងការខូចខាតផ្នែកបរិស្ថានកាន់តែអាក្រក់ជាងមុនមិនធ្លាប់មានពីមុនមក។ ក្រៅពីនេះ ក៏នៅមានការហូរច្រោះដាច់ដីនៅតាមច្រាំងទន្លេ ការធ្លាក់ចុះទិន្នផលត្រីនៅតំបន់ដីសណ្ដទន្លេមេគង្គ ដោយសារតែការកើនឡើងបរិមាណប្រើប្រាស់ទឹក និងការប្រែប្រួលអាកាសធាតុ។ លោកពន្យល់បន្ថែមថា ទន្លេមេគង្គក៏បានប្រែប្រួលនារយៈពេលចុងក្រោយនេះដោយសារតែការប្រែប្រួលជលសាស្ត្របង្កឡើងដោយការសាងសង់ទំនប់វារីអគ្គិសនីជាច្រើននៅលើដងទន្លេមេគង្គ ដែលការណ៍នេះធ្វើឱ្យប៉ះពាល់ដល់ប្រព័ន្ធអេកូឡូស៊ីរបស់ទន្លេមេគង្គ និងធ្វើឱ្យអាយុជីវិត និងជីវភាពរស់នៅរបស់ពលរដ្ឋនៅតំបន់នេះ ត្រូវប្រឈមនឹងហានិភ័យ។
បណ្ឌិត អាន ពេជ្រហត្ថដា ព្រមានថា បញ្ហាប្រឈមអស់ទាំងនេះ គឺជាការដាស់តឿនស្មារតីដែលប្រទេសសមាជិកគណៈកម្មការទន្លេមេគង្គទាំងអស់មិនត្រូវមិនអើពើឡើយ។ លោកថា ការការពារទន្លេមេគង្គទាំងនៅខ្សែទឹកខាងលើ និងនៅខ្សែទឹកខាងក្រោម គឺជាការទទួលខុសត្រូវរួមគ្នា ដើម្បីបញ្ឈប់ការខូចខាតបរិស្ថាននៅតំបន់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។