លោក ហ៊ុន ម៉ាណែត អះអាងថា លោកមិនពាក់ព័ន្ធរឿងដោះដូរដីនៅតំបន់ភ្នំតាម៉ៅទេ
2022.08.19
លោក ហ៊ុន ម៉ាណែត ថ្លែងនៅលើហ្វេសប៊ុក ថ្ងៃទី១៩ ខែសីហា ឆ្នាំ២០២២ បដិសេធចំពោះប្រសាសន៍របស់លោក អាឡិចហាន់ដ្រូ ហ្គន់សាឡេស ដេវិដសុន ស្ថាបនិកអង្គការមាតាធម្មជាតិ ដែលថា លោកអាចនៅពីក្រោយខ្នងនៃគម្រោងអភិវឌ្ឍន៍តំបន់ភ្នំតាម៉ៅ និងខាងស្ដាំ រូបភាពព្រៃនៅតំបន់ឧទ្យានភ្នំតាម៉ៅ ត្រូវក្រុមហ៊ុន ឡេង ណាវ៉ាត់ត្រា ឈូសវាលអស់ជាង ៥០០ហិកតារ កាលពីពេលថ្មីៗ នេះ។
រូប៖ ហ្វេសប៊ុកលោក ហ៊ុន ម៉ាណែត
លោក ហ៊ុន ម៉ាណែត កូនប្រុសរបស់លោកនាយករដ្ឋមន្ត្រី ហ៊ុន សែន អះអាងថា លោកមិនបាននៅពីក្រោយខ្នងគម្រោងវិនិយោគនៅតំបន់ភ្នំតាម៉ៅឱ្យទៅក្រុមហ៊ុន ឡេង ណាវ៉ាត់ត្រា កន្លងមកនោះទេ។ ទន្ទឹមនឹងនេះ លោកចាត់ទុកអ្នកដែលចោទលោក គឺជារឿងប្រឌិត និងមួលបង្កាច់ ដើម្បីកេងចំណេញផលប្រយោជន៍នយោបាយ។
ប្រតិកម្មនេះកើតឡើងក្រោយពេល ស្ថាបនិកអង្គការមាតាធម្មជាតិ លោក អាឡិចហាន់ដ្រូ ហ្គន់សាឡេស ដេវិដសុន ថា លោក ហ៊ុន ម៉ាណែត អាចនៅពីក្រោយខ្នងនៃគម្រោងអភិវឌ្ឍន៍តំបន់ភ្នំតាម៉ៅ។ លោក អាឡិច អះអាងថា លោកមានប្រភពច្បាស់លាស់ ហើយលោកស្នើដល់រដ្ឋាភិបាលឱ្យបើកការស៊ើបអង្កេតឱ្យបានត្រឹមត្រូវ និងតម្លាភាព ដើម្បីបង្ហាញការពិត និងបញ្ចៀសមតិរិះគន់ពីពលរដ្ឋខ្មែរ។
លោក ហ៊ុន ម៉ាណែត បានបង្ហោះវីដេអូនៅលើហ្វេសប៊ុក នៅថ្ងៃទី១៩ ខែសីហា ដោយលើកឡើងថា ម្ចាស់ក្រុមហ៊ុន ឡេង ណាវ៉ាត់ត្រា គឺជាក្រុមការងារយុវជនរបស់លោក ដែលតែងតែចូលរួមជួយសង្គម និងយុវជនជាច្រើន។ ប៉ុន្តែលោកបដិសេធចំពោះការចោទប្រកាន់របស់ស្ថាបនិកអង្គការមាតាធម្មជាតិលោក អាឡិច ថា រូបលោកជាប់ពាក់ព័ន្ធករណីរត់ការដោះដូរដីឱ្យក្រុមហ៊ុនឯកជនមួយនេះ ដើម្បីអភិវឌ្ឍនៅតំបន់ភ្នំតាម៉ៅកន្លងមក ពីព្រោះគ្មានភស្តុតាង ដែលលោកមិនអាចទទួលយកបានឡើយ។ លោក ហ៊ុន ម៉ាណែត បានចោទប្រកាន់ទៅលោក អាឡិច ថា មានគំនិតទុច្ចរិត ដើម្បីប្រឌិតរឿងកេងចំណេញប្រយោជន៍នយោបាយ៖ «រិះគន់ដើម្បីស្ថាបនា គឺផ្អែកលើយោបល់ លើភស្តុតាងមួយចំនួន ដើម្បីចង់កែលម្អ ប៉ុន្តែប្រឌិតបញ្ហា ដើម្បីវាយប្រហារគេក្នុងបំណងអំពើទុច្ចរិត គឺធ្វើឡើង ដោយគ្មានភស្តុតាង តែដឹងហើយធ្វើភ្លើ ដើម្បីវាយប្រហារកេងចំណេញនយោបាយ កេងចំណេញផលអ្វីមួយ។ អ៊ីចឹងដែរ ការចោទខ្ញុំ (រឿងភ្នំតាម៉ៅ) ដោយសារលោក ឡេង ណាវ៉ាត់ត្រ ជាយុវជនរបស់ខ្ញុំ ជាយុវជនរបស់ខ្ញុំ សូមឈប់ទៅ»។
ប្រតិកម្មដ៏កម្ររបស់កូនប្រុសច្បងរបស់លោកនាយករដ្ឋមន្ត្រី ហ៊ុន សែន នេះ ធ្វើឡើង គឺបន្ទាប់ពីវិទ្យុអាស៊ីសេរី កាលពីថ្ងៃទី១៦ ខែសីហា បានស្រង់សម្ដីសំខាន់ៗ របស់ស្ថាបនិកអង្គការមាតាធម្មជាតិ លោក អាឡិចហាន់ដ្រូ ហ្កាន់សាឡេស ដេវិដសុន លើកឡើងក្នុងវេទិកាអ្នកស្ដាប់វិទ្យុអាស៊ីសេរីថា លោក ហ៊ុន ម៉ាណែត នៅពីក្រោយខ្នងនៃគម្រោងអភិវឌ្ឍន៍តំបន់ភ្នំតាម៉ៅ។
ឆ្លើយតបរឿងនេះ ស្ថាបនិកអង្គការមាតាធម្មជាតិ លោក អាឡិចហាន់ដ្រូ ហ្កាន់សាឡេស ដេវិដសុន (Alejandro Gonzales Davidson) ប្រាប់វិទ្យុអាស៊ីសេរីនៅល្ងាចថ្ងៃទី១៩ ខែសីហាថា មូលហេតុដែលលោករិះគន់លោក ហ៊ុន ម៉ាណែត នៅពីក្រោយខ្នងនៃគម្រោងអភិវឌ្ឍន៍តំបន់ភ្នំតាម៉ៅរបស់ក្រុមហ៊ុន ឡេង ណាវ៉ាត់ត្រា ដោយលោកផ្អែកតាមការលើកឡើងរបស់ពលរដ្ឋខ្មែរ ជាពិសេស ប្រភពច្បាស់លាស់ពីមន្ត្រីរដ្ឋាភិបាល ដែលធ្លាប់បញ្ចេញព័ត៌មានរឿងលួចបូមខ្សាច់លក់នៅខេត្តកោះកុងកន្លងមក។
លោក អាឡិច ឱ្យដឹងថា បច្ចុប្បន្នថា ក្រុមហ៊ុន ឡេង ណាវ៉ាត់ត្រា គឺជាខែល ឬល្បិចកលរបស់គ្រួសារត្រកូលហ៊ុន ដើម្បីរកស៊ីទុច្ចរិត ដូចជា ការលាងលុយកង្វក់ជាដើម។ លោកថា ប្រតិកម្មពេលនេះបង្ហាញកាន់តែច្បាស់ថា លោក ហ៊ុន ម៉ាណែត គឺនៅពីក្រោយខ្នងរឿងនេះ ប៉ុន្តែលោកបញ្ជាក់ថា អ្វីដែលលោកលើកឡើងនោះ លោកពុំបានចាត់ទុកលោក ហ៊ុន ម៉ាណែត ជាសត្រូវនោះទេ។ ដូច្នេះ លោកស្នើដល់រដ្ឋាភិបាល ឲ្យលើកបម្រាមដោយអនុញ្ញាតឱ្យលោកចូលកម្ពុជាវិញ ដើម្បីជជែកអំពីបញ្ហាបរិស្ថាន និងធនធានធម្មជាតិ៖ «នេះជាព័ត៌មាន ដែលខ្ញុំទទួលច្បាស់ ហើយបើសួរខ្ញុំថា តើបុគ្គលនរណាប្រាប់ អាហ្នឹងខ្ញុំមិនអាចនិយាយប្រាប់បានទេ បើនិយាយគឺគ្រោះថ្នាក់ដល់ប្រភព។ អ៊ីចឹងគេលែងនិយាយជាមួយយើង សូមបញ្ជាក់មិនមែនតែពេលនេះ តាំងពីសម័យបូមខ្សាច់យកទៅសិង្ហបុរី គេប្រាប់យើងច្បាស់ៗ រឿងហ្នឹងដែរ ហើយអ្វីដែលខ្ញុំនិយាយនៅកន្លែងសុវត្ថិភាព ខ្ញុំហ៊ាននិយាយអត់មានបញ្ហាទេ ប៉ុន្តែ ប្រជាពលរដ្ឋខ្មែរណាក្នុងស្រុកហ៊ាននិយាយចំៗ រឿងរកស៊ីកខ្វក់របស់ត្រកូល ហ៊ុន គេចាប់។ អ៊ីចឹងបានគេមិននិយាយជាសាធារណៈ»។
ចំណែកអ្នកវិភាគនយោបាយ ដែលកំពុងភៀសខ្លួននៅប្រទេសហ្វាង់ឡង់ លោក គឹម សុខ ថ្លែងថា លោក ហ៊ុន ម៉ាណែត មិនត្រូវបន្ទោសអ្នកបញ្ចេញមតិ ដែលបារម្ភពីការបាត់បង់ព្រៃឈើបែបនេះទេ ហើយការបកស្រាយនេះវិញ ក៏ពុំអាចលាងជម្រះចម្ងល់របស់មហាជនបានឡើយ។ លោក គឹម សុខ ថា ដើម្បីបញ្ជាក់ថា ហេតុផលរបស់សាធារណជនពិត ឬមិនពិត អាជ្ញាធរត្រូវតែបើកការស៊ើបអង្កេតដោយមានការចូលរួមពីគ្រប់ភាគីទាំងអស់ថា តើលោក ហ៊ុន ម៉ាណែត នៅពីក្រោយឧក្រិដ្ឋកម្មកាប់បំផ្លាញព្រៃអភិរក្សនៅតំបន់ភ្នំតាម៉ៅ ជាមួយក្រុមហ៊ុន ឡេង ណាវ៉ាត់ត្រា ឬយ៉ាងណា៖ «ដើម្បីជម្រះថា គាត់ពាក់ព័ន្ធក៏អត់ត្រូវតែមានការស៊ើបអង្កេតឱ្យច្បាស់លាស់មួយ ដោយមិនត្រូវបន្ទោសអ្នកដែលបញ្ចេញយោបល់សម្ដែងការបារម្ភខ្លាចបាត់បង់ព្រៃឈើធម្មជាតិរបស់ប្រទេសកម្ពុជានោះទេ។ ហើយការស៊ើបអង្កេតមិនពិបាកទេ ដោយផ្ដើមចេញពីក្រុមហ៊ុនឈូសឆាយដី និងការពាក់ព័ន្ធនានា ជាមួយមន្ត្រីរដ្ឋាភិបាលដែលអនុញ្ញាត ជាពិសេស លោក ហ៊ុន សែន ខ្លួនឯងបានសារភាពរួចហើយ»។
រីឯអតីតតំណាងគណបក្សសង្គ្រោះជាតិ លោក អ៊ំ សំអាន ថ្លែងថា លោកមិនចំឡែកនោះទេ ការណ៍ដែលកូនប្រុសច្បងលោក ហ៊ុន សែន ចេញមុខច្រានចោលមតិរិះគន់ និងចោទប្រកាន់របស់អ្នកការពារបរិស្ថាន និងមហាជននោះ។ ប៉ុន្តែលោកថា ការអនុញ្ញាតឱ្យក្រុមហ៊ុនឧកញ៉ា ដែលស្និទ្ធនឹងលោក ហ៊ុន ម៉ាណែត ទទួលបានការឈូសឆាយព្រៃនៅតំបន់ភ្នំតាម៉ៅអស់រាប់រយហិកតារ ដោយរលូនកន្លងមក អាចជាប់ពាក់ព័ន្ធផលប្រយោជន៍ជាមួយគ្រួសារត្រកូល ហ៊ុន ផង និងជាថ្នូរឱ្យឧកញ៉ាជួយទ្រទ្រង់សកម្មភាពនយោបាយរបស់បក្សកាន់អំណាច ខណៈក្រុមគ្រួសារលោក ហ៊ុន សែន កន្លងមក ជាប់ឈ្មោះអាស្រូវរឿងកិបកេងទ្រព្យសម្បត្តិជាតិ រំលោភសិទ្ធិមនុស្សដោយឃុបឃិតជាមួយឧកញ៉ាលាងលុយកខ្វក់ រំលោភយកដីស្រែពលរដ្ឋជាដើម ដូច្នេះលោកជំរុញឱ្យអាជ្ញាធរត្រូវបង្កើតគណៈកម្មការស៊ើបអង្កេតដោយឯករាជ្យ និងតម្លាភាពក្នុងរឿងនេះ។
កាលពីថ្ងៃទី៧ ខែសីហា លោកនាយករដ្ឋមន្ត្រី ហ៊ុន សែន បានបញ្ជាឱ្យរក្សាទុកដីព្រៃតំបន់ភ្នំតាម៉ៅ ដោយឱ្យក្រុមហ៊ុនបញ្ឈប់ការឈូសឆាយ និងដាំដើមឈើនៅតំបន់នោះឡើងវិញ ក្រោយមានប្រតិកម្មពីមហាជនពីគ្រប់មជ្ឈដ្ឋាន។ កន្លងមកសកម្មជនការពារបរិស្ថាន ក្រុមយុវជន និងមន្ត្រីសង្គមស៊ីវិលទាមទារឱ្យរដ្ឋាភិបាលស៊ើបអង្កេតដោយឯករាជ្យ ដើម្បីវែកមុខមន្ត្រីពាក់ព័ន្ធមួយចំនួន ដែលទាក់ទិនករណីឈូសឆាយព្រៃអភិរក្សតំបន់ភ្នំតាម៉ៅអស់ប្រមាណ ៦០០ហិកតារ ដើម្បីយកមកផ្ដន្ទាទោសតាមច្បាប់។
ភាគច្រើនឧកញ៉ា ឬជំនួញរកស៊ីធំៗ នៅកម្ពុជាតែងជួយឧបត្ថម្ភលុយដល់រដ្ឋាភិបាល និងគណបក្សកាន់អំណាចជាបន្តបន្ទាប់។ ក្នុងនោះពួកគេខ្លះប្រព្រឹត្តអំពើខុសច្បាប់នៅក្នុងសង្គម ដូចជា ច្បាមយកដីធ្លីពីពលរដ្ឋក្រីក្រ កាប់បំផ្លាញព្រៃឈើ បូមខ្សាច់ បំផ្លិចបំផ្លាញធនធានធម្មជាតិ ជួញគ្រឿងញៀន និងពាក់ព័ន្ធនឹងរឿងអាស្រូវផ្លូវភេទជាដើម។ លើសពីនេះ ឧកញ៉ាខ្លះទៀត មានឈ្មោះក្នុងបញ្ជីខ្មៅរបស់សហរដ្ឋអាមេរិក ឬក្នុងបញ្ជីខ្មៅនៃអង្គការអន្តរជាតិ ដូចជា លោក ទ្រី ភាព លោក លី យ៉ុងផាត់ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- តុលាការសម្រេចឃុំខ្លួនមេដឹកនាំសហជីពកញ្ញា ឈឹម ស៊ីថរ ក្រោយចាប់ខ្លួនពីព្រលានយន្តហោះ
- លោក ហ៊ុន សែន ទទួលស្គាល់ថា ប្រធានាធិបតីអាមេរិកប្រាប់ឱ្យកែលំអស្ថានភាពសិទ្ធិមនុស្ស មុនការបោះឆ្នោតឆ្នាំ២០២៣ ខាងមុខ
- លោក សុន ឆ័យ ថា តុលាការរឹបអូសទ្រព្យសម្បត្តិរបស់លោកដោយបំពាននីតិវិធី
- លោក ទៀ បាញ់ ស្នើសុំឲ្យអាមេរិកឈប់សង្ស័យពីវត្តមានទ័ពចិននៅកំពង់ផែរាម
- បណ្ឌិត យ៉ង សាំងកុមារ ចុះចូលជាមួយគណបក្សកាន់អំណាចដោយអះអាងថា ដើម្បីជួយវិស័យកសិកម្ម
