រដ្ឋាភិបាលឡាវ និងវៀតណាម បានជូនដំណឹងឲ្យពលរដ្ឋខ្មែរ ដែលរស់នៅតាមបណ្តោយដងទន្លេមេគង្គ និងទន្លេស្រែពក ក្នុងខេត្តស្ទឹងត្រែង ខេត្តរតនគិរី និងខេត្តក្រចេះ ត្រូវប្រុងប្រយ័ត្ន ខណៈដែលពួកគេគ្រោងនឹងបើកទ្វារទឹកនៃទំនប់វារីអគ្គិសនីសាយ៉ាបូរី (Xayaburi dam ) និងទំនប់វារីអគ្គិសនីស្រែពក៤។
រីឯគណៈកម្មការទន្លេមេគង្គ (MRC) ក៏បានជូនដំណឹង ពីការកើនឡើងកម្ពស់ទឹកក្នុងអាងទន្លេមេគង្គនៅប្រទេសចំនួន៤ ស្របពេលដែលទឹកភ្លៀងកំពុងធ្លាក់រាយប៉ាយ ក្នុងតំបន់ទន្លេមេគង្គ។
គណៈកម្មការទន្លេមេគង្គ (MRC ) នៅថ្ងៃទី៩ សីហា បានជូនដំណឹងថា កម្ពស់ទឹកទន្លេមេគង្គនឹងកើនឡើងខ្លាំង ស្របពេលដែលទឹកភ្លៀងបន្តពូនជ្រំពាសពេញ តំបន់ទន្លេមេគង្គ ធ្វើឱ្យកម្រិតទឹកទន្លេកើនឡើងយ៉ាងឆាប់រហ័ស ក្នុងរយៈពេល ៥ ថ្ងៃខាងមុខនេះ។
ស្របជាមួយគ្នានេះដែរអាជ្ញាធរឡាវ បានជូនដំណឹងថា ទំនប់វារីអគ្គិសនីសាយ៉ាបូរី (Xayaubri) នឹងបើកទ្វារទំនប់បង្ហូរទឹក នៅរយៈពេលប៉ុន្មានថ្ងៃខាងមុខ ហើយពលរដ្ឋរស់នៅខ្សែទឹកខាងក្រោម ត្រូវបង្កើនការប្រុងប្រយ័ត្ន។
ក្រសួងថាមពល និងរ៉ែ ឡាវ កាលពីថ្ងៃទី៧ សីហា ឱ្យដឹងថា " មានភ្លៀងធ្លាក់ខ្លាំងជាបន្តបន្ទាប់ក្នុងប្រទេសឡាវដោយសារតែផលប៉ះពាល់ព្យុះត្រូពិច ខាន់នុន (Khanun) និងការហូរទឹកចេញពីអាងស្តុកទឹកនៃទំនប់វារីអគ្គិសនីផ្នែកខាងលើផ្សេងៗទៀត ធ្វើឱ្យកម្រិតទឹកនៅទំនប់សាយ៉ាប៊ូរី កើនឡើងខ្លាំង។
ឆ្លើយតបរឿងនេះ នាយកប្រតិបត្តិអង្គការបណ្ដាញការពារទន្លេបី លោក លាង ប៊ុនលាភ មានប្រសាសន៍ថា គោលការណ៍ច្បាប់អន្តរជាតិ ការបើកបង្ហូរទ្វារទឹកទំនប់វារីអគ្គិសនីមិនឱ្យលើសពី ៥០០ ម៉ែត្រគូបក្នុងមួយវិនាទី ប្រសិនបើបើកហួសកម្រិត នឹងធ្វើឱ្យទឹកជន់ខ្លាំង ក្នុងតំបន់ទន្លេមេគង្គ បង្កជាគ្រោះមហន្តរាយទឹកជំនន់។
លោកថា អាជ្ញាធរខ្មែរគួរតែជូនដំណឹងទៅរដ្ឋាភិបាលឡាវ ឱ្យអនុវត្តតាមគោលការណ៍ច្បាប់អន្តរជាតិ ឬកិច្ចព្រមព្រៀងគណៈកម្មការទន្លេមេគង្គឆ្នាំ ១៩៩៥។ លោកបន្ថែមថា អាជ្ញាធរមូលដ្ឋានគ្រប់លំដាប់ថ្នាក់ គួរតែអនុវត្តផែនការគ្រប់គ្រងគ្រោះមហន្តរាយ ឱ្យបានពេញលេញ ដើម្បីកាត់បន្ថយផលប៉ះពាល់ជាអតិបរមា។
លោក លាង ប៊ុនលាភ៖ «ប្រសិនបើការសិក្សាឃើញថា វាលើសពីច្បាប់អន្តរជាតិហើយនឹងផលប៉ះពាល់ វាកើតមានរដ្ឋាភិបាលខ្មែរត្រូវធ្វើរបាយការណ៍ទៅឡាវ ផ្អែកតាមកិច្ចព្រមព្រៀងគណៈកម្មការទន្លេមេគង្គឆ្នាំ១៩៩៥ ដើម្បីឱ្យឡាងសងនូវទឹកជំនន់ខុសប្រក្រតី»។
របាយការណ៍ របស់លេខាធិការដ្ឋានគណៈកម្មការទន្លេមេគង្គ (MRC) ដែលចេញផ្សាយកាលពីថ្ងៃទី ០៩ សីហា ឱ្យដឹងថា អាងទឹកទន្លេមេគង្គ ក្នុងទីក្រុងវៀងចន្ទន៍ប្រទេសឡាវ បានកើនឡើងយ៉ាងឆាប់រហ័ស ហើយនឹងបន្តកើនឡើងបន្ថែមទៀតក្នុងរយៈពេល ៥ ថ្ងៃខាងមុខ។ រីឯទន្លេមេគង្គប្រទេសថៃ ក៏កើនឡើងខ្លាំងដូចគ្នាដែរ។
អ្នកជំនាញព្យាករណ៍ទឹកជំនន់នៃលេខាធិការដ្ឋាន គណៈកម្មការទន្លេមេគង្គ (MRC) លោក ខេម សុធា បានថ្លែងក្នុងរបាយការណ៍ថា នៅតំបន់មួយចំនួន ក្នុងប្រទេសឡាវ និងថៃ ប៉ះពាល់ខ្លាំងដោយទឹកជំនន់ កាលពីចុងសប្ដាហ៍មុន។ លើសពីនេះទៀត ចាប់តាំងពីពេលនោះមក ស្ថានភាពនេះបានធ្វើឱ្យកម្រិតទឹកកើនឡើង និងប៉ះពាល់ដល់ទ្រព្យសម្បត្តិ និងជីវភាពរស់នៅរបស់ពលរដ្ឋ។
របាយការណ៍នៃគណៈកម្មការទន្លេមេគង្គបន្តថា នៅកម្ពុជា កម្ពស់ទឹកទន្លេមេគង្គ ក្នុងខេត្តស្ទឹងត្រែង ដល់ខេត្តក្រចេះ បានកើនឡើងពី ០,៩២ ម៉ែត្រ ដល់ ២,៥៩ ម៉ែត្រ ក្នុងរយៈពេលដូចគ្នានេះ ហើយក្នុងរយៈពេល៥ថ្ងៃខាងមុខ កម្រិតអាចនឹងធ្លាក់ចុះ។
ឆ្លើយតបរឿងនេះ អ្នកនាំពាក្យសាលាខេត្តស្ទឹងត្រែង លោក ម៉ែន គុង ថ្លែងថា ក្រោយពីទទួលបានការជូនដំណឹង របស់ភាគីឡាវ ទាក់ទិនការបើកទ្វារទឹកទំនប់វារីអគ្គិសនីផ្នែកខាងលើ លោកថា អាជ្ញាធរខេត្តបានត្រៀមបម្រុងឆ្លើយតបនឹងគ្រោះមហន្តរាយនេះរួចហើយ។
លោក ម៉ែន គុង៖ «ផែនការគ្រប់គ្រងគ្រោះមហន្តរាយខេត្តបានត្រៀមលក្ខណៈសម្បត្តិ តាំងពីដើមខែវស្សា ដែលមានផែនការត្រៀមបម្រុងឆ្លើយតបនឹងគ្រោះអាសន្នទឹកជំនន់រួចហើយ»។
រីឯទំនប់វារីអគ្គិសនីស្រែពក៤ នៅប្រទេសវៀតណាមឯណោះវិញ នៅថ្ងៃទី១០ ខែសីហា អាជ្ញាធរវៀតណាម បានជូនដំណឹងពីការបើកបង្ហូរទឹក ពីផ្ទៃអាងទំនប់វារីអគ្គិសនីនេះ ចំនួន ៣៩០ ម៉ែត្រគូបក្នុងមួយវិនាទី ហូរធ្លាក់មកលើតំបន់ផ្នែកខាងក្រោមនៃទន្លេស្រែពក ឋិតក្នុងខេត្តរតនគិរី និង ខេត្តស្ទឹងត្រែង គឺចាប់ពីថ្ងៃទី១៦ ដល់ថ្ងៃទី ៣០ ខែសីហា។
នាយកប្រតិបត្តិអង្គការបណ្ដាញការពារទន្លេបី លោក លាង ប៊ុនលាប បារម្ភថា ទឹកជំនន់នឹងបន្តកើនឡើងខ្លាំង អាចនឹងលិចផលដំណាំ របស់ពលរដ្ឋម្តងទៀត ខណៈដែលកាលពីចុងខែកក្កដាកន្លងទៅពលរដ្ឋរស់នៅក្នុងឃុំចំនួន ៧ក្នុងខេត្តរតនគិរី បានទទួលរងផលប៉ះពាល់ដោយគ្រោះទឹកជំនន់។
លោកស្នើឱ្យអាជ្ញាធរខ្មែរ គួរពិនិត្យ និងតាមដានឱ្យច្បាស់លាស់ ពីកម្រិតទឹកទំនប់វារីអគ្គិសនី របស់ភាគីវៀតណាម និងឡាវ ចៀសវាង បើកបង្ហូរទឹកហួសកម្រិត ផ្ទុយពីច្បាប់អន្តរជាតិ។
លោក លាង ប៊ុនលាប៖ «បើយើងបើកលើសពីហ្នឹង វានឹងមហន្តរាយដល់ផ្នែកខាងក្រោម ដល់ជីវចម្រុះ។ អាជ្ញាធរដែនដី គួរតែសំណូមពរឱ្យរដ្ឋាភិបាលគោរពតាមកិច្ចព្រមព្រៀងទន្លេមេគង្គឆ្នាំ ១៩៩៥»។
ទំនប់វារីអគ្គិសនីសាយ៉ាបូរី (Xayaburi ) របស់ឡាវ បានចាប់ផ្តើមសាងសង់នៅលើតួទន្លេមេគង្គ តាំងពីឆ្នាំ២០១២ នឹងសង់រួចរាល់កាលពីឆ្នាំ២០១៩ អាចផលិតថាមពលអគ្គិសនីជាង ១ពាន់ ២រយ មេហ្គាវ៉ាត់ (១.២៦០)។
ទំនប់នេះមានប្រវែង ៨១០ម៉ែត្រ កម្ពស់ ៣២ម៉ែត្រមានចម្ងាយ១៥០គីឡូម៉ែត្រពីខេត្តលួងព្រះបាង (Luang Prabang) ភាគខាងជើងនៃប្រទេសឡាវ។ ប្រទេសដែលប៉ះពាល់ខ្លាំងជាងគេនៃការសាងសង់ទំនប់នេះ គឺកម្ពុជា និងវៀតណាមឋិតនៅផ្នែកខាងក្រោមនៃខ្សែទឹកទន្លេមេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។