"ព្រៃ​សហគមន៍​៧​នៅ​ខេត្ត​កំពង់ឆ្នាំង​កំពុង​រង​ការ​កាប់​បំផ្លាញ"

ដោយ ជិន ជេដ្ឋា
2014-12-29
អ៊ីម៉ែល
មតិ
Share
បោះពុម្ព
តំណាង​សហគមន៍​ឃុំ​ក្រាំងស្គារ លោក ម៉ែន ស៊ឺន ផ្ដល់​បទ​សម្ភាសន៍​ដល់​វិទ្យុ​អាស៊ីសេរី នា​ខេត្ត​កំពង់ឆ្នាំង កាល​ពី​ថ្ងៃ​ទី​១១ ខែ​ធ្នូ ឆ្នាំ​២០១៣។
តំណាង​សហគមន៍​ឃុំ​ក្រាំងស្គារ លោក ម៉ែន ស៊ឺន ផ្ដល់​បទ​សម្ភាសន៍​ដល់​វិទ្យុ​អាស៊ីសេរី នា​ខេត្ត​កំពង់ឆ្នាំង កាល​ពី​ថ្ងៃ​ទី​១១ ខែ​ធ្នូ ឆ្នាំ​២០១៣។
RFA/Chin Chetha

តំណាង​សហគមន៍ និង​នាយិកា​នៃ​អង្គការ​សកម្មភាព​ដើម្បី​បរិស្ថាន និង​សហគមន៍ (AEC) ​អះអាង​ថា ព្រៃឈើ​ក្រោម​ការ​គ្រប់គ្រង​សហគមន៍​ព្រៃ​ឈើ​ខេត្ត​កំពង់ឆ្នាំង នៅ​ស្រុក​ទឹក​ផុស​ចំនួន ៣ និង​ស្រុក​បរិបូរណ៍​ចំនួន ៤ កំពុង​រង​ការ​កាប់​បំផ្លាញ។ ពួកគេ​បញ្ជាក់​ថា មន្ត្រី​មូលដ្ឋាន ប្រជាពលរដ្ឋ និង​អ្នក​មាន​លុយ ឬ​មាន​អំណាច គឺ​ជា​អ្នក​ទន្ទ្រាន​ដី​ព្រៃ​សហគមន៍ ហើយ​ទប់ស្កាត់​ពុំ​មាន​ប្រសិទ្ធភាព។

ផ្ទៃ​ដី​ព្រៃ​សហគមន៍​ចំនួន ៧ នៅ​ស្រុក​ទឹក​ផុស និង​ស្រុក​បរិបូរណ៍ សរុប​ជាង ៨​ពាន់​ហិកតារ (៨០៧៩.៥០៥) ដែល​ប្រជា​សហគមន៍​ធ្លាប់​អាស្រ័យ​ផល​ដូច​ជា រក​អុស បោច​វល្លិ មើល​គោ ក្របី និង​កាប់​ឈើ​ធ្វើ​ផ្ទះ​ជា​ដើម ប្រឈម​នឹង​ការ​បាត់​បង់ ខណៈ​តំណាង​សហគមន៍ និង​អង្គការ​ក្រៅ​រដ្ឋាភិបាល​មើល​ឃើញ​បទល្មើស​កាប់​ឈើ​ប្រភេទ​ខ្លុង ត្បែង ធ្វើ​ជា​អុស ឬ​ដុត​ឡ​ធ្យូង និង​ឈូស​ព្រៃ​យក​ធ្វើ​កម្មសិទ្ធិ​ឯកជន។

នាយិកា​អង្គការ​ដើម្បី​បរិស្ថាន និង​សហគមន៍​អ្នកស្រី សរ សាត មាន​ប្រសាសន៍​នៅ​ថ្ងៃ​ទី​២៨ ខែ​ធ្នូ ថា សហគមន៍​ទួល​សំរោង សហគមន៍​ចាន់ត្រក និង​សហគមន៍​ភ្នំ​បាណន់ ឋិត​នៅ​ស្រុក​ទឹកផុស និង​សហគមន៍​ស្ទឹង​ខ្សាច់ស សហគមន៍​ពេជ្រចង្វាធីតាល្អឆើត និង​សហគមន៍ ១៨៥​កា (185.K) ឋិត​នៅ​ស្រុក​បរិបូរណ៍ ត្រូវ​កាប់​បំផ្លាញ​ឈើ​ល្អៗ ឬ​ប្រភេទ​ព្រៃស្រោង អស់​គ្មាន​សល់​នៅ​អំឡុង​ឆ្នាំ​២០១០ ហើយ​នៅ​សល់​ឈើ​តូចតាច​កំពុង​កាប់​បំផ្លាញ​រាល់​ថ្ងៃ។

អ្នកស្រី​ថា ចាប់​ពី​ខែ​តុលា ឆ្នាំ​២០១៤ ​ខាង​រដ្ឋបាល​ព្រៃ​ឈើ អាជ្ញាធរ និង​អង្គការ​អ្នកស្រី​បាន​សហការ​គ្នា​ល្អ ហើយ​សង្ឃឹម​ថា បទល្មើស​នឹង​ថយ​ចុះ៖ «ប្រសិន​បើ​អាជ្ញាធរ រដ្ឋបាល​ព្រៃឈើ និង​សហគមន៍​សហការ​គ្នា​ទប់​ស្កាត់​ព្រៃ​ឈើ​នឹង​ដុះ​ឡើង​វិញ​បាន​ល្អ ប៉ុន្តែ​បើ​ដូច​សព្វ​ថ្ងៃ​មាន (ប្រជា​សហគមន៍) គាត់​បាក់​ទឹក​ចិត្ត​លែង​ចង់​ដើរ​ល្បាត​អ៊ីចឹង»

ចំណែក​តំណាង​សហគមន៍​ចំនួន​បី នៃ​ឃុំ​ក្រាំង​ស្គារ ស្រុក​ទឹកផុស លោក ម៉ែន សឺន ថ្លែង​ថា បច្ចុប្បន្ន​នៅ​តំបន់​លោក​កើត​មាន​បទល្មើស​ព្រៃ​ឈើ និង​កាប់​ទន្ទ្រាន​ដី​ព្រៃ​សហគមន៍​តិច​តួច ដោយសារ​តែ​មាន​ប្រជា​សហគមន៍​ចែក​វេន​គ្នា​ល្បាត​រៀងរាល់​ថ្ងៃ​ចំនួន ១២​ក្រុម ដោយ​ក្នុង​១​ក្រុម​មាន​មនុស្ស​យ៉ាង​តិច ១៥​នាក់ ហើយ​បទល្មើស​បាន​ថយ​ចុះ​ជា​បន្ត​បន្ទាប់​តាំង​ពី​ដើម​ឆ្នាំ​២០១៤ មក៖ «ដោយ​ឡែក​មាន​តែ​សហគមន៍​ភ្នំ​បាណន់ ដែល​មាន​ការ​រំលោភ​បំពាន។ មាន​ទាំង​ប៉ូលិស ស្មៀនឃុំ​កាប់​យក​ដី​សហគមន៍​ហ្នឹង​តែម្ដង»

​ទាក់ទង​បញ្ហា​នេះ នាយ​ខណ្ឌ​រដ្ឋបាល​ព្រៃ​ឈើ​ខេត្ត​កំពង់ឆ្នាំង លោក ស៊ិន កុសល ថ្លែង​បញ្ជាក់​យ៉ាង​ខ្លី​ថា បញ្ហា​ទាំង​នេះ​ខាង​រដ្ឋបាល​ព្រៃ​ឈើ​កំពុង​ធ្វើ​ការងារ​ជាមួយ​អង្គការ​ដៃគូ ដើម្បី​ទប់ស្កាត់​ហើយ​រួច​ក៏​ចុច​ផ្ដាច់​ទូរស័ព្ទ​តែម្ដង។ ចំណែក​អនុ​ប្រធាន​មន្ទីរ​បរិស្ថាន លោក បឿ ប៊ុនថន បដិសេធ​មិន​ឆ្លើយ​តប​អ្វី​ច្រើន​ឡើយ​​ ដោយ​លោក​ប្រាប់​ថា សហគមន៍​ទាំង​នេះ​មិន​ឋិត​នៅ​ក្នុង​ដែន​សមត្ថកិច្ច​របស់​លោក។

យ៉ាង​ណា​អភិបាល​ស្រុក​បរិបូរណ៍ លោក ឃួន សៅរុំ ថ្លែង​បញ្ជាក់​ថា បទល្មើស​កាប់​ឈើ ឬ​ទន្ទ្រាន​ដី​ព្រៃ​សហគមន៍​យក​ធ្វើ​ជា​កម្មសិទ្ធិ គឺ​មាន​ពលរដ្ឋ​តែ ១​គ្រួសារ​ប៉ុណ្ណោះ បាន​រុករាន​ដី​ព្រៃ​សហគមន៍ ១៨៥​កា ហើយ​ខាង​រដ្ឋបាល​ព្រៃ​ឈើ​បាន​ដាក់​ពាក្យ​បណ្ដឹង​ទៅ​តុលាការ​រួច​ហើយ។ លោក​បន្ត​ថា បញ្ហា​ព្រៃឈើ​នៅ​តាម​សហគមន៍​ក្នុង​ស្រុក​ហាក់​ស្ងប់ស្ងាត់​ក្នុង​រយៈពេល​ចុង​ក្រោយ​នេះ។

បញ្ហា​បទល្មើស​ព្រៃ​ឈើ ឬ​ការ​ចរាចរ​ប្រភេទ​ឈើ​ប្រណីត​នៅ​ខេត្ត​កំពង់ឆ្នាំង និង​ការ​ចរាចរ​ពី​ខេត្ត​ផ្សេងៗ​ឆ្លង​កាត់​អាជ្ញាធរ និង​មន្ត្រី​ជំនាញ​រដ្ឋបាល​ព្រៃ​ឈើ​តែង​តែ​ចាប់​បាន​ឡាន ឬ​ឈើ ប៉ុន្តែ​ជនល្មើស និង​អ្នក​នៅ​ពី​ក្រោយ​ខ្នង​នៃ​បទល្មើស​មិន​សូវ​ចាប់​បាន​ឡើយ។ បញ្ហា​នេះ​ពលរដ្ឋ​ធ្លាប់​លើក​មក​ជជែក​នៅ​ក្នុង​វេទិកា​សាធារណៈ​ថ្នាក់​ជាតិ​មួយ កាល​ពី​ដើម​ឆ្នាំ​២០១៤ តែ​គ្មាន​ចម្លើយ​ច្បាស់លាស់​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Khemrak

ពី PP

នេះជាយុទ្ធសាស្ត្រផែនការ ក៥​ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតសម្តេចនាយករដ្ឋមន្ត្រី

Dec 29, 2014 09:31 PM

គេហទំព័រ​ទាំងមូល