រូបថតអង្គការពន្លកខ្មែរ
សហគមន៍ការពារព្រៃឈើព្រះរកា ខែត្រព្រះវិហារ ឲ្យដឹងថា ក្រុមអ្នកអារឈើបានងាកមកកាប់រំលំដើមឈើផលិតជ័រទឹកធ្វើអាជីវកម្មខុសច្បាប់កាន់តែខ្លាំងឡើង នៅគ្រាដែលឈើមូលធំៗ ត្រូវគេកាប់រំលំយកឈើធ្វើអាជីវកម្មខុសច្បាប់ អស់ទាំងស្រុង។ ចំណែកអាជ្ញាធរ និងមន្ត្រីជំនាញមិនត្រឹមតែធ្វើមិនដឹងមិនឮទប់ស្កាត់បទល្មើសព្រៃឈើតាមបញ្ជារបស់ប្រមុខរដ្ឋាភិបាលទេ បែរជាចាំទទួលលុយពីអ្នកដឹកឈើជាថ្នូរអនុញ្ញាតឲ្យឈ្មួញចូលព្រៃអារឈើ និង ដឹកជញ្ជូនឈើតាមចិត្ត។
ឈើមូលធំៗឋិតក្នុងតំបន់ព្រៃព្រះរកា ស្រុកត្បែងមានជ័យ ខែត្រព្រះវិហារ ដែលជនជាតិដើមភាគតិចកួយអាស្រ័យផលច្រើនជំនាន់មកហើយនោះ ត្រូវបានគេលួចកាប់ធ្វើអាជីវកម្មអស់ស្ទើរទាំងស្រុង ហើយបច្ចុប្បន្ននៅសេសសល់តែដើមឈើផលិតជ័រទឹកដែលជាដង្ហើមសេដ្ឋកិច្ចរបស់ជនជាតិដើមភាគតិចកួយអាស្រ័យផលកំពុងបាត់បង់បន្តិចម្ដងៗ។
ប្រជាសហគមន៍ភូមិប្រមេរ ថ្លែងសុំមិនបញ្ចេញឈ្មោះឲ្យដឹងនៅថ្ងៃទី១៨ ខែធ្នូ ថា ឈ្មួញនៅតែលួចកាប់ដើមឈើផលិតជ័រទឹករៀងរាល់ថ្ងៃ ហើយដឹកជញ្ជូនចេញពីព្រៃនៅពេលយប់ ដែលមានរថយន្តសាំយ៉ុងចាំទទួលទិញនៅមូលដ្ឋាន។ លោកស្រីថា ជារៀងរាល់យប់រថយន្តសាំយ៉ុងមិនក្រោម ៥គ្រឿងទេ ដឹកឈើចេញពីព្រៃអភិរក្សព្រះរកា ដែលភាគច្រើនសុទ្ធសឹងតែជាប្រភេទឈើផលិតជ័រទឹកដូចជាដើមឈើទាល និងត្រាច។ លោកស្រីកត់សម្គាល់ថា ពលរដ្ឋចំណាកស្រុកជាអ្នកស៊ីឈ្នួលអារឈើលក់ចិញ្ចឹមជីវិត បានឃុបឃិតជាមួយសមត្ថកិច្ច និងមន្ត្រីជំនាញ៖ «គេដឹកសព្វថ្ងៃនេះ សុទ្ធតែដើមជ័រច្បោះ អត់មានឈើអីអារទៀតទេ មានតែដើមច្បោះ។ ដើមឈើអស់បាត់ហើយ ដើមគគីរ និងផ្ដៀក អស់បាត់ហើយ»។
ស្ត្រីដដែលកត់សម្គាល់ថា ការសម្របសម្រួលជាប្រាក់ដើម្បីអនុញ្ញាតប្រគល់វត្ថុតាងអារឈើ និងមធ្យោបាយដឹកជញ្ជូនឈើឲ្យជនល្មើសវិញ គឺជាយន្តការរបស់មន្ត្រីបរិស្ថាន និងអាជ្ញាធរដែលជាដើមហេតុនាំឲ្យជនល្មើសមិនរាងចាល និងមិនខ្លាចច្បាប់។ លោកស្រីថា អ្នកកាប់ឈើភាគច្រើនបានស្គាល់មន្ត្រីជំនាញ និងសមត្ថកិច្ចទើបអាចដឹកជញ្ជូនឈើ និងចូលព្រៃអារឈើបាន តែបើជនល្មើសណាមិនស្គាល់មន្ត្រីទាំងនោះវិញ គេនឹងអនុវត្តច្បាប់។ លោកស្រីមានជំនឿថា ប្រសិនបើអាជ្ញាធរមានឆន្ទៈពង្រឹងការងារទប់ស្កាត់បទល្មើសព្រៃឈើ ជនល្មើសមិនហ៊ានចូលព្រៃអារឈើនោះទេ ហើយការដឹកជញ្ជូនឈើក៏មិនអាចគេចពីកណ្ដាប់ដៃរបស់សមត្ថកិច្ចដែរ៖ «ខ្ញុំអាល័យកង្វល់រឿងព្រៃឈើមិនដឹងធ្វើអីបាន ធ្វើទៅអស់ ខ្ញុំកើតឆ្កូតអស់ហើយ អ្នកស្រុក។ គេយកលុយខ្លះ និងគេឲ្យកាប់ខ្លះដោយតែមានលុយឲ្យ»។
មេឃុំពោធិ៍ ស្រុកត្បែងមានជ័យ លោក ហម បាន ធ្លាប់បញ្ជាក់ថា ការបង្ក្រាបបទល្មើសព្រៃឈើ ជាសមត្ថកិច្ចរបស់មន្ត្រីជំនាញ និងសមត្ថកិច្ច ហើយអាជ្ញាធរឃុំមានតួនាទីសម្របសម្រួល និងដោះស្រាយជូនពលរដ្ឋ។ លោកថា ឋានៈត្រឹមអាជ្ញាធរឃុំ មិនអាចឈប់ស្កាត់បទល្មើសព្រៃឈើបានទូលំទូលាយទេ ហើយយន្តការនេះគួរមានការចូលរួមពីភាគីពាក់ព័ន្ធ ជាពិសេសរដ្ឋាភិបាល។
ដែនជម្រកសត្វព្រៃព្រះរកា លាតសន្ធឹងលើផ្ទៃដីជាង ៩ម៉ឺន ៦ពាន់ហិកតារ នៅភូមិសាស្ត្រប្រជុំបីស្រុក គឺស្រុកជាំក្សាន្ត ស្រុកត្បែងមានជ័យ និងស្រុកឆែប នៃខែត្រព្រះវិហារ។ ដែនជម្រកសត្វព្រៃនេះឋិតក្នុងការគ្រប់គ្រងរបស់ក្រសួងបរិស្ថាន មានកាតព្វកិច្ចធានាកិច្ចគាំពារអភិរក្ស និងទប់ស្កាត់បទល្មើសព្រៃឈើគ្រប់ប្រភេទ។
មន្ត្រីជាន់ខ្ពស់សមាគមអាដហុក (ADHOC) លោក ស៊ឹង សែនករុណា យល់ថា ការបណ្ដោយឲ្យបទល្មើសព្រៃឈើកើតមានដដែលៗ គឺជាសញ្ញានាំឲ្យពលរដ្ឋបាត់ជំនឿចិត្តលើការអនុវត្តច្បាប់ព្រៃឈើរបស់មន្ត្រីជំនាញ។ លោកអំពាវនាវឲ្យប្រមុខរដ្ឋាភិបាលពិនិត្យឡើងវិញចំពោះមន្ត្រីរណាដែលបណ្ដោយឲ្យបទល្មើសព្រៃឈើកើតមាន និងមិនបានបំពេញកាតព្វកិច្ចការពារព្រៃឈើតាមតួនាទី៖ «អត់មានចំណាត់ការសោះ យើងឃើញថា មានភាពអសកម្មមែនទែនចំពោះការចាត់ការលើអ្នកដែលបានប្រព្រឹត្តរឿងបំផ្លាញធនធានធម្មជាតិ។ នីតិវិធីផ្លូវច្បាប់គាត់ត្រូវប្ដឹងទៅអាជ្ញាធរ និងតុលាការសាមីខែត្ររបស់ខ្លួនពីអ្នកបំផ្លាញ និងអ្នកទទួលខុសត្រូវណាមួយតំបន់ហ្នឹង ដែលគាត់មិនអើពើបំផ្លាញ»។
មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ មើលឃើញថា បើទោះបីជាប្រមុខរដ្ឋាភិបាលចេញបញ្ជាឱ្យរួមគ្នាការពារព្រៃឈើក៏ដោយ តែសកម្មភាពកាប់ឈើនៅតាមតំបន់អភិរក្សព្រះរកា មិនថយចុះទេ។ លោកថា អាជ្ញាធររដ្ឋាភិបាលមួយចំនួនបានខំប្រឹងទប់ស្កាត់បទល្មើសព្រៃ តែមន្ត្រីជំនាញមួយចំនួនទៀតបណ្ដែតបណ្ដោយយកផលប្រយោជន៍ជាធំដែលនាំឲ្យការអនុវត្តបទបញ្ជារបស់ប្រមុខរដ្ឋាភិបាលពុំមានប្រសិទ្ធភាព៕ភាព៕
