សង្គម​ស៊ីវិល​ខេត្ត​កោះកុង​បារម្ភ​ខ្លាច​ដី​ព្រៃ​កោងកាង​នឹង​ត្រូវ​បាត់បង់

ដោយ ដែន អយុធ្យា
2017-02-27
Share
ដី​ព្រៃ​កោងកាង កោះកុង ២០១៦ ៨៥៥ តំបន់​ដី​ព្រៃ​មាន​ដុះ​ដើម​កោងកាង​នៅ​តាម​ឆ្នេរ​សមុទ្រ​មួយ​ចំនួន​នា​ខេត្ត​កោះកុង ត្រូវ​គេ​ចាក់​ដី​លុប​ធ្វើ​កម្មសិទ្ធិ និង​បាន​ពុះ​ច្រៀក​ជា​ឡូៗ​លក់​ដូរ​បន្ត។ រូបថត​កាល​ពី​ថ្ងៃ​ទី​៧ ខែ​ធ្នូ ឆ្នាំ​២០១៦។ RFA
Photo: RFA

អ្នក​ឃ្លាំ​មើល​សង្គម​ក្នុង​ខេត្ត​កោះកុង បន្ត​ព្រួយ​បារម្ភ​ខ្លាច​ដី​ព្រៃ​កោងកាង​ជា​ជម្រក​ត្រី​សមុទ្រ​បន្ត​ពូជ​នា​មូលដ្ឋាន​នេះ ត្រូវ​រលាយ​ហិនហោច ព្រោះ​បច្ចុប្បន្ន​នេះ​គេ​សង្កេត​ឃើញ​មាន​សកម្មភាព​ចាក់​ដី​លុប​ព្រៃ​កោងកាង និង​បោះ​តម្រុយ​កំណត់​ក្បាល​ដី​ពុះ​ច្រៀក​ជា​ឡូៗ​លក់​ដូរ​បន្ត បាន​កើត​មាន​អនាធិបតេយ្យ។

បញ្ហា​នេះ អភិបាល​ខេត្ត​កោះកុង អះអាង​ថា ដី​ព្រៃ​លិច​ទឹក ឬ​ដី​ព្រៃ​កោងកាង​នឹង​មិន​អនុញ្ញាត​ឲ្យ​ក្លាយ​ជា​កម្មសិទ្ធិ​ឯកជន​នោះ​ទេ។

អ្នក​ឃ្លាំ​មើល​ការ​រំលោភ​សិទ្ធិ​មនុស្ស​នៃ​អង្គការ​លីកាដូ (LICADHO) ប្រចាំ​ខេត្ត​កោះកុង លោក ហ៊ួរ អ៊ីន ផ្តល់​សម្ភាស​ថា វិនាសកម្ម​នៃ​ការ​ចាក់​ដី​លុប​ព្រៃ​កោងកាង​ជា​ជម្រក​ត្រី​សមុទ្រ​បន្ត​ពូជ​នា​មូលដ្ឋាន​នេះ មាន​វិសាលភាព​ធំធេង ដែល​ទាមទារ​ឲ្យ​រដ្ឋាភិបាល​ទប់ស្កាត់​ឲ្យ​មាន​ប្រសិទ្ធភាព។

អ្នក​ឃ្លាំ​មើល​សង្គម​រូប​នេះ​អះអាង​ថា ដី​ព្រៃ​លិច​ទឹក​មាន​ទីតាំង​នៅ​តាម​ព្រែក និង​ជាប់​ឆ្នេរ​សមុទ្រ​ភាគច្រើន​នា​ខេត្ត​កោះកុង ត្រូវ​ឈ្មួញ និង​មន្ត្រី​មាន​អំណាច​មួយ​ចំនួន​បន្ត​មាន​មហិច្ឆតា​ទន្ទ្រាន​កាន់​កាប់​ធ្វើ​កម្មសិទ្ធិ ដោយ​បាន​ដឹក​ដី​ចាក់​លុប​ព្រៃ​លិច​ទឹក និង​សង់​សំណង់​ផ្សេងៗ​នៅ​លើ​ដី​មាន​ដុះ​ព្រៃ​កោងកាង ព្រម​ទាំង​បាន​ពុះ​ច្រៀក​ជា​ឡូៗ​លក់​ដូរ​បន្ត​ថែម​ទៀត។

លោក ហ៊ួរ អ៊ីន ស្នើ​ឲ្យ​លោក ជា សុផារ៉ា រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ និង​លោក វេង សាខុន រដ្ឋមន្ត្រី​ក្រសួង​កសិកម្ម ដែល​ទទួល​អនុវត្ត​បទបញ្ជា​របស់​លោក​នាយក​រដ្ឋមន្ត្រី ហ៊ុន សែន ត្រូវ​ចុះ​ពិនិត្យ​ឈាន​ដល់​និរាករណ៍ ឬ​លុប​ប័ណ្ណ​កម្មសិទ្ធិ និង​ឯកសារ​បញ្ជាក់​កម្មសិទ្ធិ​ដីធ្លី​ផ្សេង​ទៀត​ដែល​ជាប់​ពាក់ព័ន្ធ​ដី​ព្រៃ​កោងកាង​នៅ​ខេត្ត​កោះកុង ត្រូវ​បង្ហាញ​លទ្ធផល​ចុះ​ស្រាវជ្រាវ​ជា​សាធារណៈ៖ «នៅ​ខេត្ត​កោះកុង សម្រាប់​ក្រុង​ខេមរភូមិន្ទ នេះ គឺ​មិន​ទាន់​មាន​ការ​លុប ឬ​ដក​ហូត​ប័ណ្ណ​កម្មសិទ្ធិ​ដីធ្លី ដែល​ចេញ​ប៉ះពាល់​ទៅ​លើ​ដី​ព្រៃ​កោងកាង ឬ​ព្រៃ​លិច​ទឹក​នៅ​ឡើយ​ទេ គឺ​មាន​តែ​ការ​ដក​ហូត​នៅ​ស្រុក​កោះកុង។ មាន​ន័យ​ថា នៅ​ក្រុង​ខេមរភូមិន្ទ នេះ មិន​ទាន់​មាន​ការ​លុប​ប័ណ្ណ​កម្មសិទ្ធិ​ទាំងនោះ​ចោល​ទេ ហើយ​ការ​ចាក់​ដី​លុប​ព្រៃ​កោងកាង នៅ​តែ​បន្ត​កើត​មាន​ដដែល។ ក្រសួង​រៀបចំ​ដែនដី គួរ​តែ​ពិនិត្យ​មើល​ដែល​តម្រូវ​ឲ្យ​ដក​ហូត ឬ​ការ​ទប់ស្កាត់​ការ​រុក​រាន​ដី​ព្រៃ​កោងកាង​នា​មូលដ្ឋាន​នេះ ដោយសារ​ការ​អនុវត្ត​មិន​ទាន់​មាន​ប្រសិទ្ធភាព​ទេ​នៅ​ក្រុង​ខេមរភូមិន្ទ នេះ»

លោក​នាយក​រដ្ឋមន្ត្រី ហ៊ុន សែន កាល​ពី​ឆ្នាំ​២០១៦ កន្លង​ទៅ បាន​ចេញ​បទបញ្ជា​ឲ្យ​រដ្ឋមន្ត្រី​ក្រសួង​ដែនដី និង​ក្រសួង​កសិកម្ម ឲ្យ​ពិនិត្យ​រាល់​ការ​ចេញ​ប័ណ្ណ​កម្មសិទ្ធិ និង​ឈាន​ដល់​លុប​ចោល​ប័ណ្ណ​កម្មសិទ្ធិ​ទាំងឡាយ​ណា​ដែល​ចេញ​ប៉ះពាល់​ដល់​ដី​ព្រៃ​កោងកាង រួម​មាន​ខេត្ត​កែប ខេត្ត​កំពត ខេត្ត​ព្រះសីហនុ និង​ខេត្ត​កោះកុង។ ខេត្ត​ទាំង​៤ មាន​ឆ្នេរ​សមុទ្រ​សរុប​ចំនួន ៤៤០​គីឡូម៉ែត្រ។

អ្នក​សម្របសម្រួល​សមាគម​អាដហុក (ADHOC) ខេត្ត​កោះកុង លោក ញៀប សំអឿន ឲ្យ​ដឹង​ដែរ​ថា ដី​ជាប់​ឆ្នេរ​សមុទ្រ​ដែល​មាន​ដុះ​ព្រៃ​កោងកាង​ជា​ជម្រក​ត្រី​សមុទ្រ​បន្ត​ពូជ​មូលដ្ឋាន​នេះ បាន​បន្ត​រង​ការ​បំផ្លាញ​ជា​បន្តបន្ទាប់​រហូត​មក​ដល់​ពេល​នេះ។ លោក​បន្ត​ថា ឈ្មួញ និង​មន្ត្រី​មាន​អំណាច​បាន​បន្ត​ឃុបឃិត​ជាមួយ​មន្ត្រី​ជំនាញ​ស្ថាប័ន​ខ្លះ​នៃ​រដ្ឋបាល​ខេត្ត​កោះកុង បាន​ដឹក​ដី​ចាក់​លុប​ព្រៃ​កោងកាង និង​ពុះ​ច្រៀក​ដី​ព្រៃ​លិច​ទឹក​ទាំងនោះ​ជា​ឡូៗ​លក់​ដូរ​យ៉ាង​អនាធិបតេយ្យ។

មន្ត្រី​សិទ្ធិ​មនុស្ស​រូប​នេះ​រិះគន់​ថា បទបញ្ជា​ដែល​ប្រមុខ​ដឹកនាំ​ដាក់​ឲ្យ​មន្ត្រី​ក្រោម​ឱវាទ​ពិនិត្យ​សើរើ​ទៅ​លើ​រាល់​ការ​ចេញ​ប័ណ្ណ​កម្មសិទ្ធិ នាំ​ឲ្យ​ប៉ះពាល់​ដី​ព្រៃ​កោងកាង​នៅ​តាម​ឆ្នេរ​សមុទ្រ​ខេត្ត​កោះកុង មន្ត្រី​ថ្នាក់​ក្រោម​អនុវត្ត​មិន​ទាន់​មាន​ប្រសិទ្ធភាព​ទេ។

លោក ញៀប សំអឿន ស្នើ​ឲ្យ​លោក​នាយក​រដ្ឋមន្ត្រី​ជួយ​ទប់ស្កាត់​សកម្មភាព​ចាក់​ដី​លុប​ព្រៃ​កោងកាង​អនាធិបតេយ្យ​នា​មូលដ្ឋាន​ខេត្ត​កោះកុង ឲ្យ​មាន​ប្រសិទ្ធភាព ដើម្បី​រក្សា​ជម្រក​ត្រី​សមុទ្រ​បន្ត​ពូជ​ឲ្យ​បាន​គង់វង្ស៖ «អ្វី​ដែល​យើង​បារម្ភ គឺ​នៅ​ពេល​ដែល​ចំណាត់ការ ឬ​នីតិវិធី​របស់​អាជ្ញាធរ​ពាក់ព័ន្ធ ជាពិសេស​មន្ត្រី​ជំនាញ​ពាក់ព័ន្ធ​ដែល​លោក​ធ្វើ​ការ​មិន​សូវ​មាន​ប្រសិទ្ធភាព​ដូច​រាល់​ថ្ងៃ​នេះ គឺ​យើង​បារម្ភ​ខ្លាច​ឈ្មួញ​មួយ​ចំនួន​ដែល​មាន​បំណង​មិន​ល្អ បាន​ធ្វើ​សកម្មភាព​ដឹក​ដី​ចាក់​លុប​ព្រែក និង​ឆ្នេរ​មាន​ដុះ​ព្រៃ​កោងកាង​នៅ​ក្នុង​ខេត្ត​នេះ​កើត​មាន​ជា​បន្ត​ទៅ​ទៀត ធ្វើ​ឲ្យ​ធនធាន​ធម្មជាតិ​ដែល​ជា​ជម្រក​មច្ឆជាតិ និង​ជីវចម្រុះ​ត្រូវ​រលាយ​ហិនហោច​ដោយសារ​ស្នាដៃ​ឈ្មួញ​មួយ​ចំនួន​តូច»

អភិបាល​ខេត្ត​កោះកុង លោក ប៊ុន លឺត ផ្តល់​សម្ភាស​តាម​ទូរស័ព្ទ​ឲ្យ​អាស៊ីសេរី​ដឹង​នៅ​ថ្ងៃ​សុក្រ ទី​២៤ ខែ​កុម្ភៈ ថា ពាក់ព័ន្ធ​ដល់​ដី​ព្រៃ​កោងកាង ឬ​ព្រៃ​លិច​ទឹក រដ្ឋបាល​ខេត្ត​នេះ​មិន​អនុញ្ញាត​ឲ្យ​មន្ត្រី​ក្រោម​ឱវាទ​ពាក់ព័ន្ធ​ខេត្ត ចេញ​ប្លង់​កម្មសិទ្ធិ​ជូន​បុគ្គល​ឯកជន​នោះ​ទេ។ លោក​ថា ក្រសួង​ពាក់ព័ន្ធ រួម​ជាមួយ​រដ្ឋបាល​ខេត្ត​កោះកុង បាន​អនុវត្ត​បទបញ្ជា​របស់​ប្រមុខ​ដឹកនាំ​ក្នុង​ការងារ​ចុះ​ពិនិត្យ​ទៅ​លើ​ការ​ចេញ​ប័ណ្ណ​កម្មសិទ្ធិ ឬ​សកម្មភាព​ដឹក​ដី​ចាក់​លុប​ព្រៃ​កោងកាង​នៅ​តាម​តំបន់​ឆ្នេរ​សមុទ្រ​មួយ​ចំនួន​នា​ខេត្ត​កោះកុង ជា​បន្តបន្ទាប់។

លោក ប៊ុន លឺត សង្កត់​ធ្ងន់​ថា រដ្ឋបាល​ខេត្ត​កោះកុង នឹង​មិន​អនុញ្ញាត​ឲ្យ​មាន​សកម្មភាព​ដឹក​ដី​ចាក់​លុប​ព្រែក និង​ឆ្នេរ​សមុទ្រ​មាន​ដុះ​ព្រៃ​កោងកាង​បន្ត​កើត​មាន​ទៀត​ទេ ហើយ​បើ​មាន​បទល្មើស​នេះ​បាន​លួច​ធ្វើ​សកម្មភាព អាជ្ញាធរ​នឹង​ចុះ​មាន​វិធានការ​ទប់ស្កាត់ និង​ឈាន​ដល់​កសាង​សំណុំ​រឿង​បញ្ជូន​អ្នក​ជាប់​ពាក់ព័ន្ធ​ការ​ទន្ទ្រាន​កាន់​កាប់​ដី​ព្រៃ​លិច​ទឹក​ទៅ​ផ្ដន្ទាទោស​តាម​ច្បាប់៖ «បញ្ហា​នេះ លោក​រដ្ឋមន្ត្រី​ក្រសួង​រៀបចំ​ដែនដី និង​រដ្ឋមន្ត្រី​ក្រសួង​បរិស្ថាន ជាដើម គឺ​បាន​ចុះ​ត្រួត​ពិនិត្យ​ជាក់ស្តែង​ដោយ​ខ្លួន​លោក​រួច​ហើយ ជុំវិញ​ករណី​ដី​ព្រៃ​កោងកាង​នា​មូលដ្ឋាន​ខេត្ត​កោះកុង។ យើង​មិន​ចេញ​កម្មសិទ្ធិ​ជូន​បុគ្គល​ឯកជន​នៅ​លើ​ដី​ព្រៃ​កោងកាង បាន​នោះ​ទេ»

ទោះ​ជា​បែប​នេះ​ក្តី មន្ត្រី​សង្គម​ស៊ីវិល និង​សាធារណជន កំពុង​រង់ចាំ​មើល​ការ​ប្រកាស​លទ្ធផល​ជា​សាធារណៈ​របស់​ក្រុម​ការងារ​ចម្រុះ​ក្រសួង​រៀបចំ​ដែនដី និង​ក្រសួង​កសិកម្ម ដែល​ចុះ​អនុវត្ត​សេចក្តី​សម្រេច ឬ​លិខិត​របស់​លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី​១៣ ខែ​មិថុនា ឆ្នាំ​២០១៦។ លិខិត​នោះ​បាន​ផ្ដល់​ដំណឹង ឬ​ផ្តល់​លទ្ធភាព​ជូន​លោក ជា សុផារ៉ា រដ្ឋមន្ត្រី​ក្រសួង​រៀបចំ​ដែនដី និង​លោក វេង សាខុន រដ្ឋមន្ត្រី​ក្រសួង​កសិកម្ម ក្នុង​ការងារ​ចុះ​ពិនិត្យ​តាមដាន​ទៅ​លើ​ស្ថានភាព​ព្រៃ​កោងកាង​នៅ​តាម​តំបន់​ឆ្នេរ​នៃ​ប្រទេស​កម្ពុជា លើ​ចំណុច​និរាករណ៍ ឬ​ដក​ហូត​ប័ណ្ណ​កម្មសិទ្ធិ​កាន់​កាប់​អចលនវត្ថុ វិញ្ញាបនបត្រ​សម្គាល់​ម្ចាស់​អចលនវត្ថុ និង​លិខិត​បញ្ជាក់​ការ​កាន់​កាប់​ដី​របស់​មន្ទីរ​ដែនដី នគរូបនីយកម្ម និង​សំណង់ និង​អាជ្ញាធរ​ដែនដី​ខេត្ត​ជាប់​សមុទ្រ​ទាំង​៤ មាន​ខេត្ត​កំពត ខេត្ត​កែប ខេត្ត​ព្រះសីហនុ និង​ខេត្ត​កោះកុង ដែល​មាន​ការ​ពាក់ព័ន្ធ​ដី​ព្រៃ​កោងកាង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល