គណៈកម្មការទន្លេមេគង្គ បានជជែកបញ្ហានៃការកាប់បំផ្លាញព្រៃឈើ ផលប៉ះពាល់នៃការប្រែប្រួលអាកាសធាតុ បញ្ហាថាមពលអគ្គិសនី និងបញ្ហាប្រឈមផ្សេងទៀត នៅក្នុងកិច្ចប្រជុំកំពូលគណៈកម្មការទន្លេមេគង្គលើកទី៣ នៅខេត្តសៀមរាប ដែលបិទបញ្ចប់នៅថ្ងៃទី៥ ខែ មេសានេះ។ កម្ពុជាជាប្រទេសដឹកនាំកិច្ចប្រជុំនៅឆ្នាំនេះ។
ប្រទេសតាមដងទន្លេមេគង្គរួមមាន វៀតណាម ឡាវ ចិន និងមីយ៉ាន់ម៉ា (ភូមា) ទទួលស្គាល់នូវបញ្ហាកំណើនប្រជាជន កំណើនតម្រូវការទឹក ម្ហូបអាហារ ការបាត់បង់សម្បត្តិ បរិស្ថាន និងជលផល ក៏សុទ្ធតែជាបញ្ហា ដែលត្រូវរួមគ្នាដោះស្រាយ និងកំណត់កិច្ចសហប្រតិបត្តិការទៅអនាគត ដើម្បី ប្រសិទ្ធភាព និងអភិវឌ្ឍប្រកបដោយចិរភាព សម្រាប់អាងទន្លេមេគង្គ។
អង្គការសង្គមស៊ីវិលផ្នែកបរិស្ថាន សម្ដែងការព្រួយបារម្ភយ៉ាងខ្លាំង អំពីផលប៉ះពាល់នៃទំនប់វារីអគ្គីសនីធំៗចំនួន ៦ ដែលប្រទេសចិនបានសង់នៅលើដងទន្លេមេគង្គ ក្នុងប្រទេសចិន។ ទំនប់វារីអគ្គិសនីទាំងនេះ បង្កផលប៉ះពាល់ដល់ជីវចម្រុះ បរិស្ថាន និងការរស់នៅរបស់ប្រជាពលរដ្ឋ រាប់លាននាក់ ដែលរស់នៅខ្សែទឹកខាងក្រោម។
លោកនាយករដ្ឋមន្ត្រី ហ៊ុន សែន បានធ្វើសន្និសីទបិទបញ្ចប់កិច្ចប្រជុំនោះ ប៉ុន្តែ មិនអនុញ្ញាតឲ្យមានការសួរសំណួរពីអ្នកសារព័ត៌មាននោះឡើយ៕