ក្រសួង​រ៉ែ​គ្រោង​ចេញ​អាជ្ញាប័ណ្ណ​សិប្បកម្ម​រ៉ែ​មាស​ឲ្យ​សហគមន៍​នៅ​បាត់ដំបង​និង​ព្រះវិហារ

ដោយ អ៊ុក សាវបូរី
2015-07-16
Share
រ៉ែ​មាស ព្រះវិហារ ៣០៥ ២២-វិច្ឆិកា-២០១២៖ ទរ​ទឹក​ដែល​គេ​ធ្វើ​សម្រាប់​​បូម​ដី​បង្ហូរ​ដើម្បី​រែង​យក​រ៉ែ​មាស​ដែល​គេ​ជីក​ពី​ក្នុង​រណ្ដៅ​នៅ​ភូមិ​រំដេង ឃុំ​រមទម្យ ស្រុក​រវៀង ខេត្ត​ព្រះវិហារ។
RFA/Hang Savyouth

ក្រសួង​រ៉ែ និង​ថាមពល បាន​ប្រមូល​ពលរដ្ឋ​ដែល​ជីក​មាស​នៅ​ស្រុក​ភ្នំព្រឹក ខេត្ត​បាត់ដំបង និង​ជីក​មាស​នៅ​ក្នុង​តំបន់​រំដេង ឃុំ​រមណីយ ស្រុក​រវៀង ខេត្ត​ព្រះវិហារ ឲ្យ​បង្កើត​ជា​សហគមន៍​រួម​គ្នា​ដើម្បី​កែ​ទម្រង់​ការ​ជីក​មាស​ខុស​ច្បាប់ ក្លាយ​ទៅ​ស្រប​ច្បាប់ និង​ប្រមូល​សួយសារ​ចូល​រដ្ឋ។

ក្រសួង​រ៉ែ និង​ថាមពល ត្រៀម​ចេញ​អាជ្ញាប័ណ្ណ​សិប្បកម្ម​រ៉ែ​មាស​ឲ្យ​សហគមន៍ ដែល​ជីក​យក​រ៉ែ​មាស​នៅ​ក្នុង​ខេត្ត​ចំនួន​២ គឺ​ខេត្ត​បាត់ដំបង និង​ខេត្ត​ព្រះវិហារ។

គម្រោង​ចេញ​អាជ្ញាប័ណ្ណ​រ៉ែ​មាស​នៅ​ខេត្ត​ទាំង​ពីរ​នោះ បាន​ធ្វើ​ឡើង​ក្រោយ​ពី​ការ​អនុវត្ត​ផ្តល់​អាជ្ញាប័ណ្ណ​សិប្បកម្ម​ធនធាន​រ៉ែ​មាស​នៅ​ខេត្ត​មណ្ឌលគិរី បង្ក្រាប​បាន​ជោគជ័យ​ពី​ការ​ជីក​មាស​ដោយ​ពុំ​មាន​ច្បាប់​គ្រប់គ្រង មក​ជីក​មាស​ដោយ​ស្រប​ច្បាប់ តាម​រយៈ​ការ​ផ្តល់​អាជ្ញាប័ណ្ណ។

រដ្ឋលេខាធិការ​ក្រសួង​រ៉ែ និង​ថាមពល លោក ម៉េង សក្តិធារ៉ា អះអាង​ថា ការ​ផ្តល់​អាជ្ញាប័ណ្ណ​បាន​ជួយ​កាត់​បន្ថយ​ភាព​អនាធិបតេយ្យ​ជីក​មាស។ លោក​ថា ក្រសួង​រ៉ែ និង​ថាមពល នឹង​អនុវត្ត​ដូច​គ្នា​នៅ​ស្រុក​ភ្នំព្រឹក ខេត្ត​បាត់ដំបង និង​ស្រុក​រវៀង ខេត្ត​ព្រះវិហារ ដែល​កំពុង​តែ​ជីក​មាស​ខុស​ច្បាប់​ដែរ ឲ្យ​ពួក​គាត់​ចងក្រង​ជា​សហគមន៍ ដើម្បី​ក្រសួង​នេះ​ផ្តល់​អាជ្ញាប័ណ្ណ​សិប្បកម្ម​ជូន​ពួក​គាត់ ដើម្បី​ឲ្យ​ការ​ជីក​មាស​ទៅ​ជា​ស្រប​ច្បាប់ ហើយ​ប្រមូល​ថវិកា​បង់​ពន្ធ​ចូល​រដ្ឋ៖ «នេះ គឺ​ដើម្បី​ផល​ប្រយោជន៍​របស់​ប្រជាពលរដ្ឋ​យើង​ផង ផល​ប្រយោជន៍​របស់​សង្គម សហគមន៍​នៅ​មូលដ្ឋាន​នោះ​ផង ហើយ​និង​ផល​ប្រយោជន៍​របស់​ប្រទេស​ជាតិ​ទាំង​មូល»

ការ​ចងក្រង​អ្នក​ជីក​មាស​ខុស​ច្បាប់​ជា​សហគមន៍​នេះ ត្រូវ​បាន លោក ហែម ស៊ីណាក់ អភិបាល​រង​ស្រុក​ភ្នំព្រឹក ឲ្យ​ដឹង​ថា បាន​ស្នើសុំ​អាជ្ញាប័ណ្ណ​ជា ពីរ​ផ្នែក គឺ​ទី​១ សហគមន៍​អណ្ដូង​រ៉ែ​មាស​បក គឺ​មាន ២៧​គ្រួសារ និង​ទី​២ សហគមន៍​អណ្ដូង​រ៉ែ​មាស​ក្រោម​ដី គឺ​មាន ២៣​គ្រួសារ។ លោក​ថា បច្ចុប្បន្ន​កំពុង​ស្រង់​ស្ថិតិ​បន្ត​ទៀត ដើម្បី​ស្នើសុំ​អាជីវកម្ម​សិប្បកម្ម​រ៉ែ​មាស​មាន​ចំនួន​ជាក់លាក់៖ «សហគមន៍​ដែល​ត្រូវ​កើត​មាន​នេះ ទីតាំង​នៅ​ឃុំ​ភ្នំព្រឹក ទៅ​ដល់​ឃុំ​បារាំងធ្លាក់ ហើយ​ឃុំ​អូររំដួល។ នៅ​ឃុំ​អូររំដួល មាន​មួយ​ចំណែក​តូច​នៅ​ផ្នែក​ខាង​ក្រោម​ភ្នំ»

បន្ថែម​លើ​នោះ ប្រធាន​ស្ដីទី​មន្ទីរ​រ៉ែ និង​ថាមពល ខេត្ត​បាត់ដំបង លោក អៀម មាឃ ឲ្យ​ដឹង​ថា កំពុង​រង់ចាំ​របាយការណ៍​បញ្ជូន​ចំនួន​គ្រួសារ​ពី​អាជ្ញាធរ​ស្រុក​ភ្នំព្រឹក ហើយ​ក៏​រង់ចាំ​លក្ខន្តិកៈ​ពី​ក្រសួង​រ៉ែ និង​ថាមពល ដើម្បី​ពន្យល់​ពលរដ្ឋ​ជាក់លាក់​ពី​ការ​ប្រើប្រាស់​អាជ្ញាប័ណ្ណ ដោយ​អាជ្ញាប័ណ្ណ​រ៉ែ​មាស​បក គឺ​ឲ្យ​ជីក​ដី​ជម្រៅ ៥​ម៉ែត្រ ឯ​អាជ្ញាប័ណ្ណ​រ៉ែ​មាស​ក្រោម​ដី គឺ​ឲ្យ​ជីក​ជម្រៅ​មិន​លើស ២០​ម៉ែត្រ​ជាដើម៖ «ឲ្យ​ប្រមូល​បាន​ប៉ុន្មាន​ហើយ​អី​ហើយ អ៊ីចឹង​គាត់​ថា​រង់ចាំ​គំរូ​ខាង​ក្រសួង ក្រសួង​គាត់​រវល់​រហូត​នោះ អ៊ីចឹង​គាត់​អត់​បាន​ផ្ញើ​អា​គំរូ​ហ្នឹង​មក​ទេ»

ដូច​គ្នា​ដែរ ប្រធាន​មន្ទីរ​រ៉ែ និង​ថាមពល ខេត្ត​ព្រះវិហារ លោក គង់ មករា ថ្លែង​ថា បាន​ចែក​ជូន​ពាក្យ​សុំ​អាជ្ញាប័ណ្ណ​ដល់​ពលរដ្ឋ​ដែល​មាន​បំណង​ជីក​មាស​នៅ​តំបន់​រំដេង ក្នុង​ស្រុក​រវៀង ឲ្យ​បង្កើត​ជា​សហគមន៍ ដើម្បី​ទទួល​បាន​អាជ្ញាប័ណ្ណ​សិប្បកម្ម​រ៉ែ​មាស​ស្រប​ច្បាប់៖ «ប៉ុន្តែ​បញ្ហា​ដែល​យើង​កំពុង​តែ​ប្រឈម គឺ​ថា ម្ចាស់​ដី​មួយៗ​គាត់​អត់​ទាន់​មាន​ដី​កម្មសិទ្ធិ​ស្រប​ច្បាប់ គាត់​មាន​តែ​កាន់​កាប់​លើ​ដី​ហ្នឹង​បណ្ដោះអាសន្ន។ បញ្ហា​នេះ យើង​ជំរុញ​ថា បើ​សិន​ជា​គាត់​ដាក់​ពាក្យ​សុំ ឲ្យ​គាត់​មាន​ប័ណ្ណ​កាន់​កាប់​ដីធ្លី​ហ្នឹង​ឲ្យ​ស្រប​ច្បាប់​ត្រឹមត្រូវ ហើយ​ឲ្យ​គាត់​ផ្អាក​ជីក​ជា​បណ្ដោះអាសន្ន ដើម្បី​ដាក់​ពាក្យ​សុំ​មក សុំ​មក​ក្រសួង គឺ​ក្រសួង​នេះ​អនុញ្ញាត​ចេញ​អាជ្ញាប័ណ្ណ​ឲ្យ​គាត់​ស្រប​តាម​ច្បាប់»

រដ្ឋលេខាធិការ​ក្រសួង​រ៉ែ និង​ថាមពល លោក ម៉េង សក្តិធារ៉ា ឲ្យ​ដឹង​ថា អាជ្ញាប័ណ្ណ​សិប្បកម្ម​រ៉ែ​ដែល​ក្រសួង​នេះ​បាន​ចេញ គឺ​មាន​ជាង ៥០​អាជ្ញាប័ណ្ណ​ហើយ​ក្នុង​ឆ្នាំ​២០១៥ នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល