មន្ត្រី​សង្គមស៊ីវិល​បារម្ភ​ពី​ការ​គ្រប់គ្រង​រ៉ែមាស​គ្មាន​តម្លាភាព​ ខណៈ​រដ្ឋាភិបាល​​ពង្រីក​​កន្លែង​​ជីក​​រ៉ែមាស​​បន្ថែម​

ដោយ ខែ សុណង
2022.03.31
Share on WhatsApp
Share on WhatsApp
មន្ត្រី​សង្គមស៊ីវិល​បារម្ភ​ពី​ការ​គ្រប់គ្រង​រ៉ែមាស​គ្មាន​តម្លាភាព​ ខណៈ​រដ្ឋាភិបាល​​ពង្រីក​​កន្លែង​​ជីក​​រ៉ែមាស​​បន្ថែម​ លោក​ ហ៊ុន សែន សម្ពោធដាក់​ឲ្យ​ប្រើប្រាស់ ស្ពាន​អាកាស និង​ផ្លូវ​ក្រោមដីចោមចៅ នាព្រឹកថ្ងៃទី៣១ ខែមីនា ឆ្នាំ២០២២។
រូប៖ ហ្វេសប៊ុក SMP

មន្រ្តី​សង្គមស៊ីវិល​ និង​អ្នក​ធ្វើការងារ​ផ្នែក​បរិស្ថាន​ លើកឡើងថា​ ការ​ធ្វើ​អាជីវកម្ម​​រ៉ែ​មាស​ គឺ​ជា​ផ្នែកមួយ​ជួយ​ជំរុញ​កំណើន​សេដ្ឋកិច្ច​កម្ពុជា​ ប៉ុន្តែ​ ពួក​គេ​បារម្ភ​ថា​​​បើ​ការ​គ្រប់គ្រង​ខ្វះ​តម្លាភាព​ និង​​មិន​បាន​គិតគូរ​ពី​ផល​ប៉ះពាល់​បរិស្ថាននោះទេ អាជីវកម្មមួយ​នេះ​ នឹងបង្កផល​ប៉ះពាល់​ដល់សុខភាព​ពលរដ្ឋ​ និងបរិស្ថាន​​​។​ ការ​លើកឡើង​បែប​នេះ​ ​គឺក្រោយ​ពីលោក​នាយករដ្ឋមន្ត្រី​ ហ៊ុន សែន អះអាង​​ថា កម្ពុជា​កំពុង​កាក់កប​នឹង​អាជីវកម្ម​រែ់មាស​ និងកំពុង​ពង្រីក​​កន្លែង​ជីក​រ៉ែ​មាស​បន្ថែម​ទៀត​។​

មន្រ្តី​សង្គមស៊ីវិល​ និង​អ្នក​ធ្វើការងារ​ផ្នែក​បរិស្ថាន សង្កេត​​ឃើញ​ថា​ រដ្ឋាភិបាល​ មិន​ទាន់​បាន​បង្ហាញ​ព័ត៌មាន​ពេញ​លេញ​ជុំវិញ​ការ​យក​ថវិកា​ពី​អាជីវកម្ម​រ៉ែ​មាស​ ទៅ​ធ្វើ​អ្វី​ ដើម្បី​បម្រើ​ប្រយោជន៍​សង្គមជាតិ និង​ពលរដ្ឋ​នៅឡើយ​ទេ​។​ ពួកគេ​ក៏មិន​ទាន់​ឃើញ​មាន​ការ​បង្ហាញ​ដែរ​ថា​ អាជីវកម្ម​នេះ​បង្ក​ផល​ប៉ះពាល់​ដល់​ពលរដ្ឋ​ និង​បរិស្ថាន​នៅ​តំបន់​ជុំវិញ​កន្លែង​ធ្វើ​អាជីវកម្ម​នេះបែបណាដែរ​។​

នាយកប្រតិបតត្តិ​នៃ​អង្គការតម្លាភាពកម្ពុជាលោក ប៉ិច ពិសី​​ ​សង្ឃឹម​​ថា ​​ចំណូល​ដែល​ទទួល​បាន​ពី​អាជីវកម្ម​រ៉ែ​មាស​​អាចក្លាយ​ជា​ប្រភព​ចំណូល​ថ្មី​បន្ថែម​ ពី​ការ​ប្រមូល​​ពន្ធ​ និង​ការ​វិនិយោគ​ផ្សេងៗ​ទៀត​របស់កម្ពុជា។​ លោក​​ចង់​ឃើញ​រដ្ឋាភិបាល​​​គ្រប់គ្រង​ចំណូល​បាន​ពី​អាជីវកម្ម​រ៉ែ​មាស​នេះ​ ប្រកប​ដោយ​ប្រសិទ្ធភាព គណនេយ្យ​ភាព​​ ហើយ​ត្រូវ​ធានា​ចំណូល​នេះ​យក​ទៅ​ប្រើប្រាស់​សម្រាប់​ការ​វិនិយោគ​សង្គម​។​ មន្រ្តី​សង្គម​ស៊ីវិល​រូប​នេះ​បន្ត​ថា​ ប្រសិន​ការ គ្រប់គ្រង​ធនធាន​រ៉ែ​នេះ​មិន​បានត្រឹមត្រូវ​ គឺមិន​លុប​បំបាត់​ភាព​ក្រីក្របានឡើយ​ ប៉ុន្តែ​អាច​បង្ក​គ្រោះថ្នាក់​ដល់​សង្គម​ជាតិ​ទៅវិញ៖ «អាច​ធ្វើ​ឲ្យ​ពលរដ្ឋ​មាន​បញ្ហា​សុខភាព​ជា​ដើម​ ការ​កាប់​ព្រៃឈើ​​នៅជុំវិញ​ ការ​បំផ្លាញ​សត្វព្រៃនៅ​តំបន់​ហ្នឹង​ការ​ប៉ះពាល់​គុណភាព​ទឹក​ជា​ដើម​ និង​ការ​បំផ្លាញ​បរិស្ថាន​នៅ​តំបន់​ហ្នឹង​ជា​ដើម​ ហើយ​ជា​ពិសេស​បើ​មិនមាន​ការ​គ្រប់គ្រង​ជាក់លាក់​ទេ​ នឹង​​ប៉ះពាល់​ជីវភាព និង​សេដ្ឋកិច្ច​សង្គម​ពលរដ្ឋ​នៅ​តំបន់​នោះ​​ជាពិសេស​គឺ​ជនជាតិ​ដើម​ភាគ​តិច​»

ស្រដៀង​គ្នា​នេះ​ដែរ​ សកម្មជន​បរិស្ថាន​​ដែល​ធ្លាប់​ជាប់​ពន្ធនាគារ​ព្រោះ​បុព្វហេតុ​ការពារ​​ធនធាន​ធម្មជាតិ កញ្ញា ភួន កែវរស្មី​ ឲ្យ​វិទ្យុ​អាស៊ីសេរី​ដឹង​ថា​ កញ្ញា​មិន​ទាន់​ឃើញ​រដ្ឋាភិបាល​ បង្ហាញ​ពី​ផល​ប៉ះពាល់​បរិស្ថាន​ នៃ​អាជីវកម្ម​នេះ​នោះ​ទេ​។​ កញ្ញា​បន្ត​ទៀត​ មុន​ ​​ពង្រីក​អាជីវកម្ម​នេះ​ទៅ​តំបន់​ផ្សេង​ រដ្ឋាភិបាលគួរ ​​បង្ហាញ​ព័ត៌មាន​ឲ្យ​ពលរដ្ឋ​ឬ​សាធារណជន​បាន​ដឹង​ដោយ​តម្លាភាព​។​ កញ្ញា​រំលឹក​ថា​ ធនធានទាំងនេះ​​មិនមែន​ជា​របស់​រដ្ឋាភិបាល​ផ្ដាច់​មុខ​ឡើយ​ ដូច្នេះ​ពលរដ្ឋ​មាន​សិទ្ធិ​ដឹង​ពី​គម្រោង​វិនិយោគ​ទាំង​នេះ​៖«​សង្ឃឹម​ថា ពួក​គាត់​(រដ្ឋាភិបាល)​ នឹង​ចាប់​ផ្ដើម​គិតគូរ​ឡើង​វិញ​​បើសិន​ចង់​ពង្រីក​ថ្មី ពង្រីក​ប៉ុណ្ណា​ កំណត់​ឲ្យ​ច្បាស់លាស់​ ក៏​ដូច​ជា​វាយ​តម្លៃ​ផល​បរិស្ថាន ហើយ​លើក​ជជែក​ជា​សាធារណៈ»

ក្រុមមន្ត្រីសង្គមស៊ីវិល និង​​អ្នក​ធ្វើ​ការងារ​ផ្នែក​បរិស្ថាន​លើកឡើង​បែប​នេះ​ ក្រោយ​ពេល​លោក​នាយករដ្ឋមន្ត្រី​ ហ៊ុន​ សែន​​អះអាង​ថា​​ កម្ពុជា​កំពុង​កាក់កប​នឹង​របរ​រ៉ែ​មាស។​ លោក​ឲ្យ​ដឹង​ទៀតថា ត្រឹម​រយៈ​ពេល​៩​ខែ​​​​ដំបូង​នៃការធ្វើ​​អាជីវកម្ម​រ៉ែ​មាស​ នៅ​តំបន់​អូរខ្វាវ​ ខេត្ត​មណ្ឌលគិរី​ កម្ពុជាអាចផលិត​មាស​​ជាង​ពីរ​ពាន់​គីឡូក្រាម​(.២៧៥)ក្នុង​នោះ​អាចចម្រាញ់​មាស​សុទ្ធ​បាន​ជាង​ពីរ​តោន ហើយ​សល់​ពី​នេះ​អាច​ផលិត​ជា​ប្រាក់​ និង​លង្ហិន​ជា​ដើម​​​។ ​លោក​បន្ត​ថា​ ពេល​នេះ​ ​​កំពុង​មាន​ការ​រុករក​រ៉ែ​មាសនៅ​​តំបន់​ផ្សេង​ ដើម្បី​ទាញ​ធនធាន​ទាំង​នេះ​យកមក​បំពេញ​តម្រូវ​ការ​​របស់​ប្រទេស​ជាតិ៖ «​ប្រាំបួន​ខែ​យើង​ផលិត​មាស​ បាន​២.២៧៥​គីឡូ​ វា​ទៅ​ជា​កាក់កប​អានេះ​ទៅ​វិញ គ្រាន់​តែ​គិត​មួយ​កន្លែង​ទេ​ នៅ​មិន​ទាន់​គិត​នៅ​កន្លែង​ផ្សេង​​ដទៃ​ទៀត​ អញ្ចឹង​ យើង​ក៏​ចាប់​ផ្ដើម​ប្រើប្រាស់​នូវ​ធនធាន​ធម្មជាតិ​របស់​យើង​​មួយ​ចំណែក​ ​​ដែល​យើង​បាន​កំពុង​រុករក​​»

លោក​ ហ៊ុន សែន ថ្លែងដូច្នេះ​​ក្នុងពិធី​ដាក់​ឲ្យ​ប្រើប្រាស់ ស្ពាន​អាកាស និង​ផ្លូវ​ក្រោមដីចោមចៅ នាព្រឹកថ្ងៃទី៣១ ខែមីនា។ លោក ហ៊ុន សែន ​ ក៏​ទទួល​ស្គាល់ដែរថា​​ រដ្ឋាភិបាល​ គ្រប់គ្រង​ចំណូល​នៃ​ការ​បូម​ប្រេង​មិន​បាន​ល្អ​ ​ហើយ​ប្រេង​ដែល​បូម​បាន​ហើយ​ក៏​ត្រូវ​គេ​លួច​​ដឹក​ចេញ​ពី​កម្ពុជា​ថែម​ទៀត​ផង​។

អគ្គនាយក នៃ​អគ្គនាយកដ្ឋាន​ទ្រព្យសម្បត្តិរដ្ឋ និង​ចំណូល​មិនមែន​សារពើពន្ធ​ នៃ​ក្រសួង​សេដ្ឋកិច្ច​លោក នេត មុន្នី ​ឲ្យ​ប្រព័ន្ធ​ឃោសនា​លោក​ ហ៊ុន សែន ដឹងថា ពេលនេះ​មាន​ក្រុមហ៊ុន​​ធ្វើ​អាជីវកម្ម​រ៉ែមាស​ចំនួន៧ហើយបាន​ទទួល​អាជ្ញាប័ណ្ណ​​ពី​រដ្ឋ។​ ​​

ទោះជាយ៉ាងណា មន្ត្រី​សម្របសម្រួល​គម្រោង​ការ​ផ្តល់​សិទ្ធិ​អំណាច​ដល់​យុវជន​ និង​អ្នក​តស៊ូមតិ​ ដើម្បី​យុត្តិធម៌​សង្គម​ និង​បរិស្ថាន​នៃ​សមាគម​បណ្ដាញ​យុវជន​កម្ពុជា​ (CYN) លោក​ ម៉ើ ចាន់ដារ៉ា​​ ​យល់​ថា នៅ​ពេល​​ផ្ដល់​អាជ្ញាបណ្ណធ្វើ​អាជីវកម្ម​នេះ​ទៅ​ឱ្យក្រុមហ៊ុន​ណាមួយ រដ្ឋាភិបាល​​គួរ​ផ្សព្វផ្សាយ​ឲ្យ​ទូលំទូលាយ​ ព្រោះ​លោក​សង្កេត​ឃើញ​មាន​ក្រុម​ឈ្មួញ​ខ្លះ​​​បាន​រុករក​រ៉ែមាស ដោយ​អនាធិបតេយ្យ​​​នៅ​ខេត្ត​​មណ្ឌលគិរី​ ​និង​តំបន់​មួយ​ចំនួន​ទៀត​។​ លោកថា ​ប្រជា​ពលរដ្ឋ​ខ្មែរសុទ្ធ​តែ​ចង់​ដឹង​ថា តើរដ្ឋាភិបាល​​យក​ថវិកា​ដែល​បាន​អាជីវកម្ម​រ៉ែ​មាស​​នេះ​​​ធ្វើ​អ្វី​ខ្លះ​ និង​មាន​តម្លាភាព​ដែរ​ឬ​ទេ?​​ «​ខ្ញុំ​ចង់​មើល​ឃើញ​ថ្នាក់​នាំ​បើក​ទូលាយ​ការ​សម្រេច​ចិត្ត​ពេល​មាន​គម្រោង​អភិវឌ្ឍន៍​ ផ្សេងៗ​ចូល​មក​ក្រុមប្រឹក្សាអភិវឌ្ឍន៍​ជាតិ​គួរ​តែ​មាន​ការ​បែងចែក​ឬ​ក៏​ចែក​រំលែក​ព័ត៌មាន​ទៅ​ដល់​សាធារណជន​ក៏​ដូច​អ្នក​ធ្វើ​ការពារ​ពាក់ព័ន្ធ​ឲ្យ​បាន​​​ទូលាយ​ជាង​នេះ​ជាពិសេស​គឺ​ការ​ផ្ដល់​អាជ្ញាប័ណ្ណ​តែ​ម្ដង​​»

មន្រ្តី​សង្គមស៊ីវិល​ និង​អ្នក​ធ្វើការងារ​ផ្នែក​បរិស្ថាន​ បារម្ភថា​ បើ​រដ្ឋាភិបាល​គ្រប់គ្រង​ការ​ធ្វើ​អាជីវកម្ម​រ៉ែ​មាស​មិន​បាន​ល្អ​ ​នឹង​ធ្វើ​រដ្ឋ​បាត់​ចំណូល​ ចំណែក​​ធនធាន​ធម្មជាតិ​ក៏ត្រូវ​បំផ្លាញ​ ដែល​អាច​ធ្វើ​អាជីវកម្មមួយនេះ ​ជួប​ហានិភ័យ​​ដូច​ការ​បូម​ប្រេង​ដែរ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។