អ្នកជំនាញនៅតែលើកឡើងថា ការលុបបឹងជាមូលហេតុចំបង ធ្វើឲ្យភ្នំពេញលិចលង់ដោយភ្លៀងធ្លាក់ និងជំនន់ពីទឹកស្ទឹងព្រែកត្នោតម្ដងៗ។ ប្រតិកម្មបែបនេះ ធ្វើឡើងក្រោយពេលលោកនាយករដ្ឋមន្ត្រី ហ៊ុន សែន នៅថ្លែងដដែលថា ការលុបបឹងមិនប៉ះពាល់ដល់រឿងទឹកលេចភ្នំពេញទេ។
ក្រុមអ្នកជំនាញនៅតែជំរុញឲ្យរដ្ឋាភិបាល ឬសាលារាជធានីភ្នំពេញគិតគូរលើប្រព័ន្ធរំដោះ ខណៈដែលមានទឹកមានភ្លៀងធំម្ដងៗ ភ្នំពេញតែងរងការលិចលង់ខ្លាំង។
អ្នកជំនាញផ្នែកកសិកម្ម និងធនធានទឹក បណ្ឌិត យ៉ង សាំងកុមារ លើកឡើងថា ភូមិសាស្ត្ររាជធានីភ្នំពេញ ត្រូវការចាំបាច់ឲ្យប្រព័ន្ធស្តុកទឹក និងរំដោះទឹកត្រឹមត្រូវទើបអាចបញ្ជៀសការលិចលង់។ លោកថា នៅរយៈពេលចុងក្រោយនេះ បែរជាមានការអភិវឌ្ឍដោយជ្រើសរើសការលុបបឹង ដែលបញ្ហានេះធ្វើឲ្យទឹកនៅចាល់មិនងាយស្រកចុះ៖ «កុំចេះតែនិយាយថា ទឹកលិចដោយសារភ្លៀងមកច្រើនភ្លៀងមកពីលើមកខ្លាំងអត់ចេះទេ ប៉ុន្តែហេតុអីភ្លៀងមកខ្លាំងលេច ? ហើយរកដំណោះស្រាយកុំឲ្យលិចយើងត្រូវវរកដំណោះស្រាយទៅបន្ទោសទឹកវិញទឹកវាដឹងអីវា»។
ស្រដៀងគ្នានេះដែរ អ្នកជំនាញអភិបាលកិច្ចទឹកលោក ហែម ឧត្តម លើកឡើងដែរថា រាជធានីភ្នំពេញ ត្រូវការបឹងដែលជាកន្លែងស្ដុកទឹកពេលមានជំនន់ម្ដងៗ ប៉ុន្តែ លោកថា នៅរយៈពេលចុងក្រោយ ការលុបបឹងនៅបន្តកើតឡើង ជាពិសេស ការលុបផ្នែកខ្លះនៃបឹងតាមោក ដែលជាបឹងធំចុងក្រោយរបស់ភ្នំពេញ។ លោករិះគន់ថា ការអន្តរាគមន៍របស់អាជ្ញាធរពេលមានទឹកលិចក្រុងម្ដងៗ មិនមែនជាដំណោះស្រាយល្អនោះទេ។ អ្នកជំនាញផ្នែកទឹករូបនេះ ចង់ឃើញការអភិវឌ្ឍន៍រាជធានីភ្នំពេញធ្វើឡើងតាមផែនការមេត្រឹមត្រូវ និងគិតគូរពីផលប៉ះពាល់ដល់បរិស្ថាន៖ «យើងអត់អាចចេះតែដោះស្រាយបញ្ហានៅពេលបញ្ហាកើតឡើងយើងត្រូវគិតទុកមុនយើងទុកសម្រាប់ឆ្នាំក្រោយ ឬ ១០ឆ្នាំមុនយើងបានគិតទុកអីខ្លះ ?»។
ប្រតិកម្មរបស់អ្នកធ្វើការងារផ្នែកធនធាទឹក និងកសិកម្មពេលនេះកើតឡើងក្រោយពេលលោកនាយករដ្ឋមន្ត្រី ហ៊ុន សែន កាលពីថ្ងៃទី៨ ខែវិច្ឆិកា ដោយនិយាយថា លោកស្អប់អ្នកណាដែលជេរលោករឿងលុបបឹង។ លោកពន្យល់ថា ជំនន់លេចក្រុងបែបនេះព្រោះទឹកធ្លាក់ពីលើមកខ្លាំងទើបប្រព័ន្ធ លូ បឹង ព្រែក មិនអាចទប់ឈ្នះ។ លោកចោទប្រកាន់អ្នករិះគន់រឿងទឹកជំនន់នេះកើតចេញពីការច្រណែនពេលឃើញទីក្រុងភ្នំពេញមានការអភិវឌ្ឍ៖ «ខ្ញុំស្អប់បំផុត ស្អប់ពេលទឹកជំនន់ម្ដងៗ ជេរនោះជេរជេរថា ឯងលុបបឹង ស្គាល់ទេ ពាក្យថា ជំនន់? អាហ្នឹងមកពីអី? មកអាពីលើមកខ្លាំង អាក្រោមដោះមិនរួច ហើយបន្តិចដៀមដាមឲ្យអភិបាលរាជធានីភ្នំពេញ ហើយថា គ្រាន់តែទឹកភ្លៀងបន្តិចលិចក្រុងដែរ»។
ទោះបីយ៉ាងណា បណ្ឌិត យ៉ង សំាំងកុមារ លើកឡើងទៀតថា ជំនន់ទឹកភ្លៀងដែលធ្វើឲ្យលិចលង់រាជធានីភ្នំពេញជាប់ទាក់ទងករណីសំខាន់ៗ ពីរ គឺទឹកភ្លៀង និងជំនន់មកស្ទឹងព្រែកត្នោត។ បណ្ឌិត យ៉ង សាំងកុមារ យល់ថា ដើម្បីដោះស្រាយបញ្ហានេះត្រូវបើកផ្លូវទឹកខាងក្រោមនៃភូមិសាស្ត្រនៅរាជធានីភ្នំពេញដូចធ្វើអាងស្តុបទឹក ស្ដារស្ទឹង ប្រឡាយ និងដាំដើមឡើងវិញ។ លោកបន្តទៀតថា ចំពោះតំបន់ជាប់ស្ទឹងព្រែកត្នោតដូចជា នៅភូមិសាស្ត្រខេត្តកំពង់ស្ពឺ ខេត្តកណ្ដាល និងនៅខណ្ឌដង្កោ ត្រូវបន្តសាងសង់ទំនប់ថែមទៀត ដើម្បីទប់ទឹក និងបញ្ជៀសខ្សែទឹកហូរ៖ «នៅកំពង់ស្ពឺម្ដុំសំរោងទងអី គេអាចធ្វើជាទំនប់ដើម្បីពង្វាងទឹក ទំនប់ប្រឡាយអាងស្តុកទឹកខាងលើហ្នឹង យើងធ្វើខាងលើជួយកាត់បន្ថយកុំហូរមកខ្លាំងគួបផ្សំនឹងដាំដើមឈើឡើងវិញ។ បើខាងភ្នំពេញបើកយ៉ាងម៉េចឲ្យហូរចូលទន្លេបាសាក់ ព្រោះទឹកហូរចូលទន្លេបាសាក់បើកធំឲ្យវាទូលាយឲ្យវាច្រើនអីទៅ ហើយបឹងនៅសេសសល់ឈប់លុបទៅបានហើយ ប៉ុណ្ណឹង»។
ស្រដៀងគ្នានេះដែរ អ្នកវិភាគនយោបាយលោក គឹម សុខ សរសេរលើហ្វេសប៊ុកថា បញ្ហាទឹកលិចក្រុង ធ្វើឲ្យរដ្ឋចំណាយលុយរាប់រយលានដុល្លារក្នុងមួយឆ្នាំៗ ដើម្បីសាងសង់ហេដ្ឋារចនាសម្ព័ន្ធឡើងវិញ និងធ្វើឲ្យរដ្ឋត្រូវបង្កើនកម្ចីពីបរទេសថែមទៀតយកមកជួសជុលហេដ្ឋារចនាសម្ព័ន្ធដែលធ្វើឱ្យបំណុលជាតិកើនឡើង។ ចំណែកពលរដ្ឋកាន់តែកើនបំណុលវ័ណ្ឌក និងលិចលង់ផ្ទះសំបែងខាតបង់ទ្រព្យ និងពេលវេលា។ លោកបន្តទៀតថា អ្នកដែលចំណេញពីការលុបបឹងគឺក្រុមគ្រួសារលោក ហ៊ុន សែន ពួកឧកញ៉ា និងមន្ត្រី ដែលស្និទ្ធនឹងលោក ហ៊ុន សែន។
រយៈពេលប៉ុន្មានឆ្នាំចុងក្រោយនេះ រដ្ឋាភិបាលសម្រុកបើកឲ្យក្រុមហ៊ុនឯកជន វិនិយោគលុបបឹងធម្មជាតិជាច្រើនកន្លែង រួមមាន បឹងទំពុន និងបឹងជើងឯកជាដើម ដែលបឹងទាំងនេះ ធ្លាប់ជាកន្លែងស្តុកទឹក និងរំដោះទឹកដ៏សំខាន់នាពេលកន្លងមក។
ករណីនេះពេលមានភ្លៀងម្ដងៗ ឬជំនន់ស្ទឹងព្រែកត្នោត បង្កឲ្យមានការជន់លិច និងប៉ះពាល់ហេដ្ឋារចនាសម្ព័ន្ធ ទ្រព្យសម្បត្តិ ផ្ទះសម្បែង ផលដំណាំ និងសត្វចិញ្ចឹមរបស់ពលរដ្ឋ។
ថ្មីៗ នេះ ជំនន់ស្ទឹងព្រែកត្នោត បណ្ដាលឲ្យពលរដ្ឋជាង ៣ពាន់គ្រួសារបានរងផលប៉ះពាល់ ក្នុងនោះមានពលរដ្ឋរស់នៅខេត្តកណ្ដាលជាង ១.៤០០គ្រួសារ និងរាជធានីភ្នំពេញជាង ១.៦០០គ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។