សហគមន៍​ព្រៃឡង់​ស្នើ​ឲ្យ​អាជ្ញាធរ​ថ្នាក់​ជាតិ​ចុះ​ទប់ស្កាត់​បទល្មើស​និង​ចាប់ខ្លួន​ជន​ប្រព្រឹត្ត​ដូច​ខេត្ត​ដទៃ

ដោយ មាន ឫទ្ធិ
2024.03.27
សហគមន៍​ព្រៃឡង់​ស្នើ​ឲ្យ​អាជ្ញាធរ​ថ្នាក់​ជាតិ​ចុះ​ទប់ស្កាត់​បទល្មើស​និង​ចាប់ខ្លួន​ជន​ប្រព្រឹត្ត​ដូច​ខេត្ត​ដទៃ បណ្ដាញសហគមន៍ព្រៃឡង់ ខេត្ដកំពង់ធំ សហការជាមួយសហគមន៍ព្រៃឈើអូរដាស់ស្គរ បានចុះឃ្លាំមើល និងតាមដានបទល្មើសព្រៃឈើ ស្ថិតក្នុង ភូមិសំអោង ឃុំមានរិទ្ធិ ស្រុកសណ្តាន់ ខេត្តកំពង់ធំ កាលពីខែកុម្ភៈ ឆ្នាំ២០២៤។
Photo Courtesy of Prey Lang - It's Our Forest Too

បណ្ដាញ​សហគមន៍​ព្រៃឡង់ ជំរុញ​ឲ្យ​អាជ្ញាធរ​ថ្នាក់​ជាតិ​ចុះ​ទប់ស្កាត់​បទល្មើស និង​ស្វែងរក​ចាប់ខ្លួន​ជន​ដែល​កាប់​បំផ្លាញ​នៅក្នុង​តំបន់​ព្រៃ​ឡង់ ឱ្យ​បាន​ទាន់​ពេល​វេលា​ដើម្បី​ការពារ​ព្រៃឈើ​ក្នុង​តំបន់​នោះ​វិនាស​ហិនហោច ។ អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស​ប្រាប់​ឲ្យ​សហគមន៍​រាយការណ៍​និង​ប្ដឹង​ទៅ​អាជ្ញាធរ​ថ្នាក់​ខេត្ត​ដើម្បី​អន្តរាគមន៍។

បណ្ដាញ​សហគមន៍​ព្រៃ​ឡង់​ខេត្តព្រះវិហារ លោក ខេម សុឃី ប្រាប់​វិទ្យុ​អាស៊ីសេរី នៅ​ថ្ងៃទី​២៤ ខែ​មីនា ថា បទល្មើស​ព្រៃឈើ​និង​ការ​កាប់​ទន្ទ្រាន​នៅក្នុង​តំបន់​ព្រៃ​ឡង់​កំពុង​កើតមានឡើង ហើយ​មិនទាន់​ឃើញ​អាជ្ញាធរ​ខេត្ត​ចុះ​បង្ក្រាប ឬ​ទប់ស្កាត់​នោះ​ទេ​។ លោក​បន្ថែម​ថា អាជ្ញាធរ​ថ្នាក់​ជាតិ​ត្រូវតែ​សិក្សា​ស្រាវជ្រាវ ស្វែងរក​ជនល្មើស និង​អ្នក​ដែល​ជាប់​ពាក់ព័ន្ធ ដែល​បណ្ដែតបណ្ដោយ​ឲ្យ​មានការ​កាប់​ឈើ​ធ្វើ​អាជីវកម្ម និង​ការ​កាប់​ទន្ទ្រាន​ដី​ព្រៃ​នៅក្នុង​តំបន់​ការពារ ជាពិសេស​កន្លែង​កាប់​ទន្ទ្រាន​ក្បែរ​ទីស្នាក់ការ​របស់​មន្ត្រី​បរិស្ថាន​មក​ផ្ដន្ទាទោស។

ជុំវិញ​រឿង​នេះ អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស លោក អេង ហ៊ី បាន​ជំរុញ​ឲ្យ​សហគមន៍​ប្ដឹង​និង​រាយការណ៍​ទៅ​កងរាជអាវុធហត្ថ​ថ្នាក់​ខេត្ត និង​មន្ត្រី​ជំនាញ​នៅ​តំបន់​នោះ​វិញ ពីព្រោះ​កម្លាំង​គណៈកម្មាធិការ​ជាតិ ដើម្បី​ទប់ស្កាត់​និង​បង្ក្រាប​បទល្មើស​ធនធាន​ធម្មជាតិ​ទុក​សម្រាប់​តែ​ខេត្ត​ណា​ដែល​មិន​មាន​កម្លាំង​គ្រប់គ្រាន់​ក្នុង​ការ​បង្ក្រាប​តែប៉ុណ្ណោះ។

អស់​រយៈពេល​១១​ថ្ងៃ​ហើយ ដែល​អាជ្ញាធរ​ថ្នាក់​ជាតិ បាន​ចុះ​បង្ក្រាប​បទល្មើស​កាប់​ទន្ទ្រាន​ដី​ព្រៃ​ធ្វើជា​កម្មសិទ្ធិ រាប់ពាន់​ហិកតារ និង​ចាប់បាន​ជនល្មើស​ជា​បន្តបន្ទាប់ និង​បាន​បញ្ជូន​សំណុំ​រឿង​ទៅ​តុលាការ ដើម្បី​ចាត់វិធានការ​តាមច្បាប់ ក្នុង​នោះ​មាន​ខេត្ត​ពោធិ៍សាត់ ខេត្ត​មណ្ឌលគិរី និង​ខេត្ត​មួយ​ចំនួន​ទៀត។

អ្នកសម្របសម្រួល​បណ្ដា​ញ​សហគមន៍​ព្រៃឡង់ ខេត្តកំពង់ធំ លោក ហឿន សុភាព លើកឡើង​ថា កន្លង​ទៅ​បណ្ដាញ​សហគមន៍​ព្រៃឡង់ តែងតែ​រាយការណ៍​អំពី​បទល្មើស​ទៅ​អាជ្ញាធរ​ថ្នាក់​ខេត្ត​ជា​ហូរហែ ប៉ុន្តែ​ចំណាត់ការ​របស់​អាជ្ញាធរ​ថ្នាក់​ខេត្ត​នៅ​មិន​ទាន់​មាន​ប្រសិទ្ធភាព​នោះ​ទេ ដូច្នេះ​លោក​ទទូច​ទៅ​អាជ្ញាធរ​ថ្នាក់​ជាតិ ចុះ​បង្ក្រាប​និង​ចាត់វិធានការ​ឲ្យ​បាន​តឹងរ៉ឹង ចំពោះ​ជនល្មើស​ទាំងអស់ នោះ។ «»

កាល​ពី​ចុង​ខែ​មករា ឆ្នាំ​២០២៤ សហគមន៍​ព្រៃឡង់​បាន​ចេញ​របាយការណ៍​ឃ្លាំមើល​ព្រៃឈើ​លើក​ទី​៣ រក​ឃើញ​ថា តំបន់​អភិរក្ស​ព្រៃ​ឡង់ បន្ត​បាត់បង់​គម្រប​ព្រៃឈើ​ជិត​៩​ពាន់​(.៦០០) ហិកតារ​ក្នុង​ឆ្នាំ ២០២២ ដែល​បាន​ថយ ចុះ​ជាង ២,១​ភាគរយ បើ​ធៀប​នឹង​ឆ្នាំ​២០២១។

ទាក់ទង​នឹង​បញ្ហា​នេះ មន្ត្រី​សម្របសម្រួល​គម្រោង​នៃ​សមាគម​បណ្ដាញ​យុវជន​កម្ពុជា (CYN) លោក អូត ឡាទីន យល់​ឃើញ​ថា អាជ្ញាធរ​ថ្នាក់​ជាតិ​ត្រូវតែ​ចុះ​បង្ក្រាប​បទល្មើស​ទូទាំង​ប្រទេស និង​ស្វែងរក​ចាប់ខ្លួន​ជនល្មើស​និង​អ្នក​ជាប់​ពាក់ព័ន្ធ​យក​មក​ផ្ដន្ទាទោស​ឲ្យ​ខាន​តែ​បាន បើ​ពុំ​ដូច្នោះ​ទេ អាជ្ញាធរ​មិន​បាន​បង្ហាញ​ពី​ឆន្ទៈ​ពិតប្រាកដ​ក្នុង​ការ​ទប់ស្កាត់​បទល្មើស និង​ស្ដារ​ព្រៃឈើ​ឡើងវិញ​នោះ​ទេ ។ លើស​ពី​នោះ​លោក​ថា តំបន់​ព្រៃ​ឡង់​គឺជា​តំបន់​ការពារ​ដ៏​សំខាន់​ជាងគេ​នៅក្នុង​ប្រទេស​កម្ពុជា ហើយ​បើ​អាជ្ញាធរ​បណ្ដែតបណ្ដោយ​តទៅ​ទៀត តំបន់​ព្រៃ​ការពារ​មួយ​នេះ និង​វិនាស​ហិនហោច​ជាក់​ជា​មិនខាន។

ដែន​ជម្រក​សត្វព្រៃ​ព្រៃឡង់​មាន​ផ្ទៃដី​ជាង ៤​សែន (៤៨៩.៦៦៣) ហិកតារ គ្របដណ្ដប់​ក្នុងភូមិ​សាស្ត្រ​ខេត្ត​ចំនួន​៤ រួមមាន ខេត្តក្រចេះ ស្ទឹងត្រែង ព្រះវិហារ និង​ខេត្តកំពង់ធំ ត្រូវ​បាន​រដ្ឋាភិបាល បង្កើត​ជា​តំបន់​ដែនជម្រកសត្វព្រៃ​នៅក្នុង​ឆ្នាំ​២០១៦ ។ ប៉ុន្តែ​រយៈពេល​ជាង​៧​ឆ្នាំ​មកនេះ អង្គការ​ជាតិ​និង​អន្តរជាតិ បាន​ចេញ​របាយការណ៍​ជា​បន្តបន្ទាប់​ថា ដែន​ជម្រកសត្វព្រៃ​ព្រៃ​ឡង់​តែងតែ​រង​ការ​កាប់​ឈើ​ធ្វើ​អាជីវកម្ម និង​ការ​កាប់​ទន្ទ្រាន​ដី​ព្រៃ​យក​ធ្វើជា​កម្មសិទ្ធិ​ពី​សំណាក់​ក្រុម​ឈ្មួញ និង​ក្រុមហ៊ុន​ដី​សម្បទាន​សេដ្ឋកិច្ច​នៅ​ជុំវិញ​តំបន់​នោះ​យ៉ាង​អនាធិបតេយ្យ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។