សហគមន៍​ការពារ​ព្រៃ​ព្រះ​រកា​ថា អាជ្ញាធរ​ពាក់ព័ន្ធ​មិន​អើពើ​ការពារ​ព្រៃ​ព្រះ​រកា

ដោយ វ៉ែន សុមេធ
2020-01-13
អ៊ីម៉ែល
មតិ
Share
បោះពុម្ព
បណ្ដាញ​សហគមន៍​ព្រៃ​ព្រះ​រកា ធ្វើ​ពិធី​បំបួស​ព្រៃ​ឈើ ក្នុង​ព្រៃ​ព្រះ​រកា នៅ​ចំណុច​អូរ​ថ្ម​ជញ្ជាំង ស្រុក​ឆែប​ខេត្ត​ព្រះវិហារ នៅ​ថ្ងៃ​ទី១០ និង​ថ្ងៃ​ទី១១ ខែ​មករា ឆ្នាំ២០២០ ដែល​មាន​អ្នក​ចូល​រួម​ចំនួន ១៣២នាក់។
បណ្ដាញ​សហគមន៍​ព្រៃ​ព្រះ​រកា ធ្វើ​ពិធី​បំបួស​ព្រៃ​ឈើ ក្នុង​ព្រៃ​ព្រះ​រកា នៅ​ចំណុច​អូរ​ថ្ម​ជញ្ជាំង ស្រុក​ឆែប​ខេត្ត​ព្រះវិហារ នៅ​ថ្ងៃ​ទី១០ និង​ថ្ងៃ​ទី១១ ខែ​មករា ឆ្នាំ២០២០ ដែល​មាន​អ្នក​ចូល​រួម​ចំនួន ១៣២នាក់។
រូប៖ សហគមន៍

សហគមន៍​ការពារ​ព្រៃ​ព្រះ​រកា​ ខេត្ត​ព្រះវិហារ​សម្ដែង​ក្ដី​កង្វល់​យ៉ាង​ខ្លាំង​ ពី​អនាគត​ព្រៃ​ព្រះ​រកា​ ដែល​ជា​ប្រភព​សេដ្ឋកិច្ច​របស់​ជនជាតិ​ដើម​ភាគតិច​កួយ​ នៅតែ​ទទួលរង​ការ​កាប់​បំផ្លាញ​យក​ឈើ​ធំៗ​ និង​ដើមឈើ​ផលិត​ជ័រទឹក​របស់​អ្នកស្រុក​អស់​ជាបន្តបន្ទាប់។ សហគមន៍​ថា​ សមត្ថកិច្ច​មូលដ្ឋាន​ និង​មន្ត្រី​ជំនាញ​នៅ​មិន​ទាន់​មាន​ភាព​ច្បាស់លាស់​ ការពារ​ព្រៃ​នេះ​ឱ្យ​គង់វង្ស​នៅឡើយ​ទេ​។

សហគមន៍​ការពារ​ព្រៃ​ព្រះ​រកា​ រស់នៅ​ឃុំ​ពោធិ៍​ ស្រុក​ត្បែងមានជ័យ​ រិះគន់​ មន្ត្រី​ជំនាញ​ និង​សមត្ថកិច្ច​របស់​រដ្ឋាភិបាល​ថា​ នៅតែ​មិន​យកចិត្ត​ទុកដាក់​ បង្ក្រាប​បទល្មើស​ព្រៃឈើ​ និង​ជួញដូរ​ឈើ​ខុសច្បាប់​ ក្នុង​តំបន់​ព្រៃ​ព្រះ​រកា​នៅឡើយ​ទេ។ ពួកគេ​អះអាង​ថា​ ក្រុម​ជនល្មើស​នៅតែ​មានឱកាស​លួចចូល​អារ​ឈើ​ និង​ដឹកជញ្ជូន​ឈើ​តាម​គោយន្ត​ ចេញពី​ព្រៃ​ព្រះ​រកា​ស្ទើរ​រាល់​យប់ ​ដោយ​គ្មាន​ការ​អនុវត្ត​ច្បាប់​។

កាលពី​ពេល​ថ្មី​ៗ នេះ (ថ្ងៃ​ទី១១ និង ១២មករា) បណ្ដាញ​សហគមន៍​ព្រៃ​ព្រះ​រកា​ទាំង​បី​ស្រុក​គឺ​ ស្រុក​ត្បែង​មាន​ជ័យ​ ស្រុក​ឆែប​ និង​ស្រុក​ជាំ​ក្សាន្ត​ប្រមាណ​ជាង​ ១០០នាក់​ បាន​រួមគ្នា​ធ្វើ​បុណ្យ​រំឭក​គុណ​ព្រៃ​ព្រះ​រកា​ និង​បំបួស​ដើមឈើ​ ក្នុង​ព្រៃ​នេះ ក្នុង​បំណង​ទាញ​អារម្មណ៍​អាជ្ញាធរ​គ្រប់​លំដាប់​ថ្នាក់​ ឱ្យ​ចូលរួម​ការពារ​ព្រៃឈើ​តាម​គោលការណ៍​របស់​រដ្ឋាភិបាល​ និង​ចូលរួម​ទប់ស្កាត់​បទល្មើស​ព្រៃឈើ​ឱ្យ​មាន​ប្រសិទ្ធភាព។ វិធី​បុណ្យ​នេះ​ ក៏​មានការ​ចូលរួម​ពី​មន្ត្រី​បរិស្ថាន​ និង​មន្ត្រី​សង្គម​ស៊ីវិល​ផង​ដែរ។

សមាជិក​បណ្ដាញ​សហគមន៍​ព្រៃ​ព្រះ​រកា​ លោក ជីម ចៀន​ ឱ្យ​ដឹង​នៅ​ថ្ងៃ​ទី១៣ មករា​ថា ព្រៃ​ព្រះ​រកា​ នៅ​តែ​ប្រឈម​ការ​កាប់​យក​ឈើ​ធំៗ និង​ដើមឈើ​ផលិត​ជ័រទឹក​អស់​ជា​បន្ត​បន្ទាប់​ ពី​សំណាក់​ក្រុម​ជន​ល្មើស​នៅ​មូលដ្ឋាន​ និង​ពលរដ្ឋ​ចំណាកស្រុក។ លោក​ថា​ គ្រួសារ​លោក​មាន​ដើមឈើ​ផលិត​ជ័រទឹក​ជាង ១ពាន់​ដើម​ ត្រូវ​គេ​លួច​កាប់​អស់​ជាង ៣០០ដើម នៅ​ប៉ុន្មាន​ឆ្នាំ​ចុង​ក្រោយ​នេះ​ ហើយ​ថ្មីៗ នេះ​ ដើម​ច្បោះ​ជ័រ​របស់​ពួក​គេ​នៅ​តែ​ប្រឈម​ការបាត់បង់​អស់​ជា​បន្តបន្ទាប់។ លោក​ថា សហគមន៍​បាន​រួម​គ្នា​ធ្វើ​បុណ្យ​បំបួស​ដើម​ឈើ​ ក្នុង​ព្រៃ​ព្រះ​រកា​ ដើម្បី​ថែ​រក្សា​ និង​ការពារ​ដើម​ឈើ​ធំៗ ជាពិសេស ​ដើម​ច្បោះ​ជ័រ​របស់​អ្នក​ស្រុក​ ដែល​នៅ​សេសសល់​ចុង​ក្រោយ​ឱ្យ​គង់វង្ស៖ «»

សកម្មជន​បរិស្ថាន​ លោក យឹម សុភ័ក្ត្រ ដែល​ចុះ​សង្កេត​រឿង​នេះ មាន​កង្វល់​យ៉ាង​ខ្លាំង ដោយ​សារ​តែ​ឃើញ​ឈើ​ធំៗ នៅ​សល់​តែ​គល់​ រី​ឯ​ដើម​របស់​វា​ត្រូវ​បាន​គេ​អារ​ច្រៀក​ដឹកជញ្ជូន​យក​ទៅ​បាត់។ លោក​បញ្ជាក់​ថា បច្ចុប្បន្ន​សកម្មភាព​កាប់​ឈើ​ខុស​ច្បាប់​នៅ​តំបន់​ព្រៃ​ព្រះ​រកា បាន​ថយ​ចុះ​បន្តិច​ក្ដី ក៏​ប៉ុន្តែ​សកម្មភាព​លួច​កាប់​យក​ឈើ​ធំៗ នៅ​ពេល​យប់ និង​ដឹក​ជញ្ជូន​ចេញ​ក្រៅ នៅ​តែ​កើត​មាន​យ៉ាង​ហោច​ណាស់​មួយ​ថ្ងៃ​មិន​ក្រោម ១០គោយន្ត​ទេ៖ «»

ឆ្លើយ​តប​ការ​លើក​ឡើង​នេះ​ នាយក​ដែន​ជម្រក​សត្វ​ព្រៃ​ព្រះ​រកា លោក យ៉ាន់ ប៊ុនសឿន បដិសេធ​ថា​ បច្ចុប្បន្ន​នេះ​បទ​ល្មើស​ព្រៃឈើ​ក្នុង​ព្រៃ​ព្រះ​រកា​បាន​ថយ​ចុះ​ច្រើន​ ព្រោះ​សហគមន៍​ សមត្ថកិច្ច​ និង​មន្ត្រី​ជំនាញ​ បាន​សហការ​គ្នា​ចុះ​ល្បាត​ជា​បន្ត​ចាំ​ និង​ទប់​ស្កាត់​បទ​ល្មើស​ព្រៃឈើ​។ លោក​ថា​ កិច្ច​អភិរក្ស​ធនធាន​ធម្មជាតិ​ទាល់តែ​មានការ​ចូលរួម​ពី​សហគមន៍​មូលដ្ឋាន​ សមត្ថកិច្ច​ពាក់ព័ន្ធ​ និង​មន្ត្រី​ជំនាញ​ ទើប​ការ​អភិរក្ស​ព្រៃឈើ​មានប្រសិទ្ធភាព​។ លោក​បដិសេធ​មិន​បង្ហាញ​របាយការណ៍​ ឃាត់​ចាប់​បទ​ល្មើស​បាន​ប៉ុន្មាន​ករណី​នៅ​ឡើយ​ទេ​ នៅ​រយៈ​ពេល​ ១ឆ្នាំ​ចុងក្រោយ​នេះ៖ «»

មន្ត្រី​តស៊ូ​មតិ​នៃ​អង្គការ​ពន្លក​ខ្មែរ​ លោក​ ប៉ិក​ សោភ័ណ​ មាន​ប្រសាសន៍​ថា​ សហគមន៍​បាន​មូល​មតិ​គ្នា​ធ្វើ​បុណ្យ​បំបួស​ព្រៃ​ព្រះ​រកា​កាលពី​ពេល​ថ្មី​ៗ នេះ​ ក្នុង​គោលបំណង​ដើម្បី​ថែរក្សា​ព្រៃឈើ​ទាំងមូល​ និង​រក្សា​នូវ​លំនឹង​អាកាសធាតុ​ក្នុង​សកលលោក​។ លោក​បន្ថែម​ថា​ ឆ្មាំ​អភិរក្ស​របស់ក្រ​សួង​បរិស្ថាន​ មាន​តិចតួច​នៅ​ឡើយ​ មិន​ទាន់​អាច​ការពារ​ព្រៃ​ព្រះ​រកា​គ្រប់​ជ្រុងជ្រោយ​នោះ​ទេ​ ទាល់​តែ​មានការ​ចូលរួម​ពី​សហគមន៍​ និង​សមត្ថកិច្ច​ពាក់ព័ន្ធ​ ព្រោះ​បទ​ល្មើស​ភាគ​ច្រើន​តែងតែ​លួច​ឆ្មក់​ធ្វើ​នៅ​ពេល​យប់៖ «»

មន្ត្រី​សង្គម​ស៊ីវិល​ បន្ថែម​ថា នៅ​ខេត្ត​ព្រះវិហារ​ មាន​តំបន់​ព្រៃធំ​តែ​ពីរ​កន្លែង​ គឺ​ព្រៃ​ព្រះ​រកា​ និង​តំបន់​ព្រៃ​ឡង់​ ប្រសិន​បើ​រដ្ឋាភិបាល​គ្មាន​យន្តការ​ការពារ​ព្រៃ​ទាំង​នេះ​ច្បាស់លាស់​ទេ ពលរដ្ឋ​ខេត្ត​នេះ​ នឹង​គ្មាន​ព្រៃ​ឈើ​ប្រើប្រាស់​ទៀត​ឡើយ​នៅ​ពេល​ខាង​មុខ​ដ៏​ខ្លី។ សហគមន៍​ថា អំពើ​ពុក​រលួយ​ជា​ថ្នូរ​អនុញ្ញាត​ឱ្យ​មាន​ការ​ដឹក​ជញ្ជូន​ឈើ​ នៅ​តែ​កើត​មាន​ដដែលៗ គ្មាន​យន្តការ​លុបបំបាត់​ជា​ច្រើន​ឆ្នាំ​មក​ហើយ​ ដែល​ជាហេតុ​ធ្វើ​ឱ្យ​ព្រៃ​ការពារ​មួយ​នេះ​ ប្រឈម​ការបាត់បង់​ដើម​ឈើ​ធំៗ អស់​ស្ទើរ​ទាំង​ស្រុង៕