សាច់ញាតិ និងសង្គមស៊ីវិល នៅតែជំរុញឲ្យរដ្ឋាភិបាល និងតុលាការអន្តរាគមន៍ដោះលែងយុវជននៃក្រុមខ្មែរថាវរៈ ៥ នាក់ និងយុវជននៃសមាគមសម្ព័ន្ធនិស្សិតបញ្ញវន្តខ្មែរ ២ នាក់ ឲ្យមានសេរីភាពវិញ។
បងស្រីរបស់ព្រះតេជគុណ កើត សារ៉ាយ នៃក្រុមយុវជនខ្មែរថាវរៈ គឺលោកស្រី កើត វី គាំទ្រចំពោះសំណើរបស់អ្នកជំនាញសិទ្ធិមនុស្សអន្តរជាតិ ដែលទាមទារឲ្យដោះលែងប្អូនប្រុស និងយុវជនដទៃទៀត។ លោកស្រី សោកស្ដាយចំពោះការចាប់និងឃុំខ្លួនយុវជនទាំង៧នាក់ ដោយគ្មានកំហុសរយៈពេលជិតមួយឆ្នាំមកនេះ។ លោកស្រីឲ្យដឹងទៀតថា ការឃុំខ្លួនប្អូនប្រុសជិតមួយឆ្នាំមកនេះ បណ្ដាលឲ្យម្ដាយចាស់ជរានៅឯស្រុកឈឺចិត្តយ៉ាងខ្លាំងណាស់៖ « ឃុំលោកប្អូនខ្ញុំយូរដែរហើយ ហើយគាត់ក៏មិនទាន់មានទោសអ្វីធ្ងន់ខ្លាំងណា គួរតែដោះលែងគាត់មក ហើយឥឡូវនេះកូវីដឆ្លងខ្លាំង គាត់នៅក្នុងនោះពិបាកប្រឈមឆ្លង»។
ចំណែកសាច់ញាតិរបស់យុវជននៃសមាគមសម្ព័ន្ធនិស្សិតបញ្ញវន្តខ្មែរក៏មានបំណងចង់ឲ្យរដ្ឋាភិបាលអន្តរាគមន៍ដោះលែងយុវជនទាំងអស់ តាមការទាមទាររបស់អ្នកជំនាញសិទ្ធិមនុស្សអន្តរជាតិដែរ។ ប្អូនប្រុសរបស់លោក មាន ព្រហ្មមុនី គឺលោក មាន សំណព្វ យល់ថា ការបន្តឃុំខ្លួនក្រុមយុវជនទាំង ៧ នាក់មិនបានផ្ដល់ផលចំណេញអ្វីដល់រដ្ឋាភិបាល និងសង្គមជាតិនោះទេ។ បន្ថែមពីនេះស្ថានភាពគ្រួសាររបស់ពួកគេក៏រងវិបត្តិផ្លូវចិត្តដែរ៖ « ហ្នឹងហើយ៩ខែជាង១០ខែឥឡូវហើយ។ ខ្ញុំអត់យល់ដែរ វាអត់ដឹងថាមានទោសអ្វី ត្រូវឃុំផង។ គាំទ្រឲ្យដោះលែងដែរ វាអត់ត្រូវមានទោសអ្វី ត្រូវឃុំផង»។
ការលើកឡើងរបស់ក្រុមគ្រួសារនៅពេលនេះ ធ្វើឡើងក្រោយពេល ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិចំនួន ៥ រូប ពិនិត្យឃើញថា ការបន្តឃុំខ្លួនយុវជនទាំង ៧ នាក់ គឺលោកស្រី ឈឿន ដារ៉ាវី លោក ហ៊ុន វណ្ណៈ ព្រះតេជព្រះគុណ កើត សារ៉ាយ លោក ថា ឡាវី កញ្ញា អេង ម៉ាឡៃ លោក លោក មួង សុភ័ក្រ្ត និង លោក មាន ព្រហ្មមុនី ធ្វើឡើងដោយបំពាន និងជាការដកហូតសេរីភាពរបស់ពួកគេ ដោយគ្រាន់តែពួកគេធ្វើសកម្មភាពស្របច្បាប់ និងដោយសន្តិវិធីរបស់ពួកគេក្នុងការការពារសិទ្ធិមនុស្ស និងសេរីភាពជាមូលដ្ឋាននៅប្រទេសកម្ពុជា។
ឆ្លើយតបនឹងការទាមទារឲ្យដោះលែងយុវជនទាំង ៧ នាក់នេះ រដ្ឋលេខាធិការក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជាលោក ជិន ម៉ាលីន ប្រាប់កាសែតក្នុងស្រុក(ភ្នំពេញប៉ុស្តិ៍) កាលពីថ្ងៃទី៩ ខែសីហា ថាសេចក្តីថ្លែងការណ៍របស់ក្រុមអ្នកជំនាញសិទ្ធិមនុស្សអន្តរជាតិទាំង ៥ រូប ផ្អែកលើរបាយការណ៍ពីក្រុមដែលមាននិន្នាការប្រឆាំង។ មន្ត្រីរដ្ឋាភិបាលរូបនេះ ចោទក្រុមអ្នកជំនាញសិទ្ធិមនុស្សទាំង ៥ នាក់ ថាមិនបានផ្អែកលើទិដ្ឋភាពជាក់ស្តែង និងគ្មានមូលដ្ឋានរឹងមាំផ្នែកច្បាប់។ លោកបន្តអះអាងទៀតថា សមត្ថកិច្ចមានភ័ស្តុតាង ដែលបញ្ជាក់ថា សកម្មភាពរបស់ក្រុមយុវជនទាំង ៧ នាក់ គឺជាសកម្មភាពល្មើសច្បាប់។
ទោះជាយ៉ាងណា មន្ត្រីសង្គមស៊ីវិលគាំទ្រការទាមទារឲ្យមានការដោះលែងយុវជនទាំង ៧ នាក់។ ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា (CYN) លោក ហេង គឹមហុង ជំរុញឲ្យរដ្ឋាភិបាលទម្លាក់ចោលបទចោទប្រកាន់ប្រឆាំងលើក្រុមយុវជនទាំង ៧ នាក់ ដោយសារតែសកម្មភាពនិងការតវ៉ាកន្លងមក ធ្វើឡើងក្នុងបុព្វហេតុដើម្បីទាមទារសិទ្ធិសេរីភាព ដែលមានធានាដោយរដ្ឋធម្មនុញ្ញ។ លោកបន្តថា សកម្មភាពរបស់ក្រុមយុវជនក៏មិនបានបង្កឲ្យមានផលប៉ះពាល់ធ្ងន់ធ្ងរដល់សង្គម ដូចបទចោទប្រកាន់របស់តុលាការដែរ៖ «បើសិនជាបន្តឃុំខ្លួនគឺប៉ះពាល់យ៉ាងធ្ងន់ធ្ងរទៅដល់កិត្តិសព្ទទរបស់ប្រទេសកម្ពុជា ក៏ធ្វើឲ្យប៉ះពាល់ទៅដល់គោលការណ៍យុត្តិធម៌ ដែលតែងតែធានាថាផ្ដល់យុត្តិធម៌ដោយឆាប់រហ័សសម្រាប់ពលរដ្ឋកម្ពុជា»។
របបក្រុងភ្នំពេញ បានចាប់ខ្លួនយុវជនខ្មែរថាវរៈ និងយុវជនសមាគមសម្ព័ន្ធនិស្សិតបញ្ញវន្តខ្មែរ ៧ រូប ដាក់ពន្ធនាគារជាបន្តបន្ទាប់កាលពីអំឡុងខែសីហា និងខែកញ្ញា ឆ្នាំ២០២០។ ដើមហេតុនៃការចាប់ខ្លួននេះ គឺដោយពួកគាត់តវ៉ាដោយសន្តិវិធីទាមទារឱ្យដោះលែងមេដឹកនាំសហជីពលោក រ៉ុង ឈុន និងមានគម្រោងប្រមូលផ្តុំធ្វើបាតុកម្មទាមទារយុត្តិធម៌សង្គម នៅទីលានប្រជាធិបតេយ្យ។ តុលាការបានចោទប្រកាន់ពួកគាត់ពីបទ «ញុះញង់ឱ្យប្រព្រឹត្តបទឧក្រិដ្ឋ ឬញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលប្រឈមនឹងការជាប់ពន្ធនាគារពី៦ខែដល់២ឆ្នាំ។ គិតត្រឹមខែសីហានេះ ក្រុមយុវជនទាំង៧នាក់ ដោយអ្នកខ្លះបានជាប់ពន្ធនាគារចំនួន ១ ឆ្នាំមកហើយ។
ក្រុមអង្គការសិទ្ធិមនុស្សជាតិ និងអន្តរជាតិ ជាពិសេស ទីភ្នាក់ងារអង្គការសហប្រជាជាតិ រួមទាំងប្រទេសប្រជាធិបតេយ្យមួយចំនួន ស្ថានទូតអាមេរិកជាដើម តែងតែទាមទារឲ្យរដ្ឋាភិបាលដោះលែងសកម្មជនសិទ្ធិមនុស្ស សកម្មជនសង្គម នយោបាយ បរិស្ថាន ដែលរដ្ឋាភិបាលបានចាប់ឃុំខ្លួនសរុបជាង ៨០ នាក់ ឲ្យមានសេរីភាពឡើងវិញ៕
(English version below) - UN HUMAN RIGHTS EXPERTS EXPRESS CONCERN IN RELATION TO THE ONGOING PRE-TRIAL DETENTION AND...
Posted by United Nations Human Rights in Cambodia on Sunday, August 8, 2021
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។