ពលរដ្ឋប្រទះឃើញគោយន្តជាច្រើនគ្រឿងដឹកឈើចេញពីតំបន់ព្រៃឡង់
2023.04.26
គោយន្តជាច្រើនគ្រឿង ដែលរបស់ក្រុមហ៊ុន ស៊ីង បាយអូថេក (Think Biotech (Cambodia) Co., Ltd. កំពុងដឹកឈើចេញពីតំបន់ពីព្រៃឡង់បម្រុងចូលទៅក្នុងការដ្ឋានរបស់ក្រុមហ៊ុន ពេលកងរាជអាវុធហត្ថលើផ្ទៃប្រទេស កំពុងចុះបង្ក្រាបបទល្មើសព្រៃឈើនៅតំបន់ព្រៃឡង់ កាលពីថ្ងៃទី២៥ ខែមេសា ឆ្នាំ២០២៣។
រូបពីពលរដ្ឋ
ប្រជាពលរដ្ឋរស់នៅខេត្តក្រចេះ ប្រទះឃើញគោយន្តជាច្រើនគ្រឿងរបស់ក្រុមហ៊ុន ស៊ីង បាយអូថេក (Think Biotech (Cambodia) Co., Ltd.) កំពុងដឹកឈើចេញពីតំបន់ព្រៃឡង់បម្រុងចូលទៅក្នុងការដ្ឋានរបស់ក្រុមហ៊ុន។ ស្របពេលកងរាជអាវុធហត្ថលើផ្ទៃប្រទេស កំពុងចុះបង្ក្រាបបទល្មើសព្រៃឈើនៅតំបន់ព្រៃឡង់ប៉ុន្តែសកម្មជន និងសហគមន៍ស្នើឲ្យមន្ត្រីជំនាញប្រើប្រាសឆន្ទៈពិតប្រាកដពេលចុះបង្ក្រាបបទល្មើសព្រៃឈើ។
ប្រជាពលរដ្ឋរស់នៅឃុំកំពង់ចាមស្រុកសំបូរខេត្តក្រចេះ បានអះអាងថា មានមន្ត្រីកងរាជអាវុធហត្ថខេត្តក្រចេះ បានចុះឃាត់គោយន្តដឹកឈើរបស់ក្រុមហ៊ុន ស៊ីង បាយអូថេក ប្រមាណជាង ១០គ្រឿងហើយគោយន្តជាច្រើនទៀតបានបើករត់គេចខ្លួនអស់។
ប្រជាពលរដ្ឋរស់នៅឃុំកំពង់ចាម លោក ហេង រុន បានប្រាប់វិទ្យុអាស៊ីសេរីនៅថ្ងៃទី២៦ មេសាថា គោយន្តចាប់ពី ៦០គ្រឿង ទៅ ៧០គ្រឿង ដឹកឈើចេញពីតំបន់ព្រៃឡង់ចូលទៅក្នុងក្រុមហ៊ុន ស៊ីង បាយអូថេក ជារៀងរាល់ថ្ងៃ រហូតមកដល់ថ្ងៃទី២៥ ក្រុមប្រជាពលរដ្ឋបានឃាត់គោយន្តដឹកឈើទាំងនោះ ភ្លាមៗ នោះ ក៏ឃើញមានកម្លាំងកងរាជអាវុធហត្ថខេត្តក្រចេះ ចុះទៅឃាត់គោយន្តដឹកឈើប្រមាណ ១០គ្រឿង និងគោយន្តផ្សេងទៀត បើករត់គេចខ្លួនបាត់អស់។ ពលរដ្ឋរូបនេះបន្ថែមថា ក្រុមឈ្មួញរកស៊ីឈើទាំងនោះ សម្រុកចូលទៅកាប់ឈើប្រណិត និងឈើមានតម្លៃនៅត្រង់ចំណុចត្រពាំងទា ត្រពាំងកាត់សក់ ភ្នំចែម៉ែ ប្រាសាទបន្ទាយសៀម និងកន្លែងផ្សេងទៀត ដែលស្ថិតនៅក្នុងដែនជម្រកសត្វព្រៃព្រៃឡង់ដឹកយកទៅលក់ឲ្យក្រុមហ៊ុនក្នុងតម្លៃ ១ម៉ែត្រគីប ចាប់ពី ៤០ម៉ឺនរៀលទៅ ៦០ម៉ឺនរៀល។
លោក ហេង រុន៖ «ចូលប្រហែលជា ៦០ ទៅ ៧០ ប៉ុន្តែចាប់បានតែជាង ១០គ្រឿង នៅក្នុងព្រៃឡង់យើង តាមត្រពាំងទា ត្រពាំងកាត់សក់ ភ្នំចែម៉ែ ប្រាសាទបន្ទាយសៀម ដឹកឆ្ពោះទៅក្រុមហ៊ុន ស៊ីង បាយអូថេក»។
ពាក់ព័ន្ធជុំវិញរឿងនេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់វិទ្យុអាស៊ីសេរីថា សមត្ថកិច្ចជំនាញរបស់លោក កំពុងចុះសិក្សាស្រាវជ្រាវ និងបង្ក្រាបបានជាបន្តបន្ទាប់ ក្នុងនោះមានចំនួនបីខេត្ត រួមខេត្តកំពង់ធំ ខេត្តក្រចេះ និងខេត្តព្រះវិហារ ប៉ុន្តែលោកមិនទាន់ទទួលបានរបាយការណ៍ជាក់លាក់នៅឡើងទេ ដោយកម្លាំងរបស់លោកកំពុងបន្តធ្វើការងារទាំងអស់នេះ។ លោកបន្ថែមថា កងរាជអាវុធហត្ថ នឹងមិនលើកលែង ចំពោះបុគ្គលណា ដែលបានប្រព្រឹត្តិខុសច្បាប់ នោះទេ។
លោក អេង ហ៊ី៖ «យើងកំពុងតែធ្វើ មិនទាន់បូកសរុបអស់ទេ។ យើងឃាត់គោយន្តយើងចាប់ឲ្យតែអ្នកប្រព្រឹត្តិខុស យើងអនុវត្តច្បាប់ទៅ ព្រោះយើងអប់រំឆ្អែត យើងអត់គិតថាក្រុមហ៊ុនណាទេ យើងសិក្សាស្រាវជ្រាវប៉ុណ្ណឹង។ កុំនិយាយក្រុមហ៊ុន យើងមិនទាន់ច្បាស់ យើងកុំទាន់និយាយក្រុមហ៊ុននេះក្រុមហ៊ុនណោះវាមិនត្រូវ»។
ជុំវិញការចុះបង្ក្រាបបទល្មើសព្រៃឈើនេះ សមាជិកបណ្ដាញសហគមន៍ព្រៃឡង់ខេត្តព្រះវិហារ លោក ខេម សុឃី យល់ឃើញថា ការចុះបង្ក្រាបនេះ ធ្វើឡើងគ្រាន់តែជាការល្អមើលតែប៉ុណ្ណោះ ដោយសារសមត្ថកិច្ចមិនបានសហការជាមួយសហគមន៍មូលដ្ឋាន ដែលពួកគាត់ដឹងច្បាប់ពីបទល្មើសព្រៃឈើនៅតំបន់ព្រៃឡង់។ លោកសង្កត់ធ្ងន់ៗ ថា បទល្មើសព្រៃឈើនៅដែនជម្រកសត្វព្រៃព្រៃឡង់ កើតឡើងដោយសារមន្ត្រីរបស់រដ្ឋាភិបាល បើកដៃឲ្យក្រុមហ៊ុនឯកជនមួយចំនួន ចូលទៅកាប់បំផ្លាញព្រៃឈើជារៀងរាល់ថ្ងៃ ប្រសិនបើការចុះបង្ក្រាបនេះមិនបានចាប់អ្នកប្រព្រឹត្តិនិងអ្នកជាប់ពាក់ព័ន្ធទេ នោះក្រុមឧក្រិដ្ឋជនទាំងអស់នោះនឹងវិលត្រឡប់មករកស៊ីវិញជាក់ជាមិនខាន់។
លោក ខេម សុឃី៖ «សហការជាមួយសហគមន៍មូលដ្ឋានការអនុវត្តរបស់ពួកគាត់ និងមានប្រសិទ្ធភាពទៅថ្ងៃមុខ តែពួកគាត់ប្រសិនបើមិនបានសហការត្រឹមត្រូវសហគមន៍មូលដ្ឋាននៅតំបន់នោះទេ ភារៈកិច្ចរបស់គាត់នៅតែមានចន្លោះប្រហោង ហើយបទល្មើសនឹងអាចកើតមានសាជាថ្មីដោយសារកម្សោយការអនុវត្តច្បាប់»។
ចំណែកឯសកម្មជនបរិស្ថាន លោក អូត ឡាទីន យល់ឃើញថា ប្រសិនបើអាជ្ញាធរថ្នាក់ជាតិមានឆន្ទៈពិតប្រាកដក្នុងការការពារព្រៃឈើនៅតំបន់ព្រៃឡង់ពិតមែន ត្រូវតែបើចិត្តឲ្យទូលាយអនុញ្ញាតនិងបើកផ្លូវឲ្យបណ្ដាញសហគមន៍ព្រៃឡង់ចូលរួមល្បាតព្រៃដោយសេរី និងមិនមានការរារាំងគំរាមកំហែងបិទសិទ្ធិរបស់សហគមន៍ពីសំណាក់ក្រសួងបរិស្ថានតទៅទៀត។ លោកបន្ថែមថា អាជ្ញាធរពាក់ព័ន្ធគួរតែចាត់វិធានការឲ្យបានតឹងរឹងចំពោះបទល្មើសព្រៃឈើ និងស្វែងរកអ្នកពាក់ព័ន្ធយកមកអនុវត្តទៅតាមផ្លូវច្បាប់។
លោក អូត ឡាទីន៖ «ខ្ញុំសង្ឃឹមថា អាជ្ញាធរថ្នាក់ជាតិនឹងធ្វើការពិចារណាឡើងវិញ ក្នុងការផ្ដល់ឱកាសដល់បណ្ដាញសហគមន៍ព្រៃឡង់ដល់សកម្មជនសមាគមអង្គការមិនមែនរដ្ឋាភិបាលបានធ្វើការអនុវត្តសិទ្ធិរបស់ខ្លួនឲ្យបានពេញលេញ ការចូលរួមចំណែកការពារព្រៃឡង់ ឲ្យមាននិរន្តភាពស្របតាមច្បាប់ស្ដីអំពីតំបន់ការពារធម្មជាតិ»។
សហគមន៍និងសកម្មជនលើកឡើងទៀតថា ពួកគេបានចេញរបាយការណ៍ និងបង្ហាញភស្តុតាងជាច្រើនសា អំពីការកាប់បំផ្លាញព្រៃឈើនៅតំបន់អភិរក្សមួយនេះ ប្រព្រឹត្តិឡើងដោយក្រុមហ៊ុនឯកជន ដែលមានទីតាំងជាប់នឹងតំបន់ព្រៃឡង់ ហើយសហគមន៍ ក៏បានរាយការណ៍ទៅមន្ត្រីបរិស្ថានលើកផងដែរ។ ប៉ុន្តែមន្ត្រីទាំងអស់នោះ ហាក់មិនអើពើការកាប់បំផ្លាញព្រៃឈើនៅតំបន់ព្រៃឡង់ឡើយ។ ពួកគេរង់ចាំមើលចំណាត់ការរបស់កងរាជអាវុធហត្ថទៅលើក្រុមឧក្រិដ្ឋជនទាំងអស់នោះ ហើយប្រសិនបើមិនបានចាត់វិធានការតឹងរឹងទៅលើអ្នកប្រព្រឹត្តិ និងក្រុមហ៊ុន ដែលជាប់ពាក់ព័ន្ធទេ នោះការបង្ក្រាបនេះហាក់ធ្វើឡើង ដើម្បីតែបង្គ្រប់កិច្ច និងឱ្យតែល្អមើលប៉ុណ្ណោះ។
ព្រៃឡង់ឋិតក្នុងចន្លោះខេត្តចំនួនបួនគឺ ខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ ត្រូវបានរដ្ឋាភិបាលប្រកាសបង្កើតជាដែនជម្រកសត្វព្រៃ កាលពីថ្ងៃទី៩ ខែឧសភា ឆ្នាំ២០១៦ ដែលមានផ្ទៃដីជាង ៤សែនហិកតារ (៤៣១.៦៨៣ហិកតារ) ឋិតក្រោមការគ្រប់គ្រងរបស់ក្រសួងបរិស្ថាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- សង្គមស៊ីវិលបារម្ភពីករណីបង្ខាំងមនុស្ស និងចាប់ជំរិតផ្ទុះឡើងវិញនៅកម្ពុជា
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
