ពលរដ្ឋរស់នៅជាប់បឹងទន្លេសាប ខេត្តបាត់ដំបង ត្អូញត្អែរថា ទិន្នផលនេសាទធ្លាក់ចុះនារដូវវស្សានេះ
2023.09.21
សកម្មភាពចុះបង្ក្រាបបទល្មើសនេសាទនៅចំណុចអូរតេជះ(ឡូតិ៍លេខ៤) ស្ថិតនៅស្រុកសង្កែ ខេត្តបាត់ដំបង កាលពីថ្ងៃទី១៨ កញ្ញា ២០២៣។
រូប៖ ស្នងការខេត្តបាត់ដំបង
ពលរដ្ឋរស់នៅជាប់បឹងទន្លេសាប ក្នុងខេត្តបាត់ដំបង ត្អូញត្អែរថា ទិន្នផលត្រីនៅក្នុងរដូវវស្សានេះ ធ្លាក់ចុះជាងឆ្នាំមុនៗបង្កជា បញ្ហាសេដ្ឋកិច្ចក្នុងគ្រួសារ។ មន្ត្រីអង្គការសង្គមស៊ីវិលថា អាជ្ញាធរគួរតែស្រង់ទិន្នន័យ និងផ្ដល់ជំនួយជាស្បៀងអាហារដល់ពលរដ្ឋកំពុងជួបការលំបាកនៅក្នុងតំបន់នោះ។
ពលរដ្ឋនៅភូមិបាក់ព្រា ឃុំព្រៃចាស់ ស្រុកឯកភ្នំ ដែលប្រកបរបរនេសាទត្រីត្អូញត្អែរថា នៅក្នុងរដូវវស្សាឆ្នាំនេះ គឺពុំសូវមានត្រីនោះទេ។ ពលរដ្ឋលើកឡើងថា កាលពី៣ឆ្នាំមុន ពួកគាត់ធ្លាប់តែនេសាទបានត្រីចន្លោះពីមួយរយ ទៅពីររយគីឡូក្រាមក្នុងមួយថ្ងៃ ក៏ប៉ុន្តែនៅឆ្នាំនេះ ពួកគាត់នេសាទបានត្រឹមតែចន្លោះពីដប់ ទៅម្ភៃគីឡូក្រាមតែប៉ុណ្ណោះ ក្នុងមួយថ្ងៃ។ ពលរដ្ឋបញ្ជាក់ថា បរិមាណត្រីធ្លាក់ចុះបែបនេះ គឺបណ្ដាលមកពីការសាងសង់ទំនប់ទឹកនៅផ្នែកខាងលើ គឺទំនប់សាលាតាអន ដែលឃាំងទឹកមិនឲ្យហូរចុះមកក្រោម កាលពីដើមរដូវវស្សាអំឡុងខែឧសភា និងខែមិថុនា។
អ្នកភូមិបាក់ព្រា ឃុំព្រៃចាស់ ស្រុកឯកភ្នំ លោកស្រី យ៉ាវ ហ្វាន់ ប្រាប់អាស៊ីសេរីនៅថ្ងៃទី២០ កញ្ញា ថា នៅពេលនេសាទត្រីមិនបានដូច្នេះ គ្រួសារលោកស្រីកំពុងខ្វះខាតអាហារបរិភោគ។
លោកស្រី យ៉ាវ ហ្វាន់៖ «មិនបាច់ចាំថា អ្នកខ្លះអីទេ ខ្ញុំមានពេលខ្លះដាច់អង្ករ ដើរខ្ចីគេជិតខាងអីចឹងទៅ ដល់ពេលទៅរើសខ្យងបានទៀតទៅ ក៏ទិញសងគេវិញ»។
ពលរដ្ឋនៅភូមិបាក់ព្រា ម្នាក់ទៀត គឺលោកស្រី សេង ថឹក ថ្លែងថា ការនេសាទត្រីនៅឆ្នាំនេះ គឺពុំសូវទទួលបានទិន្នផលច្រើនដូចឆ្នាំមុនៗនោះទេ ធ្វើឲ្យអ្នកភូមិបាក់ព្រាមួយចំនួនកំពុងតែជួបបញ្ហាជីវភាព។
លោកស្រី សេង ថឹក៖ «ចាស់ !ក្មួយពិបាកៗ មែនទែន!រកអីមិនសូវបាន អ្នកណាគ្នារក ជូនកាលអ្នកដែលគ្មានរបរអីធំដុំទៅ ដើររករាយមង រាយសន្ទូច ក៏រាយមិនបានដែរ»។
នេះមិនមែនជារឿងថ្មីឡើយ ដែលពលរដ្ឋនៅភូមិបាក់ព្រា ឃុំព្រៃចាស់ ស្រុកឯកភ្នំ ជួបបញ្ហាទិន្នផលនេសាទធ្លាក់ចុះបែបនេះ។ ក្រៅពីរបរនេសាទត្រី ដែលកំពុងជួបបញ្ហា អ្នកភូមិបាក់ព្រា ដើររើសខ្យងលក់សម្រាប់ចិញ្ចឹមជីវិត។ ពួកគាត់ថា ឈ្មួញកុម្ម៉ង់ខ្យងយកធ្វើជាចំណីត្រីមួយគីឡូក្រាមក្នុងតម្លៃ ៧រយរៀល ដែលតម្រូវឲ្យពលរដ្ឋឆ្កិះយកតែសាច់ខ្យងលក់មុនម៉ោង ១២ថ្ងៃត្រង់ ទើបឈ្មួញទិញយក។ ពលរដ្ឋនៅភូមិបាក់ព្រាថា បញ្ហានេះ បានធ្វើឲ្យពលរដ្ឋមួយចំនួនបង្ខំចិត្តឲ្យកូនៗរបស់ពួកគាត់ជួយដើររើសខ្យង ដើម្បីឲ្យទាន់ម៉ោង ដែលឈ្មួញកំណត់។
លោកស្រី យ៉ាវ ហ្វាន់ បន្ថែមថា របរដើររើសខ្យងនេះ គឺអាចសម្រួលថ្លៃអាហារហូបចុកបានមួយកម្រិតតូចតែប៉ុណ្ណោះ។ លោកស្រី និងអ្នកភូមិបាក់ព្រាដទៃទៀត ស្នើដល់រដ្ឋាភិបាល ជួយដោះស្រាយបញ្ហានៅភូមិបាក់ព្រានេះ ដោយបើកទ្វារទឹកនាដើមរដូវវស្សា ដើម្បីអាចឲ្យត្រីពងកូនដូចធម្មតាវិញ។
លោកស្រី យ៉ាវ ហ្វាន់៖ «ប្រសិនបើចង់ឲ្យជីវភាពនៅភូមិបាក់ព្រា ដែលល្បីដូចថា នេសាទត្រីសម្បូរដោយខ្លាញ់ជាប់តាមស្ទឹងអីដូចពីលើកមុន ស្នើសុំថា ពេលមានទំនប់ក៏មានចុះ ពេលខែ៦ ខែ៧អីចឹងយើងអាចចំហឲ្យគ្នាមកក្រោមទៅ ឲ្យប៉ះពាល់ដល់ត្រីផង ឲ្យគ្នាពងកូនបានទៅ អាចយើងរកបាន»។
វិទ្យុអាស៊ីសេរីនៅពុំទាន់អាចទាក់ទងមេឃុំព្រៃចាស់ លោក ឡុង ផុន អភិបាលស្រុកឯកភ្នំលោក ម៉ិល សុផល នាយរដ្ឋបាលជលផលខេត្តបាត់ដំបង លោក ជួង សុភា និងអភិបាលខេត្តបាត់ដំបង លោក សុខ លូ ដើម្បីឆ្លើយតបសំណើរបស់ពលរដ្ឋនេះបាននៅឡើយទេ នៅថ្ងៃទី២០ កញ្ញា។
ទោះជាយ៉ាងនេះក្ដី អ្នកសម្របសម្រួលអង្គការលីកាដូ (LICADHO) ប្រចាំខេត្តបាត់ដំបង លោក អ៊ិន គង់ជិត មានប្រសាសន៍ថា ដើម្បីដោះស្រាយបញ្ហានេះ អាជ្ញាធរគួរតែទប់ស្កាត់បទល្មើសនេសាទនារដូវត្រីពង និងចុះស្រង់ទិន្នន័យពលរដ្ឋ ដែលកំពង់ជួបគ្រោះទុរភិក្សនេះ ដើម្បីផ្ដល់ជាស្បៀងអាហារឲ្យពួកគេបណ្ដោះអាសន្ន។
លោក អ៊ិន គង់ជិត៖ «ករណីដែលគាត់ជួបគ្រោះទុរភិក្សខ្លាំងដាច់ប្រាក់ចំណូល អាហ្នឹងគួរតែមានការផ្គត់ផ្គង់ស្បៀងអាហារសម្ភារៈខ្លះដល់ពួកគាត់»។
ពលរដ្ឋ និងមន្ត្រីអង្គការសង្គមស៊ីវិល ទទូចឲ្យអាជ្ញាធរគិតគូរដល់បញ្ហាជីវភាពពលរដ្ឋនៅភូមិបាក់ព្រា និងទប់ស្កាត់បទល្មើសនេសាទក្នុងរដូវត្រីពង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ