ពលរដ្ឋស្នើអាជ្ញាធរពិនិត្យគំនរកំប្លោកតាមដងស្ទឹងសង្កែ
គំនរកំប្លោកទាំងនោះ បានធ្វើឲ្យស្ទះការចរាចរណ៍លើផ្លូវទឹក ពិបាកជិះទូក កាណូត ទៅមុខមិនរួច។ បញ្ហានេះ បានប៉ះពាល់ដល់ការធ្វើដំណើរកម្សាន្តរបស់ភ្ញៀវទេសចរបរទេសថែមទៀត។
គំនរកំប្លោក និងឈើចម្រាស់ដែលគេដាក់ជាហូរហែនៅក្នុងទឹក តាមដងស្ទឹងសង្កែដើម្បីហ៊ុមចាប់យកត្រីនោះ កំពុងក្លាយជាឧបសគ្គកកស្ទះដល់ការធ្វើចរាចរណ៍តាមផ្លូវទឹករបស់ប្រជាពលរដ្ឋ និងភ្ញៀវទេសចរបរទេស។
ក្រុមអ្នកភូមិជាអ្នកធ្វើដំណើរតាមផ្លូវទឹក ពីខេត្តបាត់ដំបង ទៅភូមិបណ្ដែតទឹកក្នុងបឹងទន្លេសាប និងអ្នកធ្វើដំណើរពីខេត្តសៀមរាប មកបាត់ដំបង និងពីខេត្តបាត់ដំបង ទៅខេត្តសៀមរាប នោះ បញ្ជាក់ថា គំនរកំប្លោក និងឈើចម្រាស់ទាំងនោះមាននៅតាមដងស្ទឹងសង្កែ ចាប់ពីឃុំព្រៃចាស់ រហូតដល់ឃុំកោះជីវាំង ស្រុកឯកភ្នំ ខេត្តបាត់ដំបង។
សំឡេងអ្នកភូមិ៖ «គេកាប់ចម្រាស់ដាក់ពីក្រោម រួចទៅកំប្លោកនៅពីលើ មុនដំបូងតូច ដល់ពេលកំប្លោកវាចេះតែដុះលូតលាស់ទៅ ធំចង់ពេញស្ទឹងទាំងអស់ ចាប់ពីបាក់ព្រា ចុះមក ហើយអ្នកហ៊ុមក៏ចេះតែហ៊ុមបារទម្លាក់ពេញណែន ទៅមកអត់ចង់រួចទេ។ ទាល់តែយើងបញ្ឆេះកាណូតខ្លាំងចុះកាយ កាណូតតូចតាចទៅអត់ចង់រួចទេ ព្រោះអីព្រែកក៏ណែន ស្ទឹងក៏ណែន ហើយប្រជាពលរដ្ឋធ្វើដំណើរទៅមកអត់កើត ឲ្យអស់លោកអ្នកធ្វើការហ្នឹង បើកភ្នែកមើលផល»។
ពួកគាត់បញ្ជាក់ទៀតថា ទឹកក្នុងដងស្ទឹងសង្កែ កាន់តែរាក់នៅរដូវប្រាំងនេះ និងមានគំនរកំប្លោកក្រាស់ពិបាកធ្វើដំណើរ។ បញ្ហានេះ បានផ្តល់នូវការលំបាកដល់អ្នកធ្វើដំណើរ ជាពិសេសប៉ះពាល់ដល់ការធ្វើចរាចរណ៍តាមផ្លូវទឹករបស់ភ្ញៀវទេសចរបរទេស ពីខេត្តបាត់ដំបង ទៅខេត្តសៀមរាប និងពីខេត្តសៀមរាប មកខេត្តបាត់ដំបង ថែមទៀត។
អភិបាលស្រុកឯកភ្នំ លោក មៀច ស៊ុម ថ្លែងថា លោកបានចាត់ឲ្យមន្ត្រីមូលដ្ឋានភូមិឃុំចុះរៀបចំប្រមូលគំនរកំប្លោកនោះចេញ ដើម្បីសម្រួលការធ្វើចរាចរណ៍តាមផ្លូវទឹក៖ «កំប្លោកហ្នឹងវាមានពេញស្ទឹងហ្នឹង ម្សិលមិញខ្ញុំបានចុះទៅហ្នឹង ពីបាក់ព្រា ទៅឃុំព្រៃចាស់ មេឃុំបានចាត់ចែងឲ្យប្រជាពលរដ្ឋ គាត់ចងកំប្លោកហ្នឹង ដើម្បីកុំឲ្យវារាលពេញស្ទឹង។ កន្លែងខ្លះវាឆ្ងាយ គាត់ក៏មិនមានលទ្ធភាពទេ អាហ្នឹងវាទាល់តែប្រជាពលរដ្ឋចូលរួម អ៊ីចឹងខ្ញុំបានឲ្យមេឃុំចាត់វិធានការឲ្យប្រជាជនចងកំប្លោកកុំឲ្យវារាលពេញស្ទឹង»។
មេឃុំព្រៃចាស់ លោក ឈន លាង ថ្លែងថា មន្ត្រីមូលដ្ឋានភូមិឃុំកំពុងចុះកាយប្រមូលកំប្លោកនោះចេញ ដើម្បីសម្រួលដល់ការធ្វើចរាចរណ៍តាមផ្លូវទឹក។ ទន្ទឹមគ្នានេះ លោកអះអាងថា នឹងមានវិធានការអប់រំប្រជាពលរដ្ឋថែមទៀត៖ «ខ្ញុំឲ្យកងកម្លាំងខ្ញុំចុះទៅនៅម្ដុំ គេហៅថា ក្បាលកោះជីវាំង ចុះទៅបារកំប្លោកឡើងលើគោក មិនមែនជាដាក់ចម្រាស់ទេ អាហ្នឹងបងប្អូនគាត់ចងកំប្លោកទៅសម្រាប់យកមោង ហ៊ុមយកត្រី ដល់មានភ្លៀងមកវាដុះលឿនណាស់»។
មន្ត្រីអង្គការសិទ្ធិមនុស្សលីកាដូ (Licadho) ប្រចាំខេត្តបាត់ដំបង លោក ហេង សាយហុង បានជំរុញឲ្យអាជ្ញាធរមូលដ្ឋានយកចិត្តទុកបញ្ហានេះឲ្យបានខ្លាំងថែមទៀត។ លោកថា បញ្ហានេះអាចឈានទៅរកផលប៉ះពាល់ និងមានការបំពុលបរិស្ថានថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- ពលរដ្ឋមួយចំនួនស្នើលោក ហ៊ុន សែន ឱ្យចុះចេញពីតំណែងដោយសារគ្មានសមត្ថភាពជួយពលរដ្ឋក្នុងគ្រាអាសន្ន
- ជំនួយការនាយករដ្ឋមន្ត្រីត្អួញថា ខ្លួនលំបាកជាងពលរដ្ឋរស់នៅតំបន់បិទខ្ទប់
- អ្នកជំងឺកូវីដម្នាក់ស្លាប់ ក្រោយមន្ទីរពេទ្យមួយចំនួនបដិសេធព្យាបាល និងទារសេវាថ្លៃ
- អ្នកវិភាគថាលោក ហ៊ុន សែន កំពុងព្យាយាមពឹងវៀតណាមឱ្យគាំទ្រលោក ហ៊ុន ម៉ាណែត ស្នងតំណែងជំនួសលោក
- មន្ត្រីបក្សប្រឆាំងរិះគន់ លោក ហ៊ុន សែន ដែលយកកីឡាករបាល់ទាត់ពិភពលោកមកពាក់ព័ន្ធរឿងនយោបាយ
