ក្រុម​យុវជន​និង​ពលរដ្ឋ​បន្ត​ដេញ​កប៉ាល់​បូម​ខ្សាច់​នៅ​ខេត្ត​កោះកុង

ដោយ ដែន អយុធ្យា
2015-07-30
Share
បូម​ខ្សាច់ កោះកុង ៦២០ សកម្មភាព​កប៉ាល់ ឬ​សាឡង់​បូម​ខ្សាច់​នៅ​ខេត្ត​កោះកុង។ រូប​ថត​កាល​ពី​ថ្ងៃ​ទី​១៤ ខែ​កុម្ភៈ ឆ្នាំ​២០១៥
RFA/Den Ayuthyea

សមាជិក​នៃ​ក្រុម​យុវជន​ចលនា​មាតា​ធម្មជាតិ និង​ប្រជាពលរដ្ឋ​រាប់​រយ​នាក់ បាន​បន្ត​សកម្មភាព​បណ្ដេញ​សាឡង់​បូម​ខ្សាច់​នៅ​តាម​មូលដ្ឋាន​មួយ​ចំនួន​នា​ខេត្ត​កោះកុង រយៈពេល ៤​ថ្ងៃ​ហើយ ដោយ​ចោទ​ថា កប៉ាល់ ឬ​សាឡង់​បូម​ខ្សាច់​មួយ​ចំនួន​ក្នុង​មូលដ្ឋាន​នេះ បាន​ធ្វើ​សកម្មភាព​ខុស​បច្ចេកទេស ឬ​មិន​គោរព​តាម​ច្បាប់​អនុញ្ញាត​ត្រឹមត្រូវ​ទេ។

បញ្ហា​នេះ បាន​ជំរុញ​ឲ្យ​ក្រុម​យុវជន និង​ពលរដ្ឋ បាន​ប្រមូល​ផ្តុំ​គ្នា និង​លើក​បដា​តវ៉ា​នៅ​ពី​មុខ​សាលា​ស្រុក​បុទុមសាគរ ដើម្បី​ទាមទារ​ឲ្យ​អាជ្ញាធរ​ពាក់ព័ន្ធ​ខេត្ត​កោះកុង ឬ​អាជ្ញាធរ​មូលដ្ឋាន បណ្ដេញ​កប៉ាល់​បូម​ខ្សាច់​ចេញ​ពី​តំបន់​របស់​ពួក​គាត់​រស់នៅ និង​អាស្រ័យ​ផល​នោះ។

ក្រុម​យុវជន​ចលនា​មាតា​ធម្មជាតិ និង​ប្រជាពលរដ្ឋ​ជាង ១០០​នាក់ នៅ​ព្រឹក​ថ្ងៃ​ពុធ ទី​២៩ ខែ​កក្កដា បាន​បន្ត​សកម្មភាព​ចុះ​ល្បាត និង​បណ្ដេញ​សាឡង់ ឬ​កប៉ាល់​បូម​ខ្សាច់​មួយ​ចំនួន​ដែល​បូម​ខ្សាច់​អនាធិបតេយ្យ​នា​មូលដ្ឋាន​ឃុំ​អណ្ដូងទឹក ក្នុង​ស្រុក​បុទុមសាគរ ខេត្ត​កោះកុង។

សមាជិក​ចលនា​មាតា​ធម្មជាតិ គឺ​យុវជន សុ វីគា បាន​ប្រាប់​វិទ្យុ​អាស៊ីសេរី ថា រយៈពេល ៤​ថ្ងៃ​មក​នេះ ក្រុម​ប្រជាពលរដ្ឋ និង​ក្រុម​យុវជន បាន​បណ្ដេញ​កប៉ាល់​បូម​ខ្សាច់​ចំនួន ២​ក្រុមហ៊ុន ដែល​ធ្វើ​សកម្មភាព​បូម​ខ្សាច់​អនាធិបតេយ្យ​នៅ​ឃុំ​អណ្ដូងទឹក ស្រុក​បុទុមសាគរ បំផ្លាញ​ដល់​ធនធាន​ជលផល​សមុទ្រ ឬ​ព្រៃ​កោងកាង ជាដើម។

ផ្ដើម​ពី​បញ្ហា​នេះ យុវជន សុ វីគា ឲ្យ​ដឹង​ថា នៅ​ថ្ងៃ​ទី​២៩ ខែ​កក្កដា នេះ សមាជិក​ចលនា​មាតា​ធម្មជាតិ និង​ប្រជាពលរដ្ឋ​ខេត្ត​កោះកុង ប្រមាណ ១០០​នាក់ ក៏​បាន​មក​ប្រមូល​ផ្តុំ​គ្នា​លើក​បដា​តវ៉ា​នៅ​ពី​មុខ​សាលា​ស្រុក​បុទុមសាគរ ដើម្បី​ស្នើ​ឲ្យ​អាជ្ញាធរ​ពាក់ព័ន្ធ ជួយ​បណ្ដេញ និង​ចុះ​ពិនិត្យ​ពី​សកម្មភាព​បូម​ខ្សាច់​របស់​ក្រុមហ៊ុន​បូម​ខ្សាច់​នៅ​តំបន់​នេះ​ឲ្យ​បាន​ត្រឹមត្រូវ៖ «ក្រុមហ៊ុន​បូម​ខ្សាច់​នៅ​តំបន់​ព្រែក​អណ្ដូងទឹក ស្រុក​បុទុមសាគរ គឺ​មាន​អាជ្ញាប័ណ្ណ ប៉ុន្តែ​អាជ្ញាប័ណ្ណ​នេះ​មិន​បាន​សិក្សា​ពី​ផល​ប៉ះពាល់​ដែល​កើត​ឡើង​ពី​ការ​បូម​ខ្សាច់​សមុទ្រ​នោះ​ទេ។ ជាង​នេះ ប្រតិបត្តិករ​ដែល​កំពុង​បូម​ខ្សាច់​នៅ​តាម​ព្រែក​អណ្ដូងទឹក​ទាំង​នោះ ក៏​មិន​បាន​គោរព​តាម​លក្ខខណ្ឌ​បច្ចេកទេស ដែល​មាន​នៅ​ក្នុង​អាជ្ញាប័ណ្ណ​របស់​ខ្លួន​ទេ មាន​ដូចជា​គម្លាត​នៃ​ការ​បូម​ពី​ច្រាំង ឬ​មាត់​ព្រែក និង​ជម្រៅ​ទឹក​ក៏​មិន​បាន​គោរព​តាម​អាជ្ញាប័ណ្ណ​ដែល​ក្រសួង​ផ្តល់​ទេ ហើយ​បាន​ធ្វើ​សកម្មភាព​បូម​ខ្សាច់​ពាស​វាល​ពាស​កាល​អនាធិបតេយ្យ រហូត​ដល់​ធ្វើ​ឲ្យ​បាក់​ច្រាំង​ព្រែក បំផ្លាញ​ដើម​កោងកាង និង​បំផ្លាញ​បរិស្ថាន​ទឹក​នៅ​តំបន់​នោះ ជាដើម»

តំណាង​ចលនា​មាតា​ធម្មជាតិ យុវជន សុ វីគា បាន​ទទូច​ដល់​ថ្នាក់​ដឹក​នាំ​ក្រសួង​ពាក់ព័ន្ធ ត្រូវ​បញ្ជូន​មន្ត្រី​ជំនាញ​ចុះ​ពិនិត្យ​ទៅ​លើ​សកម្មភាព​សាឡង់ ឬ​កប៉ាល់​បូម​ខ្សាច់​ចំនួន ២​ក្រុមហ៊ុន គឺ​ក្រុមហ៊ុន​អ៊ិនធឺណេសិនណល រ៉េនបូ (International Rainbow Co., Ltd) និង​ក្រុមហ៊ុន ដាយរិក អាកសែស (Direct Access) ដែល​កំពុង​ធ្វើ​សកម្មភាព​បូម​ខ្សាច់​នៅ​ខេត្ត​កោះកុង ដោយ​មិន​បាន​សិក្សា​ពី​ផល​ប៉ះពាល់​ឲ្យ​បាន​ត្រឹមត្រូវ​ទេ៖ «សូម​ឲ្យ​ក្រសួង​ដែល​ពាក់ព័ន្ធ​ចុះ​ធ្វើ​អធិការកិច្ច​ថា ក្រុមហ៊ុន​បូម​ខ្សាច់​ដែល​កំពុង​ធ្វើ​សកម្មភាព​នៅ​តាម​ព្រែក​អណ្ដូងទឹក ស្រុក​បុទុមសាគរ ហ្នឹង​ស្រប​ច្បាប់ ឬ​ក៏​ខុស​ច្បាប់ ឬ​មួយ​ក៏​មាន​ក្រុមហ៊ុន​ខ្លះ​បន្លំ​លួច​បូម​ខ្សាច់​ដោយ​ខុស​ច្បាប់។ ហើយ​ថា ការ​បូម​ខ្សាច់​នៅ​តំបន់​នោះ ត្រឹមត្រូវ​តាម​បច្ចេកទេស ឬ​មាន​ផល​ប៉ះពាល់​ដល់​ប្រជាពលរដ្ឋ​ដែរ​ឬ​ទេ»

ទាក់ទិន​បញ្ហា​នេះ លោក អន ភារៈ អភិបាល​ស្រុក​បុទុមសាគរ ខេត្ត​កោះកុង មាន​ប្រសាសន៍​ថា អាជ្ញាធរ​ស្រុក​មិន​មាន​សិទ្ធិ​ដេញ​សាឡង់​បូម​ខ្សាច់​របស់​ក្រុមហ៊ុន​ទាំងឡាយ​នៅ​ក្នុង​មូលដ្ឋាន​លោក ទៅ​តាម​ការ​ទាមទារ​របស់​ពលរដ្ឋ ឬ​ក្រុម​យុវជន​បាន​ទេ ព្រោះ​ក្រុមហ៊ុន​ទាំង​នោះ​មាន​ច្បាប់​អនុញ្ញាត​ពី​ក្រសួង ឬ​ស្ថាប័ន​ជំនាញ​ត្រឹមត្រូវ៖ «ខ្ញុំ​បាន​ព្យាយាម​សម្រប​សម្រួល​ជាមួយ​ពលរដ្ឋ និង​ក្រុម​យុវជន​ទាំង​នោះ ដើម្បី​រក​ដំណោះស្រាយ​ដោយ​សន្តិវិធី ប៉ុន្តែ​ពួក​គាត់​មិន​ស្តាប់​តាម​អាជ្ញាធរ​ទេ។ ហើយ​បាន​ទាមទារ​ឲ្យ​អាជ្ញាធរ​ដេញ​សាឡង់​ពី​ទីតាំង​បូម​ខ្សាច់​នៅ​ព្រែក​អណ្ដូងទឹក ជា​មុន​សិន ទើប​ពួក​គេ​បញ្ឈប់​ការ​តវ៉ា។ បញ្ហា​នេះ អាជ្ញាធរ​ស្រុក​ឯណា​ទៅ​មាន​សិទ្ធិ​ដេញ​សាឡង់​បូម​ខ្សាច់​ចេញ ដែល​គេ​មាន​អាជ្ញាប័ណ្ណ ឬ​ច្បាប់​អនុញ្ញាត​ត្រឹមត្រូវ​ពី​ក្រសួង​ពាក់ព័ន្ធ​នោះ»

ត្រង់​ចំណុច​នេះ លោក អ៊ិន គង់ជិត មន្ត្រី​សម្រប​សម្រួល​អង្គការ​លីកាដូ (Licadho) ខេត្ត​កោះកុង បាន​អះអាង​ថា ក្រុមហ៊ុន​បូម​ខ្សាច់​ដែល​ធ្វើ​សកម្មភាព​នៅ​តាម​ព្រែក ឬ​តាម​សមុទ្រ​នា​ខេត្ត​កោះកុង គឺ​គ្មាន​ការ​ត្រួត​ពិនិត្យ​ពី​ស្ថាប័ន​ពាក់ព័ន្ធ​អំពី​បច្ចេកទេស​បូម​ទេ។ លោក​បន្ត​ថា ក្រុមហ៊ុន​បូម​ខ្សាច់​ដែល​ធ្វើ​សកម្មភាព​នៅ​ឃុំ​អណ្ដូងទឹក ស្រុក​បុទុមសាគរ គឺ​មិន​បាន​គិត​ពី​ផល​ប៉ះពាល់​ទៅ​លើ​ធនធាន​សមុទ្រ ឬ​ប៉ះពាល់​ដល់​ការ​ប្រកប​របរ​នេសាទ​សមុទ្រ​របស់​ពលរដ្ឋ​មូលដ្ឋាន​នេះ​ទេ។

មន្ត្រី​សង្គម​ស៊ីវិល​រូប​នេះ បាន​ស្នើ​ដល់​ក្រសួង​ពាក់ព័ន្ធ មុន​នឹង​ផ្តល់​អាជ្ញាប័ណ្ណ​ជូន​ក្រុមហ៊ុន​បូម​ខ្សាច់​ណា​មួយ ត្រូវ​ចុះ​សិក្សា​ពី​ផល​ប៉ះពាល់ ឬ​សិក្សា​ពី​បច្ចេកទេស​នៃ​ការ​បូម​ខ្សាច់​នៅ​តាម​តំបន់​នីមួយៗ​ឲ្យ​បាន​ត្រឹមត្រូវ​ជា​មុន៖ «លោក ប៉ិច ស៊ីយ៉ុន ដែល​ជា​ប្រធាន​មន្ទីរ​រ៉ែ និង​ថាមពល ខេត្ត​កោះកុង គាត់​បាន​ប្រាប់​ប្រជាជន​កាល​ពី​ព្រឹក​ថ្ងៃ​ពុធ ទី​២៩ ខែ​កក្កដា ថា ក្រុមហ៊ុន​ទាំង​ពីរ​ហ្នឹង​មាន​អាជ្ញាប័ណ្ណ ឬ​មាន​ច្បាប់​អនុញ្ញាត ប៉ុន្តែ​ក្រុមហ៊ុន​ទាំង​ពីរ​នេះ​អាច​មាន​កំហុស​លើ​បញ្ហា​បច្ចេកទេស។ ដូច្នេះ ខាង​មន្ទីរ​ក៏​ចង់​បង្កើត​ក្រុម​ការងារ​មួយ​ក្រុម ដើម្បី​ចុះ​ពិនិត្យ​មើល​ទីតាំង​បូម​ខ្សាច់​នៅ​ក្នុង​ព្រែក​អណ្ដូងទឹក ដើម្បី​ពិនិត្យ​ក្រុមហ៊ុន​ទាំង​នោះ បាន​អនុវត្ត​ស្រប​តាម​លក្ខខណ្ឌ​ដែល​ក្រសួង​បាន​ផ្តល់​ជូន ឬ​ស្រប​តាម​បច្ចេកទេស​ត្រឹមត្រូវ​ដែរ​ឬ​ទេ»

ក្រុម​យុវជន​ចលនា​មាតា​ធម្មជាតិ និង​ប្រជាពលរដ្ឋ​មក​ពី​បណ្ដា​ស្រុក​មួយ​ចំនួន​នា​ខេត្ត​កោះកុង បាន​អះអាង​ថា នឹង​មិន​លះបង់​សកម្មភាព​បណ្ដេញ​សាឡង់ ឬ​កប៉ាល់​បូម​ខ្សាច់​ចូល​មក​បូម​ខ្សាច់​អនាធិបតេយ្យ​នា​មូលដ្ឋាន​នេះ​ទេ​នា​ថ្ងៃ​អនាគត ប្រសិន​បើ​ថ្នាក់​ដឹក​នាំ​ស្ថាប័ន​ពាក់ព័ន្ធ​មិន​មាន​ដំណោះស្រាយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល