ក្រសួង​បំភ្លឺ​ពី​ការ​ភ័ន្តច្រឡំ​ថា​ក្រសួង​មាន​សិទ្ធិ​ចេញ​អាជ្ញាប័ណ្ណ​ឲ្យ​ក្រុមហ៊ុន​បូម​ខ្សាច់

ដោយ ទេព សុរ៉ាវី
2015-01-28
Share
បូម​ខ្សាច់ ៦២០ សាឡង់​បូម​ខ្សាច់​ចត​នៅ​ក្បែរ​កោះពេជ្រ។ រូបថត​ថ្ងៃ​ទី​២៧ មករា ២០១៥
RFA/Uon Chhin

ក្រសួង​ធនធាន​ទឹក និង​ឧតុនិយម ចេញ​សេចក្ដី​បំភ្លឺ​ដើម្បី​លាង​ចម្រេះ​នូវ​មន្ទិល​សង្ស័យ​របស់​សាធារណជន​ដែល​តែង​ភ័ន្តច្រឡំ​ថា ការ​ធ្វើ​អាជីវកម្ម​ខ្សាច់​មាន​អាជ្ញា​ប័ណ្ណ​ចេញ​ដោយ​ក្រសួង​ធនធាន​ទឹក។

លិខិត​បំភ្លឺ​របស់​ក្រសួង​ធនធាន​ទឹក សង្កត់​ធ្ងន់​ថា ស្ថាប័ន​ក្រសួង​មួយ​នេះ​មិន​មាន​សមត្ថកិច្ច​ពាក់ព័ន្ធ​នឹង​ការ​ធ្វើ​អាជីវកម្ម​ខ្សាច់​ទេ ប៉ុន្តែ​រដ្ឋមន្ត្រី​ក្រសួង​ធនធាន​ទឹក លោក លឹម គានហោ គឺ​ជា​ប្រធាន​គណៈកម្មាធិការ​គ្រប់គ្រង​ធនធាន​ខ្សាច់ ហើយ​គណៈកម្មាធិការ​នេះ ក៏​គ្មាន​សិទ្ធិ​ចេញ​អាជ្ញាប័ណ្ណ​ទៅ​ក្រុមហ៊ុន​បូម​ខ្សាច់​នោះ​ឡើយ គឺ​គ្រាន់តែ​ជា​យន្តការ​សិក្សា​លើ​ផ្នែក​បច្ចេកទេស​តែប៉ុណ្ណោះ។

​ក្រសួង​ធនធាន​ទឹក​បញ្ជាក់​ក្នុង​លិខិត​បំភ្លឺ​ដែល​ចេញ​កាល​ពី​ថ្ងៃ​ទី​២៧ មករា ថា រាល់​ការ​ផ្អាក​ការ​បញ្ឈប់ ឬ​ការ​ដក​ហូត​អាជ្ញាប័ណ្ណ​បូម​ខ្សាច់ មិន​មែន​ជា​សិទ្ធិ​របស់​គណៈកម្មាធិការ​គ្រប់គ្រង​ធនធាន​ខ្សាច់​នោះ​ទេ ប៉ុន្តែ​ជា​សមត្ថកិច្ច​របស់​ក្រសួង​រ៉ែ​និង​ថាមពល។

លិខិត​ដដែល​នោះ ពិពណ៌នា​ថា ការ​ប្រមូល​នូវ​ចំណូល​ផ្សេងៗ​ពី​ការ​ធ្វើ​អាជីវកម្ម​បូម​ខ្សាច់​ចូល​ទៅ​ថវិកា​ជាតិ ក៏​មិន​មែន​ជា​កាតព្វកិច្ច​គណៈកម្មាធិការ​គ្រប់គ្រង​ធនធាន​ខ្សាច់​ដែល​មាន​លោក លឹម គានហោ ជា​រដ្ឋមន្ត្រី​ក្រសួង​ធនធាន​ទឹក ជា​ប្រធាន​នោះ​ដែរ។

​លិខិត​បំភ្លឺ​ដ៏​កម្រ​របស់​ក្រសួង​ធនធាន​ទឹក នៅ​ពេល​នេះ ធ្វើ​ឡើង​ហាក់​ស្រប​ពេល​ដែល​មាន​ការ​រិះគន់​ផ្ទួន​ពី​ពលរដ្ឋ​ដែល​បន្ទោស​ទៅ​ថ្នាក់ដឹកនាំ​ក្រសួង​ធនធាន​ទឹក ចេញ​អាជ្ញាប័ណ្ណ​ឲ្យ​ក្រុមហ៊ុន​ជា​ច្រើន​បូម​ខ្សាច់​ចេញ​ពី​ទន្លេ​ធ្វើ​ឲ្យ​បាក់​ច្រាំង​ទន្លេ ប៉ះពាល់​ផ្ទះ​របស់​ពលរដ្ឋ​រហូត​មាន​ករណី​ខ្លះ​ធ្លាក់​ទាំង​មនុស្ស​ស្លាប់​ក្នុង​ទន្លេ​ថែម​ទៀត។

​វិទ្យុ​អាស៊ីសេរី មិន​អាច​សុំ​ការ​បំភ្លឺ​បន្ថែម​ពី​អ្នក​នាំ​ពាក្យ​ក្រសួង​ធនធាន​ទឹក និង​ឧតុនិយម លោក ចាន់ យុត្ថា បាន​ទេ​នៅ​ថ្ងៃ​ទី​២៨ មករា ដោយ​លោក​ប្រាប់​ថា កំពុង​ជាប់​ប្រជុំ។

យ៉ាង​ណា​លោក លឹម គានហោ រដ្ឋមន្ត្រី​ក្រសួង​ធនធាន​ទឹក និង​ជា​ប្រធាន​គណៈកម្មាធិការ​គ្រប់គ្រង​ធនធាន​ខ្សាច់ ធ្លាប់​ប្រាប់​កាល​ពី​ថ្ងៃ​ទី​២៤ ធ្នូ ឆ្នាំ​២០១៤ ថា ការ​បូម​ខ្សាច់​ក្នុង​ទន្លេ​ទាំង​អស់​ជា​សកម្មភាព​ខុស​ច្បាប់។

​ប្រធាន​អង្គការ​សកម្មភាព​ដើម្បី​បរិស្ថាន​និង​សហគមន៍ លោកស្រី សរ សាត គិត​ថា ការ​បូម​ខ្សាច់​នៅ​កម្ពុជា ធ្វើ​ឡើង​យ៉ាង​គំហុក ដោយ​មិន​បាន​សិក្សា​ឲ្យ​បាន​ច្បាស់លាស់​ពី​ផល​ប៉ះពាល់​ជា​មុន​សិន​ទេ។ លោកស្រី​បន្ត​ថា ជីវចម្រុះ​ក្នុង​ទន្លេ​និង​ពលរដ្ឋ​ដែល​រស់​នៅ​តាម​ច្រាំង​ទន្លេ កំពុង​រងគ្រោះ​ពី​ការ​បូម​ខ្សាច់ ហើយ​ទាមទារ​ឲ្យ​រដ្ឋាភិបាល​ត្រូវ​យក​ចិត្ត​ទុក​បន្ថែម​ពី​ករណី​នេះ៖ «រដ្ឋាភិបាល​គួរ​គិត​រឿង​ហ្នឹង​ឲ្យ​បាន​ខ្លាំង ព្រោះ​ផលប្រយោជន៍​បុគ្គល ឬ​ក្រុម​មនុស្ស​មួយ ក្រុម​ធ្វើ​ឲ្យ​ប៉ះពាល់​ប្រយោជន៍​ពលរដ្ឋ ហើយ​ខ្លះ​ធ្វើ​ឲ្យ​ពលរដ្ឋ​ស្លាប់​ដោយ​ការ​បាក់​ច្រាំង​ចូល​ទន្លេ»

​កាល​ពី​ខែ​ធ្នូ ឆ្នាំ​២០១៤ លោក លឹម គានហោ ឲ្យ​ដឹង​ថា មាន​ក្រុមហ៊ុន​ថ្មី​ចន្លោះ​ពី​៣០ ទៅ ៤០ ដែល​បាន​ដាក់​ពាក្យ​សុំ​បើក​អាជីវកម្ម​បូម​ខ្សាច់​សា​ជា​ថ្មី ហើយ​ក្រសួង​កំពុងតែ​សិក្សា​ពី​រឿង​នេះ។

​កាល​ពី​ដើម​ខែ​មករា កន្លង​ទៅ​នេះ រដ្ឋមន្ត្រី​ក្រសួង​រ៉ែ​និង​ថាមពល លោក ស៊ុយ សែម ធ្លាប់​បញ្ជាក់​ថា តាំង​ពី​ឆ្នាំ​២០១១ មក អតីត​ក្រសួង​ឧស្សាហកម្ម​រ៉ែ​និង​ថាមពល បាន​លុប​អាជ្ញាប័ណ្ណ​បូម​ខ្សាច់​ទាំង​អស់​រួច​ហើយ។ ចំណែក​ក្រសួង​រ៉ែ​និង​ថាមពល ក៏​មិន​បាន​ចេញ​អាជ្ញាប័ណ្ណ​ឲ្យ​ក្រុមហ៊ុន ឬ​បុគ្គល​ណា​វិនិយោគ​បូម​ខ្សាច់​ដែរ។

​មាត្រា​៦ នៃ​អនុក្រឹត្យ​របស់​រដ្ឋាភិបាល​កាល​ពី​ខែ​កញ្ញា ឆ្នាំ​២០១៤ ស្ដីពី​ការ​កែ​សម្រួល​សមាសភាព និង​ការ​ប្រព្រឹត្ត​ទៅ​នៃ​គណៈកម្មាធិការ​គ្រប់គ្រង​ធនធាន​ខ្សាច់ បាន​ចែង​ថា បទល្មើស ឬ​ភាព​អនាធិបតេយ្យ​នៃ​ការ​ធ្វើ​អាជីវកម្ម​ខ្សាច់​កើត​មាន​នៅ​ក្នុង​រាជធានី ខេត្ត​ណា​នោះ អភិបាល​នៃ​គណៈ​អភិបាល​រាជធានី​ខេត្ត​នោះ ត្រូវ​ទទួល​ខុស​ត្រូវ​ទាំង​ស្រុក​ចំពោះ​មុខ​រាជ​រដ្ឋាភិបាល។ ប៉ុន្តែ​មិន​ដែរ ឃើញ​មាន​មន្ត្រី​រដ្ឋ​ណា​មួយ​ត្រូវ​រដ្ឋាភិបាល​ពិន័យ ឬ​ហៅ​មក​សួរ​នាំ​ពី​ការ​ផ្ដល់​ភ្លើង​ខៀវ​ឲ្យ​ក្រុមហ៊ុន ឬ​បុគ្គល​ឯកជន​មាន​សិទ្ធិ​បូម​ខ្សាច់​នៅ​មូលដ្ឋាន​របស់​ខ្លួន​នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល