ក្រសួង​រ៉ែ​អះអាង​ថា​ការ​បូម​ដី​ក្បែរ​សណ្ឋាគារ​សុខា​ភ្នំពេញ​មិន​មែន​បូម​ខ្សាច់​ទេ

ដោយ អ៊ុក សាវបូរី
2015-06-07
អ៊ីម៉ែល
មតិ
Share
បោះពុម្ព
សាឡង់​បូម​ដី​ល្បប់​នៅ​ច្រមុះ​ជ្រូក​ជ្រោយចង្វារ ក្បែរ​សណ្ឋាគារ​សុខា​ភ្នំពេញ កាល​ពី​ថ្ងៃ​ទី​១ ខែ​មិថុនា ឆ្នាំ​២០១៥។
សាឡង់​បូម​ដី​ល្បប់​នៅ​ច្រមុះ​ជ្រូក​ជ្រោយចង្វារ ក្បែរ​សណ្ឋាគារ​សុខា​ភ្នំពេញ កាល​ពី​ថ្ងៃ​ទី​១ ខែ​មិថុនា ឆ្នាំ​២០១៥។
RFA/Ouk Savborey

សកម្មភាព​ស្ដារ​ទន្លេ​ដើម្បី​បង្កើន​ជម្រៅ​ទឹក​សម្រាប់​ការ​បើកបរ​របស់​នាវា​ដឹក​ជញ្ជូន​ទំនិញ ឆ្លង​កាត់​ទីក្រុង​ភ្នំពេញ​ទៅ​ប្រទេស​ជិត​ខាង កំពុង​តែ​មាន​សកម្មភាព​នៅ​ទន្លេ​មេគង្គ ដោយ​អង្គភាព​កំពង់ផែ​ស្វយ័ត​ភ្នំពេញ។ ប៉ុន្តែ​នៅ​ទន្លេសាប​ជាប់​ច្រាំង​សណ្ឋាគារ​សុខា​ភ្នំពេញ មាន​ម៉ាស៊ីន​ខួង​ដី​នៅ​ច្រមុះ​ជ្រូក​ជ្រោយចង្វារ ច្រើន​គ្រឿង និង​មាន​កប៉ាល់​ដឹក​ជញ្ជូន​ដី​ចេញ​ដោយ​គ្មាន​ឡូហ្គោ (Logo) បំពាក់​របស់​អគ្គនាយកដ្ឋាន​កំពង់ផែ​ស្វយ័ត​ភ្នំពេញ​ទេ។ អ្នក​ដំណើរ​ឆ្លង​កាត់​មាត់​ទន្លេ​ឆ្ងល់​ពី​ករណី​បូម​ដី​នៅ​ជ្រោយចង្វារ នោះ ថា​អាច​ជា​រឿង​មិន​ស្រប​ច្បាប់។ ប៉ុន្តែ​សាលា​រាជធានី​ភ្នំពេញ អះអាង​ថា​ស្ដារ​កំណក​ដី​កុំ​ឲ្យ​បាក់​ច្រាំង។ ឯ​អ្នក​នាំ​ពាក្យ​ក្រសួង​រ៉ែ និង​ថាមពល បំភ្លឺ​ថា ក្រុមហ៊ុន​នោះ​គ្មាន​អាជ្ញាប័ណ្ណ​ពី​ក្រសួង​រ៉ែ ទេ។

រដ្ឋលេខាធិការ​ក្រសួង​រ៉ែ និង​ថាមពល លោក ឌិត ទីណា ឲ្យ​ដឹង​នៅ​ថ្ងៃ​សៅរ៍ ទី​៦ ខែ​មិថុនា ថា សកម្មភាព​ខួង​ដី​នៅ​ក្នុង​ទន្លេសាប​តំបន់​ជ្រោយ​ច្រមុះ​ជ្រូក ក្បែរ​សណ្ឋាគារ​សុខា​ភ្នំពេញ មិន​មែន​បូម​ខ្សាច់​ទេ ប៉ុន្តែ​ជា​ការ​បូម​កំណក​ដី។

លោក ឌិត ទីណា បន្ត​ថា ការ​បូម​ដី​នៅ​ក្នុង​ទន្លេសាប​តំបន់​ចុង​ជ្រោយចង្វារ ក្បែរ​សណ្ឋាគារ​សុខា​ភ្នំពេញ​នេះ ជា​របស់​ក្រុមហ៊ុន អេច្ឆ.ធី.ស៊ី (HTC)។ លោក​ថា ក្រុមហ៊ុន​នោះ​មិន​មែន​បូម​ខ្សាច់​ទេ គឺ​បំបែក​ដី​កំណក​នៅ​តំបន់​ចុង​ជ្រោយចង្វារ ក្នុង​សង្កាត់​ជ្រោយចង្វារ ដែល​វា​បង្ក​មក​ពី​ចរន្ត​ទឹក​ហូរ​នាំ​ឲ្យ​មាន​កំណក​ដី។ លោក​ថា កំណក​ដី​នោះ​ត្រូវ​សាលា​រាជធានី​ភ្នំពេញ ស្នើសុំ​ស្ដារ​ចេញ​ឲ្យ​បាន​មុន​រដូវ​ទឹក​ឡើង​ក្នុង​ពេល​ខាង​មុខ បង្ការ​កុំ​ឲ្យ​បាក់​ច្រាំង​ទន្លេ៖ «តែ​ឥឡូវ​នេះ​ដោយសារ​ស្ថានភាព​បន្ទាន់ កុំ​ឲ្យ​ទឹក​ឡើង​ទាន់​នោះ បាន​ជា​ចាប់​ធ្វើ​ឲ្យ​ហើយ។ បើ​សិន​ជា​យើង​ចាំ​រហូត​ដល់​ចាំ​បាន​អាជ្ញាប័ណ្ណ​បាន​ក្រដាស​ស្នាម​អី ស្រួល​បួល​ហើយ នោះ​វា​អាច​យឺត»

នៅ​ក្នុង​ទន្លេសាប​តំបន់​ចុង​ជ្រោយចង្វារ មាន​ម៉ាស៊ីន​ខួង​ដី ២​គ្រឿង ដែល​មាន​ក្បាល​បូម​៣ និង​ក្បាល​បូម​២ កំពុង​ខួង​ដី​ល្បប់​បង្ហូរ​ដាក់​កប៉ាល់​ច្រើន​គ្រឿង ដឹក​ជញ្ជូន​ចេញ​ពី​ជ្រោយចង្វារ ចាប់​ពី​ព្រលឹម​ដល់​ព្រលប់។

សកម្មភាព​នេះ ត្រូវ​បាន​អ្នក​នាំ​ពាក្យ​សាលា​រាជធានី​ភ្នំពេញ លោក ឡុង ឌីម៉ង់ ពន្យល់​ថា ក្រសួង​ធនធាន​ទឹក បាន​សិក្សា​ពី​កំណក​ដី​នៅ​ចុង​ជ្រោយចង្វារ​បង្ក​មក​ពី​របត់​ទឹក​ហូរ នាំ​ឲ្យ​មាន​កំណក​ដី​ធំ​ឡើងៗ​នៅ​ចុង​ច្រោយចង្វា​នោះ ដែល​វា​អាច​បង្ក​ឲ្យ​បាក់​ដី ប៉ះពាល់​ដល់​ច្រាំង​ទន្លេ​ក្នុង​រាជធានី​ភ្នំពេញ ទើប​សាលា​រាជធានី​ភ្នំពេញ​ប្រកាស​កាយ​យក​ល្បាប់​នេះ​ចេញ​បន្ទាន់ ដោយ​បាន​ស្នើសុំ​ក្រសួង​រ៉ែ និង​ថាមពល និង​ក្រសួង​ធនធាន​ទឹក រួម​ទាំង​ស្ថាប័ន​ពាក់ព័ន្ធ ជួយ​សហការ និង​ជួយ​ពិនិត្យ​ផល​ប៉ះពាល់​បរិស្ថាន និង​បច្ចេកទេស​បូម ដើម្បី​ការពារ​ច្រាំង​ទន្លេ។ លោក​បន្ត​ថា ដី​ដែល​ដឹក​ជញ្ជូន​ចេញ​ពី​ការ​បូម​ពី​ក្នុង​ទន្លេសាប​នោះ ប្រើ​សម្រាប់​ធ្វើ​សួនច្បារ​ក្នុង​រាជធានី​ភ្នំពេញ មិន​មែន​សម្រាប់​លក់​ដូរ​ទេ៖ «យើង​រៀបចំ​ធ្វើ​ម៉េច​ឲ្យ​បាញ់​ដី​ហ្នឹង ឬ​ក៏​យើង​ចាប់​យក​ដី​ហ្នឹង​ដើម្បី​កុំ​ឲ្យ​មក​នៅ​កក​ខាង​មុខ​ទៀត បម្រើ​ការ​ផល​ប្រយោជន៍​ផ្សេងៗ​ទាក់ទង​ការងារ​ធនធាន​ទឹក​វា​មួយ​ហើយ ប៉ុន្តែ​មួយ​ទៀត​ក៏​ទាក់ទង​នឹង​បញ្ហា​សោភណភាព​ក៏​ដូច​គ្នា​ដែរ ពីព្រោះ​វា​អត់​យក​ទៅ​ប្រើប្រាស់​អី​បាន​ទេ​ដី​ហ្នឹង»

បន្ថែម​លើ​នោះ អ្នក​នាំ​ពាក្យ​ក្រសួង​ធនធាន​ទឹក និង​ជា​សមាជិក​គណៈកម្មការ​ធនធាន​ខ្សាច់ លោក ចាន់ យុត្ថា ថ្លែង​ថា ដោយសារ​តែ​មាន​កំណក​ដី​នៅ​ចុង​ជ្រោយចង្វារ​ក្នុង​សង្កាត់​ជ្រោយចង្វារ ខណ្ឌ​ជ្រោយចង្វារ គឺ​បង្ក​មក​ពី​ចរន្ត​ខ្សែ​ទឹក​ហូរ និង​លក្ខណៈ​រូបសាស្ត្រ​នៃ​ទន្លេ បាន​បង្កើត​ជា​កំណក​ដី​ក្នុង​តំបន់​ជ្រោយ​ទន្លេសាប។ លោក​ថា កំណក​ដី​កាន់​តែ​ធំ​ឡើង​រហូត​មាន​ផ្ទៃ​ក្រឡា​ដី​គោក​ជាង ១៤​ហិកតារ និង​ដី​ទឹក​ជាង ៣៩​ហិកតារ គិត​សរុប​ដី​កំណក​នោះ​មាន​ទំហំ​ជាង ៥៣​ហិកតារ ជា​ទំហំ​ធំ​ដែល​វា​អាច​បង្ក​ការ​ប៉ះពាល់​ធ្ងន់​ដល់​ជលសាស្ត្រ​ផង គន្លង​ផ្លូវ​នាវាចរ​ផង និង​អាច​បង្ក​ឲ្យ​ច្រាំង​ទន្លេ​បាក់​ផង ទើប​ក្រសួង​ធនធាន​ទឹក ស្នើសុំ​ឲ្យ​សាលា​រាជធានី​ភ្នំពេញ​សុំ​បូម​ស្ដារ​យក​ដី​ល្បាប់​នោះ​ចេញ​ឲ្យ​បាន​មុន​រដូវ​ទឹក​ឡើង៖ «ហើយ​ក្រសួង​ធនធាន​ទឹក យើង​ក៏​បាន​សិក្សា​អំពី​បទដ្ឋាន​បច្ចេកទេស ដែល​ត្រូវ​យក​ដី​ល្បប់ ដែល​នៅ​កក​នៃ​ចុង​ជ្រោយចង្វារ​ហ្នឹង ហើយ​យើង​ផ្ញើ​ជូន​បទដ្ឋាន​បច្ចេកទេស​ដែល​ត្រូវ​ស្ដារ​នេះ ដែល​ត្រូវ​បូម ឬ​ក៏​ត្រូវ​កាយ​យក​ចេញ​នេះ ទៅ​សាលា​រាជធានី​ភ្នំពេញ​ហើយ ហើយ​ការ​គ្រប់គ្រង​ការ​ចាត់​ចែង​យ៉ាង​ណាៗ គឺ​សាលា​រាជធានី​ភ្នំពេញ​អ្នក​អនុវត្ត»

ដើម្បី​ជំនួយ​ក្នុង​ការ​បូម​ស្ដារ​កំណក​ដី​តំបន់​ចុង​ជ្រោយចង្វារ​ឲ្យ​ស្រប​ច្បាប់ ក្រសួង​រ៉ែ និង​ថាមពល កំពុង​រៀបចំ​ពិនិត្យ​មើល​ឯកសារ​ស្នើសុំ​អាជ្ញាប័ណ្ណ​របស់​ក្រុមហ៊ុន អេច្ឆ.ធី.ស៊ី នោះ បង្ការ​កុំ​ឲ្យ​មាន​ការ​ចោទ​ថា បូម​ខ្សាច់​ធ្វើ​អាជីវកម្ម។ លោក ឌិត ទីណា បន្ត​ថា តាម​ទំហំ​កំណក​ដី​នៅ​ចុង​ជ្រោយ​នោះ ការ​បូម​យក​ដី​ចេញ​អាច​មាន​រយៈពេល​ដល់​ទៅ ១​ឆ្នាំ។ លោក​ថា ការ​អនុញ្ញាត​ឲ្យ​ក្រុមហ៊ុន​នោះ​បូម​ស្ដារ​ល្បាប់ គឺ​ចាប់​ពី​ម៉ោង ៦​ព្រឹក ដល់​ម៉ោង ៦​ល្ងាច។ ភាគី​ក្រុមហ៊ុន​ត្រូវ​គោរព​តាម​លក្ខខណ្ឌ​បច្ចេកទេស ដែល​បាន​កំណត់​ដោយ​ក្រសួង​ធនធាន​ទឹក និង​ឧតុនិយម និង​ក្រសួង​រ៉ែ និង​ថាមពល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល