Photo Provided
ប្រជាពលរដ្ឋរាប់រយគ្រួសារនៅតំបន់បឹងទន្លេសាបក្នុងស្រុកឯកភ្នំ ខេត្តបាត់ដំបង កំពុងប្រឈមនឹងការដាច់ស្បៀង ដោយសារឆ្នាំនេះគ្មានទឹកនេសាទត្រី ដើម្បីរកប្រាក់ចំណូលដោះស្រាយជីវភាពគ្រួសារបានដូចឆ្នាំមុនៗ។ ពួកគាត់អះអាងថា សព្វថ្ងៃអ្នកភូមិខ្លះបានចាកចេញពីស្រុកកំណើតបណ្ដើរៗហើយ ដើម្បីទៅស្វែងរកការងារនៅក្រៅប្រទេស និងតំបន់ផ្សេង។
ប្រជាពលរដ្ឋនៅតំបន់បឹងទន្លេសាប ស្រុកឯកភ្នំ លើកឡើងថា សព្វថ្ងៃអ្នកនេសាទខ្លះ បានដាច់ស្បៀងបណ្ដើរៗ និងខ្លះទៀត រកប្រាក់ចំណូលបានចន្លោះពី៥ពាន់ទៅ ៣ម៉ឺនរៀល ក្នុងមួយថ្ងៃ ដោយសារគ្មានទឹកនេសាទ។
ប្រជាពលរដ្ឋម្នាក់ថ្លែងមិនហ៊ានបញ្ចេញឈ្មោះរស់នៅភូមិក្បាលតោល ឃុំកោះជីវាំង ប្រាប់អាស៊ីសេរីនៅថ្ងៃទី១៤ កក្កដាថា ចាប់តាំងពីចុងខែឧសភាមក គឺគ្រួសាររបស់លោកនេសាទត្រីរកប្រាក់ចំណូលបានពី ៥ពាន់រៀលទៅជាង ១ម៉ឺនរៀល ហើយថ្ងៃខ្លះនេសាទមិនបានត្រីលក់ក៏មាន។ លោកបន្តថា ពលរដ្ឋនៅក្នុងភូមិរបស់លោកបាននាំគ្នាស្វែងរកតំបន់នេសាទស្ទើរគ្រប់ទីកន្លែង ដើម្បីរកប្រាក់ចំណូលដោះស្រាយជីវភាពប្រចាំថ្ងៃ ប៉ុន្តែនៅតែរកត្រីមិនបាន ដោយសារទឹកបឹងទន្លេសាបនៅកន្លែងខ្លះបានរីងហួតហែង ធ្វើឱ្យគ្មានកន្លែងនេសាទ៖ «អ្នកខ្លះស៊ីឈ្នួលឱ្យគេនៅតំបន់បឹងទន្លេសាប ហើយគ្រួសារខ្លះទៅនេសាទបានត្រីបន្តិចៗចិញ្ចឹមខ្លួនប្រចាំថ្ងៃ ហើយគ្រួសារខ្លះធ្វើចំណាកស្រុកឆ្ងាយ ដើម្បីទប់ទល់ការអត់ឃ្លាន។ តាំងពីអតីតកាលមក ឆ្នាំមុនគ្រាន់ទឹកឡើងមកមានត្រីរកគ្រាន់ជាងឆ្នាំនេះ ហើយអ្នកដែលត្រៀមឧបករណ៍សម្រាប់នេសាទក្នុងរដូវនេះ អត់បាននេសាទទេ ត្រូវទុកឧបករណ៍មួយរយៈសិន ហើយត្រូវទៅធ្វើការងារផ្សេងទៀត ដើម្បីរកប្រាក់»។
អនុប្រធានភូមិក្បាលតោល លោក ឡេង ខេង ប្រាប់អាស៊ីសេរីថា ប្រជាពលរដ្ឋក្នុងភូមិរបស់លោកចាប់ផ្ដើមដាច់ស្បៀងបណ្ដើរៗ ហើយ ដោយសារនេសាទត្រីមិនបានប្រាក់ចំណូល ព្រោះពួកគាត់ពឹងផ្អែកទាំងស្រុងទៅលើរបរនេសាទត្រី ហើយគ្មានរបរផ្សេងក្រៅពីនេះឡើយ។លោកបន្តថា គិតត្រឹមខែកក្កដានេះ យ៉ាងហោចណាស់ពលរដ្ឋដែលពេញកម្លាំងធ្វើការប្រមាណ ៤០០នាក់ ក្នុងចំណោមពលរដ្ឋជាង ៨០០គ្រួសារ ដែលបានចាកចេញពីភូមិកំណើតទៅធ្វើការនៅតំបន់ផ្សេងនោះ៖ «ទីមួយឆ្នាំនេះរាំងខ្លាំង ទី២ទឹកឡើងខុសរដូវ ដែលជាទូទៅថ្ងៃទី១៥ ខែមិថុនាមានទឹកហើយ តែចំឡែកឆ្នាំនេះ ថ្ងៃទី១៤ កក្កដាហើយ តែគ្មានទឹកទេ គឺគោកស្ញេញបណ្ដោយ ហើយទៅកណ្ដាលទន្លេរកបានតិចតួចណាស់ព្រោះរីងអស់ទឹក។ ទី៣ ច្បាប់រដ្ឋបិទរដូវនេសាទផង អីចឹងពលរដ្ឋនេសាទលក្ខណៈគ្រួសារអត់បានទេស្ទើរតែដាច់បាយហើយ»។
លោកបន្តថាមានកត្តា ២យ៉ាង ដែលពលរដ្ឋធ្វើចំណាកស្រុក ទី១ គឺពួកគាត់បាត់បង់ប្រាក់ចំណូលដោយសារនេសាទត្រីមិនបាន និងទី២ ដោយសារពួកគាត់គ្មានការងារធ្វើនៅក្នុងមូលដ្ឋាន ហើយពលរដ្ឋមួយចំនួនទៀតក៏នឹងត្រៀមចាកចេញទៅរកការងារធ្វើនៅតំបន់ផ្សេងដែរ។
ឆ្លើយតបនឹងបញ្ហានេះអភិបាលស្រុកឯកភ្នំ លោក ម៉ិល សុផល ប្រាប់អាស៊ីសេរីថា អាជ្ញាធរភូមិបានរាយការណ៍បញ្ហានេះជូនលោករួចហើយ ហើយលោកក៏បានបញ្ជូនរបាយការណ៍នោះបន្តទៅអភិបាលខេត្តបាត់ដំបងរួចហើយដែរ ដើម្បីដោះស្រាយជូនពលរដ្ឋ។ លោកបញ្ជាក់ថា អាជ្ញាធរខេត្តកំពុងរិះរកវិធានការជួយដល់ពលរដ្ឋហើយ៖ «អីចឹងចាំមើលការដោះស្រាយយ៉ាងម៉េចចាំស្ដាប់គោលការណ៍ ហើយរាយការណ៍ជូនក្រុមការងារបន្ថែមទៀត ដើម្បីអំពាវនាវរកជាស្បៀងសម្រាប់ជួយពួកគាត់ បាទយើងបានរៀបចំមួយជំហានហើយ ឱ្យលោកមេភូមិស្រង់មក។ខ្ញុំនឹងចុះពិនិត្យជាក់ស្ដែងបន្ថែមទៀត ដោយសារការងារច្រើនណាស់ ហើយធ្វើដំណើរពីសាលាស្រុកទៅតាមផ្លូវទឹកចំងាយ ១០០គីឡូម៉ែត្រ អីចឹងយើងលំបាកក្នុងធ្វើដំណើរ»។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបង លោក យិន ម៉េងលី លើកឡើងថា បញ្ហានេះអាជ្ញាធរពាក់ព័ន្ធត្រូវដោះស្រាយជាបន្ទាន់ ដោយមិនត្រូវរង់ចាំអូសបន្លាយពេលយូរទៅមុនទៀតនោះទេ ព្រោះជាទុក្ខលំបាករបស់ពលរដ្ឋដែលកំពុងប្រឈម៖ «ខ្ញុំគិតថាបញ្ហាអ្វីក៏ដោយមានមធ្យោបាយដោះស្រាយ សំខាន់បញ្ហាទាំងអស់នោះយើងមានឆន្ទៈក្នុងការដោះស្រាយទេ ឬបញ្ហាទាំងអស់នោះអាជ្ញាធរបានរាយការណ៍ឱ្យប្រមុខរដ្ឋាភិបាលបានដឹងទេ ឬក៏បញ្ហាទាំងអស់នោះអាជ្ញាធរនៅមូលដ្ឋានបិតបាំងមិនឱ្យថ្នាក់លើដឹង ដើម្បីកុំឱ្យមានការស្ដីបន្ទោសឬប្រឈមបញ្ហាផ្សេងៗ។ អីចឹងខ្ញុំគិតបញ្ហានេះត្រូវតែរាយការណ៍ជាបន្ទាន់តាមឋានានុក្រមពីក្រោម ដើម្បីជួយដល់ជីវភាពរបស់ពលរដ្ឋ»។
តំបន់បឹងទន្លេសាបនៅស្រុកឯកភ្នំ មានប្រជាពលរដ្ឋពីរឃុំរស់នៅ គឺឃុំព្រៃចាស់ និងឃុំកោះជីវាំង ដែលមានចំនួនរាប់ពាន់គ្រួសារ។ ពលរដ្ឋរស់នៅពឹងផ្អែកទាំងស្រុកទៅលើរបរនេសាទ ដោយមិនមានដីស្រែសម្រាប់ដាំដុះ និងប្រកបមុខរបរផ្សេង ដូចប្រជាពលរដ្ឋនៅតំបន់ដទៃនោះទេ។ លោក យិន ម៉េងលី កត់សម្គាល់ថា ប្រជាពលរដ្ឋនេសាទរកប្រាក់ចំណូលមិនបាន ដោយសារការនេសាទខុសច្បាប់របស់អ្នកមានលុយ និងមានអំណាចមួយចំនួននៅតំបន់នោះ និងបញ្ហាភ្លើងឆេះព្រៃលិចទឹក ដែលធ្វើឱ្យបាត់បង់ដល់ជម្រកត្រីតំបន់បឹងទន្លេសាប។ លោកបន្ថែមថា បញ្ហានេះអាចនឹងប៉ះពាល់ដល់ការរកចំណូលរបស់ពលរដ្ឋកាន់តែខ្លាំងឡើង ប្រសិនបើអាជ្ញាធរពាក់ព័ន្ធមិនដោះស្រាយឱ្យបានឆាប់ទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
