ខ្យល់កន្ទ្រាក់ និងភ្លៀងមួយមេធំបានបោកបក់មកត្រូវលំនៅឋានប្រជាពលរដ្ឋនៅភូមិកក់ ឃុំកិចុង ស្រុកបរកែវ ខេត្តរតនគិរី បណ្ដាលឲ្យរលំផ្ទះ សាលារៀន បាក់ដើមឈើ បង្គោលអគ្គិសនី និងរងរបួសកូនចៅប្រជាពលរដ្ឋដែលព្យាយាមរត់រកកន្លែងសុវត្ថិភាពជ្រកពួន។
ក្រុមមន្ត្រីមូលដ្ឋានបានចុះសង្គ្រោះប្រជាពលរដ្ឋរងរបួសបញ្ជូនទៅមន្ទីរពេទ្យភ្លាមៗ បន្ទាប់ពីខ្យល់បានស្ងប់ស្ងាត់។
កុមារអាយុពី ៥ឆ្នាំ ដល់ ១៥ឆ្នាំចំនួន ៤នាក់ រងរបួសធ្ងន់ ត្រូវបញ្ជូនទៅមន្ទីរពេទ្យបង្អែកខេត្តរតនគិរី បន្ទាប់ពីខ្យល់កន្ទ្រាក់បោកបក់ត្រូវលំនៅឋានអ្នកភូមិកក់ កាលពីរសៀលម៉ោង៣ ថ្ងៃទី២០ ខែមិថុនា។
ប្រជាពលរដ្ឋភូមិកក់ លោក រចំ យើ បញ្ជាក់ថា នេះជាបាតុភូតធម្មជាតិ ភ្លៀងរួមទាំងខ្យល់បានបោកបក់កួចរំលំផ្ទះ និងដំបូលផ្ទះអ្នកភូមិជាលើកដំបូងមិនធ្លាប់មាន ខណៈប្រជាពលរដ្ឋកំពុងរស់នៅជាធម្មតានៅតាមលំនៅឋានក្នុងភូមិស្រុករបស់ខ្លួន។ លើសពីនោះទៀត កុមារកំពុងរត់លេងក្នុងភូមិប្រឈមទៅនឹងគ្រោះថ្នាក់ដោយសារដំបូលផ្ទះប្រជាពលរដ្ឋប្រាក់ស័ង្កសីត្រូវខ្យល់កួចប៉ើងតាមខ្យល់សង្កត់មកលើកុមារដែលកំពុងរត់រកកន្លែងជ្រកពួនបណ្ដាលឲ្យកុមារខ្លះបែកក្បាលត្រូវដៃជើងរបួសធ្ងន់ និងស្រាល៖ «ដំបូលផ្ទះគេប៉ើង ប្អូនខ្ញុំកំពុងឡើងផ្ទះខ្យល់បក់ប៉ះឈើ ឈើប៉ើងពីផ្ទះគេចំប្អូនខ្ញុំ។ នៅផ្ទះហ្នឹង ៤នាក់ របួសទាំងអស់គ្នា»។
គ្រូបង្រៀនសាលាបឋមសិក្សាភូមិកក់ ឈ្មោះ ស្រ៊ុន សារ៉ាត បញ្ជាក់ថា លោកបានជម្លៀសសិស្សឲ្យចេញទៅផ្ទះ ខណៈមេឃងងឹត និងមានខ្យល់បោកបក់ខ្លាំង។ លោកថា សាលារៀនមួយខ្នងដែលធ្វើពីឈើប្រក់ស័ង្កសី នៅភូមិកក់ ត្រូវខ្យល់កួចធ្លាក់បែកបាក់ខ្ទេចខ្ទីនៅទីវាលចម្ងាយ ៣០ម៉ែត្រ បន្សល់ចោលតុកៅអីសិស្សនៅទីតាំងចាស់ បន្ទាប់ពីសិស្សចាកចេញផុត៖ «បង្រៀនៗមេឃងងឹតរកភ្លៀង ខ្ញុំឲ្យក្មេងចេញសម្រាក។ ពេលក្មេងចេញផុតបន្តិច មកតែម្ដងលើកទៅទាំងអស់។ លើកផុតពីហ្នឹងទៅបាក់ចោលក្នុងព្រៃ។ តុអត់ស្អីនៅស្អាតទាំងអស់»។
តួលេខបណ្ដោះអាសន្នរបស់អាជ្ញាធរភូមិកក់ នៅក្នុងហេតុការណ៍ខ្យល់កន្ទ្រាក់នេះ កុមារបួននាក់រងរបួស ផ្ទះចំនួន ៣៨ខ្នងខូចខាត ខ្លះរបើកដំបូល ខ្លះដួលរលំទាំងស្រុង។ ក្នុងនោះដែរ សាលារៀនមួយខ្នងរលំខ្ទេចខ្ទីអស់ទាំងស្រុង បង្គោលបណ្ដាញអគ្គិសនីក្នុងភូមិបាក់រលំ បាក់ដើមចន្ទីអ្នកភូមិ ១៧គ្រួសារ និងបាក់ដើមឈើតូចធំក្នុងភូមិប្រមាណ ១០ដើម។
មេឃុំកិចុង លោក រចំ ឡៃ មានប្រសាសន៍ថា អាជ្ញាធរមូលដ្ឋានចាត់វិធានការសង្គ្រោះបន្ទាន់ដឹកជញ្ជូនកុមាររងរបួសទៅមន្ទីរពេទ្យ។ ដោយឡែកអាជ្ញាធរឃុំចុះពិនិត្យការខូចខាតជាក់ស្ដែង ដើម្បីធ្វើរបាយការណ៍ជូនអាជ្ញាធរខេត្តសុំជំនួយមនុស្សធម៌ផ្ដល់ឲ្យជនរងគ្រោះក្នុងគ្រោះមហន្តរាយនេះ៖ «ទាំងខេត្តទាំងស្រុកយើង ហើយទាំងថ្នាក់ជាតិ ខ្ញុំសុំអំពាវនាវឲ្យចុះមកជួយ ជាពិសេសសាលារៀន ខ្ញុំសុំអំពាវនាវឲ្យក្រុមហ៊ុន លោកឧកញ៉ា ឲ្យជួយសាងសង់សាលារៀនឲ្យកូនសិស្សបានរៀនវិញ»។
នៅព្រឹកថ្ងៃទី២១ ខែមិថុនា មន្ត្រីកាកបាទក្រហមខេត្តរតនគិរី និងកងកម្លាំងប្រដាប់អាវុធនគរបាល កងរាជអាវុធហត្ថខេត្តរតនគិរី បានទៅពិនិត្យកន្លែងកើតហេតុដើម្បីស្រង់តួលេខការខូចខាតទ្រព្យសម្បត្តិ ផ្ទះសម្បែងប្រជាពលរដ្ឋ។
តំណាងប្រធានសាខាកាកបាទក្រហមខេត្តរតនគិរី លោក ឌឹម ណាត ថ្លែងបញ្ជាក់ថា បន្ទាប់ពីស្រង់ទិន្នន័យការខូចខាតផ្ទះសម្បែង និងទ្រព្យសម្បត្តិប្រជាពលរដ្ឋ សាខាកាកបាទក្រហមនឹងរៀបចំជំនួយឧបត្ថម្ភ មានស្បៀងអាហារ គ្រឿងប្រើប្រាស់ជូនជនរងគ្រោះដើម្បីបន្ធូរបន្ថយការខ្វះខាត។ បន្ថែមលើនេះទៀត សាខាកាកបាទក្រហមខេត្តនឹងធ្វើរបាយការណ៍សុំជំនួយបន្ថែមពីកាកបាទក្រហមជាតិ ជួយបំពេញការខ្វះខាតជនរងគ្រោះជាបន្ត៖ «ខ្ញុំមកនេះដើម្បីអង្កេតមើលពីស្ថានភាពប្រជាជនដែលរងគ្រោះដោយខ្យល់កន្ទ្រាក់កាលពីល្ងាច រសៀលថ្ងៃទី២០ ដើម្បីវាយតម្លៃពីកម្រិតការខូចខាត។ នៅរសៀលនេះយើងនឹងរៀបចំផ្ដល់ជំនួយមនុស្សធម៌»។
ចាប់ពីដើមឆ្នាំ២០១៦ រហូតបច្ចុប្បន្ន តួលេខរបស់កាកបាទក្រហមខេត្តរតនគិរី មានផ្ទះប្រជាពលរដ្ឋប្រមាណ ២០០ផ្ទះ ត្រូវខូចខាត និងដួលរលំដោយបាតុភូតខ្យល់កន្ទ្រាក់នៅរដូវវស្សាឆ្នាំនេះ។ កាលពីខែចុងខែមេសា ដើមកៅស៊ូជាង ១០ហិកតារនៅភូមិជ្រុង ឃុំកក់ ស្រុកបរកែវ ត្រូវបាក់រលំដោយសារខ្យល់កន្ទ្រាក់នេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។